പുതുപ്പള്ളി ഗ്രാമപഞ്ചായത്ത് ഏപ്രിൽ നാലിന് അധ്യാപക ബാങ്ക് ആഡിറ്റോറിയത്തിൽ നടത്താനിരുന്ന സൗജന്യ കണ്ണട വിതരണം മാറ്റി വെച്ചു. പുതിയ തീയതി പിന്നീട് അറിയിക്കുമെന്ന് പ്രസിഡന്റ് നിബു ജോൺ അറിയിച്ചു

ബീഡി-ചുരുട്ട് തൊഴിലാളി ക്ഷേമ പദ്ധതിയിൽ ഫെബ്രുവരി വരെ അംശദായം അടച്ച തൊഴിലാളികൾക്ക് പൂരക വേതനം അനുവദിക്കുന്നതിനായി  അവരുടെ പേര് വിവരം, ക്ഷേമനിധി അംഗത്വ നമ്പർ, ബാങ്ക് അക്കൗണ്ട് നമ്പർ, ഐ എഫ് എസ് സി കോഡ്, ആധാർ നമ്പർ എന്നിവ ബന്ധപ്പെട്ട സ്ഥാപന ഉടമകളുടെ സാക്ഷ്യപത്രം ഉൾപ്പെടെ ഏപ്രിൽ 20 നകം  beedi.worker@gmail.com  ലേക്ക് സമർപ്പിക്കേണ്ടതാണ്.
പി.എൻ.എക്സ്.1316/2020

കോവിഡ് 19 ജാഗ്രതാക്കാലത്തും സുരക്ഷിത മാർഗങ്ങളിലൂടെ മാലിന്യശേഖരണത്തിനും സംസ്‌കരണത്തിനും ഫലപ്രദമായ നടപടികളുമായി ഹരിതകേരളം മിഷൻ. കൊറോണ വൈറസ് രോഗബാധയുടെ വ്യാപനത്തെത്തുടർന്ന് സംസ്ഥാനത്ത് മാലിന്യ നീക്കവും സംസ്‌കരണവും ഭാഗികമായി തടസ്സപ്പെട്ടിരിക്കുന്ന സാഹചര്യത്തിലാണ് തദ്ദേശസ്ഥാപനങ്ങളുമായി ചേർന്ന് ഹരിതകേരളം മിഷൻ പ്രവർത്തനങ്ങൾ ഏകോപിപ്പിക്കുന്നത്. പ്രത്യേക പരിശീലനം നൽകിയ ഹരിതകർമ്മ സേനാംഗങ്ങളാണ് മാലിന്യ ശേഖരണം നടത്തുന്നത്.

സംസ്ഥാനത്തിന്റെ വികസനപ്രവർത്തനങ്ങളുടെ ധനശേഖരണാർഥം 6000 കോടി രൂപയുടെ കടപ്പത്രം പുറപ്പെടുവിക്കുന്നു. ഇതിനായുള്ള ലേലം ഏപ്രിൽ ഏഴിന് റിസർവ് ബാങ്കിന്റെ മുംബൈ ഫോർട്ട് ഓഫീസിൽ ഇ-കുബേർ സംവിധാനം വഴി നടക്കും. ലേലം സംബന്ധിച്ച വിജ്ഞാപനത്തിനും (നമ്പർ: എസ്.എസ്-1/106/2020, എസ്.എസ്-1/107/2020, എസ്.എസ്-1/108/2020 ഫിൻ. തിയതി 01.04.2020) വിശദാംശങ്ങൾക്കും ധനവകുപ്പിന്റെ വെബ്സൈറ്റ്    (www.finance.kerala.gov.in) സന്ദർശിക്കുക.
പി.എൻ.എക്സ്.1314/2020

പായിപ്പാട്ടെ അതിഥി തൊഴിലാളികള്‍ക്ക് ജില്ലാ ഭരണകൂടത്തിന്‍റെ നേതൃത്വത്തില്‍ ഭക്ഷ്യവസ്തുക്കള്‍ വിതരണം ചെയ്തു തുടങ്ങി. 

ആദ്യ ദിവസമായ ഇന്നലെ 65 ക്യാമ്പുകളിലെ തൊഴിലാളികള്‍ക്കായി അഞ്ച് മെട്രിക് ടൺ അരിയും 1155 കിലോ വീതം സവാളയും ഉരുളക്കിഴങ്ങും 140 കിലോ പച്ചമുളകുമാണ് വിതരണം ചെയ്തത്. അരി കണ്‍സ്യൂമര്‍ഫെഡും മറ്റിനങ്ങള്‍ ഹോര്‍ട്ടികോര്‍പ്പും ലഭ്യമാക്കി.

 അസിസ്റ്റന്‍റ് കളക്ടര്‍ ശിഖ സുരേന്ദ്രന്‍റെ നേതൃത്വത്തില്‍ ആര്‍.ഡി.ഒ ജോളി ജോസഫ്, തഹസില്‍ദാര്‍ ജിനു പുന്നൂസ്, ഗ്രാമപഞ്ചായത്ത് സെക്രട്ടറി സജിത്ത് എന്നിവര്‍ വിതരണത്തിന്‍റെ മേല്‍നോട്ടം വഹിച്ചു. 

-
കൊറോണ പ്രതിരോധത്തിന്‍റെ ഭാഗമായുള്ള നിയന്ത്രണങ്ങള്‍ നിലനില്‍ക്കുന്ന സാഹചര്യത്തില്‍ സംസ്ഥാന സര്‍ക്കാര്‍ പ്രഖ്യാപിച്ച സൗജന്യ റേഷന്‍ ആദ്യ ദിനമായ ഇന്നലെ വാങ്ങിയത്  83509 കാര്‍ഡുടമകള്‍.

 ജില്ലയില്‍ ആകെ 514568 കാര്‍ഡുടമകളാണുള്ളത് .951  റേഷന്‍ കടകളിലൂടെ 13906 ക്വിന്‍റല്‍ അരിയും 1582 ക്വിന്‍റല്‍ ഗോതമ്പുമാണ് ഇന്നലെ വിതരണം ചെയ്തത്. 

ആരോഗ്യ വകുപ്പിന്‍റെ നിർദ്ദേശങ്ങൾ പാലിച്ചാണ് റേഷൻ കടകളിൽ ഭക്ഷ്യധാന്യ വിതരണം നടത്തുന്നത്. ഒരു മീറ്റർ അകലം പാലിച്ച് ഒരേ സമയം അഞ്ചു പേരിൽ കൂടുതൽ ക്യൂവിൽ വരാത്ത വിധമാണ്  ക്രമീകരണം.

ജില്ലയിലെ അതിഥി തൊഴിലാളികളുടെ ക്ഷേമം ഉറപ്പാക്കുന്നതിനുള്ള പ്രവര്‍ത്തനങ്ങളുടെ ഭാഗമായി കളക്ടറേറ്റില്‍ ജില്ലാതല കണ്‍ട്രോള്‍ റൂം തുറന്നു. ഫോണ്‍ നമ്പരുകള്‍- 9497713705, 0481 2562650

------
ജില്ലയില്‍ കൊറോണ നിരീക്ഷണത്തില്‍ കഴിയുന്നവര്‍ ആരൊക്കെ? അവര്‍ ഏത് മേഖലകളില്‍? ഏറ്റവുമൊടുവില്‍ നിരീക്ഷണത്തില്‍ പ്രവേശിപ്പിക്കപ്പെട്ടത് ആര്?  ഓരോരുത്തരുടെയും ഇന്നത്തെ സ്ഥിതി എന്ത്..? പഴുതുകളടച്ചുള്ള പ്രതിരോധം ഉറപ്പാക്കാന്‍ ജാഗ്രത പുലര്‍ത്തുന്ന കോട്ടയം ജില്ലാ ഭരണകൂടത്തിനും ആരോഗ്യ വകുപ്പിനും ഈ വിവരങ്ങളെല്ലാം കണ്ടെത്താന്‍ വേണ്ടത് ഏതാനും നിമിഷങ്ങള്‍ മാത്രം.