ജില്ലയില്‍ ലോക്ക് ഡൗണ്‍ നിര്‍ദ്ദേശങ്ങള്‍ ലംഘിച്ചതിന് രണ്ടു ദിവസത്തിനിടെ(മാര്‍ച്ച് 30, 31) 550 കേസുകള്‍ രജിസ്റ്റര്‍ ചെയ്യുകയും 450 പേരെ അറസ്റ്റ് ചെയ്യുകയും ചെയ്തു. 411 വാഹനങ്ങള്‍ പിടിച്ചെടുത്തു. അനാവശ്യമായി കൂട്ടംകൂടിയതിന് എടുത്ത 12 കേസുകളും കടയുടമകള്‍ക്കെതിരെ എടുത്ത നാലു കേസുകളും അതിഥി തൊഴിലാളികളുടെ താമസസ്ഥലത്തേക്കുള്ള വൈദ്യുതിബന്ധം വിച്ഛേദിച്ചതിനുള്ള ഒരു കേസും ഇതില്‍ ഉള്‍പ്പെടുന്നു. 

അതിഥി തൊഴിലാളികളുടെ താമസസ്ഥലത്തേക്കുള്ള വൈദ്യുതിബന്ധം വിച്ഛേദിച്ചതിനു പന്തളം പോലീസ് വീണ്ടും കേസ് രജിസ്റ്റര്‍ ചെയ്തു. പന്തളം മുട്ടാര്‍, കളീക്കല്‍ പുത്തന്‍വീട്ടില്‍ ലുബൈന അഹമ്മദ് (61), മകന്‍ ഷമീം, മരുമകള്‍ ബിസ്മി ഷഫ്‌ന എന്നിവര്‍ക്കെതിരെയാണ് കേസെടുത്തത്. ലുബൈനയുടെ ഉടമസ്ഥതയിലുള്ള ലോഡ്ജ് മുറികളിലായി താമസിച്ച് വന്ന 53 അതിഥി തൊഴിലാളികള്‍ക്കുള്ള വൈദ്യുതിബന്ധമാണ് വിച്ഛേദിച്ചത്. കേസ് എടുത്തതിനെ തുടര്‍്ന്ന്  നഗരസഭാ അധികൃതരും പോലീസും ചേര്‍ന്ന്  വൈദ്യുതിബന്ധം പുനഃസ്ഥാപിച്ചു.

കോവിഡ് 19 ലോക്ക്ഡൗണ്‍ കാലയളവില്‍ സംസ്ഥാന സര്‍ക്കാര്‍ ഉടമസ്ഥതയിലുള്ള ഹോര്‍ട്ടികോര്‍പ്പ്  റാന്നിതാലൂക്ക് ആശുപത്രിക്ക് സമീപമുള്ള കാര്‍ഷിക വിപണിയില്‍ പച്ചക്കറി ചില്ലറ വില്‍പ്പന കേന്ദ്രം ആരംഭിച്ചതായി രാജു എബ്രഹാം എം എല്‍ എ, വിപണി പ്രസിഡന്റ് ജിജു കല്ലറ വാഴയ്ക്കല്‍ എന്നിവര്‍ അറിയിച്ചു. പച്ചമുളക് 36 രൂപ, തക്കാളി 40, ചേന 33, കാച്ചില്‍ 60, പയര്‍ 45, പാവയ്ക്ക 56, ഉരുളക്കിഴങ്ങ് 48, സവാള 38 എന്നിങ്ങനെയാണ് വില നിലവാരം.

തദ്ദേശ സ്വയംഭരണസ്ഥാപനങ്ങള്‍ സര്‍ക്കാര്‍ നിര്‍ദ്ദേശിച്ചിരിക്കുന്ന പന്ത്രണ്ടിന പരിപാടികള്‍കൂടി ഉള്‍പ്പെടുത്തി പ്രോജക്ട് നല്‍കിയാലേ ഡി പി സി അംഗീകരിക്കുകയുള്ളു എന്ന് ജില്ലാ പഞ്ചായത്ത് പ്രസിഡന്റും ഡി പി സി ചെയര്‍പേഴ്സണുമായ അന്നപൂര്‍ണാ ദേവി പറഞ്ഞു. പഞ്ചായത്ത് പ്രസിഡന്റിന്റെ ചേംബറില്‍ ചേര്‍ന്ന ഡിപിസി യില്‍ സംസാരിക്കുകയായിരുന്നു അദ്ദേഹം. കോവിഡ് 19-ന്റെ പശ്ചാത്തലത്തില്‍ സാമൂഹിക അകലം പാലിച്ചാണ് യോഗം ചേര്‍ന്നത്. ജില്ലാ പഞ്ചായത്ത് വൈസ് പ്രസിഡന്റ് ജോര്‍ജ് മാമ്മന്‍ കോണ്ടൂര്‍, ഇലന്തൂര്‍ ബ്ലോക്ക് പഞ്ചായത്ത് പ്രസിഡന്റ് ജെറി മാത്യു സാം, ജില്ലാ പ്ലാനിംഗ് ഓഫീസര്‍ സാബു.സി.മാത്യു തുടങ്ങിയവര്‍ പങ്കെടുത്തു.

പത്തനംതിട്ട ജില്ലയില്‍ ഇന്ന്(31) പുതിയ കേസുകള്‍ ഒന്നും കണ്ടെത്തിയിട്ടില്ല. പ്രോഗ്രാം ഓഫീസര്‍മാരുടെയും മാനേജ്‌മെന്റ് ടീം ലീഡര്‍മാരുടെയും പ്ലാനിംഗ് മീറ്റിംഗ്, ജില്ലാ മെഡിക്കല്‍ ഓഫീസറുടെ ചേമ്പറില്‍ കൂടി.
ഇന്നത്തെ(31) സര്‍വൈലന്‍സ് ആക്ടിവിറ്റികള്‍ വഴി പുതിയ പ്രൈമറി, സെക്കന്‍ഡറി കോണ്‍ടാക്ടുകളെ കണ്ടെത്തിയിട്ടില്ല.
ജനറല്‍ ആശുപത്രി പത്തനംതിട്ടയില്‍ അഞ്ചു പേരും, ജില്ലാ ആശുപത്രി കോഴഞ്ചേരിയില്‍ അഞ്ചു പേരും നിലവില്‍ ഐസൊലേഷനില്‍ ഉണ്ട്.
സ്വകാര്യ ആശുപത്രികളില്‍ തിരുവല്ല പുഷ്പഗിരി മെഡിക്കല്‍ കോളജ് ആശുപത്രിയില്‍ മൂന്നു പേര്‍ ഐസൊലേഷനില്‍ ഉണ്ട്.

അടൂര്‍ മണ്ഡലത്തില്‍ അലഞ്ഞുതിരിഞ്ഞ് നടക്കുന്ന മുഴുവന്‍ പേരെയും സംരക്ഷിക്കുന്നതിനായി അടൂര്‍ കരുവാറ്റ ഗവ.എല്‍പിഎസില്‍ അഗതി ക്യാമ്പ് ആരംഭിച്ചതായി ചിറ്റയം ഗോപകുമാര്‍ എം എല്‍ എ അറിയിച്ചു. കോവിഡ് 19 വ്യാപനത്തില്‍ നിന്നും ജനങ്ങളെ സംരക്ഷിക്കുന്നതിനായാണ് ക്യാമ്പ് ആരംഭിച്ചിട്ടുള്ളത്. 

മൂന്നുനേരം ഭക്ഷണവും ആരോഗ്യ പരിപാലനവും ഉണ്ടായിരിക്കും. അടൂര്‍ ഡിവൈഎസ്പിയുടെ നേതൃത്വത്തില്‍ മദര്‍ തെരേസാ പാലിയേറ്റീവ് കെയര്‍ സന്നദ്ധ പ്രവര്‍ത്തകരാണ് അലഞ്ഞുതിരിഞ്ഞ് നടക്കുന്നവരെ ക്യാമ്പിലേക്ക് കൊണ്ടുവന്നത്. 

കോവിഡ് 19 പ്രതിരോധ പ്രവര്‍ത്തനത്തിന്റെ ഭാഗമായി ജില്ലയിലെ ഫ്ളാറ്റുകളിലും മറ്റും താമസിക്കുന്നവരെ ബോധവത്ക്കരിക്കുന്നതിനും ധൈര്യം പകരുന്നതിനുമായി പത്തനംതിട്ട പോലീസ് സബ് ഡിവിഷന്റെ നേതൃത്വത്തില്‍ നടത്തിയ ഗാനമേള ശ്രദ്ധേയമായി. പത്തനംതിട്ട കലാസ്റ്റാര്‍ മ്യൂസിക്കിലെ ഗായകരേയും പോലീസിലെ കലാകാരന്മാരേയും ഉള്‍പ്പെടുത്തിയാണ് ഗാനമേള അവതരിപ്പിച്ചത്.  ഇതോടനുബന്ധിച്ച് പത്തനംതിട്ട ഡിവൈഎസ്പി കെ.സജീവ് കോവിഡ് 19 പ്രതിരോധപ്രവര്‍ത്തനത്തെ സംബന്ധിച്ച് ജനങ്ങള്‍ക്ക് സന്ദേശം നല്‍കി. ട്രാഫിക് എസ്ഐ സുരേഷ് കുമാര്‍, എസ്ഐ സദാശിവന്‍, എസ്ഐ ഹരീന്ദ്രന്‍, സിവില്‍ പോലീസ് ഓഫീസര്‍ ശ്രീരാജ് എന്നിവര്‍ പങ്കെടുത്തു. 

അതിഥി ദേവോ ഭവ എന്ന ആപ്തവാക്യത്തെ അന്യര്‍ത്ഥമാക്കുകയാണ് ആറന്മുള ജനമൈത്രി പോലീസ് സ്റ്റേഷനിലെ ഉദ്യോഗസ്ഥര്‍ ഒന്നടങ്കം. തങ്ങളുടെ കരുതല്‍ നാട്ടുകാര്‍ക്കൊപ്പം അതിഥി തൊഴിലാളികള്‍ക്കും വീതിച്ചുനല്‍കി സമൂഹത്തിനാകെ മാതൃകയാകുകയാണ് ഈ പോലീസുകാര്‍. 

ഇലക്ഷൻ വിഭാഗം ഡെപ്യൂട്ടി കളക്ടർ ആർ. രേണുവിൻ്റെ ഔദ്യോഗിക ജീവിതത്തിലെ അവസാന ദിവസമായിരുന്നു ഇന്നലെ. കോ വിഡ് ഭീതിയിൽ പകച്ചു നിൽക്കുന്ന സംസ്ഥാനത്തിന് ദുരിതാശ്വാസ നിധിയിലേക്ക് 50,000 രൂപ സംഭാവന നൽകി മാതൃക കാട്ടിയാണ് അവർ വിശ്രമ ജീവിതത്തിലേക്ക് കടക്കുന്നത്. മുഖ്യമന്ത്രി പ്രഖ്യാപിച്ച സാലറി ചലഞ്ചിനും പൂർണ്ണ പിന്തുണ നൽകുമെന്ന് അവർ പറയുമ്പോൾ, ദുരന്തത്തെ അതിജീവിക്കാൻ എല്ലാവരും ഒന്നിച്ച് നിൽക്കണമെന്ന സന്ദേശമാണ് അവർ നൽകുന്നത്. കോവിഡ് പ്രതിരോധ പ്രവർത്തനങ്ങളുടെ ഭാഗമായി നടക്കുന്ന ജില്ലാതല അവലോകന യോഗത്തിനെത്തിയ മന്ത്രി വി.എസ്. സുനിൽ കുമാറിന് ചെക്ക് കൈമാറി.