കടലാക്രമണത്തെ പ്രതിരോധിക്കുന്നതിന്റെ ഭാഗമായി ചാവക്കാട് കടൽ തീരത്ത് ആൻഡമാൻ ബുള്ളറ്റ് മരത്തൈകൾ നട്ടു. കേരള വനം വന്യജീവി വകുപ്പ് തൃശൂർ സാമൂഹ്യ വനവത്കരണ വിഭാഗമാണ് തീരദേശത്തെ കടലാക്രമണത്തെ പ്രതിരോധിക്കാൻ പരീക്ഷണാടിസ്ഥാനത്തിൽ മരത്തൈകൾ നട്ടത്. മഹാത്മാ നഗറിൽ കെ. വി അബ്ദുൾഖാദർ എംഎൽഎ തൈകൾ നട്ട് ഉദ്ഘാടനം ചെയ്തു. കേരളത്തിൽ കടൽത്തീരങ്ങളിൽ ഇത്തരമൊരു പരീക്ഷണം ആദ്യമാണ്.

കാട്ടകാമ്പാൽ ഗ്രാമപഞ്ചായത്തിലെ പെങ്ങാമുക്ക് ഹൈസ്‌ക്കൂളിന് സമീപത്തായി 26 കുടുംബങ്ങൾക്ക് വീട് നിർമ്മിക്കുന്നതിന്റെ നിർമ്മാണോദ്ഘാടനം തദ്ദേശസ്വയംഭരണ വകുപ്പ് മന്ത്രി എ സി മൊയ്തീൻ നിർവ്വഹിച്ചു. കേരളത്തിലെ പാർപ്പിട സമുച്ചയ നിർമ്മാതാക്കളുടെ സംഘടന ക്രെഡായ് ആണ് വീടുകൾ നിർമ്മിച്ചു നൽകുന്നത്.

കോവിഡ് കാലത്തെ നേരിടാൻ സപ്ലൈകോ ഓൺലൈൻ കച്ചവട മേഖലയിലേക്ക് പ്രവേശിക്കുന്നുവെന്ന് ഭക്ഷ്യ-സിവിൽ വകുപ്പ് സപ്ലൈസ് മന്ത്രി പി തിലോത്തമൻ. സംസ്ഥാനത്ത് നവീകരിച്ച എട്ട് സപ്ലൈകോ സൂപ്പർ സ്റ്റോറുകളുടെ ഓൺലൈൻ ഉദ്ഘാടനം നിർവ്വഹിച്ച് സംസാരിക്കുകയായിരുന്നു മന്ത്രി. വൈറസ് വ്യാപനം നിലനിൽക്കുന്ന സാഹചര്യത്തിൽ അവശ്യവസ്തുക്കൾ വീട്ടുപടിക്കൽ എത്തിക്കുക എന്ന ഉദ്ദേശത്തോടെയാണ് ഓൺലൈൻ കച്ചവടം ആരംഭിക്കുന്നത്.

കോവിഡ് 19 രോഗവ്യാപനസാധ്യത നിയന്ത്രണ വിധേയമായതിനെ തുടർന്ന്, തൃശൂർ കോർപറേഷനിലെ 38, 48 ഡിവിഷനുകളെ കണ്ടെയ്ൻമെന്റ് സോൺ നിയന്ത്രണങ്ങളിൽ നിന്ന് ഒഴിവാക്കി ജില്ലാ കളക്ടർ ഉത്തരവിട്ടു. അതേസമയം കോർപറേഷനിലെ 35, 39, 49, 51 എന്നീ നാല് ഡിവിഷനുകളിൽ കണ്ടെയ്ൻമെന്റ് സോൺ നിയന്ത്രണം തുടരും. കൂടാതെ ശ്രീനാരായണപുരം ഗ്രാമപഞ്ചായത്തിലെ എഴ്, എട്ട്, 11, 12 എന്നീ നാലു വാർഡുകളിലും ചാലക്കുടി നഗരസഭയിലെ 16, 19, 21, 30, 31, 35, 36 എന്നീ എഴ് വാർഡുകളിലും കണ്ടെയ്ൻമെന്റ് സോൺ നിയന്ത്രണം തുടരും. ജൂൺ 24, 26, ജൂലൈ ഒന്ന് തീയതികളിലെ ഉത്തരവിൻ പ്രകാരമാണ് ഇവ കണ്ടെയ്ൻമെന്റ് സോണുകളാക്കിയത്.

ജില്ലാ ഭാഗ്യക്കുറി ഓഫീസില്‍ മാര്‍ച്ച് 28ന് നടത്താനിരുന്ന കൂടിക്കാഴ്ച ഈ മാസം 14ന് നടക്കും. അറിയിപ്പ് ലഭിച്ച ഉദേ്യാഗാര്‍ഥികള്‍ രാവിലെ 11.30ന് ഹാജരാകണമെന്ന് ജില്ലാ ഭാഗ്യക്കുറി ഓഫീസര്‍ അറിയിച്ചു.

ചെന്നീര്‍ക്കര ഗവണ്‍മെന്റ് ഐ.റ്റി.ഐയിലെ അധ്യാപകരും ട്രെയിനികളും ചേര്‍ന്ന് രൂപകല്‍പ്പന ചെയ്ത് നിര്‍മ്മിച്ച പാദം ഉപയോഗിച്ച് പ്രവര്‍ത്തിപ്പിക്കുന്ന സാനിറ്റൈസര്‍ ഡിസ്‌പെന്‍സിങ്ങ് മെഷീന്‍ പത്തനംതിട്ട ജില്ലാ ട്രഷറിയില്‍ സ്ഥാപിച്ചു. വീണാജോര്‍ജ് എംഎല്‍എ ഉദ്ഘാടനം ചെയ്തു. ഐറ്റിഐ പ്രിന്‍സിപ്പാള്‍ സനല്‍കുമാര്‍ അദ്ധ്യക്ഷത വഹിച്ച ചടങ്ങില്‍  ജില്ലാ ട്രഷറി ഓഫീസര്‍  പ്രസാദ് മാത്യു,  ആര്‍ദ്രം മിഷന്‍ ജില്ലാ അസിസ്റ്റന്റ് കോ-ഓര്‍ഡിനേറ്റര്‍ ഡോ. സി.ജി.ശ്രീരാജ്, സ്റ്റാമ്പ് ഡിപ്പോ ഓഫീസര്‍ രാജേഷ്.റ്റി.നായര്‍ തുടങ്ങിയവര്‍ പങ്കെടുത്തു. 

 കോവിഡ് പശ്ചാത്തലത്തില്‍ ഗവി ഗവണ്‍മെന്റ് എല്‍.പി സ്‌കൂളില്‍ ഓണ്‍ലൈന്‍ ക്ലാസുകള്‍ മുടങ്ങാതിരിക്കാനും വൈദ്യുതി ലഭ്യത ഉറപ്പാക്കുന്നതിനുമായി പെരിയാര്‍ ടൈഗര്‍ ഡിവിഷന്‍ വെസ്റ്റ് പമ്പ റെയിഞ്ച് ഫോറസ്റ്റ് ഉദ്യോഗസ്ഥരുടെ നേതൃത്വത്തില്‍ ഇന്‍വര്‍ട്ടര്‍ കൈമാറി. ഡെപ്യൂട്ടി റെയിഞ്ച് ഫോറസ്റ്റ് ഓഫീസര്‍ വി.വിവേക്, ബീറ്റ് ഫോറസ്റ്റ് ഓഫീസര്‍ മഹേഷ്‌കുമാര്‍, സെക്ഷന്‍ ഫോറസ്റ്റ് ഓഫീസര്‍ ജിജിമോന്‍ തുടങ്ങിയവര്‍ പങ്കെടുത്തു.