കോവിഡ് 19 പ്രതിരോധത്തിന്റെ ഭാഗമായി പ്രഖ്യാപിച്ച നിരോധനാജ്ഞ ലംഘിച്ചതിന് ജില്ലയില്‍ പൊലീസ് 38 കേസുകള്‍ കൂടി ഇന്നലെ (മാര്‍ച്ച് 30) രജിസ്റ്റര്‍ ചെയ്തു. വിവിധ സ്റ്റേഷനുകളിലായി 48 പേരെ ഇന്നലെ അറസ്റ്റു ചെയ്തതായി ജില്ലാ പൊലീസ് മേധാവി യു. അബ്ദുള്‍ കരീം അറിയിച്ചു. നിര്‍ദേശങ്ങള്‍ ലംഘിച്ച് നിരത്തിലിറക്കിയ നാല് വാഹനങ്ങളും പിടിച്ചെടുത്തിട്ടുണ്ട്. ഇതോടെ നിരോധനാജ്ഞ ലംഘിച്ചതിന് പൊലീസ് രജിസ്റ്റര്‍ ചെയ്ത കേസുകളുടെ എണ്ണം 305 ആയി. 435 പേരെയാണ് ഇതുവരെ അറസ്റ്റു ചെയ്തത്. ജില്ലയിലാകെ ഇതുവരെ 46 വാഹനങ്ങളും പിടിച്ചെടുത്തു.

കോവിഡ് 19 വൈറസ് ഭീഷണി ചെറുക്കാന്‍ രാജ്യ വ്യാപകമായി ലോക് ഡൗണ്‍ പ്രഖ്യാപിച്ച സാഹചര്യത്തില്‍ ജില്ലയില്‍ ഭക്ഷണ ലഭ്യത ഉറപ്പുവരുത്താന്‍ വിപുലമായ സംവിധാനങ്ങളാണ് പ്രവര്‍ത്തിക്കുന്നത്. ഗ്രാമ പഞ്ചായത്തുകളിലും നഗരസഭകളിലുമായി 109 സാമൂഹിക അടുക്കളകളില്‍ നിന്നായി ഇന്നലെ (മാര്‍ച്ച് 30) 2,304 പേര്‍ക്ക് പ്രാതലും 34,262 പേര്‍ക്ക് ഉച്ചഭക്ഷണവും 9,601 പേര്‍ക്ക് അത്താഴവും വിതരണം ചെയ്തു.

ജില്ലയിലെ വിവിധ കേന്ദ്രങ്ങളിലുള്ള അതിഥി തൊഴിലാളികള്‍ക്ക് സുരക്ഷയും ഭക്ഷണ ലഭ്യതയും ഉറപ്പാക്കിയതായി ജില്ലാ കലക്ടര്‍ ജാഫര്‍ മലിക് അറിയിച്ചു. കോവിഡ് 19 ഭീഷണി നിലനില്‍ക്കെ സ്വന്തം നാടുകളിലേക്ക് മടങ്ങാന്‍ ശ്രമിക്കരുതെന്ന് ഇവര്‍ക്ക് നിര്‍ദേശം നല്‍കിയിട്ടുണ്ട്. 3,677 അതിഥി തൊഴിലാളികള്‍ക്ക് ഇന്നലെ ഭക്ഷണ കിറ്റുകള്‍ വളണ്ടിയര്‍മാര്‍ മുഖേന ലഭ്യമാക്കിയിട്ടുണ്ട്.

കോവിഡ് 19 ഭീഷണി നിലനില്‍ക്കുന്ന അടിയന്തര സാഹചര്യത്തില്‍ മലപ്പുറം ജില്ലാ കലക്ടര്‍ ജാഫര്‍ മലിക് ക്രിമിനല്‍ പ്രൊസീജിയര്‍ കോഡ് (സി.ആര്‍.പി.സി) സെക്ഷന്‍ 144 പ്രകാരം പ്രഖ്യാപിച്ച നിരോധനാജ്ഞ ഏപ്രില്‍ 14 അര്‍ധരാത്രിവരെ നീട്ടി ഉത്തരവായി. ഇന്നലെ (മാര്‍ച്ച് 31) അര്‍ധരാത്രി വരെ പ്രഖ്യാപിച്ചിരുന്ന നിരോധനാജ്ഞ ഏപ്രില്‍ 14 അര്‍ധരാത്രിവരെ രാജ്യ വ്യാപകമായി കേന്ദ്ര സര്‍ക്കാര്‍ പ്രഖ്യാപിച്ച ലോക് ഡൗണ്‍ നിലനില്‍ക്കുന്ന സാഹചര്യത്തിലാണ് ദീര്‍ഘിപ്പിച്ച ഉത്തരവായത്.

തിരൂര്‍ മുനിസിപ്പാലിറ്റി, നിറമരുതൂര്‍, താനാളൂര്‍, തലക്കാട്, ചെറിയമുണ്ടം, പൊന്‍മുണ്ടം ഗ്രാമപഞ്ചായത്തുകളിലേക്ക് തിരൂര്‍ പള്ളിപ്പടി പമ്പ് ഹൗസില്‍ നിന്ന് നിയന്ത്രണങ്ങള്‍ക്ക് വിധേയമായി മാത്രമേ ജലവിതരണം ചെയ്യുകയൊള്ളുവെന്ന് വാട്ടര്‍ അതോറിറ്റി തിരൂര്‍ പി.ച്ച് ഡിവിഷന്‍ അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ അറിയിച്ചു. ഭാരതപ്പുഴയില്‍ വെള്ളം ക്രമാതീതമായി താഴ്ന്നതിനെ തുടര്‍ന്ന്  പള്ളിപ്പടി പമ്പ് ഹൗസില്‍  നിന്നും ഭാഗികമായി പമ്പ് ചെയ്യുവാനുള്ള വെള്ളം മാത്രമാണ് ലഭിക്കുന്നതെന്നതിനാലാണ് തീരുമാനമെന്ന് അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ അറിയിച്ചു.

ജില്ലയില്‍ വൈറസ് ബാധ സ്ഥിരീകരിച്ച ഒമ്പതു പേരുടേയും ആരോഗ്യ നില തൃപ്തികരമായി തുടരുകയാണെന്ന് ജില്ലാ മെഡിക്കല്‍ ഓഫീസര്‍ ഡോ. കെ. സക്കീന മുഖ്യ സമിതി അവലോകന യോഗത്തില്‍ അറിയിച്ചു. ഇതുവരെ 457 പേര്‍ക്ക് വൈറസ് ബാധയില്ലെന്നു സ്ഥിരീകരിച്ചു. 151 സാമ്പിളുകളുടെ ഫലങ്ങളാണ് ഇനി ലഭിക്കാനുള്ളത്.