നാരങ്ങാനം പഞ്ചായത്തിലെ ചേനംചിറ കുടിവെള്ള പദ്ധതി വീണാ ജോര്‍ജ് എംഎല്‍എ ഉദ്ഘാടനം ചെയ്തു. വര്‍ഷങ്ങളായി കുടിവെള്ളക്ഷാമം അനുഭവിക്കുന്ന ചേനംചിറ, ചെമ്മണ്ണും കുന്നേല്‍ ഭാഗങ്ങളിലെ കുടിവെള്ള പ്രശ്‌നത്തിന് ശാശ്വത പരിഹാരമാണ് പുതിയ കുടിവെള്ള പദ്ധതിയെന്ന് വീണാ ജോര്‍ജ് എംഎല്‍എ പറഞ്ഞു. ഈ പ്രദേശങ്ങളിലെ നൂറു കണക്കിന് കുടുംബങ്ങള്‍ക്ക് ആവശ്യമായ വെള്ളം വേനല്‍ക്കാലത്തും ഇനി ലഭ്യമാകും. എംഎല്‍എ ആസ്തി വികസന ഫണ്ടില്‍ നിന്നും 25 ലക്ഷം രൂപ ചെലവഴിച്ച് വാട്ടര്‍ അതോറിറ്റിയുടെ സഹായത്തോടെ കിണര്‍ പണി പൂര്‍ത്തിയാക്കുകയായിരുന്നു.

മല്ലപ്പള്ളി - ആനിക്കാട് പഞ്ചായത്തുകളെ ബന്ധിപ്പിച്ച് മണിമലയാറിന് കുറുകെ നിര്‍മിച്ച കാവനാല്‍കടവ് പാലത്തിന്റെ ഉദ്ഘാടനം നാളെ (ജൂലൈ 06) പൊതുമരാമത്ത് വകുപ്പ് മന്ത്രി ജി.സുധാകരന്‍ വീഡിയോ കോണ്‍ഫറന്‍സ് വഴി നിര്‍വഹിക്കും. മാത്യു.ടി തോമസ് എംഎല്‍എയുടെ അധ്യക്ഷതയില്‍ മുരണി യുപി സ്‌കൂള്‍ കെട്ടിടത്തില്‍ നടക്കുന്ന ചടങ്ങില്‍ ആന്റോ ആന്റണി എംപി മുഖ്യാതിഥിയാകും.
568.46 ലക്ഷം രൂപയാണ് പാലത്തിന്റെ നിര്‍മാണ ചെലവ്. 126.6 മീറ്റര്‍ നീളവും 11.05 മീറ്റര്‍ വീതിയുമുള്ള പാലത്തില്‍ ഏഴര മീറ്റര്‍ വീതിയില്‍ വാഹന ഗതാഗത പാതയും ഒന്നര മീറ്റര്‍ വീതിയില്‍ ഇരുവശത്തും നടപ്പാതയും നിര്‍മിച്ചിട്ടുണ്ട്.  

സമഗ്രശിക്ഷ കേരളയുടെ ആഭിമുഖ്യത്തില്‍ പൊതുഇടങ്ങളില്‍ ഓണ്‍ലൈന്‍ പഠനത്തിന് ടെലിവിഷന്‍ സ്ഥാപിക്കുന്ന പദ്ധതിയുടെ പുളിക്കീഴ് ബ്ലോക്ക്തല ഉദ്ഘാടനം ബ്ലോക്ക് പഞ്ചായത്ത് കാര്യാലയത്തില്‍  അഡ്വ. മാത്യു റ്റി തോമസ് എംഎല്‍എ ക്ലസ്റ്റര്‍ റിസോഴ്സ് സെന്ററിലെ പ്രധമ അധ്യാപകന് ടി വി കൈമാറി നിര്‍വഹിച്ചു. തിരുവല്ല ബിആര്‍സിയുടെ നേതൃത്വത്തിലാണ് ടെലിവിഷന്‍ സൗകര്യം ഒരുക്കുന്നത്.  വ്യവസായ വകുപ്പിന്റെ നേതൃത്വത്തില്‍ തിരുവല്ല നിയോജക മണ്ഡലത്തിലെ അര്‍ഹരായ അഞ്ച് വിദ്യാര്‍ഥികള്‍ക്ക് നല്‍കുന്ന ടെലിവിഷനുകളുടെ വിതരണ ഉദ്ഘാടനവും നടന്നു.

ന്യൂഡല്‍ഹി-തിരുവനന്തപുരം, നിസാമുദീന്‍-എറണാകുളം, മുംബൈ- തിരുവനന്തപുരം സ്‌പെഷല്‍ ട്രെയിനുകളിലായി വെള്ളിയാഴ്ച (ജൂലൈ 3) പത്തനംതിട്ട ജില്ലക്കാരായ 14 പേര്‍കൂടി എത്തി. ഇവരില്‍ ഒരാളെ കോവിഡ് കെയര്‍ സെന്ററിലും 13 പേരെ വീടുകളിലും നിരീക്ഷണത്തിലാക്കി.

തിരുവനന്തപുരം, കൊച്ചി, കരിപ്പൂര്‍ അന്താരാഷ്ട്ര വിമാനത്താവളങ്ങള്‍ വഴി  വെള്ളിയാഴ്ച (ജൂലൈ 3) 28 വിമാനങ്ങളിലായി പത്തനംതിട്ട ജില്ലക്കാരായ 104 പ്രവാസികള്‍കൂടി എത്തി. ഇവരില്‍ 35 പേര്‍ വിവിധ കോവിഡ് കെയര്‍ സെന്ററുകളിലും 69 പേര്‍ വീടുകളിലും നിരീക്ഷണത്തില്‍ പ്രവേശിച്ചു.

വയനാട്ടുകാരുടെ ചിരകാല സ്വപ്നമായ വയനാട് മെഡിക്കല്‍ കോളേജ് യാഥാര്‍ഥ്യമാക്കുന്നതിന് സംസ്ഥാന സര്‍ക്കാര്‍ നിയോഗിച്ച വിദഗ്ധ സമിതിയടെ റിപ്പോര്‍ട്ട് അനുകൂലമായാല്‍ ഉടന്‍ തന്നെ ഡി.എം വിംസ് മെഡിക്കല്‍ കോളേജ് ഏറ്റെടുക്കുമെന്ന് സി.കെ ശശീന്ദ്രന്‍ എം.എല്‍.എ. പറഞ്ഞു. ഡി.എം വിംസ് മെഡിക്കല്‍ കോളേജ് സര്‍ക്കാരിനു കൈമാറുന്നതിന് സന്നദ്ധത അറിയിച്ച്  ജൂണ്‍ അഞ്ചിന് ഡി.എം വിംസ് മാനേജിംഗ് ട്രസ്റ്റി ഡോ.ആസാദ് മൂപ്പന്‍ കത്ത് നല്‍കിയതിന്റെ അടിസ്ഥാനത്തിലാണ് സര്‍ക്കാര്‍, കോളേജ് ഏറ്റെടുക്കുന്നതിന് വിദഗ്ധ സമിതിയെ നിയോഗിച്ചത്.  

 
കോവിഡുമായി ബന്ധപ്പെട്ട് ജില്ലയില്‍ പുതുതായി നിരീക്ഷണത്തില്‍ വന്ന 237 പേരുള്‍പ്പെടെ ആകെ 3539 പേര്‍ നിരീക്ഷണത്തില്‍. 343 പേര്‍ ഇന്ന് നിരീക്ഷണ കാലം പൂര്‍ത്തിയാക്കി. 36 പേര്‍ മാനന്തവാടി ജില്ലാ ആശുപത്രിയിലും, പട്ടികവര്‍ഗ്ഗ വിഭാഗത്തില്‍പെടുന്ന 325 പേരുള്‍പ്പെടെ 1910 പേര്‍ വിവിധ കോവിഡ് കെയര്‍ സെന്ററുകളിലുമാണ് നിരീക്ഷണത്തില്‍ കഴിയുന്നത്  .

ജില്ലയില്‍ നിന്ന് ഇതുവരെ പരിശോധനയ്ക്കയച്ച 3438 സാമ്പിളുകളില്‍ 2874 എണ്ണത്തിന്റെ ഫലം ലഭിച്ചതില്‍ 2809 നെഗറ്റീവും 65 പോസിറ്റീവുമാണ്. 559 സാമ്പിളുകളുടെ ഫലം ലഭിക്കാനുണ്ട്.

വയനാട് ജില്ലയില്‍ രണ്ട് പേര്‍ക്ക്കൂടി കോവിഡ് സ്ഥിരീകരിച്ചതായി ജില്ലാ മെഡിക്കല്‍ ഓഫീസര്‍ അറിയിച്ചു. കര്‍ണാടകയില്‍ നിന്നു ജൂണ്‍ 25ന് ജില്ലയിലെത്തിയ കണിയാമ്പറ്റ സ്വദേശി (36 വയസ്സ്), സൗദി അറേബ്യയിലെ ദമ്മാമില്‍ നിന്ന് കണ്ണൂരിലെത്തി അവിടെ സ്ഥാപന നിരീക്ഷണത്തിലായിരുന്ന എള്ളുമന്ദം സ്വദേശി (29) എന്നിവര്‍ക്കാണ് രോഗം സ്ഥിരീകരിച്ചത്. ആദ്യത്തെയാള്‍ മാനന്തവാടി ജില്ലാ ആശുപത്രിയിലും രണ്ടാമത്തെ വ്യക്തി
അഞ്ചരക്കണ്ടി കോവിഡ് ആശുപത്രിയിലും ചികിത്സയിലാണ്.

*ആറ് മോഡല്‍ ഫോറസ്റ്റ് സ്റ്റേഷനുകളുടെ ഉദ്ഘാടനം നിര്‍വ്വഹിച്ചു* 

അധിനിവേശ സസ്യ നിര്‍മാര്‍ജ്ജന പദ്ധതിയുടെ ഭാഗമായി സംസ്ഥാനത്തെ വിദേശ സസ്യങ്ങള്‍ വെട്ടിമാറ്റി പ്രദേശിക- സ്വാഭാവിക വൃക്ഷങ്ങള്‍ വെച്ചുപിടിപ്പിക്കുമെന്ന് വനം- വന്യജീവി വകുപ്പ് മന്ത്രി അഡ്വ. കെ. രാജു പറഞ്ഞു. അധിനിവേശ സസ്യ നിര്‍മാര്‍ജ്ജനത്തിന്റെ സംസ്ഥാനതല ഉദ്ഘാടനവും മോഡല്‍ ഫോറസ്റ്റ് സ്റ്റേഷനുകളുടെ ഉദ്ഘാടനവും  കുപ്പാടിയില്‍ വീഡിയോ കോണ്‍ഫറന്‍സിലൂടെ നിര്‍വ്വഹിച്ച് സംസാരിക്കുകയായിരുന്നു മന്ത്രി.