കോവിഡ് 19 രോഗബാധ ലക്ഷണങ്ങള്‍ പ്രകടിപ്പിക്കുന്നവരെ കൂടാതെ ലോക്ക് ഡൗണ്‍ കാലയളവില്‍  വീടില്ലാത്തവര്‍ക്കും അനാഥര്‍ക്കുമായി തിരഞ്ഞെടുത്ത കൊറോണ കെയര്‍ സെന്ററുകളില്‍  പ്രത്യേകം പ്രവേശനം നല്‍കിത്തുടങ്ങി. നിലവില്‍ റീഹാബിലിറ്റേഷന്‍ സെന്റര്‍ ആയി ഒന്‍പത് സ്ഥാപനങ്ങള്‍ പ്രവര്‍ത്തിക്കുന്നു. ഇവിടെ 337 പേര്‍ പരിചരണത്തിലുണ്ട്.

കോവിഡ് 19 നിയന്ത്രണത്തിന്റെ ഭാഗമായി 122 കൊറോണ കെയര്‍ സെന്ററുകളിലായി ഒറ്റയ്ക്ക് കഴിയുന്നതിന് കിടക്ക സൗകര്യമുള്ള 3,325 മുറികളാണ് പൂര്‍ണ സജ്ജമായിട്ടുള്ളത്. നിലവില്‍ ഒന്‍പത് സെന്ററുകളിലായി 194 പേരാണ് പ്രത്യേക പരിചരണത്തിലുള്ളത്. ഇന്നലെ നാലുപേര്‍ മാത്രമാണ് പുതുതായി എത്തിയത്. മറ്റു സംസ്ഥാനങ്ങളില്‍ നിന്നും മറ്റു ജില്ലകളില്‍ നിന്നും എത്തുന്നവരെയാണ് കൊറോണ കെയര്‍ സെന്ററുകളില്‍ നേരിട്ട് പ്രവേശിപ്പിക്കുന്നത്. ഇവര്‍ 14 ദിവസം നിരീക്ഷണത്തില്‍  തുടരണം. രോഗപരിചരണം, ഭക്ഷണം, അനുബന്ധ സൗകര്യങ്ങള്‍ തുടങ്ങിയവ  കുറ്റമറ്റ രീതിയില്‍ ഏര്‍പ്പെടുത്തിയിട്ടുണ്ടെന്ന് ജില്ലാ കലക്ടര്‍ ബി അബ്ദുല്‍ നാസര്‍ അറിയിച്ചു.

  കൊറോണ ബോധവത്കരണ സന്ദേശം മൈക്ക് അനൗണ്‍സ്‌മെന്റ് വഴി 16 ആരോഗ്യ ബ്ലോക്കുകളിലും എത്തിക്കും. ഇതോടൊപ്പം ഗൃഹനിരീക്ഷണത്തില്‍ കഴിയുന്നവര്‍ക്കുള്ള മാര്‍ഗനിര്‍ദേശങ്ങള്‍ അടങ്ങിയ ലഘുലേഖകള്‍ വിതരണം ചെയ്യും. ഇന്നലെ മാത്രം 16,659 വീടുകളാണ് ജില്ലയില്‍ 1,948 ടീമുകളായി 6,053 വോളന്റിയര്‍മാര്‍ സന്ദര്‍ശിച്ചത്. 91 റാപ്പിഡ് റസ്‌പോണ്‍സ് ടീമുകളും ഒരു റെയില്‍വേ, 12 റോഡ് സ്‌ക്വാഡും നിതാന്ത ജാഗ്രതയോടെ നിരീക്ഷണ പ്രവര്‍ത്തനങ്ങള്‍ തുടരുന്നു.

കോവിഡ് 19 സമൂഹ വ്യാപനം തടയുന്നതിനായി ജില്ലാ അതിര്‍ത്തികളില്‍ കര്‍ശനമായ പരിശോധന തുടരുന്നു. പൊലീസ്, ആശ, ആരോഗ്യ പ്രവര്‍ത്തകര്‍ അടങ്ങിയ 58 അംഗ സംഘം ഓച്ചിറ-123,  താമരക്കുളം-131 കടമ്പാട്ടുകോണം-2824, ഏനാത്ത്-392, ആര്യങ്കാവ് ചെക്ക് പോസ്റ്റ്-814 എന്നിവിടങ്ങളിലായി 4,284 സൈറ്റുകളില്‍ സ്‌ക്രീനിംഗ് നടത്തി. ആകെ 1,743 വാഹനങ്ങള്‍ മാത്രമാണ് കടത്തിവിട്ടത്. ഫ്‌ളാഷ് തെര്‍മോമീറ്റര്‍ ഉപയോഗിച്ച് നടത്തിയ പ്രാഥമിക പരിശോധനയില്‍ ആര്‍ക്കും രോഗലക്ഷണങ്ങള്‍ പ്രകടമല്ല.

മാതൃക വികസന പ്രവര്‍ത്തനങ്ങളിലൂടെ മികവ് തെളിയിക്കുന്ന കടയ്ക്കല്‍ ഗ്രാമപഞ്ചായത്തിന് വീണ്ടും അംഗീകാരം. 2019-20 സാമ്പത്തിക വര്‍ഷത്തിലെ പദ്ധതി നിര്‍വഹണത്തില്‍ ജില്ലയില്‍ ഒന്നാം സ്ഥാനം നേടിയിരിക്കുകയാണ് കടയ്ക്കല്‍ ഗ്രാമപഞ്ചായത്ത്. പദ്ധതി നിര്‍വഹണത്തിനായി അനുവദിച്ച തുകയുടെ 99.53 ശതമാനവും ചെലവഴിച്ചാണ് ജില്ലയില്‍ ഒന്നാം സ്ഥാനം നേടിയത്.
5.24 കോടിരൂപയാണ് വിവിധ പദ്ധതികള്‍ക്കായി അനുവദിച്ചിരുന്നത്. ഇതില്‍ 5.21 കോടി രൂപയും ചെലവഴിച്ചാണ് ജില്ലയില്‍ ഒന്നാം സ്ഥാനവും സംസ്ഥാനതലത്തില്‍ ഇരുപത്തി നാലാം സ്ഥാനവും ലഭിച്ചത്.

കോവിഡ് 19 വൈറസ് വ്യാപനത്തിന്റെ മറവില്‍ നിരോധിത പ്ലാസ്റ്റിക് ഉത്പന്നങ്ങളുടെ ഉപയോഗം വര്‍ധിക്കുന്നതായി ജില്ലാ ശുചിത്വ മിഷന്‍. 2020 ജനുവരി ഒന്നു മുതലാണ് സംസ്ഥാന സര്‍ക്കാരിന്റെ പ്ലാസ്റ്റിക് നിരോധനം പ്രാബല്യത്തില്‍ വന്നത്. ശുചിത്വ മിഷന്‍, കുടുംബശ്രീ യൂണിറ്റുകള്‍, തദ്ദേശ സ്വയംഭരണ സ്ഥാപനങ്ങള്‍, സന്നദ്ധ സംഘടനകള്‍ എന്നിവരുടെ നേതൃത്വത്തില്‍ പ്ലാസ്റ്റിക്കിന് ബദല്‍ ഉത്പന്നങ്ങളും തുണി സഞ്ചികളും പേപ്പര്‍ ക്യാരി ബാഗുകളും നിര്‍മിച്ചു നല്‍കുകയും ചെയ്തിരുന്നു.

കോവിഡ് 19 പ്രതിരോധപ്രവര്‍ത്തനങ്ങളുടെ ഭാഗമായി ആറന്മുള നിയോജക മണ്ഡലത്തില്‍ വീണാ ജോര്‍ജ് എം.എല്‍.എയുടെ നേതൃത്വത്തില്‍ ആരംഭിച്ച ഹെല്‍പ്പ് ഡെസ്‌ക്ക് ജനങ്ങള്‍ക്ക് ആശ്വാസമാകുന്നു. മരുന്ന്, ആഹാരസാധനങ്ങള്‍, കുഞ്ഞുങ്ങള്‍ക്കുള്ള അവശ്യസാധങ്ങള്‍, തുടങ്ങിയവ വോളന്റിയര്‍മാര്‍ മുഖേന വീടുകളില്‍ എത്തിച്ചുനല്‍കുന്നതിനായി ആരംഭിച്ച ഹെല്‍പ്പ് ഡെസ്‌ക്കിലൂടെ അവശ്യസാധനങ്ങള്‍ ലഭ്യമായവര്‍ ഏറെയാണ്. 800ല്‍ അധികം ആളുകള്‍ക്ക് ഇതിന്റെ പ്രയോജനം ലഭിച്ചിട്ടുണ്ട്.