രാജ്യ വ്യാപകമായി ലോക് ഡൗണ്‍ നിലനില്‍ക്കുന്ന സാഹചര്യത്തില്‍ ജില്ലയില്‍ സാമൂഹിക അടുക്കളകള്‍ വഴിയുള്ള ഭക്ഷണ വിതരണം തുടരുകയാണ്. ഗ്രാമ പഞ്ചായത്തുകളിലും നഗരസഭകളിലുമായി പ്രവര്‍ത്തിക്കുന്ന 109 സാമൂഹിക അടുക്കളകളില്‍ നിന്ന് ഇന്നലെ (ഏപ്രില്‍ 02) 2,963 പേര്‍ക്ക് പ്രാതലും 37,082 പേര്‍ക്ക് ഉച്ചഭക്ഷണവും 12,424 പേര്‍ക്ക് അത്താഴവും വിതരണം ചെയ്തു.

കോവിഡ് 19 സ്ഥിരീകരിച്ച കീഴാറ്റൂര്‍ പൂന്താനം കാരിയമാട് സ്വദേശിയുമായി ഇടപഴകിയിട്ടുള്ള ബന്ധുക്കള്‍, സുഹൃത്തുക്കള്‍, നാട്ടുകാര്‍ എന്നിവര്‍ കൃത്യമായും മറ്റുള്ളവരുമായി അകലം പാലിച്ച് സ്വയം നിരീക്ഷണത്തില്‍ കഴിയണമെന്ന് ജില്ലാ കലക്ടര്‍ ജാഫര്‍ മലിക് അറിയിച്ചു. എന്തെങ്കിലും അസുഖ ലക്ഷണങ്ങള്‍ കണ്ടാല്‍ നേരിട്ട് ആശുപത്രികളില്‍ പോകാതെ കണ്‍ട്രോള്‍ സെല്ലില്‍ വിളിച്ച് ലഭിക്കുന്ന നിര്‍ദേശങ്ങള്‍ പൂര്‍ണ്ണമായും പാലിക്കണമെന്നും ജില്ലാ കലക്ടര്‍ അറിയിച്ചു.
കണ്‍ട്രോള്‍ സെല്‍ നമ്പറുകള്‍ - 0483 2737858, 2737857, 2733251, 2733252, 2733253

കോവിഡ് 19 പ്രതിരോധ പ്രവര്‍ത്തനങ്ങള്‍ക്കായി നിയോഗിച്ച വളണ്ടിയര്‍മാര്‍ നിഷ്പക്ഷത പുലര്‍ത്തണമെന്ന് ജില്ലാ കലക്ടര്‍. മത, രാഷ്ട്രീയ, സംഘടനാപരമായ അടയാളങ്ങളും ക്ലബ്ബുകള്‍ ഉള്‍പ്പെടെയുള്ള സ്ഥാപനങ്ങളുടെ പേരുകളും ഒരു കാരണവശാലും പ്രദര്‍ശിപ്പിക്കരുത്. തദ്ദേശ സ്വയംഭരണ സ്ഥാപനങ്ങള്‍ ചുമതലപ്പെടുത്തിയ വളണ്ടിയര്‍മാത്രമെ നിര്‍ദിഷ്ട സേവനങ്ങളില്‍ ഏര്‍പ്പെടാവൂ. ഇതില്‍ വീഴ്ച വരുത്തുന്നത് ശ്രദ്ധയില്‍പ്പെട്ടാല്‍ കര്‍ശന നിയമ നടപടികള്‍ സ്വീകരിക്കുമെന്ന് ജില്ലാ പൊലീസ് മേധാവി യു. അബ്ദുള്‍ കരീം വ്യക്തമാക്കി.

കോവിഡ് 19 പ്രതിരോധത്തിന്റെ ഭാഗമായി പ്രഖ്യാപിച്ച നിരോധനാജ്ഞ ലംഘിച്ചതിന് ജില്ലയില്‍ പൊലീസ് 111 കേസുകള്‍ കൂടി ഇന്നലെ (ഏപ്രില്‍ 02) രജിസ്റ്റര്‍ ചെയ്തു. വിവിധ സ്റ്റേഷനുകളിലായി 111 പേരെ ഇന്നലെ അറസ്റ്റു ചെയ്തതായി ജില്ലാ പൊലീസ് മേധാവി യു. അബ്ദുള്‍ കരീം അറിയിച്ചു. നിര്‍ദേശങ്ങള്‍ ലംഘിച്ച് നിരത്തിലിറക്കിയ 28 വാഹനങ്ങളും പിടിച്ചെടുത്തിട്ടുണ്ട്. ഇതോടെ നിരോധനാജ്ഞ ലംഘിച്ചതിന് പൊലീസ് രജിസ്റ്റര്‍ ചെയ്ത കേസുകളുടെ എണ്ണം 573 ആയി. 735 പേരെയാണ് ഇതുവരെ അറസ്റ്റു ചെയ്തത്. ജില്ലയിലാകെ ഇതുവരെ 115 വാഹനങ്ങളും പിടിച്ചെടുത്തിട്ടുണ്ട്.

ജില്ലയില്‍ ഒരാള്‍ക്കു കൂടി കോവിഡ് 19 സ്ഥിരീകരിച്ചതായി ജില്ലാ കലക്ടര്‍ ജാഫര്‍ മലിക് അറിയിച്ചു. പെരിന്തല്‍മണ്ണക്കടുത്ത് കീഴാറ്റൂര്‍ പൂന്താനം കാരിയമാട് സ്വദേശിയായ 85 കാരനാണ് വൈറസ് ബാധ. ഇയാള്‍ മഞ്ചേരി ഗവ. മെഡിക്കല്‍ കോളജ് ആശുപത്രിയില്‍ ഐസൊലേഷനിലാണ്. ഇതോടെ ജില്ലയില്‍ വൈറസ് ബാധ സ്ഥിരീകരിച്ചവരുടെ എണ്ണം 12 ആയി.

കോവിഡ് 19 ആഗോള വെല്ലുവിളിയാകുമ്പോള്‍ മലപ്പുറം ജില്ലയുടെ സുരക്ഷയും ക്ഷേമവും ഉറപ്പാക്കുന്നതിന്റെ അക്ഷീണ പരിശ്രമത്തിലാണ് ജില്ലാ കലക്ടര്‍ ജാഫര്‍ മലികിന്റെ നേതൃത്വത്തില്‍ ജില്ലാ ഭരണകൂടവും റവന്യൂ വകുപ്പ് ഉദ്യോഗസ്ഥരും. പ്രതിരോധ പ്രവര്‍ത്തനങ്ങളുടെ ഏകോപനം മുതല്‍ അവശ്യ സാധനങ്ങളുടെ ലഭ്യത ഉറപ്പു വരുത്തുന്നതുവരെയുള്ള വിവിധ ഘട്ടങ്ങളില്‍ ഉത്തരവാദിത്തത്തോടെയുള്ള ഉദ്യോഗസ്ഥ സംഘത്തിന്റെ ഇടപെടല്‍ പരാതികള്‍ക്കിടനല്‍കാതെയുള്ള സുരക്ഷിത ലോക് ഡൗണ്‍ കാലം ജില്ലയില്‍ ഉറപ്പാക്കുന്നതില്‍ നിര്‍ണായകമാവുകയാണ്.