ചിറങ്ങര റെയിൽവേ ഓവർ ബ്രിഡ്ജ് സ്ഥലമെടുപ്പിന്റെ ഭാഗമായി നടപ്പാക്കുന്ന പുനരധിവാസ പുന:സ്ഥാപന സ്‌കീമിനോട് ബന്ധപ്പെട്ട് ഏപ്രിൽ 7 ന് കൊരട്ടി ഗ്രാമപഞ്ചാത്ത് ഹാളിൽ ചേരാൻ നിശ്ചയിച്ചിരുന്ന പൊതുവിചാരണ മാറ്റിവച്ചതായി ഡെപ്യൂട്ടി കളക്ടർ എൽഎ അറിയിച്ചു. പുതുക്കിയ തീയതി പിന്നീടറിയിക്കും.
 

കോവിഡ് പ്രതിരോധത്തിന്റെ ഭാഗമായി റേഷൻ കാർഡുടമകൾക്ക് നൽകുന്ന സൗജന്യ റേഷൻ വിതരണത്തിൽ തൂക്കത്തിൽ കൃത്രിമം നടന്നതായി ബോധ്യപ്പെട്ടാൽ കർശന നടപടി സ്വീകരിക്കുമെന്ന് ഉത്തരമേഖലാ ഡെപ്യൂട്ടി റേഷനിംഗ് കൺട്രോളർ അറിയിച്ചു. ഇത് സംബന്ധിച്ച പരാതികൾ ഗൗരവമായി പരിശോധിക്കും. കാർഡുടമകൾക്ക് ബില്ലുകൾ വാങ്ങേണ്ടതും ബില്ല് പ്രകാരമുളള അളവിൽ ഭക്ഷ്യധാന്യം ലഭിക്കുന്നുവെന്ന് ഉറപ്പുവരുത്തേണ്ടതുമാണെന്നും കൺട്രോളർ അറിയിച്ചു.  

ജില്ലയിൽ ഒരാൾക്ക് കൂടി കോവിഡ് സ്ഥിരീകരിച്ചു. രോഗബാധിതനായ 36 കാരൻ മെഡിക്കൽ കോളേജ് ആശുപത്രിയിൽ ചികിത്സയിലാണ്
വീടുകളിൽ 14033 പേരും ആശുപത്രികളിൽ 40 പേരും ഉൾപ്പെടെ ആകെ 14073 പേരാണ് നിരീക്ഷണത്തിലുളളത്. വെളളിയാഴ്ച (ഏപ്രിൽ 3) 194 പേരെയാണ് പുതുതായി വീടുകളിൽ നിരീക്ഷണത്തിൽ കഴിയാൻ നിർദ്ദേശിച്ചിട്ടുളളത്. 11 പേരെ ആശുപത്രിയിൽ പ്രവേശിപ്പിച്ചു. 8 പേരെ ഡിസ്ചാർജ്ജ് ചെയ്തു.

കോവിഡ് 19ന്റെ പശ്ചാത്തലത്തില്‍ അളവ്തൂക്ക നിയമലംഘനം സംബന്ധിച്ച പരാതികളെ തുടര്‍ന്ന് ലീഗല്‍ മെട്രോളജി വകുപ്പ് റാന്നി താലൂക്കിലെ റേഷന്‍ കടകള്‍ കേന്ദ്രീകരിച്ച് പരിശോധന നടത്തി. അളവില്‍ കുറച്ച് വില്‍പ്പന നടത്തിയതിന് ഒരു വ്യാപാരിക്കെതിരെ കേസെടുത്തു. പരിശോധനയില്‍ ഇന്‍സ്‌പെക്ടര്‍ കെ.ജി സുജിത്, ഇന്‍സ്‌പെക്ടിംഗ് അസിസ്റ്റന്റ് വി.ആര്‍.സന്തോഷ് കുമാര്‍, കെ.കെ.അജയകുമാര്‍ എന്നിവര്‍ പങ്കെടുത്തു. വരും ദിവസങ്ങളില്‍ പരിശോധന തുടരുമെന്ന് ലീഗല്‍ മെട്രോളജി അധികൃതര്‍ അറിയിച്ചു.

20 തദ്ദേശ സ്ഥാപനങ്ങളുടെ പദ്ധതികള്‍ക്ക്  അംഗീകാരം 

തദ്ദേശ സ്വയംഭരണസ്ഥാപനങ്ങള്‍ സര്‍ക്കാര്‍ നിര്‍ദ്ദേശിച്ചിരിക്കുന്ന പന്ത്രണ്ടിന പരിപാടികള്‍കൂടി ഉള്‍പ്പെടുത്തി പ്രോജക്ട് നല്‍കിയാലേ ഡി പി സി അംഗീകരിക്കുകയുള്ളു എന്ന് ജില്ലാ പഞ്ചായത്ത് പ്രസിഡന്റും ഡി പി സി ചെയര്‍പേഴ്‌സണുമായ അന്നപൂര്‍ണാ ദേവി പറഞ്ഞു. പഞ്ചായത്ത് പ്രസിഡന്റിന്റെ ചേംബറില്‍ ചേര്‍ന്ന ഡിപിസി യില്‍ സംസാരിക്കുകയായിരുന്നു അദ്ദേഹം.

കേരള ബീഡി-ചുരുട്ട്് തൊഴിലാളി ക്ഷേമപദ്ധതിയില്‍ 2020 ഫെബ്രുവരി വരെ അംശദായം അടച്ച് അംഗത്വം നിലനിര്‍ത്തിയ രജിസ്ട്രേഡ് തൊഴിലാളികള്‍ അവരുടെ പേര് വിവരം, ക്ഷേമനിധി അംഗത്വ നമ്പര്‍, ബാങ്ക് അക്കൗണ്ട് നമ്പര്‍, ഐ.എഫ്.എസ്.സി. കോഡ്, ആധാര്‍ നമ്പര്‍ എന്നീ വിവരങ്ങള്‍ ബന്ധപ്പെട്ട  സ്ഥാപനമുടമകളുടെ സാക്ഷ്യപത്രം സഹിതം  ഏപ്രില്‍ 20- നകം  ഇ-മെയില്‍ മുഖേന അയച്ചുതരണമെന്ന്  ചീഫ് എക്സിക്യൂട്ടീവ് ഓഫീസര്‍ അറിയിച്ചു. ഇ-മെയില്‍: beedi.worker@gmail.com.

കോവിഡ് 19 വ്യാപനത്തെ തുടര്‍ന്ന് ലോക്ക്ഡൗണ്‍ പ്രഖ്യാപിച്ച പശ്ചാത്തലത്തില്‍ ഗുരുതര രോഗങ്ങള്‍ ബാധിച്ച് ജീവന്‍ രക്ഷാമരുന്നുകള്‍ ലഭിക്കാന്‍ ബുദ്ധിമുട്ടുള്ള വ്യക്തികള്‍ക്ക് മരുന്നുകള്‍ എത്തിക്കുകയാണ് കേരള സംസ്ഥാന യുവജന കമ്മീഷന്‍. യുവജനകമ്മീഷന്റെ ആസ്ഥാനത്തേക്ക് വന്ന ഫോണ്‍ കോളിന്റെ അടിസ്ഥാനത്തില്‍ വിവരങ്ങള്‍ ശേഖരിച്ച് മരുന്നുകള്‍ ഫയര്‍ഫോഴ്സിന്റെ സഹായത്തോട് കൂടിയാണ് എത്തിക്കുന്നത്.

ആദ്യ ഘട്ട മരുന്ന് വിതരണത്തിനായി കാസര്‍ഗോഡ് വരെയുള്ള ജില്ലകളിലേക്കുള്ള ജീവന്‍രക്ഷാ മരുന്നുകളുമായി ഫയര്‍ ഫോഴ്സിന്റെ വാഹനം ഏ്പ്രില്‍ മൂന്നിന് രാവിലെ പുറപ്പെട്ടു.

കാര്‍ഡുടമകള്‍ ബില്ലുകള്‍ വാങ്ങി സൂക്ഷിക്കണം

കോവിഡ് 19 ന്റെ പശ്ചാത്തലത്തില്‍ റേഷന്‍ കാര്‍ഡുടമകള്‍ക്ക് നല്‍കുന്ന സൗജന്യ റേഷന്‍ വിതരണവുമായി ബന്ധപ്പെട്ട് തൂക്കത്തില്‍ കൃത്രിമം നടക്കുന്നതായി പരാതികള്‍ ലഭിക്കുന്നതായും കാര്‍ഡുടമകള്‍ ഇക്കാര്യത്തില്‍ ജാഗ്രത പാലിക്കണമെന്നും കോഴിക്കോട് ഉത്തരമേഖലാ  റേഷനിംഗ് ഡെപ്യൂട്ടി കണ്‍ട്രോളര്‍ അറിയിച്ചു.