ലോക്ക് ഡൗണില്‍ ജോലിയും കൂലിയും ഇല്ലാതായ അതിഥി തൊഴിലാളികള്‍ക്ക് ആശ്വാസമായി ജില്ലാ ഭരണകൂടം താമസ സ്ഥലത്ത് എത്തിച്ചു നല്‍കിയ ഭക്ഷ്യോത്പന്ന കിറ്റുകള്‍. തൊഴിലാളികള്‍ക്ക് അവരിഷ്ടപ്പെടുന്ന ഭക്ഷണം പാകം ചെയ്യുന്നതിനാവശ്യമായ സാധനങ്ങളടങ്ങിയ കിറ്റുകളാണ് വിതരണം ചെയ്യുന്നത്.  വില്ലേജ് ഓഫീസറും വാര്‍ഡ് കൗണ്‍സിലറുമടങ്ങുന്ന സംഘമാണ് കിറ്റുകള്‍ എത്തിക്കുന്നത്.

കോവിഡ് 19 ലോക്ക് ഡൗണ്‍ നിലനില്‍ക്കുന്ന സാഹചര്യത്തില്‍ ജില്ലയില്‍ അതിഥി തൊഴിലാളികളുടെ സംരക്ഷണം ഉറപ്പാക്കുന്നതിന്റെ ഭാഗമായി 3529 പേര്‍ക്കായി അഞ്ച് കിലോ അരി വീതം 17645 കിലോഗ്രാം അരിയും അവയ്ക്കാനുപാതികമായി ഉരുളക്കിഴങ്ങ്, സവാള, മുളകുപൊടി തുടങ്ങിയവ ജില്ലാ ഭരണകൂടം തഹസില്‍ദാര്‍ മുഖേന വിതരണം ചെയ്തതായി ജില്ലാ കളക്ടര്‍ പി.ബി നൂഹ് അറിയിച്ചു.  

പത്തനംതിട്ട ജില്ലയില്‍ ഇന്ന്(2) പുതുതായി ഒരാള്‍ക്ക് രോഗം സ്ഥിരീകരിച്ചു. ദുബായില്‍ നിന്ന് എത്തിയ തുമ്പമണ്‍ സ്വദേശിക്കാണ് രോഗം സ്ഥിരീകരിച്ചത്. ഈ വ്യക്തിയുടെ റൂട്ട് മാപ്പ് തയാറാക്കിയിട്ടുണ്ട്. ഇയാളുമായി നേരിട്ട് സമ്പര്‍ക്കമുളള 18 പേരേയും പരോക്ഷ സമ്പര്‍ക്കമുളള അഞ്ചു പേരേയും കണ്ടെത്തിയിട്ടുണ്ട്.  
പ്രോഗ്രാം ഓഫീസര്‍മാരുടെയും മാനേജ്‌മെന്റ് ടീം ലീഡര്‍മാരുടെയും പ്ലാനിംഗ് മീറ്റിംഗ്, ജില്ലാ മെഡിക്കല്‍ ഓഫീസറുടെ ചേമ്പറില്‍ കൂടി.
ജനറല്‍ ആശുപത്രി പത്തനംതിട്ടയില്‍ 14 പേരും, ജില്ലാ ആശുപത്രി കോഴഞ്ചേരിയില്‍ എട്ടു പേരും നിലവില്‍ ഐസൊലേഷനില്‍ ഉണ്ട്.

ജില്ലാ പോലീസ് മേധാവിയുടെ നിര്‍ദ്ദേശാനുസരണം ജനമൈത്രി പോലീസിന്റെ നേതൃത്വത്തില്‍ ജില്ലയിലെ വിവിധ പോലീസ് സ്‌റ്റേഷന്‍ പരിധിയില്‍ ഭക്ഷ്യ കിറ്റുകളും മറ്റും വിതരണം ചെയ്തുവരുന്നു. കൂടല്‍ ജനമൈത്രി പോലീസിന്റെ വകയായി സ്വരൂപിച്ച ഭക്ഷ്യകിറ്റുകള്‍ കലഞ്ഞൂരില്‍ അതിഥി തൊഴിലാളികള്‍ക്കും റാന്നി അടിച്ചിപ്പുഴ ആദിവാസി കോളനിയില്‍ റാന്നി ജനമൈത്രി പോലീസിന്റെ  നേതൃത്വത്തിലും കോയിപ്പുറത്ത് അതിഥി തൊഴിലാളികള്‍ക്ക് കോയിപ്രം ജനമൈത്രി പോലീസും ഭക്ഷ്യകിറ്റുകള്‍ വിതരണം ചെയ്തു.

ലോക്ഡൗണ്‍ നിയമലംഘനങ്ങള്‍ക്ക് ജില്ലയില്‍ രണ്ടുദിവസത്തിനിടെ (എപ്രില്‍ 1, 2) 624 കേസുകളിലായി 621 പേരെ അറസ്റ്റ് ചെയ്തു. 524 വാഹനങ്ങള്‍ പിടിച്ചെടുത്തതായും ജില്ലാ പോലീസ് മേധാവി കെ.ജി സൈമണ്‍ അറിയിച്ചു. പുളിക്കീഴ് വീട്ടില്‍ നിരീക്ഷണത്തില്‍ കഴിഞ്ഞിരുന്ന ഒരാള്‍ അത് ലംഘിച്ചു പുറത്തു പോയതിന്  എടുത്ത കേസ് ഉള്‍പ്പെടെയാണിത്.  വിദേശത്ത് നിന്നും ജില്ലയില്‍ മടങ്ങിയെത്തിയവരുടെ ട്രാവലേഴ്‌സ് ലിസ്റ്റ് വാട്‌സ്ആപ്പ് ഗ്രൂപ്പിലൂടെ പ്രചരിപ്പിച്ച സര്‍ക്കാര്‍ ഉദ്യോഗസ്ഥയ്ക്ക് എതിരെയും കേസ് രജിസ്റ്റര്‍ ചെയ്തു.

ജില്ലയില്‍ സാലറി ചലഞ്ചിന് തുടക്കമിട്ട് ഉമയനല്ലൂര്‍ സര്‍വീസ് സഹകരണ ബാങ്ക് ഭരണ സമിതി അംഗങ്ങളും ജീവനക്കാരും. 30 ജീവനക്കാരുടെ ഒരു മാസത്തെ ശമ്പളവും പ്രസിഡന്റിന്റെ ഓണറേറിയവും അലവന്‍സുകളും മെമ്പര്‍മാരുടെ സിറ്റിംഗ് ഫീയും ഉള്‍പ്പടെ 12,20,000 രൂപയാണ് മുഖ്യമന്ത്രിയുടെ ദുരിതാശ്വാസ നിധിയിലേക്ക് കൈമാറിയത്. കലക്‌ട്രേറ്റില്‍ നടന്ന ചടങ്ങില്‍ ബാങ്ക് പ്രസിഡന്റ് എസ് ഫത്തഹുദ്ദീന്‍ ചെക്ക് മന്ത്രി ജെ മേഴ്‌സിക്കുട്ടിയമ്മയ്ക്ക് കൈമാറി. ജില്ലാ കലക്ടര്‍ ബി അബ്ദുല്‍ നാസറിന്റെ സാന്നിധ്യത്തില്‍ നടന്ന ചടങ്ങില്‍ ബാങ്ക് സെക്രട്ടറി കെ കെ സതികുമാരി, ഭരണസമിതി അംഗം എ എം ഹാഷിം എന്നിവരും പങ്കെടുത്തു.
 

ജില്ലയിലെ കോവിഡ് പ്രതിരോധ നടപടികള്‍ വിലയിരുത്തുന്നതിനായി നടത്തുന്ന അവലോകന യോഗത്തില്‍ സൂം വീഡിയോ കോണ്‍ഫറന്‍സിംഗിലൂടെ മന്ത്രി കെ രാജുവും എം പി മാരും എം എല്‍ എ മാരും പങ്കെടുത്തു. സൗജന്യ റേഷന്‍ വിതരണം അതിഥി തൊഴിലാളികള്‍ക്കുള്ള ഭക്ഷണ സാമഗ്രികളുടെ വിതരണം, സമൂഹ അടുക്കളകള്‍, സന്നദ്ധ പ്രവര്‍ത്തകരുടെ വിന്യാസം, ഗൃഹനിരീക്ഷണ വാര്‍ഡുതല കമ്മിറ്റികളുടെ പ്രവര്‍ത്തനം, കോവിഡ് ട്രീറ്റ്‌മെന്റ് സെന്ററുകള്‍, കെയര്‍ സെന്ററുകള്‍ എന്നിവയുടെ പ്രവര്‍ത്തനം, വിവിധ വകുപ്പുകളുടെ ഏകോപനം തുടങ്ങിയ വിഷയങ്ങളാണ് കോണ്‍ഫറന്‍സില്‍ അവലോകനം ചെയ്തത്.

ജില്ലയില്‍  ഇന്നലെ (ഏപ്രില്‍ 02) 16,157 പേരാണ് ഗൃഹനിരീക്ഷണത്തില്‍ ഉള്ളത്. ഇതില്‍ 16 പേര്‍ വിദേശ പൗര•ാരാണ്. ദുബായില്‍ നിന്നുള്ള 1,750 പേര്‍ ഉള്‍പ്പെടെ ഗള്‍ഫ് മേഖലയില്‍ നിന്ന് തിരികെ എത്തിയ 5,640 സ്വദേശീയരും ഗൃഹനിരീക്ഷണത്തില്‍ ഉള്‍പ്പെടുന്നു. ഇന്നലെ  പുതുതായി ഗൃഹനിരീക്ഷണത്തില്‍ പ്രവേശിപ്പിക്കപ്പെട്ടവര്‍ 26 പേര്‍ മാത്രമാണ്. പുതുതായി പ്രവേശിക്കപ്പെട്ട നാലു പേര്‍ ഉള്‍പ്പെടെ ആശുപത്രിയില്‍ 14 പേര്‍ നിരീക്ഷണത്തില്‍ ഉണ്ട്. നാലു പേര്‍ ഡിസ്ചാര്‍ജ് ആയി.

കൊറോണ നിയന്ത്രണ പ്രവര്‍ത്തനങ്ങളുടെ ഭാഗമായി അന്തര്‍ സംസ്ഥാനത്തൊഴിലാളികളുടെ താമസസ്ഥലങ്ങളില്‍ സ്‌ക്രീനിംഗ് തുടരുന്നു. അഞ്ച് സിവില്‍ പോലിസ് ഓഫീസര്‍മാരും 35 ആരോഗ്യ പ്രവര്‍ത്തകരുമടങ്ങിയ അഞ്ച് സ്‌ക്വാഡുകള്‍ ഇന്ന് 50 സൈറ്റുകള്‍ സന്ദര്‍ശിക്കുകയും 413 പേരെ പരിശോധനയ്ക്ക് വിധേയമാക്കുകയും ചെയ്തു. ആരിലും രോഗലക്ഷണങ്ങള്‍ കണ്ടെത്തിയിട്ടില്ല.