സംസ്ഥാന ന്യൂനപക്ഷ കമ്മീഷന്റെ ആഭിമുഖ്യത്തില്‍ ഏകദിന സെമിനാര്‍ സംഘടിപ്പിക്കുന്നു. ഡിസംബര്‍ 14ന് ടാഗോര്‍ ഹാളില്‍ നടക്കുന്ന സെമിനാറില്‍ ജില്ലയിലെ എല്ലാ മഹല്ലുകളിലേയും ഭരവാഹികള്‍, ഖത്തീബ്മാര്‍, മദ്രസാധ്യാപകര്‍, മറ്റ് മുസ്്‌ലിം സമുദായ പ്രവര്‍ത്തകര്‍ എന്നിവര്‍ പങ്കെടുക്കും. നിയമസഭാ സ്പീക്കര്‍ പി. ശ്രീരാമകൃഷ്ണന്‍ സെമിനാര്‍ ഉദ്ഘാടനം ചെയ്യും. 
വിവിധ സംഘടനകളെ പ്രതിനിധീകരിച്ച് 600 പ്രതിനിധികള്‍ സെമിനാറില്‍ പങ്കെടുക്കും. രാവിലെ 9 മണിക്ക് രജിസ്‌ട്രേഷന്‍ ആരംഭിക്കും. കൂടുതല്‍ വിവരങ്ങള്‍ക്ക് 0471 2315122.
 

വാണിയംകുളം ഗ്രാമപഞ്ചായത്തില്‍ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയില്‍ ഉള്‍പ്പെടുത്തിയുളള കയര്‍ ഭൂവസ്ത്ര സംരക്ഷണപ്രവര്‍ത്തനത്തിന്‍റെ ജില്ലാതല ഉദ്ഘാടനം മുന്‍ എം.പി കൂടിയായ ബ്ലോക്ക് പഞ്ചായത്ത് പ്രസിഡന്‍റ്  എസ്.ശിവരാമന്‍ നിര്‍വ്വഹിച്ചു.  പഞ്ചായത്തിലെ  തൃക്കങ്ങോട്, ചോറോട്ടൂര്‍ വാര്‍ഡുകളിലൂടെ ഒഴുകുന്ന ആന്തൂര്‍ തോടാണ് കയര്‍ ഭൂവസ്ത്രമുപയോഗിച്ച് സംരക്ഷിക്കാന്‍ തുടങ്ങുന്നത്. തൃക്കങ്ങോട് വാര്‍ഡിലെ 550 മീറ്റര്‍ 1897.5 ച.മീറ്ററും ചോറോട്ടൂര്‍ വാര്‍ഡിലെ 350 മീറ്റര്‍ 1347.5 ച.മീറ്ററും കയര്‍ ഭൂവസ്ത്രമുപയോഗിച്ചാണ് സംരക്ഷിക്കുക.

പുതിയ സാങ്കേതികവിദ്യകള്‍ ഉപയോഗിച്ച് റോഡുകളും പാലങ്ങളും നിര്‍മിക്കുമെന്ന് പൊതുമരാമത്ത് വകുപ്പ് മന്ത്രി ജി സുധാകരന്‍. കാര്യക്ഷമവും പുത്തനുമായ ഇത്തരം സാങ്കേതിക വിദ്യകള്‍ പിന്തുടരാന്‍ കരാറുകാരും എന്‍ജിനീയര്‍മാരും ശ്രമിക്കണമെന്നും മന്ത്രി പറഞ്ഞു. കുന്നത്തുനാട് തൃക്കാക്കര നിയോജകമണ്ഡലങ്ങളിലെ തമ്മില്‍ ബന്ധിപ്പിക്കുന്ന  പടിഞ്ഞാറന്‍ മോറയ്ക്കാല യിലെ മാഞ്ചേരിക്കുഴി പാലത്തിന്റെ നിര്‍മാണോദ്ഘാടനം നിര്‍വഹിക്കുകയായിരുന്നു അദ്ദേഹം.

തിരുവന്തപുരം, കോഴിക്കോട് ഗവണ്‍മെന്റ് ഹോമിയോ മെഡിക്കല്‍ കോളേജുകളില്‍ 2017-2018 വര്‍ഷത്തെ സര്‍ട്ടിഫിക്കറ്റ് കോഴ്‌സ് ഇന്‍ ഫാര്‍മസിയില്‍ (ഹോമിയോപ്പതി) ഒഴിവുള്ള സീറ്റുകളിലേക്ക്  പ്രവേശനത്തിനുള്ള സ്‌പോട്ട് അലോട്ട്‌മെന്റ് എല്‍.ബി.എസ് സെന്റര്‍ ജില്ലാ ഫെസിലിറ്റേഷന്‍ സെന്ററുകളില്‍ ഡിസംബര്‍ 14 ന് നടത്തും. വെബ്‌സൈറ്റില്‍ പ്രസിദ്ധീകരിച്ച റാങ്ക് ലിസ്റ്റില്‍ ഉള്‍പ്പെട്ട അപേക്ഷകര്‍  രാവിലെ 10 മണിക്കു  ഹാജരാകണം. അലോട്ട്‌മെന്റ് ലഭിക്കുന്നവര്‍ അന്നു തന്നെ ഫീസ് അടച്ച് അതത്  കോളേജുകളില്‍ ഡിസംബര്‍ 15 നകം  പ്രവേശനം നേടണം. ഫോണ്‍: 04712560362,63,64,65        
പി.എന്‍.എക്‌സ്.5284/17
 

കൊച്ചി: ഓഖി ചുഴലിക്കാറ്റിനെ തുടര്‍ന്ന് കടലില്‍ അകപ്പെട്ട കൊച്ചിയില്‍ നിന്നു പുറപ്പെട്ട 111 പേര്‍ കൂടി ഇന്നലെ (ഡിസംബര്‍ 11) കൊച്ചിയില്‍ തിരിച്ചെത്തി. 13 ബോട്ടുകളും തിരിച്ചെത്തി. ഇതോടെ ആകെ തിരിച്ചെത്തിയ ബോട്ടുകളുടെ എണ്ണം 213 ആയി. ഇതുവരെ ആകെ  2312 മത്സ്യത്തൊഴിലാളികളും തിരിച്ചെത്തി. 23 ബോട്ടുകളാണ് ഇനി തിരിച്ചെത്താനുള്ളത്. ഇന്നലെ (ഡിസംബര്‍ 11 ) രാവിലെയും രാത്രിയുമായി രണ്ട് മൃതദേഹങ്ങള്‍ കൂടി കോസ്റ്റ് ഗാര്‍ഡ് കണ്ടെത്തിയിട്ടുണ്ട്. ഇതില്‍ ഒന്ന് എറണാകുളം ജനറല്‍ ആശുപത്രിയില്‍ സൂക്ഷിച്ചിട്ടുണ്ട്.

കൊച്ചി: ജില്ലാ പദ്ധതിയുടെ ഭാഗമായി ഡിസംബര്‍ 13-ന് രാവിലെ 10-ന് ആസൂത്രണ സമിതി കോണ്‍ഫറന്‍സ് ഹാളില്‍ നടത്താനിരുന്ന ജില്ലാ വികസന സെമിനാര്‍ ചില സാങ്കേതിക കാരണങ്ങളാല്‍ മാറ്റിവച്ചു. പുതുക്കിയ തീയതി പിന്നീട് അറിയിക്കും.  ഡിസംബര്‍ 21-ന് സംസ്ഥാന ആസൂത്രണ ബോര്‍ഡ് നിയോഗിച്ച റിസോഴ്‌സ് ടീമിന്റെയും മറ്റ് വിദഗ്ധരുടെയും സാന്നിദ്ധ്യത്തില്‍ ബന്ധപ്പെട്ട വിഷയ മേഖല ഉപസമിതി കണ്‍വീനര്‍മാര്‍ ജില്ലാ പദ്ധതിയുടെ കരട് റിപ്പോര്‍ട്ട് അവതരിപ്പിക്കേണ്ടതാണ്. യോഗത്തിന്റെ സമയവും സ്ഥലവും പിന്നീട് അറിയിക്കും

കൊച്ചി: ജില്ലാ വികസന സമിതി യോഗം ഡിസംബര്‍ 30-ന് രാവിലെ 11-ന് കാക്കനാട് കളക്ടറേറ്റ് കോണ്‍ഫറന്‍സ് ഹാളില്‍ ചേരും. 

പരമ്പരാഗത മേഖലയെ സംരക്ഷിച്ച് ആധുനികവത്കരണം നടപ്പാക്കും.

കൊച്ചി: തൊഴില്‍ ലഭ്യതയും ഉത്പന്ന വൈവിധ്യവത്കരണവും ഉറപ്പാക്കി കയര്‍ വ്യവസായം പുനരുജ്ജീവിപ്പിക്കാനും കയര്‍ ഉത്പന്ന വിപണി വിപുലപ്പെടുത്താനും നടപടി സ്വീകരിക്കുമെന്ന് മുഖ്യമന്ത്രി പിണറായി വിജയന്‍. കയര്‍ഭൂവസ്ത്ര വിതാനം പരിപാടിയുടെ സംസ്ഥാനതല ഉദ്ഘാടനം വടക്കേക്കര മൂത്തകുന്നം ബാങ്ക് ഓഫ് ഇന്ത്യ മൈതാനത്ത് നിര്‍വഹിക്കുകയായിരുന്നു അദ്ദേഹം. 

    ശബരിമല തീര്‍ഥാടനം  പ്രമാണിച്ച് ഇന്ന് (12ന് ) രാത്രി തുറന്നു പ്രവര്‍ത്തിക്കുന്ന മെഡിക്കല്‍ സ്റ്റോറുകള്‍:    മുത്തൂറ്റ് മെഡിക്കല്‍ സെന്‍റര്‍ പത്തനംതിട്ട, പഴഞ്ഞിയില്‍  മെഡിക്കല്‍സ്  കോഴഞ്ചേരി, അമൃത മെഡിക്കല്‍സ് കോന്നി, മേഘ  മെഡിക്കല്‍സ് അടൂര്‍, നീതി മെഡിക്കല്‍ സ്റ്റോര്‍ കുളനട, കല്ലാത്തുചിറയില്‍ മെഡിക്കല്‍സ് തിരുവല്ല, ന്യൂ മെഡിക്കല്‍സ് റാന്നി. പ്രതിഭ  മെഡിക്കല്‍സ് മഠത്തുമൂഴി.