മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി ജില്ലാ ഓഫീസില്‍ ഐ.ടി.പ്രൊഫഷണല്‍ തസ്തികയില്‍ കരാര്‍ അടിസ്ഥാനത്തില്‍ നിയമിക്കുന്നതിന് എസ്.ടി. വിഭാഗത്തില്‍പ്പെട്ടവരില്‍ നിന്ന് അപേക്ഷ ക്ഷണിച്ചു.  ബിരുദവും പി.ജി.ഡി.സി.എ.യുമോ എം.സി.എ. യോ എം.എസ്.സി. കമ്പ്യൂട്ടര്‍ സയന്‍സോ യോഗ്യതയുള്ളവര്‍ക്ക് അപേക്ഷിക്കാം.  അപേക്ഷ ജൂണ്‍ 20 നകം ജോയിന്റ് പ്രോഗ്രാം കോ-ഓര്‍ഡിനേറ്റര്‍, മഹാത്മാഗാന്ധി എന്‍.ആര്‍.ഇ.ജി.എ. ജില്ലാ ഓഫീസ്, കളക്‌ട്രേറ്റ്, സിവില്‍ സ്റ്റേഷന്‍, കല്‍പ്പറ്റ എന്ന വിലാസത്തില്‍ ലഭിക്കണം. ഫോണ്‍ 04936 205959.

ജില്ലാ സായുധ സേന ക്യാമ്പ് ഓഫീസില്‍ സൂക്ഷിച്ചിട്ടുള്ള ഉപയോഗശൂന്യമായ 13 വാഹനങ്ങള്‍ ജൂണ്‍ 25 ന് രാവിലെ 11 ന് ക്യാമ്പില്‍ പരസ്യമായി ലേലം ചെയ്യും. ഇതിനുള്ള ദര്‍ഘാസുകള്‍ 24ന് വൈകീട്ട് 4നകം ലഭിക്കണം.

മീനങ്ങാടി  ഐ.എച്ച്.ആര്‍.ഡി  മോഡല്‍  കോളേജില്‍  അസിസ്റ്റന്റ് പ്രൊഫസര്‍, കമ്പ്യൂട്ടര്‍ പ്രോഗ്രാമര്‍ എന്നീ തസ്തികകളിലേക്ക് താത്കാലിക നിയമനം നടത്തുന്നു.  അസിസ്റ്റന്റ് പ്രൊഫസര്‍ (കൊമേഴ്‌സ്), അസിസ്റ്റന്റ് പ്രൊഫസര്‍ (കമ്പ്യൂട്ടര്‍ സയന്‍സ്), കമ്പ്യൂട്ടര്‍ പ്രോഗ്രാമര്‍ എന്നീ തസ്തികകളിലേക്കാണ് നിയമനം. കൂടിക്കാഴ്ച യഥാക്രമം ജൂണ്‍ 19 ന് രാവിലെ 9.30, 18 ന് രാവിലെ 9.30, 18 ന് ഉച്ചയ്ക്ക് 1ന് എന്നിങ്ങനെ നടക്കും. ഉദ്യോഗാര്‍ത്ഥികള്‍ അസല്‍ സര്‍ട്ടിഫിക്കറ്റും പകര്‍പ്പുമായി ഹാജരാകണം. ഫോണ്‍  04936246446,  8547005077.

ജില്ലയിലെ 500 ഓളം ഭൂരഹിത ആദിവാസി കുടുംബങ്ങള്‍ക്ക് നല്‍കാന്‍ ഭൂമി കണ്ടെത്തിയിട്ടുണ്ടെന്നും ആയത് രണ്ട് മാസത്തിനകം വിതരണം ചെയ്യുമെന്നും ജില്ലയിലെ ആദിവാസി ഭൂമി പ്രശ്‌നം ചര്‍ച്ച ചെയ്യാന്‍ മുഖ്യമന്ത്രിയുടെ അധ്യക്ഷതിയില്‍ തിരുവനന്തപുരത്ത് ചേര്‍ന്ന യോഗത്തില്‍ തീരുമാനമായി. സി കെ ശശീന്ദ്രന്‍ എം എല്‍ എ കത്ത് നല്‍കിയതിന്റെ അടിസ്ഥാനത്തിലാണ് യോഗം വിളിച്ചത്.

കോവിഡ്  19ന്റെ പശ്ചാത്തലത്തില്‍ ക്വാറന്റയിനില്‍ പോകേണ്ടി വന്ന ക്ഷീര കര്‍ഷകരുടെ ഉരുക്കള്‍ക്ക് സൗജന്യ കാലിത്തീറ്റ ലഭ്യമാക്കുന്ന മൃഗസംരക്ഷണ വകുപ്പിന്റെ പദ്ധതിയുടെ ജില്ലാതല ഉദ്ഘാടനം സി.കെ.ശശീന്ദ്രന്‍ എം.എല്‍.എ. ക്ഷീര കര്‍ഷകനായ മാത്യു അപ്പച്ചന് നല്കി നിര്‍വഹിച്ചു. ജില്ലയ്ക്ക് ആദ്യഘട്ടമായി അനുവദിച്ച 58,57,600 രൂപ ഉപയോഗിച്ച് വയനാട്ടിലെ   892   കര്‍ഷകരുടെ  2092 ഉരുക്കള്‍ക്ക് തീറ്റ ലഭ്യമാക്കുമെന്ന് പദ്ധതി വിശദീകരിച്ച ജില്ലാ മൃഗസംരക്ഷണ ഓഫീസര്‍ ഡോ.പി.ആര്‍.പ്രദീപ്കുമാര്‍ അറിയിച്ചു.

കോവിഡ് 19 ന്റെ പശ്ചാത്തലത്തില്‍ വിദ്യാഭ്യാസ വകുപ്പ് ഒരുക്കിയ ഓണ്‍ലൈന്‍ ക്ലാസുകള്‍ കുട്ടികളിലേക്കെത്തിക്കുന്നതിന് ടി.വി ചലഞ്ചുമായി ജില്ലാ വ്യവസായ വാണിജ്യ കേന്ദ്രം. ടെലിവിഷന്‍ സൗകര്യമില്ലാത്ത കുട്ടികള്‍ക്ക് സൗജന്യമായി  ടെലിവിഷന്‍ വിതരണം ചെയ്യുകയാണ് ചലഞ്ചിന്റെ ലക്ഷ്യം. ഇതിന്റെ ഭാഗമായി ശേഖരിച്ച 125 ടിവി  സെറ്റുകള്‍ ജില്ലാ വ്യവസായ കേന്ദ്രം ജനറല്‍ മാനേജര്‍ പി .എസ് സുരേഷ് കുമാര്‍ ജില്ലാ കളക്ടര്‍ ഡോ.അദീല അബ്ദുള്ളയ്ക്ക് കൈമാറി. വ്യവസായികള്‍, സഹകരണ സംഘങ്ങള്‍,  ചെറുകിട അസോസിയേഷനുകള്‍, സ്‌പോണ്‍സര്‍മാര്‍ തുടങ്ങിയവര്‍ സംഭാവന ചെയ്തതാണ് ടിവികള്‍.

കോവിഡ് 19 രോഗ പ്രതിരോധ പ്രവര്‍ത്തനങ്ങളില്‍ വ്യാപൃതരായ ആരോഗ്യ വകുപ്പ് ഉദ്യോഗസ്ഥരുടെ  മാനസിക സംഘര്‍ഷം ലഘൂകരിക്കുന്നതിന്  ഹെല്‍പ് ലൈന്‍ സംവിധാനം. മൂന്നു മാസത്തിലധികമായി ആരോഗ്യ വകുപ്പ് ജീവനക്കാര്‍ മുഴുവന്‍ സമയം ജോലിയിലാണ്. വിവിധങ്ങളായ മാനസിക സംഘര്‍ഷങ്ങളിലൂടെ കടന്നു പോകേണ്ട സാഹചര്യങ്ങള്‍ ഇതിനിടയില്‍ ഉണ്ടാകുന്നുണ്ട്. ഇക്കാര്യങ്ങള്‍ പരിഗണിച്ചാണ് ഹെല്‍പ് ലൈന്‍ സംവിധാനം ഒരുക്കിയിരിക്കുന്നത്. രാവിലെ 10 മുതല്‍ വൈകിട്ട് 7 വരെ ഡോക്ടറോടും സൈക്കോളജിസ്റ്റനോടും സംസാരിക്കാം. ഫോണ്‍ 7025713204.

കോവിഡ് 19 രോഗ വ്യാപനത്തിന്റെ പശ്ചാത്തലത്തില്‍ ഞായറാഴ്ചകളില്‍ ഏര്‍പ്പെടുത്തിയിരുന്ന സമ്പൂര്‍ണ്ണ ലോക് ഡൗണില്‍ നിന്നും ആരാധനാലയങ്ങളിലേക്കും പരിക്ഷാ കേന്ദ്രങ്ങളിലേക്കും പോകുന്നവര്‍ക്ക് ഇളവ് അനുവദിച്ചു. മെഡിക്കല്‍, ഡെന്റല്‍ കോളേജുകളില്‍ പ്രവേശനത്തിന് പോകുന്നതിനും ഇളവുണ്ടാകും. അഡ്മിറ്റ് കാര്‍ഡ് പാസ് ആയി പരിഗണിക്കും.

കോവിഡ് 19 രോഗ പ്രതിരോധത്തിന്റെ ഭാഗമായി നിരീക്ഷണത്തില്‍ കഴിയുകയായിരുന്ന 230 പേര്‍ ശനിയാഴ്ച നിരീക്ഷണ കാലം പൂര്‍ത്തിയാക്കി. പുതുതായി നിരീക്ഷണത്തിലായ 329 പേര്‍ ഉള്‍പ്പെടെ നിലവില്‍ 3690 പേരാണ് ജില്ലയില്‍ നിരീക്ഷണത്തിലുള്ളത്.  ഇതില്‍ 33 പേരാണ് മാനന്തവാടി ജില്ലാ ആശുപത്രിയിലുള്ളത്. രോഗം സ്ഥിരീകരിച്ച് 20 പേര്‍ മാനന്തവാടി ജില്ലാ ആശുപത്രിയിലും  ഒരാള്‍ കോഴിക്കോട് ബീച്ച് ആശുപത്രിയിലുമാണ് ചികിത്സയില്‍ കഴിയുന്നത്. ജില്ലയില്‍ നിന്നും ഇതുവരെ  പരിശോധനയ്ക്ക് അയച്ച 2458 ആളുകളുടെ സാമ്പിളുകളില്‍ 2058  ഫലം ലഭിച്ചു. 395 സാമ്പിളുകളുടെ ഫലം ലഭിക്കുവാന്‍ ബാക്കിയുണ്ട്.