കടുങ്ങാത്ത്കുണ്ട് - എടരിക്കോട് റോഡില്‍ പൂന്തോട്ടപ്പടി മുതല്‍ മമ്മാലിപ്പടി വരെ പ്രവൃത്തി നടക്കുന്നതിനാല്‍ ഇതിലൂടെയുള്ള ഗതാഗതം മാര്‍ച്ച് 12 മുതല്‍ നിരോധിച്ചു. വാഹനങ്ങള്‍ തിരൂര്‍ - എടരിക്കോട് വഴിയോ എടിക്കോട് - പുത്തനത്താണി ദേശീയപാത വഴിയോ പോകണമെന്ന് എക്‌സിക്യൂട്ടീവ് എഞ്ചിനീയര്‍ അറിയിച്ചു.

     മൃഗസംരക്ഷണ വകുപ്പിന്റെ ആഭിമുഖ്യത്തില്‍ മലമ്പുഴ മൃഗസംരക്ഷണ   പരിശീലന കേന്ദ്രത്തില്‍  മാര്‍ച്ച് 14,15,16 തിയ്യതികളില്‍ പശു വളര്‍ത്തലില്‍ സൗജന്യ പരിശീലനം സംഘടിപ്പിക്കുന്നു. പങ്കെടുക്കുവാന്‍ താല്‍പര്യമുളളവര്‍ നേരിട്ടോ ഫോണ്‍ മുഖേനയോ പേര് രജിസ്റ്റര്‍ ചെയ്യണം. (ഫോണ്‍ നമ്പര്‍ 0491 - 2815454 ) രജിസ്റ്റര്‍  ചെയ്തവര്‍ ആധാര്‍ നമ്പറുമായി  14ന്   രാവിലെ  10 നകം പരിശീലന കേന്ദ്രത്തില്‍ എത്തണം.

വിജിലന്‍സ് ആന്‍ഡ് ആന്റി കറപ്ഷന്‍ ബ്യൂറോ 'അഴിമതി രഹിത മലപ്പുറം' എന്ന ക്യാമ്പയിന്റെ ഭാഗമായി ജില്ലയിലെ വിവിധ കോളേജുകളില്‍ നടത്തിയ ക്വിസ്സ് മത്സരങ്ങളിലെ വിജയികള്‍ക്കുള്ള സമ്മാനങ്ങള്‍ വിതരണം ചെയ്തു. വിജിലന്‍സ് ഉത്തര മേഖല പൊലീസ് സൂപ്രണ്ട് ഉമ  നിര്‍വ്വഹിച്ചു. പരിപാടിയില്‍ യൂണിറ്റ് മേധാവി എ. രാമചന്ദ്രന്‍ അധ്യക്ഷത വഹിച്ചു. ഇന്‍സ്‌പെക്ടര്‍ എം. ഗംഗാധരന്‍, സിവില്‍ പൊലീസ് ഓഫീസര്‍ ഹനീഫ, ടി.ടി ബദറുല്‍ ജമാല്‍ എന്നിവര്‍ സംസാരിച്ചു.  

കേന്ദ്ര സര്‍ക്കാറിനു കീഴില്‍ പ്രവര്‍ത്തിക്കുന്ന ജന്‍ ശിക്ഷണ്‍ സന്‍സ്ഥാന്‍- മലപ്പുറം,  വനിതാദിനം ആചരിച്ചു. ജെ എസ് എസ് ഡയറക്ടര്‍ വി. ഉമ്മര്‍കോയയുടെ ആദ്ധ്യക്ഷതയില്‍ ജെ എസ് എസ് വൈസ് ചെയര്‍മാന്‍ അബ്ദു സമദ് സീമാടന്‍ ഉദ്ഘാടനം ചെയ്തു. ജെ എസ് എസ് ഡോക്യുമെന്റേഷന്‍ ഓഫീസര്‍ സുകുമാരി.എന്‍ .കെ സ്വാഗതം പറഞ്ഞു. പരിപാടിയില്‍ അബ്ദുള്‍ ബഷീര്‍ ആശംസ അറിയിച്ചു .'ആധുനിക ലോകത്തിലെ വനിത' എന്ന വിഷയത്തെക്കുറിച്ച് പാനല്‍ ചര്‍ച്ചയും, സെമിനാറും നടത്തി. കുടുംബശ്രീ പ്രവര്‍ത്തകരായ സതി ബിജു, ഷീജ എന്നിവര്‍ നേതൃത്വം നല്‍കി. ജെ  എസ് എസ്സിലെ വിവിധ പരിശീലനങ്ങളിലെ ഗുണഭോക്താക്കള്‍ പങ്കെടുത്തു.

നെഹ്‌റു യുവ കേന്ദ്രയുടെ ആഭിമുഖ്യത്തില്‍ സാര്‍വ്വദേശീയ വനിതാ ദിനാചരണ പരിപാടി സംഘടിപ്പിച്ചു.  ജില്ലാ മെഡിക്കല്‍ ഓഫീസര്‍ ഡോ. കെ സക്കീന ഉദ്ഘാടനം ചെയ്തു. വികസന പ്രവര്‍ത്തനങ്ങളുടെ ഗുണഫലം താഴെ തട്ടില്‍ എത്തിക്കുന്നതിന് സ്ത്രീ സമൂഹം വഹിക്കുന്ന പങ്ക് നിര്‍ണായകമാണെന്ന് ഡി.എം.ഒ അഭിപ്രായപ്പെട്ടു. നെഹ്‌റു യുവ കേന്ദ്ര ഹാളില്‍ നടന്ന ചടങ്ങില്‍ ജില്ലാ യൂത്ത് കോര്‍ഡിനേറ്റര്‍ കെ കുഞ്ഞഹമ്മദ് അദ്ധ്യക്ഷനായി. നാഷണല്‍ സര്‍വീസ് സ്‌കീം ജില്ലാ കോര്‍ഡിനേറ്റര്‍ എം.പി സമീറ, പി അസ്മാബി , ബുഷ്‌റ ബീഗം, പി. സീന, സി.എച് സഹ്‌ല, പി.രശ്മി, ഇ.കെ മറിയുമ്മ, നവ്യ എന്നിവര്‍ സംസാരിച്ചു.

വനിതാ ദിനത്തില്‍ കുടുംബശ്രീ മിഷന്‍ സംഘടിപ്പിച്ച പ്രതിധ്വനി എന്ന ടോക് ഷോ പരിപാടി ജില്ലാ പഞ്ചായത്ത് വൈസ് പ്രസിഡന്റ് ഷക്കീന പുല്‍പ്പാടന്‍ ഉദ്ഘാടനം ചെയ്തു. ക്ഷേമകാര്യ സ്‌ററാന്റിംഗ് കമ്മിറ്റി ചെയര്‍പേഴ്‌സണ്‍ ഹാജറുമ്മ ടീച്ചര്‍ അധ്യക്ഷത വഹിച്ചു. ഓഖി പുനരധിവാസത്തിനായി കുടുംബശ്രീ പ്രവര്‍ത്തകര്‍ നല്‍കിയ സേവനങ്ങള്‍ പ്രശംസനീയമാണെന്ന് ജില്ലാ മിഷന്‍ കോ ഓര്‍ഡിനേറ്റര്‍ സി. കെ ഹേമലത പറഞ്ഞു. 32 ലക്ഷം രൂപ വിലവരുന്ന ഭക്ഷ്യ വസ്തുക്കള്‍ ജില്ലയിലെ ഓഖി ദുരിതമുണ്ടായ 10 മേഖലകളില്‍ വിതരണം ചെയ്യാന്‍ കുടുംബശ്രീക്കു സാധിച്ചതായും അവര്‍ പറഞ്ഞു.  

ഭരണങ്ങാനം ഗ്രാമ പഞ്ചായത്തിലെ 2018-19 സാമ്പത്തിക വര്‍ഷത്തെ പദ്ധതി രൂപീകരണവുമായി ബന്ധപ്പെട്ട വികസന സെമിനാര്‍ മാര്‍ച്ച് ഒന്‍പതിന് ഉച്ചകഴിഞ്ഞ് രണ്ടിന് ഗ്രാമപഞ്ചായത്ത് ഹാളില്‍ നടക്കും. യോഗത്തില്‍ എല്ലാ വര്‍ക്കിംഗ് ഗ്രൂപ്പ് അംഗങ്ങളും ഹാജരാകണം.