കരിപ്പൂര്‍ വിമാനദുരന്തവുമായി ബന്ധപ്പെട്ട്  രക്ഷാപ്രവര്‍ത്തനത്തില്‍ പങ്കെടുത്തവര്‍ കോവിഡ് സാഹചര്യത്തില്‍ സ്വയം നിരീക്ഷണത്തില്‍ നില്‍ക്കണമെന്ന് ജില്ലാ മെഡിക്കല്‍ ഓഫീസര്‍ ഡോ ജയശ്രീ വി അറിയിച്ചു. കൂടുതല്‍ വിവരങ്ങള്‍ക്ക് ജില്ലാ മെഡിക്കല്‍ ഓഫീസിലെ കണ്‍ട്രോള്‍ സെല്ലുമായി ബന്ധപ്പെടാം. കണ്‍ട്രോള്‍ സെല്‍ നമ്പറുകള്‍ 0483-2733251, 3252,3253, 2737857,  0495-2371471, 2376063.
 

ജില്ലയിൽ മഴക്കെടുതിയെ തുടർന്ന് 37 ക്യാമ്പുകളിലായി  699 പേരെ  മാറ്റിപ്പാർപിച്ചു.  ക്വാറന്റൈനില്‍ കഴിയുന്നവര്‍ക്കായി പ്രത്യേകം ടോയ്‌ലറ്റ് സൗകര്യമുള്ള ക്യാമ്പുകള്‍ തയ്യാറാക്കിയിട്ടുണ്ട്. കോവിഡ് പോസിറ്റീവ് ആയവരെ ട്രീന്റ്‌മെന്റ് സെന്ററിലേക്കാണ് മാറ്റിയത്. നാല് താലൂക്കുകളിലായി 50 ലക്ഷം രൂപയുടെ പ്രാഥമിക നാശനഷ്ടം കണക്കാക്കുന്നു.

മലയോര ഹൈവേയുടെ ഭാഗമായുള്ള കോടഞ്ചേരി മുതല്‍ കക്കാടംപൊയില്‍ വരെയുള്ള റീച്ചിന്റെ പ്രവൃത്തി ഉദ്ഘാടനം ചൊവ്വാഴ്ച (ആഗസ്റ്റ് 11) രാവിലെ 11ന് പുല്ലൂരാംപാറയില്‍ നടക്കും. പൊതുമരാമത്ത് വകുപ്പു മന്ത്രി ജി.സുധാകരന്‍ വീഡിയോ കോണ്‍ഫറന്‍സ് വഴിയാണ് ഉദ്ഘാടനം നിര്‍വഹിക്കുക. ജോര്‍ജ് എം തോമസ് എംഎല്‍എ  അധ്യക്ഷത വഹിക്കും.

കുന്ദമംഗലം മിനി സിവിൽ സ്റ്റേഷൻ ഉദ്ഘാടനം ഇന്ന് (ആഗസ്റ്റ് 10) രാവിലെ 10 മണിക്ക് വീഡിയോ കോൺഫറൻസ് മുഖേന മുഖ്യമന്ത്രി പിണറായി വിജയൻ നിർവ്വഹിക്കും.. റവന്യൂ വകുപ്പ് മന്ത്രി ഇ. ചന്ദ്രശേഖരൻ അദ്ധ്യക്ഷത വഹിക്കുന്ന ചടങ്ങിൽ പി.ടി.എ റഹീം എം.എൽ.എ സഹ അദ്ധ്യക്ഷനായിരിക്കും. വിവിധ ഭാഗങ്ങളിലായി ഒറ്റപ്പെട്ടു നിൽക്കുന്ന സർക്കാർ ഓഫീസുകൾ ഒരു മേൽക്കൂരയ്ക്കു കീഴിൽ കൊണ്ടുവരിക എന്ന ലക്ഷ്യത്തോടെയാണ് കുന്ദമംഗലത്ത് മിനി സിവിൽ സ്റ്റേഷൻ ഒരുക്കിയത്.  50 സെൻറ് സ്ഥലത്തുള്ള മിനി സിവിൽ സ്റ്റേഷൻ കെട്ടിട നിര്‍മ്മാണ പ്രവൃത്തി രണ്ട് ഘട്ടമായാണ് പൂര്‍ത്തീകരിച്ചത്.

ഇന്ന് പുതുതായി വന്ന 486 പേര്‍ ഉള്‍പ്പെടെ  ജില്ലയില്‍ 13880 പേര്‍ നിരീക്ഷണത്തില്‍. ജില്ലയില്‍ ഇതുവരെ  80704 പേര്‍ നിരീക്ഷണം പൂര്‍ത്തിയാക്കി.