മലപ്പുറം ജില്ലയില്‍ പത്ര പ്രവര്‍ത്തക പെന്‍ഷന്‍, പത്രപ്രവര്‍ത്തകേതര പെന്‍ഷന്‍,ആശ്രിത പെന്‍ഷന്‍ എന്നിവ കൈപ്പറ്റുന്നവര്‍ ഗസറ്റഡ് ഓഫിസര്‍ സാക്ഷ്യപ്പെടുത്തിയ ലൈഫ് സര്‍ട്ടിഫിക്കറ്റ് നവംബര്‍ 25 നകം ജില്ലാ ഇന്‍ഫര്‍മേഷന്‍ ഓഫിസില്‍ ഹാജരാക്കണം.

    സംസ്ഥാന വ്യവസായ വാണിജ്യ വകുപ്പിന്റെ കീഴില്‍ മഞ്ചേരി, പയ്യനാടുളള കോമണ്‍ ഫെസിലിറ്റി സര്‍വ്വീസ് സെന്ററില്‍ റബ്ബര്‍ പാലില്‍ നിന്നും ഡ്രൈ റബ്ബറില്‍ നിന്നും ഉല്‍പന്നങ്ങള്‍ നിര്‍മ്മിച്ച് റബ്ബറധിഷ്ഠിത വ്യവസായങ്ങള്‍ ആരംഭിക്കാന്‍ താല്‍പര്യമുളളവര്‍ക്കുവേണ്ടി നവംബര്‍ 16 മുതല്‍ 18 വരെ പ്രായോഗിക പരിശീലന പരിപാടി നടത്തുന്നു.
താല്‍പര്യമുളളവര്‍ക്ക്  നവംബര്‍ 15-ാം തിയ്യതി വൈകുന്നേരം അഞ്ച്  വരെ പേര് രജിസ്റ്റര്‍ ചെയ്യാം. വിവരങ്ങള്‍ക്ക് അസിസ്റ്റന്റ് ഡയറക്ടര്‍,കോമണ്‍ ഫെസിലിറ്റി സര്‍വ്വീസ്  സെന്റര്‍, പയ്യനാട് (പി.ഒ), മഞ്ചേരി, മലപ്പുറം വിലാസവുമായി ബന്ധപ്പെടുക. ഫോണ്‍ :0483 2768507

സ്‌കോള്‍ കേരള മുഖേന മലപ്പുറം ഗവ. ഗേള്‍സ് ഹയര്‍ സെക്കന്‍ഡറി സ്‌കൂളില്‍ രജിസ്റ്റര്‍ ചെയ്തിട്ടുള്ള ഒന്നാം വര്‍ഷ ഹയര്‍ സെക്കന്‍ഡറി വിദ്യാര്‍ഥികളുടെ ഓറിയന്റേഷന്‍ ക്ലാസ് നവംബര്‍ 18ന് രാവിലെ 9.30ന് സ്‌കൂളില്‍ നടക്കും.  വിദ്യാര്‍ഥികള്‍ ഐഡന്റിറ്റി കാര്‍ഡ് സഹിതം എത്തണമെന്ന് പ്രിന്‍സിപ്പല്‍ അറിയിച്ചു.

കുട്ടികളുടെ അവകാശ സംരക്ഷണത്തില്‍ മുതിര്‍ന്നവരും സമൂഹവും കൂടുതല്‍ ശ്രദ്ധാലുക്കളാകണമെന്ന് ജില്ലാ കളക്ടര്‍ അമിത് മീണപറഞ്ഞു.  സാമൂഹ്യനീതി വകുപ്പിന്റെ ആഭിമുഖ്യത്തില്‍ സംഘടിപ്പിച്ച ശിശുദിനാചരണ പരിപാടികള്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.  മലപ്പുറം നഗരസഭാ ചെയര്‍പേഴ്‌സണ്‍ സി.എച്ച്. ജമീല അദ്ധ്യക്ഷത വഹിച്ചു.  ജില്ലാ സാമൂഹ്യനീതി ഓഫീസര്‍ കെ.വി. സുഭാഷ്‌കുമാര്‍, ഐ.സി.ഡി.എസ് പ്രോഗ്രാം ഓഫീസര്‍ സി.ആര്‍.ലത, ജില്ലാ ചൈല്‍ഡ് പ്രൊട്ടക്ഷന്‍ ഓഫീസര്‍ സമീര്‍ മച്ചിങ്ങല്‍ സംസാരിച്ചു. ജില്ലയിലെ വിവിധ അങ്കണവാടികളില്‍ നിന്നായി 500 ല്‍ അധികം കുട്ടികള്‍ പരിപാടിയില്‍ പങ്കെടുത്തു.

മലപ്പുറം ഗവ. ഗേള്‍സ് ഹയര്‍ സെക്കന്‍ഡറി സ്‌കൂളില്‍ 2016-17 അധ്യായന വര്‍ഷം പ്ലസ്ടു പൂര്‍ത്തിയാക്കിയ വിദ്യാര്‍ഥികളുടെ ക്വാഷന്‍ ഡെപ്പോസിറ്റ് നവംബര്‍ 30നകം സ്‌കൂളില്‍ നിന്നും കൈപ്പറ്റണമെന്ന് പ്രിന്‍സിപ്പല്‍ അറിയിച്ചു.

എം.ഇ.ജി റെജിമെന്റിലെ ജവാന്‍മാര്‍, വിമുക്ത ഭട•ാര്‍, സേവനത്തിലിരിക്കെ മരണപ്പെട്ട ജവാ•ാര്‍ എന്നിവരുടെ മക്കള്‍ക്കും ആശ്രിതര്‍ക്കും യൂണിറ്റ് ഹെഡ്ക്വാര്‍ട്ടേഴ്‌സ് ക്വാട്ടയില്‍ സൈന്യത്തില്‍ ചേരാന്‍ അവസരം. മദ്രാസ് എഞ്ചിനീയര്‍ ഗ്രൂപ്പ് നടത്തുന്ന എന്റോള്‍മെന്റ് എം.ഇ.ജി ആന്‍ഡ് സെന്ററില്‍ നവംബര്‍ 21 മുതല്‍ നടക്കും.  വിവരങ്ങള്‍ ജില്ലാ സൈനിക ക്ഷേമ ഓഫീസില്‍ നിന്നും ലഭിക്കും.

    ഊര്‍ജ്ജ സംരക്ഷണ യജ്ഞത്തിന്റെ പ്രാധാന്യത്തിലേക്ക് വെളിച്ചം വീശി കൊണ്ട് എനര്‍ജിമാനേജ്‌മെന്റ് സെന്റര്‍ വിദ്യാഭ്യാസ വകുപ്പുമായി  സഹകരിച്ച് ഊര്‍ജ്ജോത്സവം നടത്തി. മലപ്പുറം ഗേള്‍സ് സ്‌കൂളില്‍ നടന്ന പരിപാടി പി. ഉബൈദുള്ള എം.എല്‍.എ ഉദ്ഘാടനം ചെയ്തു.

ജില്ലാ ആരോഗ്യ കുടുംബക്ഷേമ സമിതിക്കു കീഴില്‍ ജില്ലയില്‍ പാലിയേറ്റീവ് കെയര്‍ പ്രോഗ്രാമില്‍ ഡോക്ടറെ കരാര്‍ അടിസ്ഥാനത്തില്‍ നിയമിക്കുന്നതിന് അപേക്ഷ ക്ഷണിച്ചു.  എം.ബി.ബി.എസ് ഡിഗ്രിയും ട്രാവന്‍കൂര്‍ കൊച്ചിന്‍ മെഡിക്കല്‍ കൗണ്‍സില്‍ രജിസ്‌ട്രേഷനും ബേസിക് സര്‍ട്ടിഫിക്കറ്റ് കോഴ്‌സ് ഇന്‍ പാലിയേറ്റീവ് കെയര്‍ മെഡിസിന്‍ എന്നിവയാണ് യോഗ്യത.  2017 നവംബര്‍ ഒന്നിന് 67 വയസ്സ് കവിയാന്‍ പാടില്ല. ഒഴിവുകളുടെ എണ്ണം ഒന്ന്.  താല്‍പര്യമുള്ളവര്‍ നവംബര്‍ 15ന് രാവിലെ 10ന് കൂടിക്കാഴ്ചക്ക് സര്‍ട്ടിഫിക്കറ്റുകള്‍ സഹിതം മലപ്പുറം സിവില്‍ സ്റ്റേഷനിലെ ജില്ലാ മെഡിക്കല്‍ ഓഫീസില്‍ എത്തണം.  ഫോണ്‍  0483 2730313.