തദ്ദേശസ്വയംഭരണ സ്ഥാപനങ്ങള്‍ ഡിസംബര്‍ മാസത്തില്‍ എഴുപത് ശതമാനം പദ്ധതി പുരോഗതി കൈവരിക്കണമെന്ന്  തദ്ദേശസ്വയംഭരണ വകുപ്പ് മന്ത്രി കെ ടി ജലീല്‍ പറഞ്ഞു. ജില്ലയിലെ വിവിധ തദ്ദേശ സ്വയംഭരണ സ്ഥാപനങ്ങളുടെ വാര്‍ഷിക പദ്ധതി പുരോഗതി അവലോകനവും സദ്ഭരണ പഞ്ചായത്തുകളുടെ പ്രഖ്യാപനവും പത്തനംതിട്ടയില്‍ നിര്‍വഹിക്കുകയായിരുന്നു മന്ത്രി. 

സംസ്ഥാനസര്‍ക്കാര്‍ കാലാവധി പൂര്‍ത്തിയാകുമ്പോള്‍ സംസ്ഥാനത്താകെ  അഞ്ച് ലക്ഷം കോടി രൂപയുടെ  വികസനപ്രവര്‍ത്തനങ്ങള്‍ക്ക് തുക അനുവദിക്കുമെന്ന് പൊതുമരാമത്ത് വകുപ്പ് മന്ത്രി  ജി.സുധാകരന്‍ പറഞ്ഞു.  18 മാസത്തിനിടെ  അവതരിപ്പിച്ച  രണ്ടു ബജറ്റുകളിലായി  അനുവദിക്കപ്പെട്ട 75,000 കോടി രൂപയുടെ  വികസനപ്രവര്‍ത്തനങ്ങളാണ്  ഇപ്പോള്‍ നടന്നുകൊണ്ടിരിക്കുന്നതെന്നും പൊതുമരാമത്ത് വകുപ്പുമാത്രം 25,000 കോടിയുടെ നിര്‍മ്മാണ   പ്രവര്‍ത്തനങ്ങളാണ് നടത്തിക്കൊണ്ടിരിക്കുന്നതെന്നും മന്ത്രി  പറഞ്ഞു.

പാപ്പിനിശ്ശേരി ഖാദി കേന്ദ്രത്തില്‍ വിഷരഹിത പച്ചക്കറി കൃഷിക്ക് തുടക്കമായി. ഹാജിറോഡിലെ ഖാദി ഗ്രാമവ്യവസായ ബോര്‍ഡിന്റെ ഉടമസ്ഥതയിലുള്ള പാപ്പിനിശ്ശേരി കൈക്കടലാസ് നിര്‍മാണ കേന്ദ്രത്തിനോടനുബന്ധിച്ചുള്ള 1.25 ഏക്കര്‍ സ്ഥലത്ത് കാര്‍ഷിക വികസന-കര്‍ഷകക്ഷേമ വകുപ്പ്, പന്നിയൂര്‍ കൃഷി വിജ്ഞാന്‍ കേന്ദ്രം എന്നിവയുമായി സഹകരിച്ച് നടപ്പാക്കുന്ന പദ്ധതിയുടെ ഉദ്ഘാടനം തുറമുഖ വകുപ്പ് മന്ത്രി രാമചന്ദ്രന്‍ കടന്നപ്പള്ളി പച്ചക്കറിത്തൈ നട്ടുകൊണ്ട് നിര്‍വഹിച്ചു. 

തദ്ദേശ സ്വയംഭരണ വകുപ്പ് മന്ത്രിയുടെ അധ്യക്ഷതയില്‍ 27 ന് നടത്താനിരുന്ന വാര്‍ഷിക പദ്ധതി പുരോഗതി അവലോകന യോഗം മാറ്റിവെച്ചതായി ജില്ലാ പ്ലാനിങ്ങ് ഓഫീസര്‍ അറിയിച്ചു. 
പി എന്‍ സി/4474/2017
 

കണ്ണൂര്‍ ഗവ.ഐ ടി ഐ യും, ഐ എം സി യും ചേര്‍ന്ന് നടത്തുന്ന തൊഴിലധിഷ്ഠിത ഫയര്‍ & സേഫ്റ്റി എഞ്ചിനീയറിങ്ങ്(ഡിപ്ലോമ) കോഴ്‌സിന് അപേക്ഷ ക്ഷണിച്ചു.  എസ് എസ് എല്‍ സി യോഗ്യതയുള്ളവര്‍ 30 നകം അപേക്ഷ പ്രിന്‍സിപ്പലിന് സമര്‍പ്പിക്കണം.  ഫോണ്‍: 8921503040, 8304970276.
പി എന്‍ സി/4473/2017
 

തൃക്കരിപ്പൂര്‍ ഗവ.പോളിടെക്‌നിക് കോളേജില്‍ ആരംഭിക്കുന്ന നോര്‍ക്ക റൂട്ട്‌സ് തൊഴില്‍ വൈദഗ്ധ്യ പരിശീലനത്തിന് അലൂമിനിയം ഫാബ്രിക്കേഷന്‍, കമ്പ്യൂട്ടര്‍ ഹാര്‍ഡ്‌വെയര്‍ & നെറ്റ് വര്‍ക്കിങ്ങ്, ഡിപ്ലോമ ഇന്‍ ഗ്രാഫിക് ഡിസൈനിംഗ് എന്നീ കോഴ്‌സുകളില്‍ സീറ്റ് ഒഴിവുണ്ട്.  18 നും 45 നും ഇടയില്‍ പ്രായമുള്ളവര്‍ക്ക് അപേക്ഷിക്കാം.  അലൂമിനിയം ഫാബ്രിക്കേഷന്‍, കമ്പ്യൂട്ടര്‍ ഹാര്‍ഡ്‌വെയര്‍ & നെറ്റ് വര്‍ക്കിങ്ങ് കോഴ്‌സുകള്‍ക്ക് 2360 രൂപ വീതവും ഡിപ്ലോമ ഇന്‍ ഗ്രാഫിക് ഡിസൈനിംഗിന് 1180 രൂപയുമാണ് കോഴ്‌സ് ഫീസ്.  നവംബര്‍ 30 വരെ അപേക്ഷ സ്വീകരിക്കും.  വിശദ വിവരങ്ങള്‍ www.norkaroots.net ല്‍ ലഭിക്കും.

തൃക്കരിപ്പൂര്‍ ഗവ.പോളിടെക്‌നിക് കോളേജില്‍  നിലവില്‍ ഒഴിവുളള അസി.പ്രൊഫസര്‍ ഓഫ് മാത്തമാറ്റിക്‌സ് തസ്തികയില്‍ ദിവസവേതനാടിസ്ഥാനത്തില്‍ നിയമനം നടത്തുന്നു.  ബന്ധപ്പെട്ട വിഷയത്തില്‍ രണ്ടാം ക്ലാസ് ബിരുദാനന്തരബിരുദവും യു ജി സി/സെറ്റ് യോഗ്യതയുമുള്ളവര്‍ക്ക് 29 ന് രാവിലെ 10 മണിക്ക് പോളിടെക്‌നിക്കില്‍ നടത്തുന്ന എഴുത്തുപരീക്ഷയിലും കൂടിക്കാഴ്ചയിലും പങ്കെടുക്കാം.  താല്‍പ്യമുളളവര്‍ വിശദമായ ബയോഡാറ്റ, അസ്സല്‍ സര്‍ട്ടിഫിക്കറ്റുകള്‍, പരിചയ സര്‍ട്ടിഫിക്കറ്റുകള്‍, അവയുടെ പകര്‍പ്പുകള്‍ സഹിതം 29 ന് രാവിലെ 9.30 ന് മുമ്പ് പേര് രജിസ്റ്റര്‍ ചെയ്യണം.  ഫോണ്‍: 0467 2211400.
പി എന്‍ സി/4471/2017
 

 പാളം അറ്റകുറ്റപ്പണി നടക്കുന്നതിനാല്‍ തലശ്ശേരി-എടക്കാട് സ്റ്റേഷനുകള്‍ക്കിടയിലുളള 233 നമ്പര്‍ ലവല്‍ക്രോസ് 26 ന് രാവിലെ എട്ട് മണി മുതല്‍ 30 ന് വൈകിട്ട് ആറ് വരെ അഞ്ച് ദിവസം അടച്ചിടും.
പി എന്‍ സി/4470/2017
 

തലശ്ശേരി പൈതൃക ടൂറിസം പദ്ധതിയുടെ ഭാഗമായി കേരള വിനോദ സഞ്ചാര വകുപ്പ്, ജില്ലാ ടൂറിസം പ്രമോഷന്‍ കൗണ്‍സിലിന്റെ  സഹകരണത്തോടെ തലശ്ശേരി ഓവര്‍ബറീസ്‌ഫോളിയില്‍ നടത്തിയ പെയിന്റിങ്ങ് മത്സരത്തില്‍ എളയാവൂര്‍ സി എച്ച് എം എസ് എച്ച് എസ് എസിലെ ഫിഡാല്‍.ടി, സെന്റ് തെരേസാസ് ആംഗ്ലോ ഇന്‍ഡ്യന്‍ എച്ച് എസ് എസിലെ അഖില പി, ചാല ചിന്മയ വിദ്യായത്തിലെ അവന്തിക.പി എന്നിവര്‍ യഥാക്രമം ഒന്ന്, രണ്ട്, മൂന്ന് സ്ഥാനങ്ങള്‍ നേടി.
പി എന്‍ സി/4469/2017
 

തളിപ്പറമ്പ് ബ്ലോക്ക് പഞ്ചായത്തിന്റെ 2017-18 വാര്‍ഷിക പദ്ധതിയില്‍ ഉള്‍പ്പെടുത്തി പട്ടികജാതി വികസന മേഖലയില്‍ നടപ്പിലാക്കുന്ന പട്ടികജാതി വിദ്യാര്‍ത്ഥികള്‍ക്ക് മെറിറ്റോറിയസ് ഗ്രാന്റ്  എന്ന പരിശീലന പദ്ധതിയില്‍ സാമ്പത്തിക ആനുകൂല്യം ലഭിക്കുന്നതിന് സംസ്ഥാന സര്‍ക്കാരോ സര്‍ക്കാര്‍ ചുമതലപ്പെടുത്തിയിട്ടുളള ഏജന്‍സികളോ നടത്തുന്ന കോഴ്‌സുകളില്‍ കേന്ദ്രസംസ്ഥാനതല പ്രവേശന പരീക്ഷയില്‍ യോഗ്യത നേടി പഠനം നടത്തുന്ന വിദ്യാര്‍ത്ഥികളില്‍ നിന്ന് അപേക്ഷ ക്ഷണിച്ചു.