നിയമസഭ തിരഞ്ഞെടുപ്പുമായി ബന്ധപ്പെട്ട്  ചെങ്ങന്നൂർ മണ്ഡലത്തിലേക്ക് നിയമനം ലഭിച്ചിട്ടുള്ള പോളിംഗ് ഉദ്യോഗസ്ഥരുടെ സ്വകാര്യ വാഹനങ്ങൾ ഏപ്രിൽ എട്ട് , ഒമ്പത്  തീയതികളിൽ പാർക്ക് ചെയ്യുന്നതിനായി എം സി റോഡിൽ ചെങ്ങന്നൂർ ക്രിസ്ത്യൻ കോളേജ് ജംഗ്ഷനും ആഞ്ഞിലിമൂട് ജംഗ്ഷനും മധ്യഭാഗത്തായുള്ള ഗിരിദീപം ഓഡിറ്റോറിയത്തിന് എതിർ വശത്ത് സൗകര്യം ഏർപ്പെടുത്തിയിട്ടുള്ളതാണ് എന്ന് റിട്ടേണിംഗ് ഓഫീസർ അറിയിച്ചു.

നിയമസഭാ തിരഞ്ഞെടുപ്പിൽ ആലപ്പുഴ ജില്ലയിൽ 100 ശതമാനം വോട്ടിംഗ് ലക്ഷ്യമിട്ട് നടത്തുന്ന പ്രചാരണ പരിപാടികളുടെ (സ്വീപ്) ഭാഗമായി ആലപ്പുഴ ബീച്ചിൽ  വിവിധ ബോധവൽക്കരണ പരിപാടികൾ സംഘടിപ്പിച്ചു. വോട്ട് ചെയ്യുന്നതിന്റെ പ്രാധാന്യത്തെക്കുറിച്ച് ജനങ്ങളിൽ അവബോധം ഉണ്ടാക്കുക എന്നതാണ് ഇതിലൂടെ ലക്ഷ്യമിടുന്നത്. ആലപ്പുഴ എസ് ഡി കോളേജിലെ എൻഎസ്എസ് വോളണ്ടിയർമാരാണ്  വിവിധ പരിപാടികൾ അവതരിപ്പിച്ചത്.

നിയമസഭാ തിരഞ്ഞെടുപ്പുമായി ബന്ധപ്പെട്ട് വോട്ടവകാശത്തിന്റെ പ്രാധാന്യം ജനങ്ങളിലെത്തിക്കുന്നതിന്റെ ഭാഗമായി ഫ്ലാഷ്മോബ് സംഘടിപ്പിച്ചു.  സ്വീപിന്റെ (സിസ്റ്റമാറ്റിക് വോട്ടേഴ്‌സ് എഡ്യൂക്കേഷൻ ആൻഡ് ഇലക്ടറൽ പാർട്ടിസിപ്പേഷൻ) ആഭിമുഖ്യത്തിൽ ആലപ്പുഴ ജില്ലാ കോടതി വളപ്പിൽ സംഘടിപ്പിച്ച ഫ്ലാഷ്മോബ് ജില്ലാ ജഡ്ജി ഹണി എം വർഗീസ് ഉദ്ഘാടനം ചെയ്തു.

 
എസ് ഡി കോളേജിലെ എൻഎസ്എസ് വോളണ്ടിയർമാരാണ് ഫ്ലാഷ്മോബിന് നേതൃത്വം നൽകിയത്. വോട്ട് ചെയ്യുന്നതിന്റെ പ്രാധാന്യത്തെക്കുറിച്ച് ജനങ്ങളിൽ അവബോധം ഉണ്ടാക്കുക എന്നതാണ് ഇതിലൂടെ ലക്ഷ്യമിടുന്നത്. വിവിധ കലാപ്രകടനങ്ങളും ഇതോടൊപ്പം നടന്നു. 

നിയമസഭാ തിരഞ്ഞെടുപ്പുമായി ബന്ധപ്പെട്ട പെരുമാറ്റച്ചട്ട ലംഘനം കൂടുതല്‍ കാര്യക്ഷമമായി കണ്ടെത്തുന്നതിന് സജ്ജീകരിച്ച സി വിജില്‍ ആപ്പിലൂടെ ജില്ലയില്‍ 25729 പരാതികള്‍ പരിഹരിച്ചു. ആലത്തൂര്‍ 1907 ,ചിറ്റൂര്‍ 2012, കോങ്ങാട് 2192, മലമ്പുഴ 3866,മണ്ണാര്‍ക്കാട് 2555, നെന്മാറ 1484, ഒറ്റപ്പാലം 2091, പാലക്കാട് 2418, പട്ടാമ്പി 937, ഷൊര്‍ണൂര്‍ 2623 , തരൂര്‍ 1648, തൃത്താല 1996 എന്നിങ്ങനെയാണ്  മണ്ഡല അടിസ്ഥാനത്തില്‍ പരിഹരിച്ച പരാതികള്‍.

നിയമസഭാ തിരഞ്ഞെടുപ്പിനോടനുബന്ധിച്ച് സ്വീപ് വോട്ടര്‍ ബോധവത്കരണത്തിന്റെ ഭാഗമായി കാളവണ്ടി റാലി സംഘടിപ്പിച്ചു. അസിസ്റ്റന്റ് കളക്ടര്‍ രവി കുമാര്‍ മീണ പരിപാടി ഫ്‌ളാഗ് ഓഫ് ചെയ്തു. പാലക്കാട് സിവില്‍ സ്റ്റേഷന്‍ നിന്ന് ആരംഭിച്ച റാലി സ്റ്റേഡിയം സ്റ്റാന്‍ഡ്, സുല്‍ത്താന്‍ പേട്ട, മോയന്‍സ് സ്‌കൂള്‍, ശകുന്തള ജംഗ്ഷന്‍, ടൗണ്‍ സ്റ്റാന്‍ഡ് മിഷന്‍ സ്‌കൂള്‍ വഴി തിരിച്ചു സിവില്‍ സ്റ്റേഷനില്‍ സമാപിച്ചു.

നിയമസഭാ തിരഞ്ഞെടുപ്പിനോടനുബന്ധിച്ച് സുരക്ഷാബോധം വര്‍ധിപ്പിക്കുന്നതിന്റെ ഭാഗമായി റൂട്ട് മാര്‍ച്ച് സംഘടിപ്പിച്ചു. ഷൊര്‍ണൂര്‍ പൊലീസ് സ്റ്റേഷന്‍ പരിധിയില്‍ കേരള പൊലീസും, കര്‍ണ്ണാടക റിസര്‍വ് പൊലീസും സംയുക്തമായാണ് റൂട്ട് മാര്‍ച്ച് സംഘടിപ്പിച്ചത്. കുറുവട്ടൂര്‍, കയ്യിലിയാട് സെന്റര്‍, ചളവറ റോഡ്, ഷൊര്‍ണൂര്‍ റോഡ് വരെയുള്ള പ്രദേശത്തെ പ്രധാന വീഥികളിലൂടെ മാര്‍ച്ച് നടന്നത്. വോട്ടര്‍മാര്‍ക്ക് ഭയരഹിതമായി സമ്മതിദാനാവകാശം വിനിയോഗിക്കുന്നതിനുള്ള സാഹചര്യം ഒരുക്കുക, സാമൂഹിക വിരുദ്ധ പ്രവര്‍ത്തനങ്ങള്‍ തടയുക എന്നിവയാണ് റൂട്ട് മാര്‍ച്ചിന്റെ പ്രധാന ലക്ഷ്യം.

നിയമസഭാ തിരഞ്ഞെടുപ്പിന്റെ ഭാഗമായി ജില്ലയിൽ എട്ട് ദിവസമായി നടന്ന ഹോം വോട്ടിംഗ് നടപടികൾ പൂർത്തിയായി. ജില്ലയിൽ ഇതുവരെ 19598 പേർ ഹോം വോട്ടിംഗ് രേഖപ്പെടുത്തി.