മീനങ്ങാടി സാമൂഹികാരോഗ്യ കേന്ദ്രത്തിലെ പ്രൊജക്ട് പാലിയേറ്റീവ് കെയർ പദ്ധതിയിലേക്ക് ദിവസ വേതനാടിസ്ഥാനത്തിൽ ഡ്രൈവറെ നിയമിക്കുന്നു. എസ്.എസ്.എൽ.സി, ഹെവി വെഹിക്കിൾ ഡ്രൈവിങ് ലൈസൻസ്, ബാഡ്ജ് എന്നിവയും മൂന്ന് വർഷം പ്രവൃത്തി പരിചയവുമുള്ളവർക്ക് അപേക്ഷിക്കാം. താത്പര്യമുള്ളവർ ബയോഡേറ്റ, യോഗ്യതാ സർട്ടിഫിക്കറ്റുകളുടെ അസൽ എന്നിവ സഹിതം ജൂലൈ 29 രാവിലെ 11ന് നടക്കുന്ന അഭിമുഖത്തിൽ പങ്കെടുക്കണം. ഫോൺ: 04936 247290.

കുടുംബശ്രീ സൂക്ഷ്മ സംരംഭ കൺസൽട്ടന്റ് സംവിധാനം വിപുലപ്പെടുത്തുന്നതിന്റെ ഭാഗമായി ജില്ലയിൽ പുതുതായി മൈക്രോ എന്റർപ്രൈസ് കൺസ‌ൾട്ടന്റുമാരെ നിയമിക്കുന്നു. ബിരുദധാരികളും മാർക്കറ്റിംഗിൽ താൽപര്യമുള്ളവരുമായ കുടുംബശ്രീ അംഗങ്ങൾക്കും അംഗങ്ങളുടെ കുടുംബാംഗങ്ങൾക്കും ഒക്സിലറി അംഗങ്ങൾക്കുമാണ് അവസരം. പ്രായപരിധി 25നും 40നും ഇടയിൽ. കുടുംബശ്രീ പ്രവർത്തനങ്ങളെകുറിച്ച് അറിവും ആശയ വിനിമയ ശേഷിയും അവതരണ ശേഷിയുമുണ്ടായിരിക്കണം. കണക്കും ബിസിനസ്സ് ആശയങ്ങളും മനസിലാക്കാനുള്ള അഭിരുചിയും പ്രോജക്ടുകൾ തയ്യാറാക്കാനുള്ള കഴിവും ആവശ്യമാണ്.

പാറക്കടവ്-മാടപ്പള്ളിക്കുന്ന്-ചാമപ്പാറ-കൊളവള്ളി റോഡിൽ അറ്റകുറ്റ പ്രവൃത്തികൾ നടക്കുന്നതിനാൽ ഇന്ന് (ജൂലൈ 23) മുതൽ വാഹന ഗതാഗതത്തിന് പൂർണ നിയന്ത്രണം ഏർപ്പെടുത്തുമെന്ന് പൊതുമരാമത്ത് വകുപ്പ് റോഡ് വിഭാഗം പുൽപ്പള്ളി അസിസ്റ്റന്റ് എഞ്ചിനീയർ അറിയിച്ചു. പുൽപ്പള്ളിയിൽ നിന്ന് മാടപ്പള്ളിക്കുന്നിലേക്ക് പോകുന്ന വാഹനങ്ങൾ പാറക്കടവിൽ നിന്ന് തിരിഞ്ഞ് വണ്ടിക്കടവ് വഴി മാടപ്പള്ളിക്കുന്നിലേക്ക് പോകണം. മാടപ്പള്ളിക്കുന്നിൽ നിന്ന് പുൽപ്പള്ളി ഭാഗത്തേക്ക് പോകുന്ന വാഹനങ്ങൾ വണ്ടിക്കടവിൽ നിന്ന് തിരി‌ഞ്ഞ് പാറക്കടവ് വഴി പുൽപ്പള്ളിയിലേക്ക് പോകണം.

കോളേജ് വിദ്യാർത്ഥികൾക്കിടയിൽ എച്ച്.ഐ.വി എയ്ഡ്‌സിനെക്കുറിച്ച് അവബോധം സൃഷ്ടിക്കുന്നതിനായി സംസ്ഥാന എയ്ഡ്‌സ് കൺട്രോൾ സൊസൈറ്റിയും സംസ്ഥാന ആരോഗ്യ കുടുംബ ക്ഷേമ വകുപ്പും എൻ.എസ്.എസ് യുവജാഗിരണും ചേർന്ന് മാരത്തൺ മത്സരം സംഘടിപ്പിക്കുന്നു. അന്താരാഷ്ട്ര യുവജന ദിനത്തിന് മുന്നോടിയായാണ് ജില്ലാതല മത്സരം. ജൂലൈ 30ന് രാവിലെ ഏഴിന് ആരംഭിക്കുന്ന മത്സരത്തിൽ ജില്ലയിലെ കോളേജുകളിൽ പഠിക്കുന്ന 17 മുതൽ 24 വയസ്സ് വരെയുള്ള വിദ്യാർത്ഥികൾക്ക് പങ്കെടുക്കാം. രാവിലെ ഏഴിന് കല്പറ്റ സിവിൽ സ്റ്റേഷനിൽ നിന്നാരംഭിച്ച് മുട്ടിൽ ഡബ്ല്യു.എം.ഒ കോളേജ് വരെ സ്ത്രീ, പുരുഷ വിഭാഗങ്ങളിലായിട്ടായിരിക്കും മാരത്തൺ.

കുടുംബശ്രീ ഉത്പന്നങ്ങളുടെ വിപണനം കൂടുതൽ കാര്യക്ഷമമാക്കുന്നതിനും ഹോംഷോപ് ശൃംഖല ശക്തിപ്പെടുത്തുന്നതിനുമായി പുതിയ ഹോംഷോപ് മാനേജ്‌മെന്റ് ടീം രൂപീകരിക്കുന്നു. കുടുംബശ്രീ സംരംഭമായി രജിസ്റ്റർ ചെയ്യുന്ന സ്വകാര്യ കൂട്ടായ്മയായിരിക്കും മാനേജ്‌മെന്റ് ടീം. കുടുംബശ്രീ ഉല്‍പാദകരിൽ നിന്ന് ഉത്പന്നങ്ങൾ ശേഖരിച്ച് ഹോംഷോപ് ഓണർമാർക്ക് ആവശ്യാനുസരണം വിതരണം ചെയ്യുക, ഉത്പന്ന ലഭ്യത ഉറപ്പാക്കുക, വിപണന പ്രവർത്തനങ്ങൾ ഏകോപിപ്പിക്കുക എന്നിവയാണ് ടീമിന്റെ പ്രധാന പ്രവർത്തനങ്ങൾ. വിപണന രംഗത്ത് പ്രവർത്തിക്കാൻ താൽപര്യമുള്ള വ്യക്തികൾക്കും കൂട്ടായ്മകൾക്കും പുതിയ സംരംഭക അവസരം ലഭ്യമാണ്.

സ്റ്റാച്യുവിൽ പ്രവർത്തിക്കുന്ന ഗ്രാമീണ സ്വയംതൊഴിൽ പരിശീലനകേന്ദ്രത്തിൽ ആ​ഗസ്റ്റ് 5ന് ആരംഭിക്കുന്ന 30 ദിവസത്തെ സൗജന്യ മൊബൈൽ ഫോൺ റിപ്പയർ ആൻഡ് സർവീസ് പരിശീലനത്തിന് അപേക്ഷ ക്ഷണിച്ചു. 

18-50 പ്രായപരിധിയിലുളളവർക്ക്  0471-2322430, 8891228788 എന്നീ നമ്പരുകളിൽ വിളിച്ച് രജിസ്റ്റർ ചെയ്യാം. ജൂലൈ 28ന് അഭിമുഖം നടക്കും.

അസംഘടിത സാമൂഹ്യ സുരക്ഷാ ബോർഡിന്റെ ജില്ലയിൽ അംഗങ്ങളായ തൊഴിലാളികളുടെ മക്കൾക്ക് 2026-27 വർഷത്തെ വിദ്യാഭ്യാസ ആനുകൂല്യത്തിനുള്ള അപേക്ഷ ക്ഷണിച്ചു. എസ്.എസ്.എൽ.സി പാസായതിനുശേഷം കേരള സർക്കാരിൻ്റെ അംഗീകാരമുള്ള സ്ഥാപനങ്ങളിൽ റഗുലർ കോഴ്സിന് ഉപരിപഠനം നടത്തുന്ന കുട്ടികളുടെ രക്ഷിതാക്കൾ കോഴ്സി‍ൽ പ്രവേശനം കിട്ടി 60 ദിവസത്തിനകം ഓൺലൈൻ അപേക്ഷ സമർപ്പിക്കേണ്ടതാണ്.

പട്ടികജാതി വികസന വകുപ്പിന്റെ തിരുവല്ല നഗരസഭയില്‍ പ്രവര്‍ത്തിക്കുന്ന പെണ്‍കുട്ടികളുടെ പ്രീ -മെട്രിക് ഹോസ്റ്റലിലേക്ക് 2026-27 അധ്യയന വര്‍ഷം കുക്കിന്റെ താല്‍കാലിക ഒഴിവിലേക്ക് വനിതകളില്‍നിന്നും അപേക്ഷ ക്ഷണിച്ചു. ഫുഡ് ക്രാഫ്റ്റ് ഇന്‍സ്റ്റിറ്റ്യൂട്ടില്‍ നിന്ന് ഫുഡ് പ്രൊഡക്ഷന്‍ അംഗീകൃത കോഴ്‌സ് പഠിച്ചവര്‍ക്ക് അപേക്ഷിക്കാം. അപേക്ഷ, ജാതി, വരുമാന സര്‍ട്ടിഫിക്കറ്റുകളും തിരിച്ചറിയല്‍ രേഖ, പാസ്‌പോര്‍ട്ട് സൈസ് ഫോട്ടോ സഹിതം തിരുവല്ല പട്ടികജാതി വികസന കാര്യാലയത്തില്‍ അപേക്ഷ സമര്‍പ്പിക്കണം. അവസാന തീയതി ഓഗസ്റ്റ് ഒന്ന്. ഫോണ്‍: 8547630038.
 

കുടുംബശ്രീ ജില്ല മിഷന്റെ സ്‌നേഹിത ജെന്‍ഡര്‍ ഹെല്‍പ്പ് ഡെസ്‌കിന്റെ ആഭിമുഖ്യത്തില്‍ 'സഹയാത്ര' എന്ന പേരില്‍ ജില്ലാതല ബോധവല്‍ക്കരണ കാമ്പയിന്‍ സംഘടിപ്പിക്കുന്നു. ജൂലൈ 23, 24, 25, 27 തീയതികളില്‍ തിരുവല്ല, അടൂര്‍, പന്തളം, പത്തനംതിട്ട സ്വകാര്യ ബസ് സ്റ്റാന്‍ഡുകളിലാണ് പരിപാടി. സ്‌നേഹിതയുടെ സേവനങ്ങള്‍ കൂടുതല്‍ ജനങ്ങളിലെത്തിക്കുക, കൗണ്‍സിലിംഗ്, മാനസികാരോഗ്യ പിന്തുണ, നിയമസഹായം, സ്ത്രീ-ശിശു സുരക്ഷാ സേവനങ്ങള്‍ എന്നിവയെക്കുറിച്ച് പൊതുജനങ്ങളില്‍ അവബോധം സൃഷ്ടിക്കലാണ് കാമ്പയിന്‍ ലക്ഷ്യം.