ജില്ലയില്‍ 35 പേര്‍ക്ക് കൂടി ഇന്നലെ (ജൂലൈ മൂന്ന്) കോവിഡ് 19 സ്ഥിരീകരിച്ചു. ഇതില്‍ മൂന്ന് പേര്‍ക്ക് സമ്പര്‍ക്കത്തിലൂടെയാണ് രോഗബാധ. രോഗം ബാധിച്ചവരില്‍ മൂന്ന് പേര്‍ ഇതര സംസ്ഥാനങ്ങളില്‍ നിന്നും 29 പേര്‍ വിവിധ വിദേശ രാജ്യങ്ങളില്‍ നിന്നും എത്തിയവരാണെന്ന് ജില്ലാ കലക്ടര്‍ കെ. ഗോപാലകൃഷ്ണന്‍ അറിയിച്ചു. ഇവരില്‍ എട്ട് പേര്‍ കോഴിക്കോട് ഗവണ്‍മെന്റ് മെഡിക്കല്‍ കോളജിലും നാല് പേര്‍ എറണാകുളം കളമശ്ശേരി മെഡിക്കല്‍ കോളജിലും ശേഷിക്കുന്നവര്‍ മഞ്ചേരി ഗവ. മെഡിക്കല്‍ കോളജ് ആശുപത്രിയിലുമാണ് ചികിത്സയിലുള്ളത്.

    
കൊണ്ടോട്ടി ബ്ലോക്ക് പഞ്ചായത്ത് പരിധിയില്‍ നിന്നും 2020 എസ്.എസ്.എല്‍.സി  പരീക്ഷയില്‍  എല്ലാ വിഷയങ്ങള്‍ക്കും എപ്ലസ് വാങ്ങിയ വിദ്യാര്‍ഥികളെ ഓണ്‍ലൈന്‍ വഴി അനുമോദിക്കുന്നു.  ജൂലൈ അഞ്ചിന്  രാവിലെ 10ന് നടക്കുന്ന പരിപാടി ഇ.ടി മുഹമ്മദ് ബഷീര്‍ എം.പി ഉദ്ഘാടനം ചെയ്യും. ചടങ്ങില്‍ വിദ്യാര്‍ഥികള്‍ക്കുള്ള അനുമോദന സര്‍ട്ടിഫിക്കറ്റ് വിതരണം ചെയ്യും. ടി.വി. ഇബ്രാഹിം എം.എല്‍.എ തുടങ്ങി വിവിധ ജനപ്രതിനിധികള്‍ പങ്കെടുക്കും. ഹയര്‍ സെക്കന്‍ഡറി  പ്രവേശനത്തെക്കുറിച്ചും ഉന്നത വിദ്യാഭ്യാസ അവസരങ്ങളെക്കുറിച്ചും വിദഗ്ധര്‍ നല്‍കുന്ന ക്ലാസുകളും ഉണ്ടാകും.

    കൊണ്ടോട്ടി മഹാകവി മോയിന്‍കുട്ടി വൈദ്യര്‍ മാപ്പിള കലാ അക്കാദമിയുടെ പ്രസിദ്ധീകരണമായ ഇശല്‍ പൈതൃകം ത്രൈമാസികയ്ക്ക് യു.ജി.സി കെയര്‍ ലിസ്റ്റില്‍ സ്ഥാനം ലഭിച്ചു.  വിവിധ സര്‍വകലാശാലകളുടെ ശുപാര്‍ശയിലാണ് ഇശല്‍ പൈതൃകം ത്രൈമാസികയെ യു.ജി.സി അംഗീകരിച്ചത്. ഇതോടെ സാഹിത്യ സംബന്ധിയായ ഗവേഷണങ്ങള്‍ക്ക്  ഇശല്‍ പൈതൃകം ഏറെ പ്രയോജനപ്രദമാകും. ഇശല്‍ പൈതൃകം www.ishalpaithrkam.info യില്‍ ലഭിക്കും. കോപ്പികള്‍  തപാലില്‍ ലഭിക്കാന്‍ 9207173451 എന്ന വാട്‌സ്ആപ്പ് നമ്പറില്‍ മേല്‍വിലാസം അയക്കണം.
 

    
അംബേദ്കര്‍ കോളജ് ഓഫ് ആര്‍ട്‌സ് ആന്‍ഡ് സയന്‍സില്‍ (എയ്ഡഡ്)  2020-21 അധ്യയന വര്‍ഷത്തിലേക്ക്  മൂന്നാം സെമസ്റ്റര്‍,  അഞ്ചാം സെമസ്റ്റര്‍ ബിരുദ കോഴ്‌സുകളിലെ ഒഴിവുള്ള സീറ്റുകളിലേക്ക് അപേക്ഷ ക്ഷണിച്ചു. ഒ.ബിസി വിഭാഗത്തില്‍ മൂന്നാം സെമസ്റ്റര്‍, അഞ്ചാം സെമസ്റ്റര്‍ ബി.എ എക്കണോമിക്‌സ്, ബി.എസ്.സി മാത്തമാറ്റിക്‌സ് എന്നീ വിഷയത്തിലാണ് ഒഴിവ്. താത്പര്യമുള്ളവര്‍ ജൂലൈ ആറിനകം കോളജ് ഓഫീസില്‍ അപേക്ഷ സമര്‍പ്പിക്കണമെന്ന് പ്രിന്‍സിപ്പല്‍ അറിയിച്ചു.     ഫോണ്‍: 04931: 249666
 

ജില്ലയിലെ നാല് മാതൃകാ ഫോറസ്റ്റ് സ്റ്റേഷന്‍ ഉദ്ഘാടനം ചെയ്തു

    
കേരള കര്‍ഷക തൊഴിലാളി ക്ഷേമനിധി അംഗങ്ങള്‍ക്ക് സര്‍ക്കാര്‍ അനുവദിച്ച 1,000 രൂപ ധനസഹായം ലഭിക്കുന്നതിന് ഇതുവരെയും അപേക്ഷ സമര്‍പ്പിക്കാത്തവര്‍ Karshakathozhilali എന്ന മൊബൈല്‍ ആപ്പിലൂടെയോ www. Karshakathozhilali.org വെബ്‌സൈറ്റ് വഴിയോ അക്ഷയ കേന്ദ്രങ്ങളിലൂടെയോ അപേക്ഷ സമര്‍പ്പിക്കണം. നിലവില്‍ കുടിശ്ശികയുള്ള എല്ലാ അംഗങ്ങളും ധനസഹായത്തിന് അര്‍ഹരാണെന്ന് ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു.

    
കിഴിശ്ശേരി ഇലക്ട്രിക്കല്‍ സെക്ഷന്‍ പരിധിയില്‍പ്പെട്ട മച്ചിങ്ങല്‍, നെരവത്ത്, മൊടത്തിക്കുണ്ട് ഭാഗങ്ങളില്‍ ഇന്ന് (ജൂലൈ നാല്)  രാവിലെ ഒന്‍പത് മുതല്‍ വൈകീട്ട്  അഞ്ച് വരെ വൈദ്യുതി വിതരണം  തടസപ്പെടുമെന്ന് അസിസ്റ്റന്റ് എഞ്ചിനീയര്‍ അറിയിച്ചു.
 

  
'കേര കേരളം സമൃദ്ധ കേരളം' പദ്ധതിയുടെ ഭാഗമായി വേങ്ങര ബ്ലോക്കില്‍ ആറായിരത്തോളം തെങ്ങിന്‍ വിതരണം ചെയ്യുന്നു. 50 ശതമാനം സബ്‌സിഡിയോടെ പഞ്ചായത്ത് വഴിയാണ് കര്‍ഷകര്‍ക്ക് തെങ്ങിന്‍ തൈകള്‍ വിതരണം ചെയ്യുന്നത്. ഡബ്ല്യു.സി.ടി, ഡോറസ് തുടങ്ങിയ നല്ലയിനം തെങ്ങിന്‍ തൈകളാണ്  കേര കര്‍ഷകര്‍ക്ക്  നല്‍കുന്നത്. കണ്ണമംഗലം 1,200, വേങ്ങര 1,380, എടരിക്കോട്  960, പറപ്പൂര്‍ 1,140, എ.ആര്‍.നഗര്‍ 1,260 എന്നിങ്ങനെയാണ് തെങ്ങിന്‍ തൈ വിതരണം.
  

   
കോവിഡ്-19 ന്റെ പശ്ചാത്തലത്തില്‍ എംപ്ലോയ്‌മെന്റ് എക്‌സ്‌ചേഞ്ചുകളില്‍ നിന്നും നല്‍കുന്ന രജിസ്‌ട്രേഷന്‍, പുതുക്കല്‍, സര്‍ട്ടിഫിക്കറ്റ് ചേര്‍ക്കല്‍ എന്നീ സേവനങ്ങള്‍  സെപ്റ്റംബര്‍ 30 വരെ  www.eemployment.kerala.gov.in എന്ന വെബ്‌സൈറ്റിലൂടെ ഓണ്‍ലൈനായി  നല്‍കാമെന്ന് ജില്ലാ എംപ്ലോയ്‌മെന്റ് ഓഫീസര്‍ അറിയിച്ചു. 'ശരണ്യ'/ 'കൈവല്യ' തുടങ്ങിയ സ്വയംതൊഴില്‍ പദ്ധതികളുടെ വായ്പാ തിരിച്ചടവ്, എംപ്ലോയ്‌മെന്റ് എക്‌സ്‌ചേഞ്ചുകള്‍ വഴി താത്ക്കാലിക നിയമനം ലഭിച്ചവരുടെ വിടുതല്‍ സര്‍ട്ടിഫിക്കറ്റ് ചേര്‍ക്കല്‍ തുടങ്ങിയ സേവനങ്ങള്‍ ബന്ധപ്പെട്ട എക്‌സ്‌ചേഞ്ചുകള്‍ വഴി ലഭിക്കും.