എലത്തൂര്‍ നിയോജക മണ്ഡലത്തിലുള്‍പ്പെട്ട പഞ്ചായത്തുകളിലെയും കോര്‍പ്പറേഷന്‍ പരിധിയിലെയും വിവിധ റോഡുകളുടെ നവീകരണത്തിന് 82 ലക്ഷം രൂപയുടെ ഭരണാനുമതി ലഭിച്ചതായി ഗതാഗത മന്ത്രി എ.കെ.ശശീന്ദ്രൻ അറിയിച്ചു.  കഴിഞ്ഞ കാലവര്‍ഷത്തില്‍ ഗതാഗത യോഗ്യമല്ലാതായി തീര്‍ന്ന റോഡുകളുടെ അടിയന്തര പുനരുദ്ധാരണ പ്രവര്‍ത്തികള്‍ക്കാണ് വെള്ളപ്പൊക്ക ദുരിതാശ്വാസ നിധിയിലുള്‍പ്പെടുത്തി തുക അനുവദിച്ചത്. എത്രയും വേഗം ടെന്‍ഡര്‍ നടപടികള്‍ പൂര്‍ത്തീകരിച്ച് പ്രവര്‍ത്തി ആരംഭിക്കാന്‍ ബന്ധപ്പെട്ട ഉദ്യോഗസ്ഥര്‍ക്ക് അദ്ദേഹം നിര്‍ദ്ദേശം നല്‍കി.

കുന്ദമംഗലം നിയോജകമണ്ഡലത്തിലെ ഒളവണ്ണ, മാവൂര്‍, കുന്ദമംഗലം ഗ്രാമപഞ്ചായത്തുകളെ ജലജീവന്‍ പദ്ധതിയില്‍ ഉള്‍പ്പെടുത്തുന്നതിന് തീരുമാനമായതായി പി.ടി.എ റഹീം എം.എല്‍.എ അറിയിച്ചു.

എല്ലാവീടുകളിലും കുടിവെള്ള കണക്ഷൻ നൽകുന്ന  ജലജീവൻ പദ്ധതിയിൽ ബാലുശ്ശേരി മണ്ഡലത്തിലെ  2250 വീടുകളിൽ   ആദ്യ ഘട്ടത്തിൽ വെള്ളമെത്തും.  പദ്ധതി നടപ്പിലാക്കുന്നതിന്റെ ഭാഗമായി പുരുഷൻ കടലുണ്ടി എംഎൽഎ യുടെ അധ്യക്ഷതയിൽ ആലോചനായോഗം ചേർന്നു. കേന്ദ്ര-സംസ്ഥാന  ഫണ്ടുകൾ വിനിയോഗിച്ച്  തദ്ദേശസ്വയംഭരണ ഭരണ സ്ഥാപനങ്ങളുടെയും ഗുണഭോക്താക്കളുടെയും പങ്കാളിത്തത്തോടു കൂടിയാണ്  ജലജീവൻ മിഷൻ പദ്ധതി കേരള വാട്ടർ അതോറിറ്റി മുഖേന നടപ്പിലാക്കുന്നത്.

ജില്ലയില്‍ ഉറവിടമറിയാത്തതടക്കം കേസുകള്‍ റിപ്പോര്‍ട്ട് ചെയ്യുന്ന സാഹചര്യത്തില്‍ പൊതു ഇടങ്ങളിലെ കൂടിച്ചേരലുകള്‍ക്കെതിരേ കര്‍ശന നടപടിയെടുക്കുമെന്ന് ജില്ലാ കലക്ടര്‍ സാംബശിവ റാവു. മാര്‍ക്കറ്റുകളിലും ഹാര്‍ബറിലും എത്തുന്ന ആളുകളെ നിയന്ത്രിക്കും. ഇവിടങ്ങളില്‍ ബാരിക്കേഡുകള്‍ വച്ച് പൊലിസ് നിരീക്ഷണം ശക്തിപ്പെടുത്തും. ആളുകളെ പരിമിതപ്പെടുത്തി മാത്രം ഉള്ളിലേക്ക് കയറ്റിവിടുകയുള്ളുവെന്ന് കലക്ടര്‍ പറഞ്ഞു.

ആശുപത്രികളിലെ തിരക്ക് കുറയ്ക്കാന്‍ ഇ-ഹെല്‍ത്ത് പ്രോഗ്രാം

കൊവിഡുമായി ബന്ധപ്പെട്ട് ജില്ലയില്‍ 3000 പേരെ ചികിത്സിക്കാന്‍ ആവശ്യമായ സൗകര്യങ്ങള്‍ ഒരുക്കുമെന്ന് ഗതാഗത വകുപ്പ് മന്ത്രി എ.കെ ശശീന്ദ്രന്‍. കലക്ടറേറ്റില്‍ നടന്ന ജില്ലാതല കോവിഡ് അവലോകനയോഗത്തില്‍ സംസാരിക്കുകയായിരുന്നു മന്ത്രി.പഴുതടച്ച പ്രവര്‍ത്തനങ്ങളാണ് ജില്ലയില്‍ നടക്കുന്നത്. രോഗികളുടെ എണ്ണത്തിലും രോഗമുക്തി നേടുന്നവരുടെ എണ്ണത്തിലും ജില്ലയ്ക്ക് ആശ്വാസകരമായ വാര്‍ത്തയാണുള്ളതെന്ന് മന്ത്രി പറഞ്ഞു.

നഗരസഭയിലെ സ്കൂൾ കെട്ടിട നിർമ്മാണം പുരോഗമിക്കുന്നു

സംസ്ഥാന സർക്കാരിന്റെ പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി മികവിന്റെ കേന്ദ്രങ്ങളായി മാറുകയാണ് കൊയിലാണ്ടി നഗരസഭയിലെ സ്കൂളുകൾ. നഗരസഭയിലെ രണ്ട് സ്കൂളുകളിൽ നിർമ്മാണ പ്രവൃത്തി പുരോഗമിക്കുകയാണ്.

കൊയിലാണ്ടി ഗവ ഗേൾസ് സ്കൂളിൽ മൂന്ന് കോടി രൂപയിൽ പുതിയ ബ്ലോക്ക് കെട്ടിടത്തിന്റെ നിർമ്മാണം തുടങ്ങി. ആറ് മാസം കൊണ്ട് പണി പൂർത്തിയാക്കാനാണ് ശ്രമം. മൂന്ന് നിലയിലായി 12 ക്ലാസ് മുറികൾ, ലാബ് എന്നിവ ഒരുക്കും.

കൊടുവള്ളി നിയോജകമണ്ഡലത്തില്‍ മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയിലുള്‍പ്പെടുത്തി 54 റോഡുകളുടെ പ്രവൃത്തിക്ക് 6.18 കോടി രൂപയുടെ ഭരണാനുമതി ലഭിച്ചതായി കാരാട്ട് റസാഖ് എംഎല്‍എ അറിയിച്ചു. സംസ്ഥാന സര്‍ക്കാരിന്റെ റീ ബില്‍ഡ് കേരള ഇനിഷ്യേറ്റീവില്‍ ഉള്‍പ്പെടുത്തി പ്രാദേശിക റോഡുകളുടെ പുനരുദ്ധാരണം ലക്ഷ്യമിട്ടാണ് മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതി നടപ്പിലാക്കുന്നത്.

മാവൂര്‍ ഗ്രാമപഞ്ചായത്തിലെ നൊച്ചിക്കാട്ട്കടവ് ലക്ഷം വീട് കോളനി റോഡ് പി.ടി.എ റഹീം എം.എല്‍.എ ഉദ്ഘാടനം ചെയ്തു. എം.എല്‍.എയുടെ  
ആസ്തി വികസന ഫണ്ടില്‍ നിന്ന് രണ്ട് ഘട്ടങ്ങളിലായി അനുവദിച്ച 62.5 ലക്ഷം രൂപ വിനിയോഗിച്ചാണ്  റോഡിന്‍റെ വികസന പ്രവൃത്തികള്‍ പൂര്‍ത്തീകരിച്ചത്.

വെള്ളക്കെട്ട് കാരണം ഗതാഗതത്തിന് സാധിക്കാതെ ഏറെ പരിതാപകരമായിരുന്ന ഈ റോഡ് വശങ്ങൾ കെട്ടി ഫില്ല് ചെയ്ത് ഉയര്‍ത്തി ടാറിംഗ് ചെയ്താണ് പരിഷ്കരിച്ചത്.  ആവശ്യമായ വശങ്ങളില്‍ ഗാര്‍ഡ് പോസ്റ്റുകള്‍ സ്ഥാപിക്കുകയും ചെയ്തിട്ടുണ്ട്.

മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയില്‍ ഉള്‍പ്പെടുത്തിയ 16 റോഡുകള്‍ക്ക് 3.75 കോടി രൂപയുടെ പുതുക്കിയ ഭരണാനുമതി ലഭ്യമാക്കിയതായി പി.ടി.എ റഹീം എം.എല്‍.എ അറിയിച്ചു.

കുന്ദമംഗലം ഗ്രാമപഞ്ചായത്തിലെ കൊട്ടാരത്തില്‍ മാമ്പറ്റമ്മല്‍ റോഡ് -16 ലക്ഷം, പൂതംകുഴി കുഴിമ്പാട്ടില്‍ ചോലക്കമീത്തല്‍ റോഡ് -25 ലക്ഷം, ചൂലാംവയല്‍ അക്കനാടൻകുഴി റോഡ് -30 ലക്ഷം.

ചാത്തമംഗലം ഗ്രാമപഞ്ചായത്തിലെ ത്രിവേണി എളാംകുന്നുമ്മല്‍ റോഡ് -15 ലക്ഷം, കൊന്നരയില്‍താഴം പാറക്കണ്ടി റോഡ് - 25 ലക്ഷം, കല്ലില്‍പുറം നാരകശ്ശേരി റോഡ് - 12 ലക്ഷം, നായര്‍കുഴി നറുക്കുംപൊയില്‍ തേവര്‍വട്ടം റോഡ് -17.3 ലക്ഷം.

കണ്ണാടി പൊയില്‍ - ചാത്തോത്ത്താഴെ റോഡ് പ്രവൃത്തി ഉദ്ഘാടനം പുരുഷന്‍ കടലുണ്ടി എം.എല്‍ എ നിര്‍വഹിച്ചു. കിനാലൂര്‍, പൂവമ്പായി പ്രദേശങ്ങളില്‍ നിന്ന് എളുപ്പത്തില്‍ കണ്ണാ്ടി പൊയിലിലെ കുടുംബ ആരോഗ്യ കേന്ദ്രത്തിലും മറ്റും എത്തിച്ചേരാവുന്ന റോഡാണിത്. എം.എല്‍.എയുടെ മണ്ഡലം ആസ്തി വികസന ഫണ്ടില്‍ നിന്നും  അനുവദിച്ച 25 ലക്ഷം രൂപ ഉപയോഗിച്ചാണ് റോഡ് നിര്‍മിക്കുക.

 പനങ്ങാട് പഞ്ചായത്ത് പ്രസിഡന്റ് വി.എം. കമലാക്ഷി അധ്യക്ഷത വഹിച്ചു. വൈസ് പ്രസിഡന്റ് പി.ഉസ്മാന്‍, കോട്ടയില്‍ മുഹമ്മദ്, ഷീജ മങ്ങാടങ്കണ്ടി എ. സി. ബൈജു, ദിനേശന്‍ പനങ്ങാട്, സദാനന്ദന്‍ തുടങ്ങിയവര്‍ പങ്കെടുത്തു.