കര്‍ണാടകയില്‍ നിന്ന്  ജില്ലയിലേക്ക് വരുന്നവര്‍ ആദൂര്‍ പോലീസ് സ്റ്റേഷന്‍ പരിധിയിലെ മിഞ്ചപദവ്, ഈശ്വരമംഗല തുടങ്ങിയ പ്രദേശങ്ങളിലൂടെ അനധികൃതമായി അതിര്‍ത്തി കടന്നു വരുന്നതായി  ശ്രദ്ധയില്‍പ്പെട്ടതിനാല്‍ അതിര്‍ത്തി പ്രദേശങ്ങളില്‍ കര്‍ശന പോലീസ് നീരീക്ഷണം ഏര്‍പ്പെടുത്താന്‍ ജില്ലാതല കോറോണ കോര്‍ കമ്മിറ്റി യോഗം തീരുമാനിച്ചു. ഇത് സംബന്ധിച്ച് ജില്ലാ ഭരണകൂടത്തെ സഹായിക്കുന്നതിന് രാഷ്ട്രീയ പാര്‍ട്ടികളും, യുവജന സംഘടനകളും, സന്നദ്ധ സംഘടനകളും മറ്റും മുന്നോട്ടു വരണമെന്ന് ജില്ലാ ജില്ലാകളക്ടര്‍ ഡോ ഡി സജിത് ബാബു അഭ്യര്‍ത്ഥിച്ചു.

കേരള സംസ്ഥാന കളിമണ്‍പാത്ര നിര്‍മ്മാണ വിപണന ക്ഷേമ വികസന കോര്‍പ്പറേഷന്‍ കളിമണ്‍ ഉല്പന്ന നിര്‍മ്മാണം കുലത്തൊഴിലാക്കിയ സമുദായത്തില്‍ ഉള്‍പ്പെട്ട വ്യക്തികള്‍ക്ക് നിലവിലെ സംരംഭങ്ങളുടെ ആധുനികവല്‍ക്കരണത്തിനും നൂതന സംരംഭങ്ങള്‍ ആരംഭിക്കുന്നതിനും വായ്പ നല്‍കുന്നു.  പരമ്പരാഗത കളിമണ്‍ ഉല്പന്ന നിര്‍മ്മാണ മേഖലയില്‍ തൊഴില്‍ ചെയ്യുന്നവരോ അവരുടെ ആശ്രിതരോ ആയവര്‍ക്ക് അപേക്ഷിക്കാം.  

ശാരീരിക മാനസിക വെല്ലുവിളി നേരിടുന്നവര്‍ക്കുള്ള ജില്ലാതല കര്‍മ്മ പദ്ധതിയുടെ ഭാഗമായി ഭിന്നശേഷിക്കാര്‍ക്ക് നല്‍കുന്ന  മുച്ചക്ര വാഹനം  വിതരണം ചെയ്തു. പദ്ധതിയുടെ ഉദ്ഘാടനം ജില്ല പഞ്ചായത്ത് പ്രസിഡന്റ് എജിസി ബഷീര്‍ നിര്‍വ്വഹിച്ചു.  ജില്ല പഞ്ചായത്തിന്റെ ഭിന്നശേഷി സൗഹൃദ പദ്ധതിയില്‍ ഉള്‍പ്പെടുത്തി ഭിന്നശേഷിക്കാരുടെ യാത്രാ സൗകര്യം മെച്ചപ്പെടുത്താനായി 28 പേര്‍ക്കാണ് അധിക വീല്‍ ഘടിപ്പിച്ച സ്‌കൂട്ടര്‍ വിതരണം ചെയ്തത്.  79000 രൂപ വിലയുള്ള സ്‌കൂട്ടറുകളാണ് വിതണം ചെയ്തത്. ഭിന്ന ശേഷി സൗഹൃദ ഭവനം, പെട്ടിക്കടകള്‍ ഉപകരണങ്ങള്‍ എന്നിവയും ഭിന്നശേഷി സൗഹൃദ പദ്ധതിയില്‍ ലഭ്യമാക്കും.

2024 നകം രാജ്യത്തെ എല്ലാ ഗ്രാമീണ വീടുകളിലും പൈപ്പ് ലൈന്‍ വഴി കുടിവെള്ളം എത്തിക്കുന്നതിനുള്ള കേന്ദ്ര-സംസ്ഥാന സംയുക്ത പദ്ധതിയായ ജലജീവന്‍ മിഷന്റെ  ഭാഗമായുള്ള ജില്ല ജല ശുചിത്വമിഷന്‍ രൂപീകരിച്ചു.ജില്ലയിലെ എല്ലാ പഞ്ചായത്തുകളിലും കുടിവെള്ള പദ്ധതികളുടെ സമഗ്ര വിവരശേഖരണം നടത്തുന്നതിന് സമിതിയുടെ പ്രഥമ യോഗം തീരുമാനിച്ചു.  മിഷന്‍ ചെയര്‍മാന്‍ കൂടിയായ ജില്ലാ കളക്ടര്‍ ഡോ  ഡി സജിത് ബാബു അധ്യക്ഷത വഹിച്ചു.

എന്‍ഡോസള്‍ഫാന്‍ ദുരിതബാധിതരെ സാമൂഹിക ജീവിതത്തിന്റെ മുഖ്യധാരയിലേക്ക് കൈപിടിച്ചുയര്‍ത്തുന്നതിനായി തുടരുന്ന കരുതലുകള്‍ അവസാനിക്കുന്നില്ല. സമഗ്ര സാമൂഹിക വികസനം ഉറപ്പു വരുത്തുന്നതിന് എന്‍ഡോസള്‍ഫാന്‍ പുനരധിവാസ ഗ്രാമം പദ്ധതി യാഥാര്‍ത്ഥ്യമാവുന്നു. പദ്ധതിയുടെ ശിലാസ്ഥാപനം നാളെ (ജൂണ്‍ നാല്)  ഓണ്‍ലൈനായി  ആരോഗ്യ വകുപ്പ് മന്ത്രി കെ കെ ശൈലജ നിര്‍വഹിക്കും. കോവിഡ് നിയന്ത്രണങ്ങള്‍ പാലിച്ച് ബോവിക്കാനം യു പി സ്‌കൂളില്‍ നടക്കുന്ന ചടങ്ങില്‍ റവന്യു വകുപ്പ് മന്ത്രി ഇ ചന്ദ്രശേഖരന്‍ അധ്യക്ഷത വഹിക്കും.

1875 ലെ കേരള തൊഴിലാളി ക്ഷേമനിധി നിയമത്തിന്റെ പരിധിയില്‍ വരുന്ന എല്ലാ തൊഴില്‍ സ്ഥാപനങ്ങളും 2019 രണ്ടാം അര്‍ധവര്‍ഷം വരെയുള്ള കുടശികയും 2020 ഒന്നാം അര്‍ധവര്‍ഷം മുതല്‍ 90 രൂപ നിരക്കില്‍ പുതുക്കിയ ക്ഷേമനിധി വിഹിതവും ജൂലൈ 31 നകം www.labourwelfarefund.in  വെബ്‌സൈറ്റ് വഴിയോ അല്ലാതെയോ അടയ്ക്കണമെന്ന് ലേബര്‍ വെല്‍ഫെയര്‍ ഫണ്ട് ഇന്‍സ്‌പെക്ടര്‍ അറിയിച്ചു.
 (പി.ആര്‍.കെ നമ്പര്‍ 1777/2020)

കേരള മോട്ടോര്‍ തൊഴിലാളി ക്ഷേമനിധി ബോര്‍ഡില്‍ അംഗത്വം എടുത്ത തൊഴിലാളികള്‍ക്ക് കോവിഡ് 19 ധനസഹായത്തിനുള്ള അപേക്ഷ ഓഗസ്റ്റ് 31 വരെ സമര്‍പ്പിക്കാമെന്ന് ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു.
(പി.ആര്‍.കെ നമ്പര്‍ 1776/2020)

കൊട്ടാരക്കര ബ്ലോക്കിലെ പൂയപ്പള്ളി ഗ്രാമപഞ്ചായത്തിനെ 'സന്‍സദ് ആദര്‍ശ് ഗ്രാമയോജന' പദ്ധതിയില്‍ സാഗി ഫേസ് രണ്ടില്‍ ഉള്‍പ്പെടുത്തി. പൂയപ്പള്ളി ഗ്രാമപഞ്ചായത്തില്‍ നടന്ന പരിപാടിയില്‍ എന്‍ കെ പ്രേമചന്ദ്രന്‍ എം പി പ്രഖ്യാപനം നടത്തി.  ഗ്രാമപഞ്ചായത്തിന്റെ സുസ്ഥിരമായ വികസനം നടപ്പാക്കുന്നതിന് സാഗി പദ്ധതി ഉപയോഗിക്കും.  കേന്ദ്ര-സംസ്ഥാന സര്‍ക്കാരുകളുടെ വിവിധ വികസന പ്രവര്‍ത്തനങ്ങള്‍ ഏകോപിപ്പിച്ച് നടപ്പിലാക്കുന്നതിന് സാഗി പദ്ധതി നിലവില്‍ വരുന്നതിലൂടെ സാധ്യമാകും.  സാഗി പദ്ധതിയുടെ വരവ് അറിയിച്ച് കൊണ്ട് പ്രാരംഭഘട്ട പ്രവര്‍ത്തനങ്ങള്‍ നടത്തും.

മത്സ്യഫെഡിന്റെ ആഭിമുഖ്യത്തില്‍ ജില്ലയിലെ ഉള്‍നാടന്‍ മേഖലയില്‍ ഓണ്‍ലൈന്‍ പഠന കേന്ദ്രങ്ങള്‍ ആരംഭിക്കുന്നു. 16 ഓണ്‍ലൈന്‍ പഠന കേന്ദ്രങ്ങളുടെ ഉദ്ഘാടനം നാളെ(ജൂലൈ 4) ഉച്ചയ്ക്ക് 12 ന് കുണ്ടറ കച്ചേരി മുക്കിലെ സഹൃദയ കാലാകേന്ദ്രത്തില്‍ മന്ത്രി ജെ മേഴ്‌സിക്കുട്ടിയമ്മ ഉദ്ഘാടനം ചെയ്യും.

കൃഷി വകുപ്പിന്റെ ആഭിമുഖ്യത്തില്‍ 2019-20 ലെ മികച്ച കര്‍ഷകര്‍, പാടശേഖര സമിതികള്‍, കര്‍ഷക തൊഴിലാളികള്‍, ശാസ്ത്രജ്ഞര്‍, കാര്‍ഷിക മേഖലകളില്‍ മികച്ച പ്രവര്‍ത്തനം കാഴ്ച്ചവയ്ക്കുന്ന വിവിധ തുറകളിലെ വ്യക്തികള്‍ എന്നിവര്‍ക്ക് അവാര്‍ഡുകളും സമ്മാനങ്ങളും നല്‍കുന്നതിന് അപേക്ഷ ക്ഷണിച്ചു. അപേക്ഷ ജൂലൈ ആറിനകം അതത് സ്ഥലത്തെ കൃഷിഭവനുകളില്‍ നല്‍കണം.