കേന്ദ്ര-സംസ്ഥാന സര്‍ക്കാരുകള്‍ സംയുക്തമായി നടപ്പാക്കുന്ന ജലവിതരണ പദ്ധതിയായ ജലജീവന്‍  മിഷന്റെ ജില്ലാതല പ്രവര്‍ത്തനങ്ങള്‍ ചര്‍ച്ച ചെയ്യുന്നതിനായി ജില്ലാ കളക്ടര്‍ നവജ്യോത് ഖോസയുടെ അധ്യക്ഷതയില്‍ കളക്ടറേറ്റില്‍ യോഗം ചേര്‍ന്നു. 2024 ഓടെ എല്ലാ വീടുകളിലും കുടിവെള്ളമെത്തിക്കുകയെന്ന ലക്ഷ്യത്തോടെ നടപ്പാക്കുന്ന പദ്ധതിയാണിത്. തദ്ദേശഭരണ സ്ഥാപനങ്ങള്‍, വാട്ടര്‍ അതോറിറ്റി, മറ്റ് സര്‍ക്കാര്‍ വകുപ്പുകള്‍ എന്നിവര്‍ സംയുക്തമായാണ് പദ്ധതി നടപ്പാക്കുന്നത്. ജില്ലാ പഞ്ചായത്ത് പ്രസിഡന്റ് വി.കെ മധു, വിവിധ വകുപ്പു മേധാവിമാര്‍ എന്നിവര്‍ യോഗത്തില്‍ സംബന്ധിച്ചു.

എസ് എസ് എല്‍ സി പരീക്ഷയില്‍ ഗിരിവികാസ് റസിഡന്‍ഷ്യല്‍ സ്‌കൂളിന് നൂറു ശതമാനം വിജയം. പത്താം ക്ലാസ്സിലും പ്ലസ്ടുവിലും ഉന്നതപഠനത്തിന് അര്‍ഹത നേടാത്ത പട്ടികവര്‍ഗ്ഗ വിദ്യാര്‍ത്ഥികളെ റസിഡന്‍ഷ്യല്‍ രീതിയില്‍ പഠിപ്പിക്കുന്ന പട്ടികവര്‍ഗ്ഗ വകുപ്പിന്റെ ധനസഹായത്തോടെ നെഹ്‌റു യുവകേന്ദ്രയുടെ കീഴില്‍ ജില്ലയില്‍ പ്രവര്‍ത്തിക്കുന്ന സ്ഥാപനമാണ് ഗിരിവികാസ്.

കല്‍പ്പറ്റ മണ്ഡലത്തിലെ ജലവിതരണ പദ്ധതികളുടെ നിര്‍മ്മാണ പ്രവൃത്തികള്‍ വേഗത്തിലാക്കുന്നതിനായി സി.കെ.ശശീന്ദ്രന്‍ എം.എല്‍.എയുടെ അധ്യക്ഷതയില്‍ യോഗം ചേര്‍ന്നു. മണ്ഡലത്തിലെ ജലവിതരണ പദ്ധതികള്‍ ജല ജീവന്‍ മിഷനുമായി സംയോജിപ്പിച്ച് കൂടുതല്‍ വീടുകളിലേക്ക് ശുദ്ധജലം ലഭ്യമാക്കുന്നതിനുള്ള സാധ്യത യോഗം ചര്‍ച്ച ചെയ്തു. ഇതുമായി ബന്ധപ്പെട്ട് പ്രോജക്ട് ഡിവിഷന്‍ എക്‌സികൂട്ടീവ് എഞ്ചിനീയറുടെ സാന്നിധ്യത്തില്‍ ജൂലായ് ഏഴിന് കളക്ട്രേറ്റില്‍ യോഗം ചേരും.

കൃഷി വകുപ്പ് നല്‍കി വരുന്ന വിവിധ അവാര്‍ഡുകള്‍ക്ക് അപേക്ഷ ക്ഷണിച്ചു.  മികച്ച കര്‍ഷകന്‍, പാടശേഖര സമിതി, കര്‍ഷക തൊഴിലാളികള്‍, ശാസ്ത്രജ്ഞര്‍, പത്രപ്രവര്‍ത്തകര്‍, കാര്‍ഷിക മേഖലകളിലെ മികച്ച പ്രകടനം കാഴ്ച വെക്കുന്ന വിവിധ തുറകളിലെ വ്യക്തികള്‍ എന്നിവര്‍ക്കാണ് അവാര്‍ഡുകളും സമ്മാനങ്ങളും നല്‍കുന്നത്.  അപേക്ഷ ജൂലൈ 6നകം അതത് കൃഷി ഭവനുകളില്‍ നല്‍കണം.  

കല്‍പ്പറ്റ ബ്ലോക്ക് പഞ്ചായത്ത്  പ്രളയക്കെടുതിയില്‍ കേടുപാടു പറ്റിയ വീടുകളുടെ പുനര്‍ നിര്‍മ്മാണത്തിന് അധിക ധനസഹായം അനുവദിച്ചു. പദ്ധതിയുടെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്റ് ഉഷ തമ്പി നിര്‍വ്വഹിച്ചു. 

2019- 20 പ്രത്യേക ഘടക പദ്ധതിയില്‍ ഉള്‍പ്പെടുത്തിയാണ് പ്രളയക്കെടുതിയില്‍ കേടുപാടു പറ്റിയ വീടുകള്‍ക്ക് അധിക ധനസഹായം പദ്ധതി നടപ്പിലാക്കിയത്. പട്ടികജാതി വിഭാഗത്തിലെ 28 കുടുംബങ്ങള്‍ക്ക് 50,000 രൂപയുടെ അധിക ധനസഹായമാണ് പദ്ധതിയിലൂടെ ലഭിച്ചത്. പ്രളയത്തില്‍ 16 ശതമാനത്തില്‍ കൂടുതല്‍ കേടുപാടു പറ്റിയ വീടുകളെയാണ് പദ്ധതിയില്‍ ഉള്‍പ്പെടുത്തിയത്. 

കേരള സംസ്ഥാന കളിമണ്‍പാത്ര നിര്‍മ്മാണ വിപണന ക്ഷേമ വികസന കോര്‍പ്പറേഷന്‍ കളിമണ്‍ ഉല്‍പന്ന നിര്‍മ്മാണം കുലത്തൊഴിലായി സ്വീകരിച്ച സമുദായത്തില്‍ ഉള്‍പ്പെട്ട വ്യക്തികള്‍ക്ക് നിലവിലെ സംരംഭങ്ങളുടെ ആധുനിക വല്‍കരണത്തിനും നൂതന സംരംഭങ്ങള്‍ ആരംഭിക്കുന്നതിനും വായ്പ നല്‍കുന്നു. വായ്പ തുക പരമാവധി രണ്ട് ലക്ഷം രൂപയും പലിശ നിരക്ക് 6 ശതമാനവും തിരിച്ചടവ് കാലാവധി 60 മാസവുമാണ്. ജാമ്യ വ്യവസ്ഥകള്‍ ബാധകമാണ്. അപേക്ഷകര്‍ പരമ്പരാഗത കളിമണ്‍ ഉല്‍പന്ന നിര്‍മ്മാണ മേഖലയില്‍ തൊഴില്‍ ചെയ്യുന്നവരോ അവരുടെ ആശ്രിതരോ ആയിരിക്കണം.  പ്രായം 18 നും 55 നുമിടയില്‍. കുടുംബ വാര്‍ഷിക വരുമാനം മൂന്ന് ലക്ഷം രൂപയില്‍ കവിയരുത്.