നികുതി വെട്ടിക്കുക എന്ന ലക്ഷ്യത്തോടെ ആഡംബര വാഹനങ്ങള്‍ വ്യാജമേല്‍വിലാസങ്ങളില്‍ പോണ്ടിച്ചേരി തുടങ്ങിയ അന്യസംസ്ഥാനങ്ങളില്‍ രജിസ്‌ട്രേഷന്‍ നടത്തുന്നതായി ശ്രദ്ധയില്‍ പെട്ട സാഹചര്യത്തില്‍ ഇത്തരം വാഹനങ്ങള്‍ കണ്ടെത്തുന്നതിനായി സംസ്ഥാനത്തുടനീളം പ്രത്യേകം പരിശോധനകള്‍ നടത്താന്‍ എല്ലാ ആര്‍.ടി.ഒ/ജോയിന്റ് ആര്‍.ടി.ഒ. മാര്‍ക്കും ട്രാന്‍സ്‌പോര്‍ട്ട് കമ്മീഷണര്‍ നിര്‍ദേശം നല്‍കി. ഇത്തരത്തില്‍ സംസ്ഥാനത്തിനകത്ത് സര്‍വീസ് നടത്തുന്ന വാഹനങ്ങള്‍ക്കെതിരെ മോട്ടോര്‍ വാഹന നിയമമനുസരിച്ചുള്ള കര്‍ശന നടപടികള്‍ സ്വീകരിക്കുമെന്നും ട്രാന്‍സ്‌പോര്‍ട്ട് കമ്മീഷണര്‍ അറിയിച്ചു.

പൊതുവിദ്യാലയ മികവുകള്‍ അവതരിപ്പിക്കാനായി കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യൂക്കേഷന്‍ (കൈറ്റ് - ഐ.ടി.@ സ്‌കൂള്‍) സംഘടിപ്പിക്കുന്ന 'ഹരിതവിദ്യാലയം' വിദ്യാഭ്യാസ റിയാലിറ്റി ഷോയില്‍ പങ്കെടുക്കാന്‍ നൂറ് സ്‌കൂളുകളെ തെരഞ്ഞെടുത്തു. ഏറ്റവും കൂടുതല്‍ വിദ്യാലയങ്ങള്‍ (15 എണ്ണം) മലപ്പുറം ജില്ലയില്‍ നിന്നാണ്. തിരുവനന്തപുരവും (11) പാലക്കാടുമാണ് (10) രണ്ടും മൂന്നും സ്ഥാനങ്ങളില്‍. ഈ സ്‌കൂളുകളില്‍ ഹരിതവിദ്യാലയം ടീം നവംബര്‍ എട്ട് മുതല്‍ സന്ദര്‍ശനം നടത്തുമെന്നും നവംബര്‍ 22 മുതല്‍ ഫ്‌ളോര്‍ ഷൂട്ടിംഗ് ആരംഭിക്കുമെന്നും കൈറ്റ് വൈസ് ചെയര്‍മാന്‍ അറിയിച്ചു.

കേരള കാര്‍ഷിക സര്‍വ്വകലാശാല വൈസ് ചാന്‍സലറുടെ ചുമതല ടീക്കാറാം മീണയ്ക്ക് നല്‍കി ചാന്‍സലര്‍ കൂടിയായ ഗവര്‍ണര്‍ ഉത്തരവിറക്കി. നിലവിലെ വൈസ് ചാന്‍സലര്‍ ഡോ. പി. രാജേന്ദ്രന്‍ വിരമിച്ച ഒഴിവിലാണ് നിയമനം. ഇന്ന് (നവംബര്‍ ഒന്ന്) ചുമതലയേല്‍ക്കും. സംസ്ഥാന കൃഷി വകുപ്പ് പ്രിന്‍സിപ്പല്‍ സെക്രട്ടറി, കാര്‍ഷികോത്പാദന കമ്മീഷണര്‍ എന്നീ ചുമതലകള്‍ വഹിച്ചുവരികയാണ് ഇപ്പോള്‍ അദ്ദേഹം.

പി.എന്‍.എക്‌സ്.4661/17

ലേകമെമ്പാടുമുളള മലയാളികള്‍ക്ക് പൊതു ചര്‍ച്ചാവേദി എന്ന നിലയില്‍ സംസ്ഥാന സര്‍ക്കാര്‍ ആവിഷ്‌കരിച്ച ലോക കേരള സഭയിലേയ്ക്ക് പ്രവാസി പ്രതിനിധികളെ നാമനിര്‍ദേശം ചെയ്യുന്നതിന് നവംബര്‍ 10 വരെ അപേക്ഷ നല്‍കാം. സഭാംഗത്വത്തിനായി വ്യക്തികള്‍ സ്വയമോ സംഘടനകള്‍ മുഖേനയോ നാമനിര്‍ദേശം ചെയ്യാം. രണ്ടു വര്‍ഷത്തിലൊരിക്കല്‍ കൂടുന്ന സഭയില്‍ ഒരംഗത്തിന്റെ കാലാവധി അഞ്ചു വര്‍ഷമായിരിക്കും. 2018 ജനുവരിയില്‍ 12, 13 തീയതികളില്‍ ആദ്യ ലോക കേരള സഭ തിരുവനന്തപുരത്തു കൂടാനാണ് ഉദ്ദേശിക്കുന്നത്. ലോക കേരളത്തിന് നേതൃത്വം കൊടുക്കുക എന്ന കടമ നിര്‍വഹിക്കുകയാണ് സഭ രൂപീകരണത്തിലൂടെ സംസ്ഥാന സര്‍ക്കാര്‍ ചെയ്യുന്നത്.

സര്‍ക്കാര്‍ അംഗീകൃത സ്വകാര്യ ഐ.റ്റി.ഐ കളില്‍ പഠിക്കുന്ന ന്യൂനപക്ഷ മതവിഭാഗങ്ങളിലെ (മുസ്ലിം, ക്രിസ്ത്യന്‍, സിഖ്, ബുദ്ധ, പാഴ്‌സി, ജൈനര്‍) ദാരിദ്ര്യ രേഖയ്ക്ക് താഴെയുള്ള കുടുംബങ്ങളിലെ വിദ്യാര്‍ത്ഥികള്‍ക്കുള്ള ഫീ-റീഇംബേഴ്‌സ്‌മെന്റ് സ്‌കീം 2017-18 ലേക്ക് കേരള സംസ്ഥാന ന്യൂനപക്ഷക്ഷേമ വകുപ്പ് അപേക്ഷ ക്ഷണിച്ചു. ബി.പി.എല്‍ അപേക്ഷകരുടെ അഭാവത്തില്‍ ന്യൂനപക്ഷ വിഭാഗത്തില്‍ ആറ് ലക്ഷം രൂപയില്‍ താഴെ വാര്‍ഷിക വരുമാനം ഉള്ളവരെയും പരിഗണിക്കും. മുസ്ലിങ്ങള്‍ക്കും മറ്റ് ന്യൂനപക്ഷ മതവിഭാഗത്തില്‍പ്പെട്ടവര്‍ക്കും 80:20 എന്ന അനുപാതത്തിലാണ് സ്‌കോളര്‍ഷിപ്പ് അനുവദിക്കുന്നത്.

കുടുംബശ്രീ സംസ്ഥാന മിഷനിലെ പ്രോഗ്രാം ഓഫീസര്‍ (ഒരൊഴിവ്) അസി.ജില്ലാമിഷന്‍ കോ-ഓര്‍ഡിനേറ്റര്‍ (തൃശ്ശൂര്‍-ഒന്ന്, കാസര്‍കോട്-ഒന്ന്) തസ്തികകളിലേയ്ക്ക് ഡെപ്യൂട്ടേഷന്‍ നിയമനത്തിന് യോഗ്യതയുള്ള കേന്ദ്ര-സംസ്ഥാന സര്‍ക്കാര്‍, അര്‍ദ്ധസര്‍ക്കാര്‍ ജീവനക്കാരില്‍ നിന്നും ചട്ടപ്രകാരം അപേക്ഷ ക്ഷണിച്ചു. അപേക്ഷകള്‍ അയയ്‌ക്കേണ്ട വിലാസം : എക്‌സിക്യൂട്ടീവ് ഡയറക്ടര്‍, കുടുംബശ്രീ, ട്രിഡ ബില്‍ഡിംഗ്, ചാലക്കുഴി ലെയിന്‍, മെഡിക്കല്‍ കോളേജ്, തിരുവനന്തപുരം-695011. അപേക്ഷ ലഭിക്കേണ്ട അവസാന തീയതി : നവംബര്‍ 15 വൈകിട്ട് അഞ്ച് മണി. എഴുത്തുപരീക്ഷയും ഇന്റര്‍വ്യൂവും : നവംബര്‍ 11 രാവിലെ 10 മുതല്‍.

തിരുവനന്തപുരം സി.ഇ.ടി കോളേജ് സിവില്‍ എന്‍ജിനീയറിംഗ് വിഭാഗത്തില്‍ ദിവസ വേതനാടിസ്ഥാനത്തില്‍ ഫസ്റ്റ് ഗ്രേഡ് ഇന്‍സ്ട്രക്ടറുടെ ഒരു ഒഴിവ് ഉണ്ട്. സിവില്‍ എന്‍ജിനീയറിംഗില്‍ ഫസ്റ്റ് ക്ലാസ് ബിരുദമാണ് യോഗ്യത. എഴുത്ത് പരീക്ഷയുടെയും അഭിമുഖത്തിന്റെയും അടിസ്ഥാനത്തില്‍ തയ്യാറാക്കുന്ന റാങ്ക് പട്ടിക പ്രകാരം ആയിരിക്കും നിയമനം. താത്പര്യമുള്ളവര്‍ നവംബര്‍ രാവിലെ 10 ന് സിവില്‍ എന്‍ജിനീയറിംഗ് വിഭാഗത്തില്‍ വിദ്യാഭ്യാസ യോഗ്യത, വയസ്, വ്യക്തിവിവരം എന്നിവ തെളിയിക്കുന്ന അസല്‍ രേഖകള്‍ സഹിതം എത്തിച്ചേരണം. ഫോണ്‍ : 0471-2515560.

പി.എന്‍.എക്‌സ്.4657/17

ഒ.ബി.സി വിഭാഗത്തില്‍പ്പെട്ട ഉദ്യോഗാര്‍ത്ഥികള്‍ക്കും, വിദ്യാര്‍ത്ഥികള്‍ക്കും സിവില്‍ സര്‍വ്വീസ്, മെഡിക്കല്‍/എന്‍ജിനീയറിങ് എന്‍ട്രന്‍സ്, ബാങ്കിങ് സര്‍വ്വീസ്, തുടങ്ങിയ മത്സര പരീക്ഷാ പരിശീലനത്തിന് ധനസഹായം അനുവദിക്കുന്ന പദ്ധതിയായ എംപ്ലോയബിലിറ്റി എന്‍ഹാന്‍സ്‌മെന്റ് പ്രോഗ്രാമിന് പിന്നാക്ക വിഭാഗ വികസന വകുപ്പ് അപേക്ഷ ക്ഷണിച്ചു. രണ്ട് ലക്ഷത്തില്‍ അധികരിക്കാത്ത കുടുംബ വാര്‍ഷിക വരുമാനമുള്ളവര്‍ക്ക് അപേക്ഷിക്കാം. കുറഞ്ഞ കുടുംബ വാര്‍ഷിക വരുമാനമുള്ളവര്‍ക്കായിരിക്കും പ്രഥമ പരിഗണന. www.eep.bcdd.kerala.gov.in എന്ന വെബ്‌സൈറ്റ് മുഖേന ഓണ്‍ലൈന്‍ ആയാണ് അപേക്ഷിക്കേണ്ടത്. അവസാന തീയതി നവംബര്‍ 30.

തമിഴ്‌നാട്, കര്‍ണ്ണാടക, ആന്ധ്രപ്രദേശ്, തെലുങ്കാന, പുതുച്ചേരി എന്നീ ദക്ഷിണേന്ത്യന്‍ സംസ്ഥാനങ്ങളിലെ മുഖ്യമന്ത്രിമാരുടെയും ദേവസ്വം മന്ത്രിമാരുടേയും ഉന്നത ഉദ്യോഗസ്ഥരുടെയും യോഗം നവംബര്‍ 13 ഉച്ചയ്ക്ക് 12 മണിക്ക് മുഖ്യമന്ത്രി പിണറായി വിജയന്റെ നേതൃത്വത്തില്‍ മാസ്‌ക്കറ്റ് ഹോട്ടലില്‍ നടക്കും. 2017-18 വര്‍ഷത്തെ ശബരിമല മണ്ഡല മകരവിളക്ക് തീര്‍ത്ഥാടനത്തോടനുബന്ധിച്ച് എത്തുന്ന തീര്‍ത്ഥാടകര്‍ക്ക് ആവശ്യമായ സൗകര്യം ഒരുക്കുന്നത് ചര്‍ച്ച ചെയ്യാനാണ് യോഗം. ദേവസ്വം-സഹകരണ-ടൂറിസം മന്ത്രി കടകംപള്ളി സുരേന്ദ്രന്‍ അദ്ധ്യക്ഷത വഹിക്കും.

പി.എന്‍.എക്‌സ്.4655/17

ഈ വര്‍ഷത്തെ മലയാള ദിനാഘോഷം, ഭരണഭാഷാ വാരാഘോഷം, ഭരണഭാഷാവര്‍ഷാഘോഷം എന്നിവയുടെയും ഭരണഭാഷ സംബന്ധിച്ച അവബോധ പരിപാടിയുടെയും സംസ്ഥാനതല ഉദ്ഘാടനം ഇന്ന് (നവംബര്‍ ഒന്ന്) രാവിലെ 10.30ന് സെക്രട്ടേറിയറ്റ് ദര്‍ബാര്‍ ഹാളില്‍ മുഖ്യമന്ത്രി പിണറായി വിജയന്‍ നിര്‍വഹിക്കും. സമകാലിക ജനപഥം ഭരണഭാഷാ പതിപ്പ്, ഭരണഭാഷാ പഠനപദ്ധതി പരിഷ്‌കരിച്ച പതിപ്പ് എന്നിവയുടെ പ്രകാശനവും സംസ്ഥാനതല ഭരണഭാഷാ പുരസ്‌കാര വിതരണവും മുഖ്യമന്ത്രി നിര്‍വഹിക്കും. സാംസ്‌കാരിക വകുപ്പ് മന്ത്രി എ.കെ. ബാലന്‍ അധ്യക്ഷത വഹിക്കും. മലയാള ഭാഷയ്ക്ക് നല്‍കിയ വിലപ്പെട്ട സംഭാവനകള്‍ കണക്കിലെടുത്ത് പ്രൊഫ. പന്മന രാമചന്ദ്രന്‍ നായരെ ആദരിക്കും.