തിരുവനന്തപുരം ജില്ലയില്‍ കാണാതായ മത്സ്യത്തൊഴിലാളികള്‍ക്കായി ഊര്‍ജിതമായ തെരച്ചിലാണ് ഇന്നും നടന്നത്. മന്ത്രിമാരായ കടകംപള്ളി സുരേന്ദ്രനും മെഴ്‌സിക്കുട്ടിയമ്മയും മുഴുവന്‍ സമയവും എയര്‍ഫോഴ്‌സിന്റെ ടെക്‌നിക്കല്‍ ഏര്യായിലെ കണ്‍ട്രോള്‍ റൂമുമായി ബന്ധപ്പെട്ടും വിവിധ വകുപ്പുകളിലെ ഉദ്യോഗസ്ഥര്‍ക്ക് മാര്‍ഗനിര്‍ദേശങ്ങളുമായി ഉണ്ടായിരുന്നു.  ഇന്ന് ദൗത്യസംഘം രക്ഷപ്പെടുത്തിയവരില്‍ എട്ട് മലയാളികളും ഉള്‍പ്പെടുന്നു.  കരയിലെത്തിച്ച അഞ്ച് മൃതദേഹങ്ങളില്‍ തൂത്തുക്കുടി സ്വദേശി ജൂഡിന്റെ മൃതദേഹം ഒഴികെ മറ്റാരേയും തിരിച്ചറിഞ്ഞിട്ടില്ല. 

കൊച്ചി: കടല്‍ക്ഷോഭത്തെ  തുടര്‍ന്ന് എറണാകുളത്ത് ഏഴ് ക്യാമ്പുകള്‍ സജ്ജീകരിച്ചിട്ടുണ്ടെന്ന് ജില്ലാ കലക്ടര്‍ കെ മുഹമ്മദ് വൈ സഫീറുള്ള അറിയിച്ചു. 1258 കുടുംബങ്ങളിലായി 4674 പേരാണ് ക്യാമ്പുകളില്‍ ഉള്ളത്. 

എടവനക്കാട് ഗവണ്‍മെന്റ് യുപി സ്‌കൂള്‍, ചെല്ലാനം സെന്റ് മേരീസ് എച്ച്എസ്എസ്,  ചെല്ലാനം പുത്തന്‍തോട് ഗവണ്‍മെന്റ് ഹയര്‍ സെക്കന്‍ഡറി സ്‌കൂള്‍, ചെല്ലാനം സെന്റ് ഫ്രാന്‍സിസ് ചര്‍ച്ച് പാരിഷ് ഹാള്‍, ചെല്ലാനം സെന്റ് ജോര്‍ജ്ജ് ചര്‍ച്ച് പാരിഷ് ഹാള്‍,  നായരമ്പലം ദേവിവിലാസം സ്‌കൂള്‍, ഞാറയ്ക്കല്‍ ഗവണ്‍മെന്റ് ഫിഷറീസ് സ്‌കൂള്‍ എന്നിവിടങ്ങളിലാണ് ക്യാമ്പുകള്‍ ആരംഭിച്ചിട്ടുള്ളത്. 

ഓഖി ചുഴലിക്കാറ്റിനെ സംബന്ധിച്ച് അടിയന്തര സാഹചര്യം പ്രഖ്യാപിക്കാനും നടപടികള്‍ നിര്‍ദേശിക്കാനും കാലതാമസം ഉണ്ടായി എന്ന വാര്‍ത്ത ശരിയല്ലെന്ന് ദുരന്ത നിവാരണ അതോറിറ്റി അറിയിച്ചു.  

ഓഖി ചുഴലിക്കാറ്റിനെ തുടര്‍ന്നുണ്ടായ കടല്‍ക്ഷോഭത്തില്‍ പെട്ടവര്‍ക്ക് എല്ലാവിധ വൈദ്യസഹായങ്ങളും നല്‍കി വരുന്നതായും ഏത് അടിയന്തര സാഹചര്യവും നേരിടാന്‍ ആരോഗ്യവകുപ്പ് സുസജ്ജമാണെന്നും ആരോഗ്യ വകുപ്പു മന്ത്രി കെ.കെ. ശൈലജ ടീച്ചര്‍ അറിയിച്ചു. കടലില്‍ നിന്നും രക്ഷപ്പെടുത്തി കരയിലേക്കെത്തിക്കുന്നവര്‍ക്ക് അടിയന്തര ശുശ്രൂഷ നല്‍കി ആശുപത്രിയില്‍ എത്തിക്കുന്നതില്‍ ആരോഗ്യവകുപ്പു ജീവനക്കാരുടേയും പൊതുജനങ്ങളുടേയും പങ്കാളിത്തം വളരം വലുതായിരുന്നു.

ചുഴലിക്കാറ്റിന്റെ ആഘാതത്തിലും പേമാരിയിലും കൃഷിനാശമുണ്ടായ കര്‍ഷകരുടെ വിശദവിവരം ശേഖരിച്ച് കൃത്യമായ നഷ്ടം തിട്ടപ്പെടുത്തി ധനസഹായം ലഭ്യമാക്കുന്നതിന് കൃഷിവകുപ്പ് മന്ത്രി വി.എസ്. സുനില്‍കുമാര്‍ ഉദ്യോഗസ്ഥര്‍ക്ക് നിര്‍ദേശം നല്‍കി. വിള ഇന്‍ഷുറന്‍സ് ചെയ്ത കര്‍ഷകര്‍ക്ക് നഷ്ടപരിഹാരം അടിയന്തരമായി ലഭ്യമാക്കാനും നിര്‍ദേശമുണ്ട്.

അടുത്ത 24 മണിക്കൂറിനുള്ളില്‍ കേരള, കര്‍ണാടക തീരങ്ങളിലും ലക്ഷദ്വീപിലും മണിക്കൂറില്‍ 65 കിമീറ്റര്‍ വേഗത്തില്‍ ഓഖി കൊടുങ്കാറ്റു വീശാന്‍ സാധ്യതയുണ്ടെന്നും മത്സ്യത്തൊഴിലാളികള്‍ കടലില്‍ പോകരുതെന്നും കാലാവസ്ഥാ നിരീക്ഷണകേന്ദ്രം അറിയിച്ചു.

പി.എന്‍.എക്‌സ്.5145/17

കടല്‍ക്ഷോഭത്തില്‍ അപകടത്തില്‍പ്പെട്ട് മെഡിക്കല്‍ കോളേജിലും ജനറല്‍ ആശുപത്രിയിലും ചികിത്സയില്‍ കഴിയുന്ന മത്സ്യത്തൊഴിലാളികളെ മുഖ്യമന്ത്രി പിണറായി വിജയന്‍ സന്ദര്‍ശിച്ചു. ചികിത്സയില്‍ കഴിയുന്നവരുടെ ചികിത്സാവിവരങ്ങള്‍ തിരക്കിയ മുഖ്യമന്ത്രി ഇവര്‍ക്ക് മികച്ച ചികിത്സ ലഭ്യമാക്കണമെന്ന് ആരോഗ്യവകുപ്പ് അധികൃതര്‍ക്ക് നിര്‍ദേശം നല്‍കി. ഇനിയും കണ്ടെത്താനുള്ളവര്‍ക്കായി തെരച്ചില്‍ ഊര്‍ജ്ജിതമായി തുടരുകയാണെന്നും കടല്‍ ശാന്തമായതോടെ മത്സ്യത്തൊഴിലാളികള്‍ കൂടി തെരച്ചില്‍ പ്രവര്‍ത്തനങ്ങളില്‍ ഏര്‍പ്പെടുന്നത് തെരച്ചില്‍ കൂടുതല്‍ ഫലപ്രദമാകാന്‍ ഉപകരിക്കുന്നുണ്ടെന്നും മുഖ്യമന്ത്രി പറഞ്ഞു. 

കൊച്ചി: ലോകഭിന്നശേഷി ദിനാഘോഷത്തിന്റെ ഭാഗമായുളള സംസ്ഥാനതല പരിപാടികള്‍ എറണാകുളം സെന്റ് ആല്‍ബര്‍ട്ട്‌സ് ഹയര്‍ സെക്കന്‍ഡറി സ്‌കൂളില്‍ ഇന്ന് (ഡിസംബര്‍ 3) നടക്കും. ഭിന്നശേഷിക്കാര്‍ക്കായി തിരിച്ചറിയല്‍ കാര്‍ഡ് വിതരണം, ജോബ് ഫെയര്‍, എംപ്ലോയ്‌മെന്റ് രജിസ്‌ട്രേഷന്‍, ഭിന്നശേഷിക്കാര്‍ നിര്‍മ്മിച്ച ഉത്പന്നങ്ങളുടെ വിപണന മേള, ഭിന്നശേഷിക്കാര്‍ക്കുളള സംസ്ഥാനതല അവാര്‍ഡ് വിതരണം എന്നിവ നടക്കും. രാവിലെ 8.30 ന് ജില്ല പഞ്ചായത്ത് വൈസ് പ്രസിഡന്റ് അബ്ദുള്‍ മുത്തലിബ് പതാക ഉയര്‍ത്തും. വൈകിട്ട് നാലിന് നടക്കുന്ന സമാപന സമ്മേളനത്തില്‍ മന്ത്രി കെ.കെ. ശൈലജ ഭിന്നശേഷിക്കാര്‍ക്കുളള സംസ്ഥാനതല അവാര്‍ഡുകള്‍ വിതരണം ചെയ്യും.

കൊച്ചി: നവീകരിച്ച ജില്ലാ ഇടപെടല്‍ കേന്ദ്രത്തിന്റെയും സഞ്ചരിക്കുന്ന യൂണിറ്റിന്റെയും ഉദ്ഘാടനം ഇന്ന് (2017 ഡിസംബര്‍ 3ന്) രാവിലെ 9 മണിക്ക് എറണാകുളം ജനറല്‍ ആശുപത്രിയില്‍ ആരോഗ്യ കുടുംബക്ഷേമ വകുപ്പ് മന്ത്രി കെ.കെ. ശൈലജ നിര്‍വഹിക്കും.