സുരക്ഷിത കേരളം എന്ന സ്വപ്ന സാക്ഷാത്ക്കാരത്തിന്റെ മുന്നോടിയായി  സംസ്ഥാനത്തെ ഭിന്നശേഷിക്കാര്‍ക്ക് പ്രത്യേക പരിശീലനം നല്‍കും  ജില്ലാ ദുരന്ത നിവാരണ അതോറിറ്റിയുടെയും ജില്ലാ സാമൂഹ്യനീതി വകുപ്പിന്റെയും സഹകരണത്തില്‍ എല്ലാ ജില്ലകളിലും പരിപാടി സംഘടിപ്പിക്കും.  കോട്ടയം ജില്ലയില്‍  മാര്‍ച്ച് മാസം 19 നാണ് ആദ്യ പരിശീലനം. ജില്ലാ കളക്ടര്‍ ഉദ്ഘാടനം ചെയ്യും. 

 കേരള ബ്ലോഗ് എക്‌സ്പ്രസ്സിന്റെ അഞ്ചാമത് എഡിഷന് തിരുവനന്തപുരത്ത് ഞായറാഴ്ച തുടക്കമായി. ടൂറിസം, സഹകരണം, ദേവസ്വം വകുപ്പ് മന്ത്രി കടകംപള്ളി സുരേന്ദ്രന്‍ മാസ്‌കറ്റ് ഹോട്ടലില്‍ പരിപാടിയുടെ ഫ്‌ളാഗ് ഓഫ് നിര്‍വഹിച്ചു. 'ട്രിപ്പ് ഓഫ് എ ലൈഫ് ടൈം' എന്ന ടാഗുമായി ലോക പ്രശസ്തരായ ബ്ലോഗര്‍മാര്‍ വര്‍ഷങ്ങളായി നടത്തിവരുന്ന കേരള യാത്രയുടെ അഞ്ചാമത് എഡിഷനാണിത്.  ഫ്രാന്‍സ്, അമേരിക്ക, കാനഡ, ജര്‍മ്മനി, ഇറ്റലി, സ്‌പെയിന്‍, ബള്‍ഗേറിയ, റൊമേനിയ, വെനസ്വേല, പെറു തുടങ്ങിയ രാജ്യങ്ങളില്‍ നിന്നുള്ള 30 ബ്ലോഗര്‍മാരാണ് രണ്ടാഴ്ച്ച നീണ്ടു നില്‍ക്കുന്ന കേരള ബ്ലോഗ് എക്‌സ്പ്രസ്സിന്റെ ഈ എഡിഷനില്‍ പങ്കെടുക്കുന്നത്.

2018 മാര്‍ച്ച് 30-ന് കാലാവധി അവസാനിക്കുന്ന എല്ലാ ജില്ലകളിലെയും എല്‍.ഡി.ക്ലാര്‍ക്ക് (വിവിധം) റാങ്ക് ലിസ്റ്റില്‍ നിന്ന് പരമാവധി നിയമനം നടത്തുന്നതിന് എല്ലാ ഒഴിവുകളും മാര്‍ച്ച് 27-ന് മുമ്പ് പി.എസ്.സിക്ക് റിപ്പോര്‍ട്ട് ചെയ്യണമെന്ന് വകുപ്പ് മേധാവികള്‍ക്കും നിയമന അധികാരികള്‍ക്കും സര്‍ക്കാര്‍ കര്‍ശന നിര്‍ദ്ദേശം നല്‍കി. ഇക്കാര്യത്തില്‍ വീഴ്ച വരുത്തുന്നവര്‍ക്കെതിരെ ബന്ധപ്പെട്ട വകുപ്പ് സെക്രട്ടറിമാര്‍ അച്ചടക്ക നടപടി സ്വീകരിക്കണമെന്ന് ഇതു സംബന്ധിച്ച സര്‍ക്കുലറില്‍ നിര്‍ദ്ദേശിക്കുന്നു.

    കുട്ടികളെ വെയിലത്ത് നിര്‍ത്തി പലവിധത്തിലുളള കച്ചവടങ്ങള്‍ നടത്തുകയോ, മാതാപിതാക്കളോടൊപ്പം ആയാല്‍ പോലും കുട്ടികളെ കടതിണ്ണകളിലോ, മറ്റ് തുറസായ സ്ഥലങ്ങളില്‍ കിടത്തുന്നതോ ശ്രദ്ധയില്‍പ്പെട്ടാല്‍ ഉടന്‍ ചൈല്‍ഡ് ലൈന്‍ നമ്പറായ 1098 ലോ, തണല്‍ നമ്പറായ 1517 ലോ അറിയിക്കേണ്ടതാണെന്ന് വനിതാ ശിശു വകുപ്പ് ഡയറക്ടര്‍ അറിയിച്ചു.
പി.എന്‍.എക്‌സ്.1017/18
 

    കശുവണ്ടി വികസന കോര്‍പ്പറേഷനില്‍ മാനേജിംഗ് ഡയറക്ടറുടെ തസ്തികയില്‍ ഡെപ്യൂട്ടേഷന്‍ വ്യവസ്ഥയില്‍ ഒഴിവുണ്ട്.  കേന്ദ്ര, സംസ്ഥാന പൊതുമേഖലാ സ്ഥാപനങ്ങളില്‍ മാനേജീരിയല്‍ തസ്തികകളില്‍ ജോലി ചെയ്യുന്നവര്‍ക്ക് അപേക്ഷിക്കാം.  അംഗീകൃത സര്‍വകലാശാലയില്‍ നിന്നും എം.ബി.എ. യാണ് യോഗ്യത.  ഏഴുവര്‍ഷത്തില്‍ കുറയാതെയുള്ള പ്രവര്‍ത്തിപരിചയം അഭികാമ്യം. 
    2018 ജനുവരി ഒന്നിന് 50 വയസ് കഴിയരുത്.  നിര്‍ദ്ദിഷ്ട മാതൃകയിലുള്ള അപേക്ഷ ഡെപ്യൂട്ടി സെക്രട്ടറി, വ്യവസായ (കെ) വകുപ്പ് ഗവ. സെക്രട്ടേറിയറ്റ്, തിരുവനന്തപുരം എന്ന വിലാസത്തില്‍ മാര്‍ച്ച് 27 നകം അപേക്ഷിക്കണം. 
പി.എന്‍.എക്‌സ്.1015/18
 

    തൃശൂര്‍ ജില്ലയിലെ അര്‍ദ്ധസര്‍ക്കാര്‍ സ്ഥാപനത്തില്‍ സീനിയര്‍ മാനേജര്‍ തസ്തികയില്‍ ഓപ്പണ്‍ വിഭാഗത്തില്‍ ഒരു സ്ഥിരം ഒഴിവ് നിലവിലുണ്ട്.
    ഏതെങ്കിലും അംഗീകൃത സര്‍വകലാശാലയില്‍ നിന്നും നേടിയ 60 ശതമാനം മാര്‍ക്കോടുകൂടിയ ബി-ടെക് മെക്കാനിക്കല്‍/പ്രൊഡക്ഷന്‍/മെറ്റാലര്‍ജിക്കല്‍ എന്‍ജിനീയറിംഗ് ബിരുദവും, എം.ബി.എ.യും (മാര്‍ക്കറ്റിംഗ്) എന്നിവയാണ് യോഗ്യത.  36,140 - 49740 ആണ് വേതനം.  പ്രായപരിധി 45 വയസ് (നിയമാനുസൃത വയസിളവ് ബാധകം).  ഏതെങ്കിലും എന്‍ജിനീയറിംഗ് മാനുഫാക്ചറിംഗ് ഇന്‍ഡസ്ട്രിയല്‍ യൂണിറ്റിലെ 12 വര്‍ഷം പ്രവൃത്തി പരിചയം ഉണ്ടായിരിക്കണം. 

    ബാങ്ക് മുഖേന പെന്‍ഷന്‍ വാങ്ങിവരുന്ന രണ്ടര ലക്ഷത്തിനുമേല്‍ വാര്‍ഷിക വരുമാനമുള്ള പെന്‍ഷന്‍കാര്‍ 2018-19 സാമ്പത്തിക വര്‍ഷത്തെ ആന്റിസിപ്പേറ്ററി ഇന്‍കം ടാക്‌സ് സ്റ്റേറ്റ്‌മെന്റ് ഏറ്റവും അടുത്തുള്ള ട്രഷറിയില്‍ ഏപ്രില്‍ 20 നകം ഏല്പിക്കണം.  പാനിന്റെ പകര്‍പ്പും അതോടൊപ്പം സമര്‍പ്പിക്കണം.  എന്നാല്‍, പാന്‍ മുന്‍പ് ട്രഷറിയില്‍ നല്‍കിയിട്ടുള്ളവര്‍ വീണ്ടും പകര്‍പ്പ് നല്‍കേണ്ടതില്ല.
പി.എന്‍.എക്‌സ്.1013/18