കൊച്ചി: കേന്ദ്രസംസ്ഥാന സര്‍ക്കാരുകള്‍ സംയുക്തമായി ലിസി മുഖേന നടപ്പാക്കിവരുന്ന ആം ആദ്മി ബീമാ യോജന (ആബി) പദ്ധതിയില്‍ അംഗങ്ങളായിട്ടുള്ളവര്‍ക്കായി കുറഞ്ഞ മരണവും മരണാനന്തര ധനസഹായം 30,000 രൂപയില്‍ നിന്നും രണ്ട് ലക്ഷം രൂപയാക്കി ഉയര്‍ത്തി.

കൊച്ചി: തയ്യല്‍തൊഴിലാളി ക്ഷേമനിധിബോര്‍ഡില്‍ നിന്നും പെന്‍ഷന്‍ വാങ്ങുന്നവര്‍ ആധാര്‍ കാര്‍ഡിന്റെയും പെന്‍ഷന്‍ ബുക്കിന്റെയും പകര്‍പ്പുകള്‍ എറണാകുളം ജില്ലാ ഓഫീസില്‍ നവംബര്‍ 15-നുമുമ്പ് ഹാജരാക്കണം. ആധാര്‍ കാര്‍ഡ് ഇതുവരെ ഹാജരാക്കാത്തവര്‍ക്ക് അടുത്ത ക്വാര്‍ട്ടര്‍ പെന്‍ഷന്‍ ലഭിക്കില്ലെന്ന് ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു.

കൊച്ചി: നാലാംക്‌ളാസിലോ ഏഴാംക്‌ളാസിലോ പഠനം നിലച്ചുപോയവര്‍ക്കും മലയാളം, ഇംഗ്‌ളീഷ്, ഹിന്ദി എന്നീ ഭാഷകള്‍ എഴുതാനും വായിക്കാനും അറിയാത്തവര്‍ക്കും സാക്ഷരതാമിഷന്റെ കീഴില്‍ തുടര്‍പഠനത്തിന് അവസരമുണ്ട്. ഫോണ്‍ - 9946820950

കൊച്ചി: മദ്യത്തിനും മയക്കുമരുന്നിനുമെതിരെയുള്ള ബോധവത്കരണത്തിനായുള്ള സര്‍ക്കാരിന്റെ ലഹരി വര്‍ജന മിഷന്‍ (വിമുക്തി)യുടെ ജില്ലാ എക്‌സിക്യൂട്ടീവ് കമ്മിറ്റിയുടെ യോഗം നവംബര്‍ 6  ഉച്ചയ്ക്ക് രണ്ടിന് കളക്ടറേറ്റ് കോണ്‍ഫറന്‍സ് ഹാളില്‍ നടക്കും.

കൊച്ചി: നിയമസഭയുടെ ആരോഗ്യവും കുടുംബക്ഷേമവും സംബന്ധിച്ച് സബ്ജക്ട് കമ്മിറ്റി നവംബര്‍ ഏഴിന് രാവിലെ 10.30ന് എറണാകുളം കളക്ടറേറ്റ് കോണ്‍ഫറന്‍സ് ഹാളില്‍ യോഗം ചേരും. ക്ലീനിക്കല്‍ എസ്റ്റാബ്ലിഷ്‌മെന്റ് (രജിസ്‌ട്രേഷനും നിയന്ത്രണവും) ബില്‍ 2017 നെ സംബന്ധിച്ച് വ്യക്തികളില്‍ നിന്നും സംഘടനകളില്‍ നിന്നും നേരിട്ട് ഹര്‍ജികള്‍ സ്വീകരിക്കും. യോഗത്തില്‍ സമിതി ചെയര്‍പേഴ്‌സണായ വകുപ്പു മന്ത്രിയും അംഗങ്ങളായ 10 എം.എല്‍.എ മാരും പങ്കെടുക്കും.

കരട് സ്ഥലംമാറ്റ ലിസ്റ്റില്‍പെട്ട ഹയര്‍സെക്കണ്ടറിയിലെ അംഗപരിമിത അധ്യാപകരുടെ സ്ഥലംമാറ്റം നിര്‍ത്തിവയ്ക്കാനും നിയമപരമായ അവകാശം സംരക്ഷിക്കാന്‍ നടപടി സ്വീകരിക്കാനും അംഗപരിമിതര്‍ക്കായുള്ള സംസ്ഥാന കമ്മീഷണറുടെ കോടതി ഹയര്‍സെക്കണ്ടറി വിദ്യാഭ്യാസ ഡയറക്ടര്‍ക്ക് നിര്‍ദേശം നല്‍കി.  കരട് ലിസ്റ്റിന്റെ പുനഃപരിശോധനയ്ക്കു ശേഷം 60 ശതമാനത്തിലധികം ഭിന്നശേഷിയുള്ളയാള്‍ ആവശ്യപ്പെട്ടിട്ടില്ലെങ്കില്‍ അഞ്ച് വര്‍ഷം പൂര്‍ത്തിയാക്കിയ അധ്യാപകനെ അതേ  സ്ഥലത്തുതന്നെയോ അതേ ജില്ലയില്‍ മറ്റൊരിടത്തോ സമീപജില്ലയിലോ മുന്‍ഗണനാക്രമം അനുസരിച്ച് മാറ്റം നല്‍കാന്‍ അടിയന്തിര നടപടി സ്വീകരിക്കണമെന്നും നിര്‍ദേശിച്ചിട്ടുണ്ട്.

കേരള ഖാദി ഗ്രാമവ്യവസായ ബോര്‍ഡിന്റെ നിയന്ത്രണത്തിലുള്ള നൂല്‍പ്പ്-നെയ്ത്ത് യൂണിറ്റുകളില്‍ ജോലി ചെയ്യുന്ന മുഴുവന്‍ ഖാദി തൊഴിലാളികളുടേയും, 2017 ഏപ്രില്‍ മുതല്‍ സെപ്റ്റംബര്‍ വരെയുള്ള മിനിമം വേതനം വിതരണം ചെയ്തു. മുന്‍ വര്‍ഷങ്ങളിലെ മുഴുവന്‍ മിനിമം വേതന ഡി.എ കുടിശ്ശികയും ഇതോടൊപ്പം നല്‍കി. ഖാദി സ്ഥാപനങ്ങളിലെ തൊഴിലാളികളുടെ, ലഭ്യമായ ക്‌ളെയിമുകളിന്‍മേലുള്ള മുഴുവന്‍ മിനിമം വേതനവും വിതരണം ചെയ്തിട്ടുണ്ടെന്നും കൈപ്പറ്റാത്തവര്‍ അതതു ജില്ലാ പ്രൊജക്ട് ഓഫീസുമായി ബന്ധപ്പെടണമെന്നും ഖാദി ബോര്‍ഡ് വൈസ് ചെയര്‍മാന്‍ എം.വി.ബാലകൃഷ്ണന്‍ മാസ്റ്റര്‍ അറിയിച്ചു.

പി.എന്‍.എക്‌സ്.4721/17

    കേരളീയരുടെ പൊതുവേദിയായി ലോക കേരള സഭ രൂപീകരിക്കുന്നതിനും പ്രഥമ സമ്മേളനം 2018 ജനുവരി 12, 13 തീയതികളില്‍ തിരുവനന്തപുരത്ത് നടത്താനും സര്‍ക്കാര്‍ ഉത്തരവായി.  
    ലോക കേരള സഭ കാലപരിധി ഇല്ലാതെ തുടരും.  രണ്ട് വര്‍ഷം കൂടുമ്പോള്‍ നാമനിര്‍ദേശം ചെയ്യപ്പെട്ട മൂന്നിലൊന്നു പേര്‍ സഭയില്‍ നിന്ന് വിരമിക്കും.  തല്‍സ്ഥാനത്തേക്ക് പുതിയ അംഗങ്ങളെ നാമനിര്‍ദേശം ചെയ്യും.  പൊതു തിരഞ്ഞെടുപ്പുകള്‍ക്കനുസരിച്ച് സംസ്ഥാന നിയമസഭയിലെ അംഗങ്ങളും രാജ്യസഭ, ലോക്‌സഭ അംഗങ്ങളും മാറും.  രണ്ടു വര്‍ഷത്തിലൊരിക്കല്‍ സഭ യോഗം ചേരും.  ആവശ്യമെങ്കില്‍ സര്‍ക്കാര്‍ തീരുമാനിക്കുന്നതനുസരിച്ച് കൂടുതല്‍ തവണ യോഗം ചേരും.

ജലവിഭവ വകുപ്പ് സംഘടിപ്പിച്ച ഫയല്‍ അദാലത്തില്‍ മൂന്ന് വര്‍ഷത്തിലധികം പഴക്കമുളള 135 ഫയലുകള്‍ തീര്‍പ്പാക്കുകയും 106 ഫയലുകളില്‍ അന്തിമ നടപടി തീരുമാനിക്കുകയും ചെയ്തു.  65 ശതമാനം ഫയലുകളിലാണ് തീര്‍പ്പായത്.  വിജിലന്‍സ് റിപ്പോര്‍ട്ട് അടങ്ങിയതുള്‍പ്പെടെയുളള മൂന്നു വര്‍ഷത്തിലേറെ പഴക്കമുളള 126 ഫയലുകളാണിനി സെക്രട്ടേറിയറ്റിലെ ജലവിഭവ വകുപ്പില്‍ അവശേഷിക്കുന്നത്.  2016 ന് ശേഷം നടത്തിയ മൂന്നാമത്തെ ഫയല്‍ അദാലത്താണിത്. സെക്രട്ടേറിയറ്റ് സൗത്ത് കോണ്‍ഫറന്‍സ് ഹാളില്‍ മന്ത്രി മാത്യു ടി. തോമസിന്റെ നേതൃത്വത്തില്‍ രാവിലെ 10ന് ആരംഭിച്ച ഫയല്‍ അദാലത്ത് രാത്രി 8.30 നാണ് അവസാനിച്ചത്.

ഈ വര്‍ഷത്തെ ഓണം മേളകളോടനുബന്ധിച്ച് സപ്ലൈകോ സംഘടിപ്പിച്ച 'ഓണം സമ്മാനമഴ 2017' സമ്മാനപദ്ധതിയുടെ നറുക്കെടുപ്പ് നവംബര്‍ 14 ന് കൊച്ചി ഗാന്ധിനഗറിലുള്ള സപ്ലൈകോ കേന്ദ്രകാര്യാലയത്തില്‍ വെച്ച് നടത്തപ്പെടുന്നു.

സംസ്ഥാനതല വിജയിക്ക് ബംപര്‍ സമ്മാനമായ '5 പവന്‍ സ്വര്ണ്ണ വും ഓരോ ജില്ലയിലെയും ഒരു വിജയിക്ക് ഒരു പവന്‍ സ്വര്ണ്ണ വുമാണ് സമ്മാനമായി നല്കുന്നത്'.