കൈത്തറി വസ്ത്ര ഡയറക്ടറേറ്റിന്റെ ആഭിമുഖ്യത്തില്‍ ഡിസംബര്‍ 23 വരെ വികാസ് ഭവനില്‍ കൈത്തറി വസ്ത്രങ്ങളുടെ പ്രദര്‍ശനവും വില്‍പനയും സംഘടിപ്പിക്കും.  പ്രസിദ്ധമായ കാസര്‍കോഡ് സാരികള്‍, കണ്ണൂര്‍ ഫര്‍ണിഷിംഗ് ഉത്പന്നങ്ങള്‍, കൂത്താമ്പുളളി, ചേന്ദമംഗലം, ബാലരാമപുരം സാരികള്‍, സെറ്റുമുണ്ടുകള്‍, ബാഗുകള്‍, മെയ്ഡ്അപ്‌സ്, കര്‍ട്ടനുകള്‍, റെഡിമെയ്ഡുകള്‍ തുടങ്ങി വൈവിധ്യമാര്‍ന്നതും, ഗുണമേന്മയുളളതുമായ ഉത്പന്നങ്ങള്‍ ലഭിക്കും.  കൈത്തറി ഉത്പനന്നങ്ങള്‍ക്ക് 20 ശതമാനം സര്‍ക്കാര്‍ റിബേറ്റ് ലഭിക്കും.

പി.എന്‍.എക്‌സ്.5447/17

മാധ്യമങ്ങളിലെ പങ്കാളിത്ത പെന്‍ഷന്‍ പദ്ധതിയില്‍ വരുന്ന പത്രപ്രവര്‍ത്തകേതര ജീവനക്കാരുടെ പെന്‍ഷന്‍ ആയിരം രൂപ വര്‍ദ്ധിപ്പിച്ച് സര്‍ക്കാര്‍ ഉത്തരവായി.  ഇതോടെ പെന്‍ഷന്‍ തുക 6,000 രൂപയായി.  2017 ഏപ്രില്‍ ഒന്നു മുതല്‍ മുന്‍കാല പ്രാബല്യത്തോടെയാണ് ഉത്തരവ്.

പി.എന്‍.എക്‌സ്.5446/17

സംസ്ഥാനത്തെ എല്ലാ ജില്ലകളിലും സാംസ്‌കാരിക സമുച്ചയങ്ങള്‍ നിര്‍മ്മിക്കുന്നതിനും ചിത്രാഞ്ജലി സ്റ്റുഡിയോ ഫിലിം സിറ്റിയായി വികസിപ്പിക്കുന്നതിനും വിവിധോപയോഗ ഫിലിം ഫെസ്റ്റിവല്‍ കോംപ്ലക്‌സ് നിര്‍മ്മിക്കുന്നതിനുമുള്ള വിശദ പദ്ധതി റിപ്പോര്‍ട്ട് തയ്യാറാക്കുന്നതിനും പദ്ധതി നിര്‍വഹണത്തില്‍ തീരുമാനമെടുക്കുന്നതിനുമായി വിദഗ്ധ കമ്മിറ്റി രൂപീകരിച്ച് സര്‍ക്കാര്‍ ഉത്തരവായി.

മൃഗസംരക്ഷണവകുപ്പിലെ ഹെഡ് ക്ലാര്‍ക്ക് തസ്തികയിലെ 2017 ഒക്ടോബര്‍ 31 അനുസരിച്ചുള്ള അന്തിമ മുന്‍ഗണനാ പട്ടിക www.ahdkerala.gov.in ല്‍ പ്രസിദ്ധീകരിച്ചു.

പി.എന്‍.എക്‌സ്.5444/17

തൃശ്ശൂര്‍ ജില്ലയിലെ ഒരു സര്‍ക്കാര്‍ സ്ഥാപനത്തില്‍ കാഴ്ചവൈകല്യമുള്ളവര്‍ക്ക് സംവരണം ചെയ്ത തസ്തികയിലെ ഒരു താത്കാലിക ഒഴിവില്‍ നിയമനം നടത്തുന്നു.  എസ്.എസ്.എല്‍.സിയോ തത്തുല്യ യോഗ്യതയോ ഉണ്ടാവണം. കേരള സര്‍ക്കാരിന്റെ ആയുര്‍വേദ തെറാപ്പിസ്റ്റ് ട്രെയിനിംഗ് കോഴ്‌സ് പാസായിരിക്കണം.  18നും 41 നും മദ്ധ്യേയായിരിക്കണം പ്രായം. 

നിശ്ചിത യോഗ്യതയുള്ളവര്‍ ജനുവരി ആറിനകം അടുത്തുള്ള എംപ്ലോയ്‌മെന്റ് എക്‌സ്‌ചേഞ്ചുകളില്‍ പേര് രജിസ്റ്റര്‍ ചെയ്യണം.   

പി.എന്‍.എക്‌സ്.5443/17

വിഴിഞ്ഞം ഭാഗത്തുനിന്നും കടലില്‍ മത്സ്യബന്ധനത്തിനു പോകുകയും ഓഖി ചുഴലിക്കാറ്റില്‍പ്പെട്ട് മരണമടയുകയും കാണാതാവുകയും ചെയ്ത 26 മത്സ്യത്തൊഴിലാളികളുടെ വീടുകളില്‍ ഫിഷറീസ്  വകുപ്പ് മന്ത്രി ജെ. മെഴ്‌സിക്കുട്ടിഅമ്മ സന്ദര്‍ശനം നടത്തി ബന്ധുക്കളെ ആശ്വസിപ്പിച്ചു. 

സര്‍ക്കാരിന്റെ ഓഖി ദുരിതാശ്വസ നിധിയിലേക്ക് കേരള ഖാദി ഗ്രാമവ്യവസായ ബോര്‍ഡും ജീവനക്കാരും 10 ലക്ഷം രൂപ സംഭാവന ചെയ്തു. ബോര്‍ഡ് വൈസ് ചെയര്‍മാന്‍ എം.വി.ബാലകൃഷ്ണന്‍ മാസ്റ്റര്‍ 10 ലക്ഷം രൂപയുടെ ചെക്ക് ഖാദി ബോര്‍ഡ് ചെയര്‍മാനും വ്യവസായ മന്ത്രിയുമായ എ.സി. മൊയ്തീന് കൈമാറി. ബോര്‍ഡ് അംഗം റ്റി.വി.ബേബി, സെക്രട്ടറി കൃഷ്ണകുമാര്‍ റ്റി.വി, ഫിനാന്‍ഷ്യല്‍ അഡൈ്വസര്‍ ജി.ഹരികുമാരമേനോന്‍, ഡയറക്ടര്‍ കെ.എസ്സ്. പ്രദീപ് കുമാര്‍ എന്നിവര്‍ സന്നിഹിതരായിരുന്നു. 

പി.എന്‍.എക്‌സ്.5441/17

    2018 ജനുവരി ഒന്ന് മുതല്‍ സബ്‌സിഡി നിരക്കില്‍ ലഭിക്കുന്ന രാസവളങ്ങള്‍ പി.ഒ.എസ്. മെഷീന്‍ വഴി മാത്രമേ ലഭിക്കുകയുള്ളൂ.  യൂറിയ, സിംഗിള്‍ സൂപ്പര്‍ ഫോസ്‌ഫേറ്റ്, എന്‍.പി.കെ. കോംപ്ലക്‌സ് വളങ്ങള്‍, ഡൈ അമോണിയം ഫോസ്‌ഫേറ്റ്, മ്യൂറേറ്റ് ഓഫ് പൊട്ടാഷ് (എം.ഒ.പി) എന്നിവയും സിറ്റി കംപോസ്റ്റും, ചെറുകിട വ്യാപാരികള്‍ പി.ഒ.എസ് മെഷീന്‍ വഴി മാത്രമേ ഇനി വില്‍ക്കാന്‍ പാടുള്ളൂ.  കര്‍ഷകര്‍ ആധാര്‍ കാര്‍ഡുമായെത്തി വിരലടയാളം പതിച്ചാണ് വളം വാങ്ങേണ്ടത്.

    ഭാഷാ ഇന്‍സ്റ്റിറ്റ്യൂട്ട് സംഘടിപ്പിച്ച വിവേകാനന്ദ സപര്‍ശം, നവോത്ഥാന ദൃശ്യയാത്ര എന്നീ പരിപാടികളുടെ സമാപനം ഇന്ന് (ഡിസംബര്‍ 22) വൈകിട്ട് ടാഗോര്‍ ഹാളില്‍ നടക്കും.  സാംസ്‌ക്കാരിക വകുപ്പ് മന്ത്രി എ.കെ. ബാലന്‍ സമാപന പരപാടികള്‍ ഉദ്ഘാടനം ചെയ്യും.
    സ്വാമി വിവേകാനന്ദന്‍ കേരളം സന്ദര്‍ശിച്ചതിന്റെ 125-ാം വാര്‍ഷികമാണ് വിവേകാനന്ദ സ്പര്‍ശം എന്ന പേരില്‍ സംഘടിപ്പിക്കുന്നത്.  സംസ്ഥാനത്തെ മുഴുവന്‍ ജില്ലകളിലും പര്യടനം നടത്തിയ ശേഷമാണ് നാളെ തിരുവനന്തപുരത്ത് സമാപിക്കുന്നത്.  നവംബര്‍ 27 ന് മുഖ്യമന്ത്രിയാണ് പരിപാടി കവടിയാറില്‍ ഉദ്ഘാടനം ചെയ്തത്.

    തിരുവനന്തപുരം ജില്ലാ പഞ്ചായത്തിന്റെ പദ്ധതി പ്രകാരം ജില്ലാ വ്യവസായ കേന്ദ്രം നടപ്പാക്കുന്ന പദ്ധതികള്‍ക്ക് അര്‍ഹരായ പവര്‍ലൂം വ്യവസായ സഹകരണ സംഘങ്ങളില്‍ നിന്ന് അപേക്ഷ സ്വീകരിക്കുന്നത് ഡിസംബര്‍ 30 വരെ നീട്ടി.  വിശദവിവരങ്ങള്‍ക്ക് ജില്ലാ വ്യവസായ കേന്ദ്രവുമായി നേരിട്ട് ബന്ധപ്പെടണമെന്ന് മാനേജര്‍ അറിയിച്ചു.  കൂടുതല്‍ വിവരങ്ങള്‍ക്ക് 0471 2326756, 2322076.