ഇന്ത്യൻ സ്വച്ഛതാ ലീഗ് സീസൺ 2 ന്റെ ഭാഗമായി ഏലൂർ നഗരസഭയിൽ സംഘടിപ്പിച്ച സ്വച്ഛതാ റാലി വ്യവസായ വകുപ്പ് മന്ത്രി പി. രാജീവ് ഫ്ലാഗ് ഓഫ് ചെയ്തു. ഏലൂർ മുൻസിപ്പൽ ചെയർമാൻ എ.ഡി സുജിലിന്റെ നേതൃത്വത്തിൽ സംഘടിപ്പിച്ച റാലി ഏലൂർ കിഴക്കും ഭാഗം ഇ.എസ്.ഐ ഡിസ്പെൻസറി പരിസരത്തു നിന്നാരംഭിച്ചു പാതാളം ജംഗ്ഷനിൽ സമാപിച്ചു. 

കൊച്ചി കായലിലെ ആവേശത്തിരയില്‍
ജലരാജാക്കന്മാരായി വീയപുരം ചുണ്ടന്‍

കൊച്ചി കായലിനെ ആവേശത്തിരയിലാഴ്ത്തി ചാമ്പ്യന്‍സ് ബോട്ട് ലീഗ്(സി.ബി.എല്‍) വള്ളംകളിയുടെ സംസ്ഥാനതല ഉദ്ഘാടന മത്സരത്തില്‍ ജലരാജാവായി വീയപുരം ചുണ്ടന്‍. വിനോദസഞ്ചാര വകുപ്പ് നടത്തുന്ന ചാമ്പ്യന്‍സ് ബോട്ട് ലീഗിന്റെ മൂന്നാംപതിപ്പിന്റെ രണ്ടാം മത്സരത്തിലാണ് എതിരാളികളെ വള്ളപ്പാടിന് പിന്നിലാക്കി പള്ളാത്തുരുത്തി ബോട്ട് ക്ലബ് ട്രോപ്പിക്കല്‍ ടൈറ്റന്‍സ് തുഴഞ്ഞ വീയപുരം ചുണ്ടന്‍ വിജയിയായത്. 3 മിനിട്ട് 27.01 സെക്കന്റ് കൊണ്ടാണ് കൂടെ തുഴഞ്ഞ മറ്റ് വള്ളങ്ങളെ  മറികടന്ന് വീയപുരം വിജയക്കൊടി പാറിച്ചത്.

എഴുത്തുകാരന്‍, സാംസ്കാരിക പ്രവര്‍ത്തകന്‍ എന്നീ നിലകളില്‍ ശ്രദ്ധേയമായ വ്യക്തിമുദ്ര പതിപ്പിച്ച പ്രഗത്ഭനായിരുന്നു സി ആര്‍ ഓമനക്കുട്ടന്‍ എന്ന് മുഖ്യമന്ത്രി പിണറായി വിജയന്‍ അനുശോചന സന്ദേശത്തില്‍ പറഞ്ഞു. 

ചാമ്പ്യൻസ് ബോട്ട് ലീഗിന് മറൈൻഡ്രൈവിൽ തുടക്കമായി

കോവിഡിന് ശേഷം കേരളത്തിലെ ആഭ്യന്തര വിനോദസഞ്ചാരമേഖലയിൽ  വൻവർദ്ധനയെന്ന്  പൊതുമരാമത്ത് ടൂറിസം വകുപ്പ് മന്ത്രി പി എ മുഹമ്മദ് റിയാസ് പറഞ്ഞു. മറൈൻഡ്രൈവിൽ ആരംഭിച്ച ചാമ്പ്യൻസ് ബോട്ട് ലീഗ്  മൂന്നാം പതിപ്പിന്റെ ഉദ്ഘാടനം ഓൺലൈനായി നിർവഹിച്ച് സംസാരിക്കുകയായിരുന്നു അദ്ദേഹം.

നേമം നിയോജകമണ്ഡലത്തിലെ വാഴമുട്ടം സര്‍ക്കാര്‍ ഹൈസ്‌കൂളിനെ അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിന്റെ ഭാഗമായി നിര്‍മിക്കുന്ന ബഹുനില മന്ദിരത്തിന്റെ ശിലാസ്ഥാപനം പൊതുവിദ്യാഭ്യാസ വകുപ്പ് മന്ത്രി വി ശിവന്‍കുട്ടി നിര്‍വഹിച്ചു. നേമത്തിന്റെ മുഖഛായ മാറ്റുന്ന തരത്തിലുള്ള വികസന പദ്ധതികളാണ് മണ്ഡലത്തില്‍ നടപ്പിലാക്കുന്നതെന്ന് മന്ത്രി പറഞ്ഞു. വികസന മുരടിപ്പിലായിരുന്ന നേമം മണ്ഡലം ഇന്ന് വികസന വഴിയിലാണ്. കോടിക്കണക്കിനു രൂപയുടെ വികസനമാണ് മണ്ഡലത്തില്‍ നടന്നുകൊണ്ടിരിക്കുന്നത്.

നിപ വൈറസ് ബാധ സ്ഥിരീകരിച്ച സ്ഥലങ്ങളിൽ പ്രതിരോധ പ്രവർത്തനം ഊർജിതമാക്കി ആരോഗ്യ പ്രവർത്തകർ. ഇന്ന് 11959 വീടുകളിൽ ഗൃഹ സന്ദർശനങ്ങൾ പൂർത്തിയായി. കണ്ടെയിൻമെന്റ് സോണുകളിൽ ഉൾപ്പെട്ട വാർഡുകളിലെ ആകെ 34617 വീടുകളിലാണ് ആരോഗ്യ പ്രവർത്തകർ സന്ദർശനം നടത്തിയത്. 

ജില്ലയിലെ വിവിധ പഞ്ചായത്ത്, മുനിസിപ്പാലിറ്റി, കോർപ്പറേഷൻ എന്നിവിടങ്ങളിലെ വിവിധ വാർഡുകളിലാണ്  ഗൃഹ സന്ദർശനം നടത്തുന്നത്. വില്യാപ്പള്ളിയിൽ 551 വീടുകളും , മരുതോങ്കര 701, ചെറുവണ്ണൂർ 2204, ബേപ്പൂർ 2884, നല്ലളം 928, ഫറോക്ക് 4202  വീടുകളിലും ഉൾപ്പെടെ വിവിധ ഭാഗങ്ങളിലായി 11959 വീടുകളിലാണ് ഇന്ന് ഗൃഹ സന്ദർശനം പൂർത്തിയായത്.

നിപ പ്രതിരോധ പ്രവർത്തനങ്ങളുടെ ഭാഗമായി കേന്ദ്ര നിരീക്ഷണ സംഘം കുറ്റ്യാടിയിലെത്തി. മരുതോങ്കരയിലെ കുടുംബാരോഗ്യ കേന്ദ്രത്തിലെത്തിയ ഏഴംഗ സംഘം പ്രതിരോധ പ്രവർത്തനങ്ങൾ ചർച്ച ചെയ്തു. നിപ വൈറസിന്റെ ഉറവിടം കണ്ടെത്തുന്നതുൾപ്പെടെയുള്ള കാര്യങ്ങളും ചർച്ചയായി.

കുറ്റ്യാടി താലൂക്ക് ആശുപത്രി സുപ്രണ്ട് ഡോ അനുരാധയുടെ നേതൃത്വത്തിൽ മരുതോങ്കര കുടുംബാരോഗ്യ കേന്ദ്രത്തിൽ ചേർന്ന പ്രത്യേക യോഗത്തിൽ പ്രദേശത്തെ നിപ പ്രതിരോധ പ്രവർത്തനങ്ങളെ കുറിച്ചും നിപ ബാധിത പ്രദേശങ്ങളെ കുറിച്ചുമുള്ള വിവരങ്ങൾ സംഘം ചോദിച്ചറിഞ്ഞു.

നിപ ബാധയിൽ ജില്ലക്ക് ആശ്വാസദിനമെന്നും നിലവിൽ പുതിയ കേസുകൾ ഒന്നും റിപ്പോർട്ട് ചെയ്തിട്ടില്ലെന്നും ആരോഗ്യ വകുപ്പ് മന്ത്രി വീണാ ജോർജ്. നിപ അവലോകന യോഗത്തിന് ശേഷം കലക്ടറേറ്റ് കോൺഫറൻസ് ഹാളിൽ മാധ്യമപ്രവർത്തകരോട് സംസാരിക്കുകയായിരുന്നു മന്ത്രി. ചികിത്സയിലുള്ള ഒൻപത് വയസ്സുള്ള കുട്ടിയെ വെന്റിലേറ്ററിൽ നിന്നും മാറ്റി. നിലവിൽ ഓക്സിജൻ സപ്പോർട്ടുണ്ട്. കുട്ടിയുടെ ആരോഗ്യ നിലയിലെ പുരോഗതി പ്രതീക്ഷാനിർഭരമാണെന്ന് മന്ത്രി അറിയിച്ചു. നിപക്കെതിരെ ജനങ്ങളെ ചേർത്തുപിടിച്ച് ഒറ്റക്കെട്ടായാണ് സർക്കാർ പ്രവർത്തിക്കുന്നതെന്ന് മന്ത്രി പറഞ്ഞു.

കേന്ദ്ര ഗവൺമെന്റിന്റെ മൃഗസംരക്ഷണ വിദഗ്ദ്ധ സംഘം നാളെ (സെപ്റ്റംബർ 18) മുതൽ സെപ്റ്റംബർ 20 വരെ ജില്ലയിൽ നിപ ബാധിത പ്രദേശങ്ങളിൽ വിശദമായ പഠനവും സാമ്പിൾ കലക്ഷനും നടത്തുമെന്ന് ജന്തു രോഗ നിയന്ത്രണ പദ്ധതി ജില്ലാ കോർഡിനേറ്റർ അറിയിച്ചു. നാളെ (സെപ്റ്റംബർ 18) മൃഗസംരക്ഷണ വകുപ്പ് മന്ത്രി ജെ ചിഞ്ചു റാണിയുടെ അധ്യക്ഷതയിൽ ചേരുന്ന യോഗത്തിൽ സംഘം പങ്കെടുക്കുമെന്നും കോർഡിനേറ്റർ അറിയിച്ചു.

മൃഗസംരക്ഷണ വകുപ്പിന്റെ കീഴിലുള്ള സ്റ്റേറ്റ് ഇൻസ്റ്റിറ്റ്യൂട്ട് ഫോർ അനിമൽ ഡിസീസസിൽ നിന്നും കേരള വെറ്ററിനറി ആന്റ് അനിമൽ സയൻസ് യൂണിവേഴ്സ്റ്റിയിൽ നിന്നുള്ള ഡോക്ടർമാരും കേന്ദ്ര സംഘത്തോടൊപ്പം ചേരും.

ജില്ലയിൽ നിപയുമായി ബന്ധപ്പെട്ട് നിലവിൽ സമ്പർക്കപട്ടികയിൽ ഉള്ളത് 1,233 പേർ. ഇന്ന് 44 പേരെയാണ് സമ്പർക്ക പട്ടികയിൽ ഉൾപ്പെടുത്തിയത്. ഇന്ന് ലഭിച്ച 42 പരിശോധന ഫലങ്ങളും നെഗറ്റീവ് ആണ്. റീജിയണൽ വി ആർ ഡി ലാബിൽ ഇന്ന് ലഭിച്ചത് 54 സാമ്പിളുകളാണ്. പരിശോധന നടത്തിയ 20 സാമ്പിളുകളും നെഗറ്റീവ് ആണ്. ആകെ 136 സാമ്പിളുകളാണ് പരിശോധനയിൽ നെഗറ്റീവ് ആയത്.