കണ്ണമ്പ്ര ഗ്രാമപഞ്ചായത്ത് പ്രദേശത്ത് താമസക്കാരായ ഡയാലിസിസ് ആവശ്യമുള്ള രോഗികള്‍ക്ക് ധനസഹായത്തിന് അപേക്ഷിക്കാം. ഇതിമ്പുറമേ പഞ്ചായത്തിലെ താമസിക്കുന്ന പട്ടികജാതി വിഭാഗം വിദ്യാര്‍ത്ഥികള്‍ക്ക് സ്‌കോളര്‍ഷിപ്പിനും അപേക്ഷിക്കാം. വൃക്ക രോഗികള്‍ ഡയാലിസിസ് ചെയ്യുന്ന ആശുപത്രിയിലെ സാക്ഷ്യപത്രം, വരുമാന സര്‍ട്ടിഫിക്കറ്റ്, ആധാര്‍-റേഷന്‍ കാര്‍ഡ് പകര്‍പ്പ് എന്നിവ സഹിതം ഗ്രാമപഞ്ചായത്ത് ഓഫീസില്‍ ധനസഹായത്തിന് അപേക്ഷിക്കണം.

അട്ടപ്പാടി രാജീവ് ഗാന്ധി സ്മാരക ആര്‍ട്സ് ആന്‍ഡ് സയന്‍സ് കോളെജില്‍ ബിരുദ/ബിരുദാനന്തര കോഴ്സുകളില്‍ വിവിധ വിഭാഗങ്ങളില്‍ സീറ്റ് ഒഴിവുകളുണ്ട്. കാലിക്കറ്റ് യൂണിവേഴ്സിറ്റി ക്യാപ് (സിഎപി) രജിസ്ട്രേഷന്‍ നടത്തിയ വിദ്യാര്‍ത്ഥികള്‍ സെപ്റ്റംബര്‍ 19 നകം കോളെജില്‍ നേരിട്ട് എത്തി ബന്ധപ്പെട്ട രേഖകള്‍ സഹിതം അപേക്ഷ നല്‍കണം എന്ന് പ്രിന്‍സിപ്പാള്‍ അറിയിച്ചു. ബികോ കമ്പ്യൂട്ടര്‍ ആപ്ലിക്കേഷന്‍, ബി.എ ഹിസ്റ്ററി, ബി.എ മലയാളം, ബി.എ പബ്ലിക്ക് അഡ്മിനിസ്ട്രേഷന്‍, എം.എ പബ്ലിക്ക് അഡ്മിനിസ്ട്രേഷന്‍ എന്നീ സീറ്റുകളിലാണ് ഒഴിവ്. ഫോണ്‍: 04924 254142.
 

പാലക്കാട് ഗവ പോളിടെക്നിക് കോളെജിലെ ഇന്‍സ്ട്രക്ടര്‍ ഇന്‍ ഫിസിക്കല്‍ എഡ്യൂക്കേഷന്‍ (ഫിസിക്കല്‍ ഇന്‍സ്ട്രക്ടര്‍) തസ്തികയില്‍ ദിവസ വേതനാടിസ്ഥാനത്തില്‍ നിയമനത്തിന് സെപ്റ്റംബര്‍ 20ന് രാവിലെ 10ന് ഇന്റര്‍വ്യൂ നടക്കും. യോഗ്യത: ഏതെങ്കിലും ഒരു അംഗീകൃത സര്‍വ്വകലാശായലില്‍ നിന്നും ഫിസിക്കല്‍ എഡ്യൂക്കേഷനില്‍ ഡിഗ്രി. താല്‍പ്പര്യമുള്ളവര്‍ അന്നേ ദിവസം അസ്സല്‍ സര്‍ട്ടിഫിക്കറ്റുകള്‍ സഹിതം കല്ലിങ്ങല്‍ റോഡില്‍ സ്ഥിതി ചെയ്യുന്ന കോളെജ് ക്യാമ്പസില്‍ ജനറല്‍ വിഭാഗം വകുപ്പ് മേധാവി മുന്‍പാകെ എത്തണമെന്ന് പ്രിന്‍സിപ്പാള്‍ അറിയിച്ചു. ഫോണ്‍: 0491 2572640.
 

ഒറ്റപ്പാലം താലൂക്കിലെ കരിമ്പുഴ കുന്നക്കാട് കിഴക്കേക്കര ശ്രീ മഹാവിഷ്ണു ക്ഷേത്രം, കടമ്പഴിപ്പുറം ശ്രീ വായില്യാംകുന്ന് ക്ഷേത്രം എന്നിവിടങ്ങളില്‍ ട്രസ്റ്റി നിയമനം. താല്‍പര്യമുള്ളവര്‍ സെപ്റ്റംബര്‍ 30 ന് വൈകീട്ട് അഞ്ചിനകം മലബാര്‍ ദേവസ്വം ബോര്‍ഡ് പാലക്കാട് അസിസ്റ്റന്റ് കമ്മീഷണര്‍ക്ക് നിശ്ചിത ഫോറത്തില്‍ അപേക്ഷ നല്‍കണം.

ജനസംഖ്യാദിനത്തോടനുബന്ധിച്ച് ജില്ലാ ശിശുക്ഷേമ സമിതി യു.പി വിഭാഗം കുട്ടികള്‍ക്കായി നടത്തിയ പ്രസംഗ മത്സരത്തിന്റെയും ഹൈസ്‌കൂള്‍ വിഭാഗം കുട്ടികള്‍ക്കായി നടത്തിയ ഉപന്യാസ മത്സരത്തിന്റെയും വിജയികളെ പ്രഖ്യാപിച്ചു. പ്രസംഗ മത്സരത്തില്‍ ഒറ്റപ്പാലം എ.യു.പി സ്‌കൂളിലെ വിദ്യാര്‍ത്ഥികളായ പി. ഋഷികേഷ് ഒന്നാം സ്ഥാനവും എം. ശ്രീലക്ഷ്മി രണ്ടാം സ്ഥാനവും കരസ്ഥമാക്കി. പൂത്തൂര്‍ ജി.യു.പി സ്‌കൂളിലെ വി. സ്വാതിയും ജി.എച്ച് സ്‌കൂള്‍ ബമ്മണ്ണൂരിലെ മൃദുല മൂന്നാം സ്ഥാനവും നേടി. ഉപന്യാസമത്സരത്തില്‍ പാലക്കാട് പി.എം.ജി.എച്ച്.എസ്.എസിലെ എ. ആയുഷ് രാജ് ഒന്നാം സ്ഥാനവും ശ്രീകൃഷ്ണപുരം എച്ച്.എസ്.എസിലെ പാര്‍വണ ജി.

ജില്ലാ സിവില്‍ സര്‍വീസ് മത്സരങ്ങള്‍ സെപ്റ്റംബര്‍ 18, 19 തീയതികളില്‍ വിവിധ കേന്ദ്രങ്ങളിലായി നടക്കും. ബാഡ്മിന്റണ്‍, ടേബിള്‍ ടെന്നീസ്, സ്വിമ്മിങ് മത്സരങ്ങള്‍ സെപ്റ്റംബര്‍ 18 ന് കോസ്‌മോ പൊളിറ്റന്‍ ക്ലബ്ബിലും ബാസ്‌ക്കറ്റ്‌ബോള്‍, ക്രിക്കറ്റ് എന്നിവ കോട്ടമൈതാനത്തും പവര്‍ ലിഫ്റ്റിങ്, വെയിറ്റ് ലിഫ്റ്റിങ് എന്നിവ മാധവ രാജാ ക്ലബ്ബിലും വോളിബോള്‍ ബി.ഇ.എം സ്‌കൂളിലും കാരംസ് സ്വാമീസ് സ്മാഷ് പാലക്കാടന്‍സിലും നടത്തുന്നു.

കൊല്ലങ്കോട്, അട്ടപ്പാടി ബ്ലോക്കുകളുടെ ബ്ലോക്ക് ഡെവലപ്‌മെന്റ് സ്ട്രാറ്റജി തയ്യാറാക്കുന്നതിന്റെ ഭാഗമായി ബന്ധപ്പെട്ട നിര്‍വഹണ ഉദ്യോഗസ്ഥന്‍ തയ്യാറാക്കിയിട്ടുള്ള നിര്‍ദേശങ്ങള്‍ ചര്‍ച്ച ചെയ്യുന്നതിനും ബ്ലോക്ക് ഡെവലപ്പ്‌മെന്റ് സ്ട്രാറ്റജിയുടെ കരട് പ്രസന്റേഷന്‍ നടത്തുന്നതിനുമായി യോഗങ്ങള്‍ ചേരുന്നു. നീതി ആയോഗ് നടപ്പാക്കുന്ന ആസ്പിരേഷണല്‍ ബ്ലോക്ക് പ്രോഗ്രാം പദ്ധതി ജില്ലയില്‍  നടപ്പാക്കുന്നതിനായി കൊല്ലങ്കോട്, അട്ടപ്പാടി ബ്ലോക്കുകളെയാണ് തെരഞ്ഞെടുത്തിരിക്കുന്നത്.

നാഷണല്‍ എംപ്ലോയ്‌മെന്റ് സര്‍വീസ്, ജില്ലാ എംപ്ലോയ്‌മെന്റ് എക്‌സ്‌ചേഞ്ച്, എംപ്ലോയബിലിറ്റി സെന്ററിന്റെ ആഭിമുഖ്യത്തില്‍ വടക്കഞ്ചേരി സെന്റ് മേരീസ് ഇന്‍സ്റ്റിറ്റ്യൂട്ട് ഓഫ് ടെക്‌നോളജി ആന്‍ഡ് സയന്‍സ് കോളെജില്‍ ജോബ് ഫെയര്‍ സംഘടിപ്പിച്ചു. മേളയില്‍ 62 പേരെ വിവിധ ഒഴിവുകളിലേക്ക് തെരഞ്ഞെടുത്തതായും 154 പേരെ ഷോര്‍ട്ട് ലിസ്റ്റ് ചെയ്തതായും ഉദ്യോഗദായകര്‍ അറിയിച്ചു. വിവിധ മേഖലകളിലെ 22 ഉദ്യോഗദായകര്‍ എത്തിയ തൊഴില്‍മേളയില്‍ 443 ഉദ്യോഗാര്‍ഥികള്‍ പങ്കെടുത്തു. പരിപാടി വടക്കഞ്ചേരി ഗ്രാമപഞ്ചായത്ത് പ്രസിഡന്റ് ലിസി സുരേഷ് ഉദ്ഘാടനം ചെയ്തു. ഗ്രാമപഞ്ചായത്തംഗം എ.എം സേതുമാധവന്‍ അധ്യക്ഷനായി.

പൊതുയിടങ്ങളില്‍ മാലിന്യം വലിച്ചെറിഞ്ഞതിന് തദ്ദേശസ്ഥാപനങ്ങളുടെ നേതൃത്വത്തില്‍ ജില്ലയില്‍ ജൂണ്‍ ഒന്ന് മുതല്‍ ജൂലൈ 31 വരെ പിഴയായി ഈടാക്കിയത് 14,47,682 രൂപ, അതേസമയം എന്‍ഫോഴ്സ്മെന്റ് ടീം തദ്ദേശസ്ഥാപനങ്ങള്‍ക്ക് നല്‍കിയ ശിപാര്‍ശയുടെ അടിസ്ഥാനത്തില്‍ 2,97,700 രൂപ പിഴ ഈടാക്കിയിട്ടുണ്ട്. പൊതുയിടങ്ങളില്‍ മാലിന്യം നിക്ഷേപിക്കുന്നവരുടെ വിവരങ്ങള്‍ നല്‍കിയതിന് 16,250 രൂപ പാരിതോഷികവും നല്‍കിയിട്ടുണ്ട്.