ജില്ലാ പഞ്ചായത്തിന്റെ 2023-24 വാർഷിക പദ്ധതിയിൽ ഉൾപ്പെടുത്തി പാടശേഖരസമിതികൾക്ക് മൂന്ന് ലക്ഷം രൂപ വരെ വിലവരുന്ന കാർഷികയന്ത്രങ്ങൾ നിബന്ധനകൾക്ക് വിധേയമായി സൗജന്യ നിരക്കിൽ വിതരണം ചെയ്യുന്നു. നടീൽ യന്ത്രം, മെതിയന്ത്രം, സ്‌പ്രേയറുകൾ, ടില്ലർ എന്നിവയാണ് പദ്ധതിയിൽ ഉൾപ്പെടുത്തിയ കാർഷികയന്ത്രങ്ങൾ. കഴിഞ്ഞവർഷങ്ങളിൽ ഇതേ പദ്ധതിയിൽ യന്ത്രങ്ങൾ ലഭിച്ചവർക്ക് അവ ഒഴികെയുളള മറ്റ് യന്ത്രങ്ങൾക്ക് വീണ്ടും അപേക്ഷിക്കാം. തെരഞ്ഞെടുക്കപ്പെട്ടാൽ ഗുണഭോക്തൃവിഹിതമായി 10 ശതമാനം തുക ജില്ലാ പഞ്ചായത്തിൽ മുൻകൂറായി അടക്കണം.

അമ്മാനപ്പാറ-പാച്ചേനി-തിരുവട്ടൂർ-തേറണ്ടി-ചപ്പാരപ്പടവ് റോഡിലെ തിരുവട്ടൂരിലെ പാറോളി ജംഗ്ഷൻ മുതൽ അരിപ്പാമ്പ്ര ജംഗ്ഷൻ വരെ റോഡ് പ്രവൃത്തി നടക്കുന്നതിനാൽ സെപ്റ്റംബർ 16 മുതൽ രണ്ട് മാസത്തേക്ക് പാറോളി ജംഗ്ഷൻ മുതൽ അരിപ്പാമ്പ്ര വരെയുള്ള വാഹന ഗതാഗതം നിരോധിച്ചതായി കെ ആർ എഫ് ബി-പി എം യു എക്‌സിക്യൂട്ടീവ് എഞ്ചിനീയർ അറിയിച്ചു. ചപ്പാരപ്പടവിലേക്ക് പോകുന്ന വാഹനങ്ങൾ പാറോളി ജംഗ്ഷന് ഇടതുവശത്തെ ശിവക്ഷേത്രം റോഡിൽ കയറി അരിപ്പാമ്പ്ര ജുമാ മസ്ജിദ് വഴി അരിപ്പാമ്പ്ര ജംഗ്ഷനിലേക്ക് എത്തേണ്ടതാണ്.
 

ജില്ലയിൽ വിദ്യാഭ്യാസ വകുപ്പിൽ ഫിസിക്കൽ എജുക്കേഷൻ ടീച്ചർ (യു പി എസ് 525/2019) തസ്തികയുടെ തെരഞ്ഞെടുപ്പിനായി 2023 ജനുവരി 13ന് പ്രസിദ്ധീകരിച്ച ചുരുക്കപ്പട്ടികയിൽ ഉൾപ്പെടുകയും ഒറ്റത്തവണ പ്രമാണ പരിശോധന പൂർത്തിയാക്കുകയും ചെയ്ത ഉദ്യോഗാർഥികൾക്കായി സെപ്റ്റംബർ 19ന് ജില്ലാ പി എസ് സി ഓഫീസിൽ ഇന്റർവ്യൂ നടത്തും.  ഉദ്യോഗാർഥികൾക്ക് പ്രൊഫൈൽ മെസേജ്, ഫോൺ മെസേജ് എന്നിവ നൽകിയിട്ടുണ്ട്.

2023-25 വർഷത്തേക്കുളള ഡി എൽ എഡ് ഗവ. ക്വാട്ട റാങ്ക് ലിസ്റ്റ് പ്രസിദ്ധീകരിച്ചു. ഗവ. സയൻസ് വിഭാഗം ഷുവർ ലിസ്റ്റ് ഇന്റർവ്യൂ സെപ്റ്റംബർ 20 ന് രാവിലെ ഒമ്പത് മണിക്കും വെയ്റ്റിങ് ലിസ്റ്റ് രാവിലെ 10.30നും നടക്കും. കോമേഴ്‌സ് വിഭാഗം ഷുവർ ലിസ്റ്റ് ഇന്റർവ്യൂ 20ന് ഉച്ച 1.30, വെയ്റ്റിങ് ലിസ്റ്റ് ഉച്ച 2.30, ഹ്യൂമാനിറ്റിസ് വിഭാഗം ഷുവർ ലിസ്റ്റ് ഇന്റർവ്യൂ 21ന് രാവിലെ ഒമ്പത് മണി, വെയ്റ്റിങ് ലിസ്റ്റ് രാവിലെ 10.30 എന്നിങ്ങനെ കണ്ണൂർ വിദ്യാഭ്യാസ ഉപഡയറക്ടറുടെ കാര്യാലയത്തിൽ നടക്കും.

കണ്ണൂർ ജില്ലയിൽ സ്ഥിരമായി ലൈസൻസ് റദ്ദ് ചെയ്ത റേഷൻ കടകൾക്ക് സ്ഥിരം ലൈസൻസി നിയമനത്തിനായി അപേക്ഷ ക്ഷണിച്ചു. എസ്എസ്എൽസി പാസ്സായ ഭിന്നശേഷി, പട്ടികജാതി, പട്ടികവർഗ വിഭാഗത്തിൽപ്പെട്ടവർക്ക് അപേക്ഷിക്കാം. അപേക്ഷകൾ ഒക്ടോബർ 13ന് വൈകുന്നേരം മൂന്ന് മണിക്ക് മുമ്പായി ജില്ലാ സപ്ലൈ ഓഫീസിൽ ലഭിക്കണം.

പട്ടികജാതി വികസന വകുപ്പിന്റെ മയ്യിലെ ആൺകുട്ടികളുടെ പ്രീമെട്രിക് ഹോസ്റ്റലിൽ വിദ്യാർഥികളുടെ രാത്രികാല മേൽനോട്ട ചുമതലകൾക്കായി മേട്രൺ കം റസിഡന്റ് ട്യൂട്ടർമാരെ നിയമിക്കുന്നു. വൈകീട്ട് നാല് മുതൽ രാവിലെ എട്ട് മണി വരെയാണ് പ്രവൃത്തി സമയം. യോഗ്യത: ബിരുദം, ബി എഡ്. താൽപര്യമുള്ളവർ യോഗ്യത തെളിയിക്കുന്ന സർട്ടിഫിക്കറ്റുകളുടെ അസ്സലും പകർപ്പും സഹിതം സെപ്റ്റംബർ 21ന് രാവിലെ 10 മണിക്ക് ജില്ലാ പട്ടികജാതി വികസന ഓഫീസിൽ ഹാജരാകണം.  

സംസ്ഥാന  പട്ടികജാതി പട്ടികവർഗ വികസന കോർപ്പറേഷൻ പട്ടികജാതിയിൽപ്പെട്ട യുവതീ യുവാക്കൾക്കായി നടപ്പാക്കുന്ന ലഘു വ്യവസായ യോജന പദ്ധതിയിൽ സ്വയം തൊഴിൽ വായ്പ അനുവദിക്കുന്നതിനായി ജില്ലയിലെ തൊഴിൽ രഹിതരായ യുവതീ യുവാക്കളിൽ നിന്നും അപേക്ഷ ക്ഷണിച്ചു. പരമാവധി രണ്ട് മുതൽ നാല് ലക്ഷം രൂപയാണ് വായ്പ അനുവദിക്കുന്നത്.

എംപ്ലോയീസ് പ്രോവിഡന്റ് ഫണ്ടുമായി ബന്ധപ്പെട്ട 'നിധി താങ്കൾക്കരികെ ജില്ല വ്യാപന പദ്ധതി' ഗുണഭോക്താക്കൾക്കായുള്ള പരാതി പരിഹാര സമ്പർക്ക പരിപാടി സെപ്റ്റംബർ 28ന് നടക്കും. കൂത്തുപറമ്പ് വീവേഴ്‌സ് സഹകരണ സംഘം ഹാൾ, കാസർകോട് കലക്ടറേറ്റ് കോൺഫറൻസ് ഹാൾ എന്നിവിടങ്ങളിൽ രാവിലെ ഒമ്പത് മുതൽ ഉച്ചക്ക് ഒരു മണി വരെയാണ് പരിപാടി. ഇപിഎഫ് അംഗങ്ങൾ, തൊഴിലുടമകൾ, ഇ പി എസ് പെൻഷണർമാർ, തൊഴിലാളി സംഘടനാ പ്രതിനിധികൾ എന്നിവർക്ക് ഒരേ സമയം വിവര കൈമാറ്റവും പരാതി പരിഹാരവും ഈ പരിപാടിയിലൂടെ സാധിക്കും. പരിപാടിയിൽ പങ്കെടുക്കാൻ താൽപര്യമുള്ളവർ ആവശ്യമായ രേഖകൾ സഹിതം എത്തിച്ചേരുക. ഫോൺ: 0497 2712388.
 

ചെണ്ടയാട് ജവഹർ നവോദയ വിദ്യാലയത്തിൽ കേന്ദ്രസർക്കാർ സ്‌കിൽ മിനിസ്ട്രിയുടെ കീഴിൽ ആറ് മാസത്തെ സെൽഫ് എംപ്ലോയിഡ് ടൈലർ സർട്ടിഫിക്കറ്റ് കോഴ്‌സിന് അപേക്ഷ ക്ഷണിച്ചു. 18നും 45നും ഇടയിൽ പ്രായമുള്ള എട്ടാം ക്ലാസ് പാസായതും ഡിഗ്രി കഴിയാത്തതുമായ സ്ത്രീകൾക്ക് അപേക്ഷിക്കാം. താൽപര്യമുളളവർ സെപറ്റംബർ 18, 19 തീയതികളിൽ ആധാർ കാർഡ്, ഫോട്ടോ എന്നിവ സഹിതം വിദ്യാലയ ഓഫീസിൽ രജിസ്റ്റർ ചെയ്യണം. ഫോൺ: 0490 2962965.

വിവിധ തൊഴിലധിഷ്ഠിത കോഴ്‌സുകളിലേക്ക് കെൽട്രോൺ അപേക്ഷ ക്ഷണിച്ചു. എസ്എസ്എൽസി, പ്ലസ്ടു, വിഎച്ച്എസ്ഇ, ഡിപ്ലോമ, ഡിഗ്രി പാസായവർക്ക് സെപ്റ്റംബർ 20 വരെ അപേക്ഷിക്കാം. ലോജിസ്റ്റിക്‌സ് ആന്റ് സപ്ലൈ ചെയിൻ മാനേജ്‌മെന്റ്, മൾട്ടിമീഡിയ ആന്റ് ആനിമേഷൻ, ഹാർഡ് വെയർ ആന്റ് അഡ്വാൻസ്ഡ് നെറ്റ് വർക്കിങ്ങ്, മെഷീൻ ലേണിങ് യൂസിങ് പൈത്തൺ,  ഇന്റീരിയർ ഡിസൈൻ, ഫയർ ആന്റ് സേഫ്റ്റി തുടങ്ങിയ കോഴ്‌സുകളിലേക്കും അപേക്ഷിക്കാം. ഫോൺ: 9188665545.