സാമ്പത്തികമായി പിന്നോക്കം നില്‍ക്കുന്ന ഒരു ലക്ഷം രൂപയില്‍ താഴെ വാര്‍ഷിക വരുമാനമുളള  55 വയസിനുതാഴെ പ്രായമുളള വിധവകളായ സ്ത്രീകള്‍ക്ക് സ്വയംതൊഴില്‍ ചെയ്ത് വരുമാനമാര്‍ഗം കണ്ടെത്തുന്നതിന് ഒറ്റത്തവണ സഹായമായി 30,000രൂപ അനുവദിക്കുന്ന സഹായഹസ്തം പദ്ധതിയില്‍ 2023-24 സാമ്പത്തിക വര്‍ഷത്തേക്ക് ധനസഹായം അനുവദിക്കുന്നതിനായി ഓണ്‍ലൈന്‍ വെബ് സൈറ്റ് മുഖേന അപേക്ഷ ക്ഷണിച്ചു.വിശദവിവരങ്ങള്‍ www.schemes.wcd.kerala.gov.in എന്ന വെബ് സൈറ്റില്‍ ലഭിക്കും.അപേക്ഷ സമര്‍പ്പിക്കേണ്ട അവസാന തീയതി  ഡിസംബര്‍ 15. ഫോണ്‍. 0468 2966649.

പയ്യന്നൂർ നഗരസഭ ഖരമാലിന്യ പരിപാലന പ്ലാൻ തയ്യാറാക്കുന്നതിന്റെ ഭാഗമായി സാമ്പിൾ പഠനം നടത്തുന്നതിനുള്ള ഉപകരണങ്ങൾ  വിതരണം ചെയ്തു. നഗരസഭാധ്യക്ഷ  കെ വി ലളിതയിൽ നിന്നും ഹരിതകർമ്മസേന പ്രവർത്തകർ ഏറ്റുവാങ്ങി. തിരഞ്ഞെടുത്ത വാർഡുകളിലെ നിശ്ചിത വീടുകളിൽ നിന്നും, കടകളിൽ നിന്നും തുടർച്ചയായി എട്ട് ദിവസങ്ങളിൽ ഉത്പാദിപ്പിക്കുന്ന ജൈവ അജൈവ മാലിന്യത്തിന്റെ അളവ് എടുത്താണ് സാമ്പിൾ പരിശോധനയ്ക്ക് അയക്കുക. ഇത്തരം പരിശോധന നടത്തുന്നതിലൂടെ നഗരസഭയിൽ ഉത്പാദിപ്പിക്കുന്ന മാലിന്യത്തിന്റെ അളവ് തിട്ടപ്പെടുത്താം.

പിണറായി, പെരളശ്ശേരി ഗ്രാമപഞ്ചായത്തുകളെ നടപ്പാത മുഖേന ബന്ധിപ്പിച്ച് അഞ്ചരക്കണ്ടി പുഴയ്ക്ക് കുറുകെ പാറപ്രത്ത് 55.42 കോടി രൂപ കിഫ്ബി സഹായത്തോടെ നിർമ്മിച്ച ലോക്കോടു കൂടിയ റെഗുലേറ്ററിന്റെ ഉദ്ഘാടനം സെപ്റ്റംബർ ഒമ്പത് ശനിയാഴ്ച വൈകീട്ട് 6.30ന് മുഖ്യമന്ത്രി പിണറായി വിജയൻ നിർവഹിക്കും. ജലവിഭവ വകുപ്പിന്റെ സ്‌പെഷൽ പർപ്പസ് വെഹിക്കിൾ ആയ കേരള ഇറിഗേഷൻ ഇൻഫ്രാസ്ട്രക്ചർ ഡവലപ്‌മെൻറ് കോർപ്പറേഷൻ ലിമിറ്റഡ് ആണ് നിർമ്മാണ പ്രവർത്തനം നടത്തിയത്.

നെൽകൃഷി കൂടുതൽ ഊർജിതമാക്കി പട്ടുവം സമ്പൂർണ തരിശുരഹിത പഞ്ചായത്താവാനൊരുങ്ങുന്നു. പഞ്ചായത്ത്, കൃഷിവകുപ്പ്, പട്ടുവം സർവീസ് സഹകരണ ബാങ്ക്, ജെ എൽ ജി ഗ്രൂപ്പുകൾ, തൊഴിലുറപ്പ് തൊഴിലാളികൾ, ഗ്രന്ഥശാല, കുടുംബശ്രീ, വിവിധ സ്വാശ്രയ സംഘങ്ങൾ, കർഷക ഗ്രൂപ്പുകൾ എന്നിവയുടെ നേതൃത്വത്തിൽ ഈ വർഷം 200 ഹെക്ടറിലധികം സ്ഥലത്താണ് നെൽകൃഷി ചെയ്യുന്നത്.

കണ്ണൂർ കോർപ്പറേഷൻ പരിധിയിലെ ഓട്ടോറിക്ഷകളുടെ പാർക്കിങ് നമ്പർ പുനഃപരിശോധനയുമായി ബന്ധപ്പെട്ട് പാർക്കിങ് നമ്പർ ഒന്ന് മുതൽ 4200 വരെയുള്ള  ഓട്ടോകളും രേഖകളും സെപ്റ്റംബർ ഒമ്പതിന് രാവിലെ 8.30 മുതൽ 11 മണി വരെ തോട്ടട എസ് എൻ കോളേജ് ഗ്രൗണ്ടിൽ പരിശോധിക്കുന്നു. ഉടമസ്ഥൻമാർ നിർദേശങ്ങൾ പാലിച്ച് വാഹനം ബന്ധപ്പെട്ട രേഖകൾ സഹിതം ഹാജരാക്കണം. പെർമിറ്റിലുള്ളതു പ്രകാരം പാർക്കിങ് പ്ലേസ് മുൻഭാഗത്ത് ഇടതുവശത്തായി എഴുതണം. കണ്ണൂർ ടൗൺ പാർക്കിങ് ഉള്ള വണ്ടികൾ മുൻഭാഗത്ത് ഗ്ലാസ് ഫ്രെയിം മുതൽ താഴോട്ട് മഞ്ഞ നിറം അടിച്ചിരിക്കണം.

സംസ്ഥാന മ്യൂസിയം വകുപ്പ് പെരളശ്ശേരിയിൽ നിർമ്മിക്കുന്ന എ കെ ജി മ്യൂസിയം അടുത്തവർഷം ആഗസ്റ്റിൽ പൊതുജനങ്ങൾക്കായി തുറന്ന് കൊടുക്കുമെന്ന് പുരാവസ്തു പുരാരേഖ വകുപ്പ് മന്ത്രി അഹമ്മദ് ദേവർ കോവിൽ പറഞ്ഞു. മ്യൂസിയത്തിന്റെ നിർമ്മാണ പുരോഗതി വിലയിരുത്തിയ ശേഷം സംസാരിക്കുകയായിരുന്നു മന്ത്രി.
അടുത്ത വർഷം ഫെബ്രുവരിയിൽ കെട്ടിട നിർമ്മാണം പൂർത്തിയാകും. തുടർന്ന് ആറ് മാസം കൊണ്ട് മറ്റ് പ്രവൃത്തികൾ നടത്തി ഉദ്ഘാടനം ചെയ്യും. പ്രവൃത്തി തൃപ്തികരമായ രീതിയിലാണ് മുന്നോട്ടു പോകുന്നത്. മ്യൂസിയം പുതുതലമുറക്ക് പാഠപുസ്തകമാകുമെന്നും മന്ത്രി പറഞ്ഞു.

കേന്ദ്ര കാലാവസ്ഥാവകുപ്പ് സെപ്റ്റംബർ എട്ട്, ഒമ്പത്, 10 തീയ്യതികളിൽ കണ്ണൂർ, കാസർകോട് ജില്ലകളിൽ മഞ്ഞ അലർട്ട് പ്രഖ്യാപിച്ചു. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്ററിൽ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർഥമാക്കുന്നത്.

സംസ്ഥാന ശുചിത്വ മിഷന്റെ 'നവകേരളം വൃത്തിയുള്ള കേരളം' ക്യാമ്പയിന്റെ ഭാഗമായി വേങ്ങൂർ ഗ്രാമപഞ്ചായത്തിന്റെയും ജില്ലാ ശുചിത്വമിഷന്റെയും സംയുക്താഭിമുഖ്യത്തിൽ കൊമ്പനാട് ഗവ യു.പി സ്കൂളിൽ പഞ്ചായത്ത് തല ശുചിത്വോത്സവം -2023 സംഘടിപ്പിച്ചു. പരിപാടിയുടെ ഉദ്ഘാടനം ഗ്രാമപഞ്ചായത്ത് പ്രസിഡന്റ് ശില്പ സുധീഷ് നിർവഹിച്ചു.

മുളന്തുരുത്തി അഡീഷണൽ ഐ.സി.ഡി.എസ് പ്രോജക്ടിന്റെ ആവശ്യത്തിനായി 2023-24 വർഷം വാഹനം വാടകയ്ക്ക് നൽകുന്നതിന് താത്പര്യമുള്ള വ്യക്തികൾ/സ്ഥാപനങ്ങൾ എന്നിവയിൽ നിന്നും വ്യവസ്ഥകൾക്ക് വിധേയമായി  റീടെന്‍ഡർ ക്ഷണിച്ചു. ടെന്‍ഡറുകള്‍ സെപ്റ്റംബര്‍ 14-ന് ഉച്ചയ്ക്ക് 12 വരെ സ്വീകരിക്കും. കൂടുതല്‍ വിവരങ്ങള്‍ക്ക് ഫോൺ 0484-2786680, 9188959730, 9947864784.

സംസ്ഥാന വിനോദ സഞ്ചാര വകുപ്പിന് കീഴിലുളള കളമശേരി ഫുഡ് ക്രാഫ്റ്റ് ഇന്‍സ്റ്റിറ്റ്യൂട്ടില്‍ ഒരു വര്‍ഷം ദൈര്‍ഘ്യമുളള ബേക്കറി ആന്‍റ്  കൺഫക്ഷണറി കോഴ്സില്‍ ഇ.ഡബ്ല്യു.എസ് വിഭാഗത്തില്‍ ഒരു സീറ്റ് ഒഴിവുണ്ട്. യോഗ്യത പ്ലസ് ടു ജയിച്ചിരിക്കണം. താത്പര്യമുളളവര്‍  0484-2558385, 9188133492 നമ്പരില്‍ ബന്ധപ്പെടുക.