നാട്ടിക ഗ്രാമപഞ്ചായത്തിലെ ബയോബിൻ വിതരണ ഉദ്ഘാടനം ഗ്രാമപഞ്ചായത്ത് പ്രസിഡന്റ് എം ആർ ദിനേശൻ നിർവഹിച്ചു. 2023 - 24 വാർഷിക പദ്ധതിയിൽ ഉൾപ്പെടുത്തി 209 ഗുണഭോക്താക്കൾക്കായി 4,53,600 രൂപ വകയിരുത്തിയാണ് ശുചിപൂർണ ബയോബിൻ പദ്ധതി നടപ്പാക്കുന്നത്. ആദ്യഘട്ടത്തിൽ 180 രൂപ ഗുണഭോക്തൃ വിഹിതം  അടച്ച 110 പേർക്കുള്ള ബയോബിന്നുകളാണ് വിതരണം ചെയ്തത്.

ഖരമാലിന്യ സംസ്കരണം കാര്യക്ഷമമാക്കുന്നതിന് കുന്നംകുളം നഗരസഭ സുഭിക്ഷ കാന്റീനിന്റെ പിറക് വശത്ത് സ്ഥാപിക്കുന്ന സീവേജ് ട്രീറ്റ്മെന്റ് പ്ലാന്റ് (എസ് ടി പി) ഇന്ന് (സെപ്റ്റംബർ 13) നിര്‍മ്മാണം ആരംഭിക്കും.  നിര്‍മ്മാണ ഏജന്‍സിയായ എച്ച്ഇസിഎസ് പ്രതിനിധികള്‍ ചൊവ്വാഴ്ച സ്ഥലം സന്ദര്‍ശിച്ചു.  10,000 ലിറ്റര്‍ സംഭരണ ശേഷിയുള്ള പ്ലാന്റുകളാണ് ഇവിടെ സ്ഥാപിക്കുന്നത്. ചെന്നൈയില്‍ നിന്നാണ്  ഇതെത്തിക്കുന്നത്.  രണ്ടുമാസം കൊണ്ട് പദ്ധതി പൂര്‍ത്തിയാക്കും. 

കേരള മോട്ടോർ തൊഴിലാളി ക്ഷേമനിധി ബോർഡിൽ അംഗങ്ങളായ തൊഴിലാളികൾക്ക് ക്ഷേമനിധി കുടിശ്ശിക 9 ശതമാനം പലിശ ഉൾപ്പെടെ അടയ്ക്കുന്നതിന് നിബന്ധനകൾക്ക് വിധേയമായി നവംബർ 30 വരെ സമയപരിധി അനുവദിച്ചതായി ചീഫ് എക്സിക്യൂട്ടീവ് ഓഫീസർ അറിയിച്ചു. ഈ അവസരം എല്ലാ തൊഴിലാളികളും പരമാവധി പ്രയോജനപ്പെടുത്തണം. ഫോൺ: 0487 2446545.

ജില്ലാതല പ്രതിമാസ സാങ്കേതിക ഉപദേശക യോഗം കൃഷി വിജ്ഞാന കേന്ദ്രത്തിൽ ചേർന്നു. ബ്ലോക്കുകളിൽ നേരിടുന്ന കാർഷിക പ്രശ്നങ്ങൾ, വിളകളുടെ രോഗകീട ബാധകൾ, അടുത്ത മാസത്തെ കാർഷിക പ്രവർത്തനങ്ങൾ തുടങ്ങിയവ ചർച്ച ചെയ്തു.   ഇത് സംബന്ധിച്ച പരിഹാര മാർഗങ്ങൾ കർഷകർക്ക്‌ നിർദ്ദേശങ്ങളായി നൽകാനും തീരുമാനമായി.

ഇടുക്കി പൈനാവ് മോഡൽ പോളിടെക്നിക് കോളജിൽ  മൂന്നുവർഷ ബയോമെഡിക്കൽ എൻജിനീയറിങ് ഉൾപ്പെടെയുള്ള ഡിപ്ലോമ കോഴ്സുകളിൽ ഒഴിവുള്ള ഏതാനും സീറ്റുകളിലേക്ക് സ്പോട്ട് അഡ്മിഷൻ ആരംഭിച്ചു. പത്താം ക്ലാസ് പാസായവർക്ക് ഒന്നാം വർഷത്തിലേക്കും പ്ലസ് ടു സയൻസ് /വിഎച്ച്എസ്ഇ /ഐടിഐ /കെജിസിഇ പാസായവർക്ക് ലാറ്ററൽ എൻട്രി വഴി രണ്ടാം വർഷത്തിലേക്ക് നേരിട്ടും പ്രവേശനം നേടാം. താല്പര്യമുള്ളവർ രക്ഷകർത്താവുമായി അസൽ സർട്ടിഫിക്കറ്റുകളും ഫീസും സഹിതം കോളജിൽ നേരിട്ട് എത്തണം. എസ് സി / എസ് ടി/  ഒ ബി സി(എച് ) / ഒ ഇ സി വിഭാഗക്കാർക്ക് ഫീസ് ആനുകൂല്യവും ഹോസ്റ്റൽ ഫീസും ലഭിക്കും. മറ്റ് അർഹരായ വിദ്യാർഥികൾക്ക് സ്കോളർഷിപ്പും ലഭിക്കും.

മത്സ്യത്തൊഴിലാളികളുടെ മക്കൾക്കുള്ള വിദ്യാഭ്യാസാനുകൂല്യം  പ്രീമെട്രിക് ആൻഡ് പോസ്റ്റ്മെട്രിക് (ഫിഷറീസ് ഇ- ഗ്രാന്റ്സ്) 2017 - 18 സാമ്പത്തിക വർഷത്തിൽ ലഭിക്കാത്തത് സംബന്ധിച്ച പരാതികൾ തീർപ്പാക്കുന്നതിന് സെപ്റ്റംബർ 13 മുതൽ 15 വരെ ആമ്പക്കാടൻ ജംഗ്ഷനിലുള്ള ഫിഷറീസ് ഡെപ്യൂട്ടി ഡയറക്ടറുടെ കാര്യാലയത്തിൽ  അദാലത്ത് നടത്തും. ജില്ലയിലെ എല്ലാ വിദ്യാഭ്യാസ സ്ഥാപനങ്ങളിലെയും ഫിഷറീസ് സ്കോളർഷിപ്പിന്റെ  ചുമതല വഹിക്കുന്ന ഉദ്യോഗസ്ഥർ/ സ്ഥാപന മേധാവികൾ പങ്കെടുത്ത് നടപടി സ്വീകരിക്കണമെന്ന് ഫിഷറീസ് ഡെപ്യൂട്ടി ഡയറക്ടർ അറിയിച്ചു.  ഫോൺ: 0487 2441132.

സ്പോട്ട് അഡ്മിഷൻ

ഗവ. എഞ്ചിനീയറിംഗ് കോളേജിൽ വിവിധ ബ്രാഞ്ചുകളിലെ ബി.ടെക് കോഴ്സുകളിൽ ഒഴിവുള്ള സീറ്റുകളിലേക്ക് സെപ്റ്റംബർ 14ന് സ്പോട്ട് അഡ്മിഷൻ നടത്തുന്നു. താത്പര്യമുള്ള വിദ്യാർത്ഥികൾ ബന്ധപ്പെട്ട സർട്ടിഫിക്കറ്റുകൾ സഹിതം രാവിലെ 10 മണിക്ക് മുൻപായി കോളേജിൽ ഹാജരാകണമെന്ന് പ്രിൻസിപ്പൽ അറിയിച്ചു. കൂടുതൽ വിവരങ്ങൾക്ക് : 0495 2383220, 2383210 

ഇരിങ്ങാലക്കുടയിലെ ചരിത്ര സ്മാരകമായ കുട്ടൻകുളം നവീകരിക്കാൻ ഭരണാനുമതി ആയതായി ഉന്നതവിദ്യാഭ്യാസ-സാമൂഹ്യനീതി മന്ത്രി ഡോ. ആർ. ബിന്ദു അറിയിച്ചു. നാലു കോടി രൂപയുടെ എസ്റ്റിമേറ്റ് അംഗീകരിച്ചാണ് ഭരണാനുമതി നൽകിയിരിക്കുന്നതെന്നും മന്ത്രി പറഞ്ഞു. 
ഈ തുക ഉപയോഗിച്ച് കുളം ഏറ്റവും ആധുനികമായ രീതിയിൽ നവീകരിക്കും. കുട്ടൻകുളത്തിന്റെ ചരിത്രപ്രാധാന്യം കണക്കിലെടുത്തു കൊണ്ടുള്ള സൂക്ഷ്മതയോടെയാവും നവീകരണ പ്രവൃത്തി. സാങ്കേതികാനുമതിക്കുള്ള എസ്റ്റിമേറ്റിന് എത്രയും വേഗം അംഗീകാരം ലഭ്യമാക്കും. നവീകരണ പ്രവൃത്തി ഉടൻ ആരംഭിക്കുമെന്നും മന്ത്രി ഡോ. ആർ. ബിന്ദു അറിയിച്ചു.

പട്ടാമ്പി സർക്കാർ സംസ്കൃത കോളജിൽ ഫിസിക്സ് വിഷയത്തിൽ അതിഥി അധ്യാപകരെ നിയമിക്കുന്നു. യു ജി സി മാനദണ്ഡങ്ങൾ അനുസരിച്ച് യോഗ്യതയുള്ളവരും തൃശൂർ കോളജ് വിദ്യാഭ്യാസ വകുപ്പ് ഡെപ്യൂട്ടി ഡയറക്ടറുടെ കാര്യാലയത്തിൽ പേര് രജിസ്റ്റർ ചെയ്തവരും  വയസ്, പ്രവർത്തി പരിചയം, വിദ്യാഭ്യാസ യോഗ്യത എന്നിവ തെളിയിക്കുന്ന അസൽ സർട്ടിഫിക്കറ്റുകളുമായി സെപ്റ്റംബർ 15ന് രാവിലെ 10ന് പ്രിൻസിപ്പൽ മുമ്പാകെ കൂടിക്കാഴ്ചയ്ക്ക് ഹാജരാകണം. ഇവരുടെ അഭാവത്തിൽ 50 ശതമാനം മാർക്കോട് കൂടി ബന്ധപ്പെട്ട വിഷയത്തിൽ ബിരുദാനന്തര ബിരുദം ഉള്ളവരെയും പരിഗണിക്കും. ഫോൺ: 0466 2212223

ജില്ലയിൽ പനി ബാധിച്ചുള്ള അസ്വാഭാവിക മരണം റിപ്പോർട്ട് ചെയ്ത സാഹചര്യത്തിൽ ജില്ലയിൽ പ്രതിരോധ മുന്നൊരുക്ക പ്രവർത്തനങ്ങൾ ആരംഭിച്ചുവെന്നും ആരോഗ്യ ജാഗ്രത വേണമെന്നും ആരോഗ്യ വകുപ്പ് മന്ത്രി വീണാ ജോർജ്. കലക്ടറേറ്റ് കോൺഫറൻസ് ഹാളിൽ ചേർന്ന ഉന്നത തല യോഗത്തിനുശേഷം മാധ്യമപ്രവർത്തകരോട് സംസാരിക്കുകയായിരുന്നു മന്ത്രി.