പട്ടികജാതി വിഭാഗത്തില്‍പ്പെട്ട അംഗീകൃത പെട്രോളിയം ഡീലര്‍മാര്‍ക്ക് അവരുടെ നിലവിലെ പെട്രോള്‍, ഡീസല്‍, എല്‍.പി.ജി വില്‍പ്പനശാലകള്‍ക്ക്  പ്രവര്‍ത്തനമൂലധനമായി പരാമധി 10 ലക്ഷം രൂപ വരെ വായ്പ അനുവദിക്കുന്നു.

ജില്ലയിൽ നിപ വൈറസ് സ്ഥിരീകരിച്ച സാഹചര്യത്തിൽ വില്യാപ്പള്ളിയിലെ 3,4,5 വാർഡുകളും പുറമേരിയിലെ 13ാം വാർഡും കൂടി കണ്ടയിൻമെന്റ് സോണായി പ്രഖാപിച്ചു. നേരത്തെ വില്യാപ്പള്ളിയിലെ 6,7 വാർഡുകളെ കണ്ടയിൻമെന്റ് സോണിൽ ഉൾപ്പെടുത്തിയിരുന്നു.

ജില്ലാ ആയുര്‍വ്വേദ ആശുപത്രിയില്‍ ലാബ്ടെക്നീഷ്യനെ  താല്‍ക്കാലികമായി നിയമിക്കുന്നു.  സെപ്തംബര്‍ 20 ന് ഉച്ചക്ക് 12.30 ന് കല്‍പ്പറ്റ ജില്ലാ ആയുര്‍വേദ ആശുപത്രിയില്‍ വാക്ക് ഇന്‍ ഇന്റര്‍വ്യൂ നടക്കും. അംഗീകൃത സര്‍വ്വകലാശാലകളില്‍ നിന്നും ബി.എസ്.സി എം.എല്‍.ടി ബിരുദമുള്ളവര്‍ക്ക് അപേക്ഷിക്കാം.  ഉദ്യോഗാര്‍ത്ഥികള്‍ ബയോഡാറ്റ, അസ്സല്‍ യോഗ്യത സര്‍ട്ടിഫിക്കറ്റുകള്‍ എന്നിവയുമായി ഹാജരാകണം.
 

അമ്പലവയല്‍ വില്ലേജില്‍ സര്‍വെ നമ്പര്‍ 256/149 ല്‍ പ്പെട്ട 0.1740 ഹെക്ടര്‍ സ്ഥലത്ത് ജീവനും സ്വത്തിനും ഭീഷണിയായി നിന്നിരുന്നതും മുറിച്ച് സൂക്ഷിച്ചിട്ടുള്ളതുമായ ഈട്ടിമരം ഒക്ടോബര്‍ 10 ന് രാവിലെ 11.30 ന് അമ്പലവയല്‍ വില്ലേജ് ഓഫീസ് പരിസരത്ത് ലേലം ചെയ്യും. ഫോണ്‍:04936 202251.

സ്റ്റേറ്റ് ഐ.ടി. സെല്ലിന്റെ മേല്‍നോട്ടത്തില്‍  ജില്ലാ ഐ.ടി. സെല്‍ തയ്യാറാക്കിയ റവന്യു ഓണ്‍ലൈന്‍ നികുതി സേവനങ്ങള്‍ സംശയങ്ങളും മറുപടിയും സംബന്ധിച്ച ഇ-പേയ്മെന്റ് ഹെല്‍പ്പ് വീഡിയോ പ്രകാശനം ചെയ്തു.

പോളിങ്ങ് ബൂത്തുകളില്‍ മാത്രം കണ്ടിട്ടുള്ള വോട്ടിങ്ങ് യന്ത്രങ്ങള്‍ കോളനികളിലെത്തിയപ്പോള്‍ കുട്ടികള്‍ക്കും മുതിര്‍ന്നവര്‍ക്കുമെല്ലാം കൗതുകം. ആശങ്കകളൊന്നുമില്ലാതെ ഇതെല്ലാം തൊട്ടറിയാനായി പിന്നെയുള്ള തിടുക്കങ്ങള്‍. തിരുനെല്ലിയിലെ ഗോത്ര വിഭാഗങ്ങള്‍ക്കിടയില്‍ നടന്ന നന്ന ബോട്ടു നന്ന അവകാസ തെരഞ്ഞെടുപ്പ് ബോധവത്കരണ ക്യാമ്പെയിനാണ് വേറിട്ട അനുഭവമായി മാറിയത്.  ജനാധിപത്യത്തിന്റെ ഉത്സവമായ തെരഞ്ഞെടുപ്പ് പ്രക്രിയയില്‍ സമൂഹത്തിന്റെ നാനാമേഖലയില്‍ ബോധവത്കരണം വ്യാപിപ്പിക്കുന്നതിന്റെ ഭാഗമായാണ് ജില്ലാ തെരഞ്ഞെടുപ്പ് വിഭാഗം നന്ന ബോട്ടു നന്ന അവകാശ ( എന്റെ വോട്ട് എന്റെ അവകാശം) ക്യാമ്പെയിനുമായി എത്തിയത്.

മൂപ്പൈനാട് ഗ്രാമപഞ്ചായത്തില്‍ പേവിഷ നിയന്ത്രണ പരിപാടിയുടെ ഭാഗമായി റാബീസ് വാക്സിനേഷന്‍ ക്യാമ്പുകള്‍ നടത്തും. സെപ്റ്റംബര്‍ 15 ന് താഴെ അരപ്പറ്റ പകല്‍ വീട്, മേലെ അരപ്പറ്റ, തിനപുരം, നല്ലന്നൂര്‍, നെടുംകരണ, പുതിയ പാടി, ആപ്പാളം, കടല്‍മാട് എന്നിവടങ്ങളിലും സെപ്റ്റംബര്‍ 16 ന് ലക്കിഹില്‍, ജയഹിന്ദ്, വടുവഞ്ചാല്‍, ചെല്ലങ്കോട് എന്നിവടങ്ങളിലും ക്യാമ്പ് നടക്കും. ക്യാമ്പുകളില്‍ വളര്‍ത്തു പൂച്ചകളെയും നായകളെയും കൊണ്ടുവരണമെന്ന് മൂപ്പൈനാട് വെറ്ററിനറി സര്‍ജന്‍ അറിയിച്ചു.

വ്യവസായ വാണിജ്യ വകുപ്പ് സൂക്ഷ്മ, ചെറുകിട, ഇടത്തരം, ലാര്‍ജ്, മെഗാ സംരംഭങ്ങളില്‍ നിന്നും എക്സ്പോര്‍ട്ട് സേവന വ്യാപാര തദ്ദേശ സ്വയംഭരണ സ്ഥാപനങ്ങളില്‍ നിന്നും ജില്ലാ, സംസ്ഥാനതല അവാര്‍ഡിന് അപേക്ഷ ക്ഷണിച്ചു. സംരംഭകര്‍ക്ക് 2021-22 സാമ്പത്തിക വര്‍ഷത്തെ  അവാര്‍ഡിനുള്ള അപേക്ഷയും നഗരസഭ പഞ്ചായത്തുകള്‍ക്ക് 2022-23 സാമ്പത്തിക വര്‍ഷത്തേയും അവാര്‍ഡിനുള്ള അപേക്ഷയുമാണ് നല്‍കാന്‍ കഴിയുക.   മികച്ച സംരംഭങ്ങള്‍ക്ക് അവാര്‍ഡ് തുകയ്ക്ക് പുറമേ സാക്ഷ്യപത്രവും പുരസ്‌കാരവും സംസ്ഥാന- ജില്ലാതലത്തില്‍ ലഭിക്കും.

പത്തുവര്‍ഷം മുമ്പ് എടുത്തിട്ടുള്ള ആധാര്‍ കാര്‍ഡുകള്‍ ജില്ലയിലെ അക്ഷയ ആധാര്‍ എന്റോള്‍മെന്റ് കേന്ദ്രങ്ങളില്‍ പുതുക്കാം. ഗുണഭോക്താക്കള്‍ നിലവിലെ ആധാറിലെ പേര് വിശദാംശങ്ങള്‍ തെളിയിക്കുന്ന ഫോട്ടോയുള്ള രേഖയും, വിലാസം തെളിയിക്കുന്ന രേഖയുമായി ആധാര്‍ എന്റോാള്‍ കേന്ദ്രങ്ങളെ സമീപിക്കണമെന്ന് ജില്ല കളക്ടര്‍ അറിയിച്ചു. വിവരങ്ങള്‍ അക്ഷയ കേന്ദ്രങ്ങളില്‍ നിന്നും ലഭ്യമാകും. അക്ഷയ ജില്ലാ പ്രൊജക്ട് ഓഫീസ് ഫോണ്‍: 04936 206 267.

സ്പാര്‍ക്ക് വിദ്യാഭ്യാസ പദ്ധതിയുടെ ഭാഗമായി നാഷണല്‍ മീന്‍സ് കം മെറിറ്റ് സ്‌കോളര്‍ഷിപ്പ് പരീക്ഷയ്ക്കുള്ള പരിശീലനം തുടങ്ങി.  കല്‍പ്പറ്റ നിയോജക മണ്ഡലത്തിലെ എല്ലാ വിദ്യാലയങ്ങളിലും സ്‌ക്രീനിംഗ് ടെസ്റ്റ് നടന്നു. 1100 ല്‍ അധികം വിദ്യാര്‍ത്ഥികളാണ് പരീക്ഷ എഴുതിയത്. പരീക്ഷയില്‍ നിശ്ചിത ശതമാനം സ്‌കോര്‍ നേടുന്ന വിദ്യാര്‍ത്ഥികള്‍ക്ക് വിദഗ്ദരുടെ നേതൃത്വത്തില്‍ സൗജന്യ പരിശീലനം നല്‍കും. നാഷണല്‍ ടാലന്റ് സേര്‍ച്ച് എക്‌സാം, കേന്ദ്ര സര്‍വകലാശാലകളിലേക്കുള്ള മത്സര പരീക്ഷയായ സി.യു.ഇ.ടി, സിവില്‍ സര്‍വീസ് ഫൗണ്ടേഷന്‍, യു എസ് എസ് എന്നിവയുടെ സൗജന്യ പരിശീലനവും ഉടന്‍  തുടങ്ങും.