കണ്ണൂർ കൃഷ്ണമേനോൻ മെമ്മോറിയൽ ഗവ.വനിതാ കോളേജിൽ മാത്തമാറ്റിക്സ് വിഷയത്തിൽ ഗസ്റ്റ് ലക്ചററുടെ ഒഴിവ്. കോളേജ് വിദ്യാഭ്യാസ ഡെപ്യൂട്ടി ഡയറക്ടറുടെ കോഴിക്കോട് ഓഫീസിൽ പേര് രജിസ്റ്റർ ചെയ്ത ബിരുദാനന്തര ബിരുദത്തിൽ 55 ശതമാനത്തിൽ കുറയാത്ത മാർക്കും നെറ്റ്/പി എച്ച് ഡിയുമുള്ള ഉദ്യോഗാർഥികൾ സർട്ടിഫിക്കറ്റുകളുടെ അസ്സലും പകർപ്പും സഹിതം സെപ്റ്റംബർ 19ന് രാവിലെ 10.30ന് പ്രിൻസിപ്പൽ മുമ്പാകെ കൂടിക്കാഴ്ചക്ക് ഹാജരാകണം. ഫോൺ: 0497 2746175.
 

ജില്ലാ എംപ്ലോയ്മെന്റ് എക്സ്ചേഞ്ചിലെ വൊക്കേഷണൽ ഗൈഡൻസ് വിഭാഗത്തിന്റെ ആഭിമുഖ്യത്തിൽ കൂടാളി പൊതുജന വായനശാലയിൽ  30 ദിവസത്തെ സൗജന്യ മത്സര പരീക്ഷ പരിശീലനം നൽകുന്നു. പത്താതരം മുതൽ യോഗ്യത നേടിയ  ഉദ്യോഗാർഥികൾക്ക് അപേക്ഷിക്കാം. പി എസ് സി, എസ് എസ് സി മുതലായ മത്സര പരീക്ഷകൾക്ക് അപേക്ഷ നൽകിയവർക്ക് മുൻഗണന. താൽപര്യമുള്ള ഉദ്യോഗാർഥികൾ  ജില്ലാ എംപ്ലോയ്മെന്റ് എക്സ്ചേഞ്ചിൽ സെപ്റ്റംബർ 16നകം ഫോൺ നമ്പർ സഹിതമുള്ള വിശദ വിവരങ്ങൾ അടങ്ങിയ അപേക്ഷ സമർപ്പിക്കേണ്ടതാണ്. ഫോൺ: 0497 2700831.
 

ജില്ലയുടെ സമഗ്ര വിവരങ്ങളുമായി തയ്യാറാക്കുന്ന വിവര സഞ്ചയികയുടെ ഭാഗമായി ഏകദിന ശിൽപശാല സംഘടിപ്പിച്ചു. ജില്ലാ പഞ്ചായത്ത് പ്രസിഡണ്ട് പി പി ദിവ്യ ഉദ്ഘാടനം നിർവഹിച്ചു. ജില്ലയുടെ വികസനത്തിനുതകുന്ന രീതിയിൽ സമഗ്ര ആസൂത്രണത്തിന് കൃത്യമായ വിവരങ്ങൾ ലഭ്യമാക്കാൻ ജില്ലാ, ബ്ലോക്ക്, ഗ്രാമപഞ്ചായത്തുകൾ സംയുക്തമായാണ് പദ്ധതി നടപ്പാക്കുന്നത്. 47 ഗ്രാമപഞ്ചായത്തുകളും, 11 ബ്ലോക്ക് പഞ്ചായത്തുകളും ഒരു നഗരസഭയുമാണ് വിവരശേഖരണ സർവേ നടത്തുക.

പാപ്പിനിശ്ശേരി ഇ എസ് ഐ ഡിസ്പെൻസറിയിൽ ആവശ്യത്തിന് ജീവനക്കാരില്ലാത്തതിനാൽ അവിടുത്തെ പ്രവർത്തനങ്ങൾ പ്രതിസന്ധിയിലാണെന്ന കെ വി സുമേഷ് എം എൽ എയുടെ സബ്മിഷന്റെ അടിസ്ഥാനത്തിൽ വിഷയം ചർച്ച ചെയ്യുന്നതിനായി പ്രത്യേകയോഗം വിളിച്ച് ചേർക്കുമെന്ന് തൊഴിൽ വകുപ്പ് മന്ത്രി വി ശിവൻകുട്ടി അറിയിച്ചു. കേന്ദ്രസർക്കാരിന്റെ കീഴിലുള്ള ഇ എസ് ഐ കോർപ്പറേഷന്റെ ഡിസ്പെൻസറിയിൽ വിവിധ തസ്തികകൾ ഒഴിഞ്ഞു കിടക്കുകയാണെന്നും ആവശ്യത്തിന് ജീവനക്കാരില്ലാതെ പ്രവർത്തനങ്ങൾ പ്രതിസന്ധിയിലാണെന്നും കാണിച്ചായിരുന്നു എം എൽ എയുടെ സബ്മിഷൻ.

വിദ്യാർഥികളുടെ നവീനാശയങ്ങളെ പ്രോത്സാഹിപ്പിച്ച് ശാസ്ത്രജ്ഞരും സംരംഭകരുമാക്കി മാറ്റുന്ന വൈ ഐ പി ശാസ്ത്രപഥം (യങ് ഇന്നവേഷൻ പ്രോഗ്രാം) ജില്ലാതല പരിശീലനം നടന്നു. പുതിയതെരുവിൽ എസ്എസ്‌കെ ജില്ലാ പ്രൊജക്ട് കോർഡിനേറ്റർ ഇ സി വിനോദ് ഉദ്ഘാടനം ചെയ്തു. ജില്ലാ പ്രോഗ്രാം ഓഫീസർ രാജേഷ് കടന്നപ്പള്ളി, കെ ഡിസ്‌ക് ജില്ലാ കോർഡിനേറ്റർ ജിൻഷ രാജീവൻ, ഐസിടി പ്രൊജക്ട് കോർഡിനേറ്റർ നൂപുര ആർ നാഥ് എന്നിവർ സംസാരിച്ചു. ഐസിടി ട്രെയ്‌നർമാരായ എം ശ്രീനിവാസൻ, എം ഡി രാജീവൻ, ബിപിസി കെ സി പ്രകാശൻ, വൈ പ്രദീപ് എന്നിവർ ക്ലാസെടുത്തു.

വിവിധ ആരോഗ്യപരിപാടികൾ ഉൾക്കൊള്ളിച്ചുകൊണ്ട് സംഘടിപ്പിക്കുന്ന ആയുഷ്മാൻ ഭവ യുടെ ഓൺലൈൻ ഉദ്ഘാടനം രാഷ്ട്രപതി ദ്രൗപതി മുർമുവും ജില്ലാ തല ഉദ്ഘാടനം ജില്ലാ പഞ്ചായത്ത് പ്രസിഡന്റ് പി പി ദിവ്യയും നിർവഹിച്ചു. പ്രധാനമന്ത്രിയുടെ ജന്മദിനമായ സെപ്റ്റംബർ 17 മുതൽ ഒക്ടോബർ 2 വരെ വിവിധ പരിപാടികളാണ് നടത്തുന്നത്. ശുചീകരണ പ്രവർത്തനങ്ങളോടൊപ്പം അവയവദാനം, രക്തദാനം തുടങ്ങിയവയും ഇതിന്റെ ഭാഗമാകും. ആയുഷ്മാൻ മേള, ആയുഷ്മാൻ സഭ എന്നിവയും ഇതിനോടനുബന്ധിച്ച് നടത്തുന്നു. സെപ്റ്റംബർ 11  മുതൽ 17  വരെ രോഗീസുരക്ഷാവാരമായി ആചരിക്കുകയാണ്.

സംസ്ഥാന വനിതാ വികസന കോർപറേഷൻ 18 മുതൽ 55 വരെ പ്രായമുളള വനിതകൾക്ക് സ്വയംതൊഴിൽ വായ്പ നൽകുന്നു. വായ്പക്ക് വസ്തു അല്ലെങ്കിൽ സർക്കാർ ഉദ്യോഗസ്ഥ ജാമ്യം ആവശ്യമാണ്. താൽപര്യമുള്ള വനിതകൾ പള്ളിക്കുന്നിലെ വനിതാ വികസന കോർപറേഷന്റെ ജില്ലാ ഓഫീസുമായി ബന്ധപ്പെടുക. അപേക്ഷാ ഫോറം www.kswdc.org ൽ ലഭിക്കും. ഫോ: 0497 2701399, 9496015014.

ജില്ലാ പഞ്ചായത്ത് ഭരണസമിതി യോഗം സെപ്റ്റംബർ 14 വ്യാഴം രാവിലെ 10.30ന് ജില്ലാ പഞ്ചായത്ത് ഭരണ സമിതി ഹാളിൽ നടക്കും.

കേരള മോട്ടോർ തൊഴിലാളി ക്ഷേമനിധി ബോർഡ് ജില്ലാ എക്‌സിക്യൂട്ടീവ് ഓഫീസിൽ നിന്നും പെൻഷൻ വാങ്ങുന്ന ഗുണഭോക്താക്കളിൽ 2023 ആഗസ്റ്റ് 31നകം മസ്റ്റർ ചെയ്യുകയും എന്നാൽ ഇ-മസ്റ്ററിങ് പരാജയപ്പെടുകയും ചെയ്തവർക്ക് ലൈഫ് സർട്ടിഫിക്കറ്റ് സമർപ്പിച്ച് മസ്റ്ററിങ് പൂർത്തീകരിക്കാനുള്ള സമയപരിധി സെപ്റ്റംബർ 15 വരെ നീട്ടിയതായി ജില്ലാ എക്‌സിക്യൂട്ടീവ് ഓഫീസർ അറിയിച്ചു. ഫോൺ: 0497 2705197.