കുട്ടികളിൽ കൃഷിയിൽ താത്പര്യം പ്രോത്സാഹിപ്പിക്കുന്ന കുഞ്ഞാവക്കൊരു ഹരിത വാടി  പദ്ധതിക്ക് കൊയിലാണ്ടിയിൽ തുടക്കമായി. പദ്ധതിയുടെ ഉദ്ഘാടനം കാനത്തിൽ ജമീല എം എൽ എ നിർവഹിച്ചു.  കുട്ടികളിൽ കൃഷിയോടുള്ള ആഭിമുഖ്യം  വളർത്തുക, പച്ചക്കറികൾ ഭക്ഷണത്തിന്റെ ഭാഗമാക്കി പുതിയൊരു ഭക്ഷണ സംസ്കാരം കുട്ടികളിലുണ്ടാക്കുക എന്നിവയാണ് പദ്ധതിയുടെ ലക്ഷ്യം.

പദ്ധതിയുടെ ഭാഗമായി കൃഷിഭവൻ മുഖേന നഗര സഭയിലെ മുഴുവൻ അങ്കണവാടി കേന്ദ്രങ്ങൾക്കും ചട്ടി, വളം, പച്ചക്കറി തൈകൾ എന്നിവ വിതരണം ചെയ്തു. നഗരസഭ 2023-24 വാർഷിക പദ്ധതിയുടെ ഭാഗമായാണ് പദ്ധതി നടപ്പാക്കുന്നത്.

സംസ്ഥാന സർക്കാരിന്റെയും വ്യവസായ വാണിജ്യ വകുപ്പിന്റെയും നേതൃത്വത്തിൽ നരിപ്പറ്റ ഗ്രാമ പഞ്ചായത്തിൽ  സംരംഭകത്വ ശിൽപശാല സംഘടിപ്പിച്ചു. പഞ്ചായത്ത് ഹാളിൽ നടന്ന ശിൽപ്പശാല ഗ്രാമപഞ്ചായത്ത് പ്രസിഡന്റ്‌ ബാബു കാട്ടാളി ഉദ്ഘാടനം ചെയ്തു. പഞ്ചായത്ത്‌ വൈസ് പ്രസിഡന്റ്‌ ബീന വി.കെ അധ്യക്ഷത വഹിച്ചു. 

ഒളവണ്ണ ഗ്രാമപഞ്ചായത്തിന്റെ പ്രവർത്തനങ്ങളും കുടുംബശ്രീ സംവിധാനവും പഠിക്കാൻ അരുണാചൽ പ്രദേശിൽ നിന്നും എത്തിയ സംഘം മടങ്ങി. സെപ്റ്റംബർ അഞ്ചിനാണ് സംഘം ഒളവണ്ണ ഗ്രാമപഞ്ചായത്തിൽ എത്തിയത്. അരുണാചലിലെ റൂറൽ ലൈവ് ലി ഹുഡ് മിഷന് കീഴിൽ പഞ്ചായത്ത് പ്രസിഡന്റുമാർ, അംഗങ്ങൾ,  പ്രാദേശിക റിസോഴ്‌സ് ഗ്രൂപ്പ് അംഗങ്ങൾ, ജില്ലാ തീമാറ്റിക് കോർഡിനേറ്റർമാർ, സംസ്ഥാന പ്രോജക്ട് കോർഡിനേറ്റർ, ബ്ലോക്ക് മിഷൻ മാനേജർമാർ, മെന്റർമാർ എന്നിവരടങ്ങിയ 30 അംഗ സംഘമാണ് സന്ദർശനം നടത്തിയത്.

ചേമഞ്ചേരി പഞ്ചായത്തിന്റെയും കുടുംബശ്രീയുടെയും പ്രവർത്തനങ്ങൾ നേരിട്ട് കണ്ടറിയുന്നതിന് അരുണാചൽ പ്രദേശിൽ നിന്നും 28 അംഗ സംഘം ഗ്രാമപഞ്ചായത്തിൽ സന്ദർശനം നടത്തി. പഞ്ചായത്തിന്റെ ഭരണപ്രവർത്തനങ്ങൾ മനസിലാക്കുകയും പഞ്ചായത്തും കുടുംബശ്രീയും പരസ്പരം യോജിച്ച് പദ്ധതികളുണ്ടാക്കി പ്രവർത്തിക്കുന്നത് എങ്ങനെയാണെന്ന് അറിയുകയുമാണ് സന്ദർശനത്തിന്റെ പ്രാഥമിക ലക്ഷ്യം.

കോടഞ്ചേരി ഗവ കോളേജ് വനിതാ ഹോസ്റ്റൽ കെട്ടിടം വിപുലീകരിക്കുന്നതിന്റെ പ്രവൃത്തി ഉദ്ഘാടനം ലിന്റോ ജോസഫ് എം എൽ എ നിർവഹിച്ചു. കോടഞ്ചേരി ഗ്രാമപഞ്ചായത്ത്‌ പ്രസിഡന്റ് അലക്സ് തോമസ് അധ്യക്ഷത വഹിച്ചു.

കാഴ്ചപരിമിതി ഉൾപ്പെടെയുള്ളവരെ സമൂഹത്തിന്റെ മുഖ്യധാരയിലേക്ക് ഉയർത്താൻ ഇടപെടലുമായി ഇരുവള്ളൂർ ഗവ. യു പി സ്കൂൾ. ശാരീരിക വൈകല്യമുള്ളവർ പൊതുസമൂഹവുമായി ഇടപഴകുമ്പോൾ അവരെ തിരിച്ചറിയാൻ സഹായിക്കുന്ന റിഫ്ലക്ടർ കുടകൾ പരിചയപ്പെടുത്തുകയാണ് വിദ്യാലയം. കാലിക്കറ്റ് എൻ.ഐ.ടിയിൽ നടക്കുന്ന ക്യൂരിയോ കോൺ- 2023 എക്സിബിഷനിലാണ് കുട പരിചയപ്പെടുത്തുന്നത്.

കനത്ത മഴ തുടരുന്നതിനാലും ഓറഞ്ച് അലേർട്ട് പ്രഖ്യാപിച്ച സാഹചര്യത്തിലും ദുരന്തങ്ങൾ തടയുന്നതിനായി ജില്ലയിൽ നിയന്ത്രണങ്ങൾ ഏർപ്പെടുത്തി. ജില്ലയിലെ ക്വാറികളുടെ പ്രവർത്തനം, എല്ലാ തരത്തിലുമുളള മണ്ണെടുക്കൽ, ഖനനം, കിണർ നിർമ്മാണ പ്രവർത്തനങ്ങൾ, മണൽ എടുക്കൽ എന്നിവ കർശനമായി നിർത്തിവച്ചു. ഇനിയൊരറിയിപ്പ് ഉണ്ടാകുന്നതുവരെ ഇത്തരം പ്രവർത്തനങ്ങൾക്ക് അനുമതി ഉണ്ടാവില്ലെന്ന് ജില്ലാ കലക്ടർ എ. ഗീത അറിയിച്ചു.

നെഹ്‌റു യുവകേന്ദ്രയുടെ ആഭിമുഖ്യത്തിൽ പന്തലായനി ബ്ലോക്കിൽ നിന്നുള്ള അമൃത് കലശ യാത്ര ആരംഭിച്ചു. മേരി മാട്ടി മേരാ ദേശ് ക്യാമ്പയിന്റെ ഭാഗമായി ഡൽഹിയിലേക്കുള്ള അമൃത് കലശ യാത്രക്കായുള്ള മണ്ണ് കലശം മുചുകുന്ന് ഗവ കോളേജ് എൻ എസ് എസ് പ്രോഗ്രാം ഓഫീസർ ഡോ.മുരളി നെഹ്രു യുവകേന്ദ്ര പന്തലായനി ബ്ലോക്ക്‌ കോർഡിനേറ്റർ അജയ്‌ദാസിനു കൈമാറി. ബ്ലോക്കിലെ അഞ്ചു പഞ്ചായത്തുകളിൽ നിന്ന് ശേഖരിച്ച മണ്ണാണ് യാത്രയുടെ ഭാഗമായി ഡൽഹിയിൽ എത്തുക.

മുചുകുന്ന് ഗവ കോളേജിൽ നടന്ന ചടങ്ങിൽ എൻ എസ് എസ് വളണ്ടിയേഴ്സ്, അധ്യാപകർ എന്നിവർ പങ്കെടുത്തു.

എം.ബി.എ സീറ്റ് ഒഴിവ്  

സംസ്ഥാന സഹകരണ യൂണിയന്റെ നിയന്ത്രണത്തിൽ നെയ്യാർഡാമിൽ പ്രവർത്തിക്കുന്ന കേരള ഇൻസ്റ്റിറ്റ്യൂട്ട് ഓഫ് കോ-ഓപ്പറേറ്റീവ് മാനേജ്മെന്റിൽ (കിക്മ) ഏതാനും സീറ്റുകളിലേക്ക് സെപ്റ്റംബർ 11ന് രാവിലെ 10 മണിക്ക് ഇന്റർവ്യൂ നടത്തുന്നു. അർഹരായ വിദ്യാർത്ഥികൾക്ക് അസൽ രേഖകൾ സഹിതം കൂടിക്കാഴ്ചയിൽ പങ്കെടുക്കാമെന്ന് ഡയറക്ടർ അറിയിച്ചു. കൂടുതൽ വിവരങ്ങൾക്ക് : 8547618290, 8281743442, www.kicma.ac.in

ഐ ടി ഐ പ്രവേശനം

ബി.ടെക് സ്പോട്ട് അഡ്മിഷൻ