പാലക്കാട് ടിപ്പുവിന്റെ കോട്ടയില്‍ പ്രവര്‍ത്തിച്ചിരുന്ന സ്‌പെഷ്യല്‍ തഹസില്‍ദാര്‍ (ഭൂപരിഷ്‌കരണം) ഓഫീസ് അവിടെ നിന്നും മാറ്റി ചിറ്റൂര്‍ മിനി സിവില്‍ സ്റ്റേഷനിലെ താഴത്തെ നിലയില്‍ പ്രവര്‍ത്തനമാരംഭിച്ചതായി സ്‌പെഷ്യല്‍ തഹസില്‍ദാര്‍ അറിയിച്ചു.

പാലക്കാട് ഗവ സ്ത്രീകളുടെയും കുട്ടികളുടെയും ആശുപത്രിയിലേക്ക് താത്കാലിക/കരാര്‍ അടിസ്ഥാനത്തില്‍ ലാബ് ടെക്‌നീഷ്യന്‍, ലാബ് അസിസ്റ്റന്റ് തസ്തികകളില്‍ നിയമനം. ലാബ് ടെക്‌നീഷ്യന്‍ തസ്തികയിലേക്ക് അപേക്ഷിക്കുന്നവര്‍ ഡയറക്ടറേറ്റ് ഓഫ് മെഡിക്കല്‍ എഡ്യൂക്കേഷന്‍ നല്‍കുന്ന ഡിപ്ലോമ ഇന്‍ മെഡിക്കല്‍ ലാബ് ടെക്‌നീഷ്യന്‍/ബി.എസ്.സി-എം.എല്‍.ടി കോഴ്‌സ് സര്‍ട്ടിഫിക്കറ്റ്, പാരാമെഡിക്കല്‍ കൗണ്‍സില്‍ രജിസ്‌ട്രേഷന്‍ എന്നീ യോഗ്യതയുള്ളവരായിരിക്കണം. ലാബ് അസിസ്റ്റന്റ് തസ്തികയില്‍ അപേക്ഷിക്കുന്നവര്‍ വി.എച്ച്.എസ്.സി-എം.എല്‍.ടി യോഗ്യതയുള്ളവരായിരിക്കണം. കമ്പ്യൂട്ടര്‍ പരിജ്ഞാനവും മലയാളഭാഷാ പ്രാവീണ്യവും ഉള്ളവര്‍ക്ക് മുന്‍ഗണന.

മലമ്പുഴ ഗവ മൃഗസംരക്ഷണ പരിശീലന കേന്ദ്രത്തിന്റെ ആഭിമുഖ്യത്തില്‍ മുയല്‍ വളര്‍ത്തല്‍ ലാഭകരമാക്കാം എന്ന വിഷയത്തില്‍ സെപ്റ്റംബര്‍ 12 ന് മലമ്പുഴ മൃഗസംരക്ഷണ പരിശീലന കേന്ദ്രത്തില്‍ രാവിലെ 10 മുതല്‍ വൈകിട്ട് അഞ്ച് വരെ പരിശീലനം നടക്കും. പങ്കെടുക്കുന്നവര്‍ 0491 2815454, 9188522713 ല്‍ മുന്‍കൂട്ടി രജിസ്റ്റര്‍ ചെയ്ത് ആധാര്‍ കാര്‍ഡിന്റെ പകര്‍പ്പുമായി എത്തണമെന്ന് അസിസ്റ്റന്റ് ഡയറക്ടര്‍ അറിയിച്ചു.
 

ഷൊര്‍ണൂര്‍ ഗവ ടെക്‌നിക്കല്‍ ഹൈസ്‌കൂളിന്റെ നിയന്ത്രണത്തിലുള്ള മണ്ണാര്‍ക്കാട്, ചാത്തന്നൂര്‍ ഗവ ഇന്‍സ്റ്റിറ്റ്യൂട്ട് ഓഫ് ഫാഷന്‍ ഡിസൈനിങ് സ്ഥാപനങ്ങളില്‍ ഒഴിവുള്ള ഫാഷന്‍ ഡിസൈനിങ് ആന്‍ഡ് ഗാര്‍മെന്റ് ടെക്‌നോളജി സീറ്റുകളിലേക്കുള്ള സ്‌പോട്ട് അഡ്മിഷന്‍ നടത്തുന്നു. മണ്ണാര്‍ക്കാട് ജി.ഐ.എഫ്.ഡിയില്‍ സെപ്റ്റംബര്‍ 13 നും ചാത്തന്നൂര്‍ ജി.ഐ.എഫ്.ഡിയില്‍ 14 നുമാണ് സ്‌പോട്ട് അഡ്മിഷന്‍. സംസ്ഥാനതലത്തില്‍ റാങ്ക് ലിസ്റ്റില്‍ ഉള്‍പ്പെട്ടിട്ടുള്ള അപേക്ഷകര്‍ ആവശ്യമായ രേഖകളും ഫീസും സഹിതം ഷൊര്‍ണൂര്‍ ഗവ ടെക്‌നിക്കല്‍ ഹൈസ്‌കൂളില്‍ അന്നേദിവസങ്ങളില്‍ ഉച്ചയ്ക്ക് 12 നകം നേരിട്ടെത്തണമെന്ന് സൂപ്രണ്ട് അറിയിച്ചു.

ജില്ലയില്‍ ദേശീയ അപ്രന്റീസ്ഷിപ്പ് മേള സെപ്റ്റംബര്‍ 11 ന് പാലക്കാട് ആര്‍.ഐ സെന്ററില്‍ നടത്തുമെന്ന് ട്രെയിനിങ് ഓഫീസര്‍ അറിയിച്ചു. ട്രേഡ് അപ്രന്റീസുകളെ തെരഞ്ഞെടുക്കുന്നതിനായി കേന്ദ്ര-സംസ്ഥാന സര്‍ക്കാര്‍, സഹകരണ സ്വകാര്യ മേഖലയിലെ വ്യവസായ വാണിജ്യ സേവന സ്ഥാപനങ്ങള്‍, പൊതുമേഖല സ്ഥാപനങ്ങള്‍ എന്നിവ www.apprenticeshipindia.gov.in ല്‍ രജിസ്റ്റര്‍ ചെയ്യണം. കൂടുതല്‍ വിവരങ്ങള്‍ ആര്‍.ഐ സെന്ററില്‍ ലഭിക്കുമെന്ന് ട്രെയിനിങ് ഓഫീസര്‍ അറിയിച്ചു. ഫോണ്‍: 0491 2815761, 9947300036

പ്രൊഫഷണല്‍ കോഴ്‌സിന് പഠിക്കുന്ന (ഒന്നാം വര്‍ഷം) വിമുക്തഭടന്മാരുടെ കുട്ടികള്‍ക്കും യുദ്ധസമാന സാഹചര്യങ്ങളില്‍ മരിച്ച ജവാന്‍മാരുടെ വിധവകള്‍ക്കും 2022-23 വര്‍ഷത്തെ പ്രധാനമന്ത്രിയുടെ മെറിറ്റ് സ്‌കോളര്‍ഷിപ്പിന് അപേക്ഷിക്കാം. താത്പര്യമുള്ളവര്‍ www.ksb.gov.in ല്‍ നവംബര്‍ 30 നകം അപേക്ഷിക്കണമെന്ന് ജില്ലാ സൈനിക ക്ഷേമ ഓഫീസര്‍ അറിയിച്ചു. ഫോണ്‍: 0491 2971633

ചിറ്റൂര്‍ ഗവ കോളെജില്‍ എം.എസ്.സി ജ്യോഗ്രഫി കോഴ്‌സില്‍ സീറ്റൊഴിവ്. യോഗ്യരായ വിദ്യാര്‍ത്ഥികള്‍ ഇന്ന് (സെപ്റ്റംബര്‍ എട്ട്) രാവിലെ 10നകം ബന്ധപ്പെട്ട വകുപ്പില്‍ എത്തണമെന്ന് പ്രിന്‍സിപ്പാള്‍ അറിയിച്ചു. ഫോണ്‍: 9446011887

കാഞ്ഞിരപ്പുഴ ഡാമിന്റെ പരിസരപ്രദേശങ്ങളില്‍ ശക്തമായ മഴ കാരണം കനാല്‍ ബണ്ടുകള്‍ക്ക് ബലക്ഷയം സംഭവിക്കാന്‍ സാധ്യതയുള്ളതിനാല്‍ ഇടതുകര കനാലിലൂടെയുള്ള ജലവിതരണം താത്ക്കാലികമായി നിര്‍ത്തിവെച്ചതായി എക്‌സിക്യൂട്ടീവ് എന്‍ജിനീയര്‍ അറിയിച്ചു. ഫോണ്‍: 04924238227

കേരള സംസ്ഥാന സാക്ഷരതാ മിഷനും കേരള മഹിള സമഖ്യ സൊസൈറ്റിയും സംയുക്തമായി നടപ്പാക്കുന്ന മുന്നേറ്റം പദ്ധതിയുടെ ചിറ്റൂര്‍ ബ്ലോക്ക് തല ആലോചനാ യോഗം ചിറ്റൂര്‍ ബ്ലോക്ക് പഞ്ചായത്ത് മീറ്റിങ് ഹാളില്‍ നടന്നു. ചിറ്റൂര്‍ ബ്ലോക്ക് പ്രസിഡന്റ് എ. സുജാത ഉദ്ഘാടനം ചെയ്തു. എലപ്പുള്ളി ഗ്രാമ പഞ്ചായത്ത് പ്രസിഡന്റ് രേവതി ബാബു അധ്യക്ഷയായി. പെരുമാട്ടി ഗ്രാമ പഞ്ചായത്ത് പ്രസിഡന്റ് റിഷാ പ്രേംകുമാര്‍ സാക്ഷരതാ സന്ദേശം നല്‍കി. സാക്ഷരതാ വാരാചരണത്തിന്റെ ഭാഗമായി ലോക സാക്ഷരതാ ദിനമായ സെപ്റ്റംബര്‍ എട്ടിന് ജില്ലാ പഞ്ചായത്ത് അങ്കണത്തില്‍ ജില്ലാ പഞ്ചായത്ത് വൈസ് പ്രസിഡന്റ് സി.കെ. ചാമുണ്ണി സാക്ഷരതാ പതാക ഉയര്‍ത്തും.

കേസുകളുടെ എണ്ണം വര്‍ധിക്കുന്നത് സ്ത്രീകള്‍ പരാതികള്‍ പറയുന്നതിന് ധൈര്യപൂര്‍വം മുന്നോട്ടു വരുന്നു എന്നതിന്റെ സൂചനയാണെന്ന് വനിതാ കമ്മിഷന്‍ അംഗം വി.ആര്‍. മഹിളാമണി പറഞ്ഞു. ജില്ലാ പഞ്ചായത്ത് ഹാളില്‍ നടത്തിയ സിറ്റിങ്ങിനു ശേഷം സംസാരിക്കുകയായിരുന്നു വനിത കമ്മിഷനംഗം. സ്ത്രീകള്‍ക്കെതിരെയുള്ള അതിക്രമങ്ങള്‍ പ്രതിരോധിക്കുന്നതിന് അവര്‍ തയാറായി വരുന്നുണ്ട്. വനിതാ കമ്മിഷന്റെ നേര്‍ പരിച്ഛേദമാണ് തദ്ദേശ സ്ഥാപന തലത്തിലുള്ള ജാഗ്രത സമിതികള്‍. സാധാരണ പ്രദേശത്ത് പരിഹരിക്കാന്‍ സാധിക്കുന്ന പ്രശ്‌നങ്ങള്‍ തദ്ദേശസ്ഥാപന തലത്തിലെ ജാഗ്രത സമിതികള്‍ വഴി പരിഹരിക്കാം.