കേരളത്തിന് അവകാശപ്പെട്ട പല ആനുകൂല്യങ്ങളും കേന്ദ്ര സർക്കാർ നിഷേധിക്കുകയാണെന്ന് മുഖ്യമന്ത്രി പിണറായി വിജയൻ പറഞ്ഞു. പിണറായി, പെരളശ്ശേരി പഞ്ചായത്തുകളെ നടപ്പാത മുഖേന ബന്ധിപ്പിച്ച്, കിഫ്‌ബി ഫണ്ടിൽനിന്ന് 55.42 കോടി രൂപ ചെലവഴിച്ച് നാവിഗേഷൻ ലോക്കോടെ നിർമ്മിച്ച പാറപ്രം റഗുലേറ്റർ  ഉദ്ഘാടനം ചെയ്യുകയായിരുന്നു മുഖ്യമന്ത്രി.

എ.ഐ ക്യാമറകൾ സ്ഥാപിച്ചതോടെ ഗതാഗത നിയമലംഘനങ്ങൾ കുറഞ്ഞതായി ഗതാഗത വകുപ്പ് മന്ത്രി ആന്റണി രാജു പറഞ്ഞു. നാഷണൽ സർവീസ് സ്കീം വോളണ്ടിയേഴ്‌സിനായി സംഘടിപ്പിച്ച സുരക്ഷയാനം നേതൃത്വ പരിശീലന ക്യാമ്പിന്റെയും പീസ് (പ്രോജക്ട് ഓൺ ആക്സിഡന്റ് ഫ്രീ ക്യാമ്പസ് എൻവിയോൺമെന്റ്)പദ്ധതിയുടെയും ഐ.ഡി.ടി.ആർ എക്സ്റ്റൻഷൻ സെന്ററിന്റെയും ഉദ്ഘാടനം കറുകുറ്റി എസ്.സി.എം.എസ് കോളേജിൽ  നിർവഹിച്ചു സംസാരിക്കുകയായിരുന്നു മന്ത്രി.

ആലുവയിൽ അതിക്രമത്തിനിരയായ 8 വയസുകാരിയുടെ മാതാപിതാക്കളെ മന്ത്രി പി രാജീവ് എറണാകുളം മെഡിക്കൽ കോളേജിലെത്തി കണ്ടു. എല്ലാ സഹായവും സർക്കാരിൽ നിന്നുണ്ടാകുമെന്ന് മന്ത്രി ഉറപ്പ് നൽകി. 

പെൺകുട്ടി ആരോഗ്യം അതിവേഗം വീണ്ടെടുക്കുകയാണ്. കുട്ടിക്കായി മെച്ചപ്പെട്ട സൗകര്യം ഉറപ്പ് വരുത്തുന്നതിനാവശ്യമായ കാര്യങ്ങൾ ശിശുക്ഷേമ സമിതിയുമായി ആലോചിച്ചതിന് ശേഷം നടപ്പിലാക്കും. വിചാരണ കഴിയുന്നതുവരെ പെൺകുട്ടിയുടെ വീട്ടുകാരെ മറ്റൊരു സ്ഥലത്തേക്ക് മാറ്റിത്താമസിക്കുന്നത് സംബന്ധിച്ച് ജില്ലാ കളക്ടറുമായി മന്ത്രി ചർച്ച നടത്തി.

കോതമംഗലം അഗ്നിരക്ഷാനിലയത്തിലേക്ക് പുതുതായി ലഭിച്ച ആധുനിക സൗകര്യങ്ങളോടുകൂടിയ  അഗ്നിരക്ഷാ വാഹനം ആന്റണി ജോൺ എം.എൽ.എ ഫ്ലാഗ് ഓഫ് ചെയ്തു. ഫസ്റ്റ് റെസ്പോണ്ട് വെഹിക്കിൾ എന്ന ഈ വാഹനം ചെറിയതും ഇടുങ്ങിയ വഴികളിലും രക്ഷാപ്രവർത്തനനം നടത്തുന്നതിന് ഏറെ ഉപകാരപ്രദമാണ്.

അഗ്നിശമന പ്രവർത്തനങ്ങൾക്കും വാഹനാപകടങ്ങൾ പോലെയുള്ള സാഹചര്യങ്ങളിലെ രക്ഷാപ്രവർത്തനത്തിനും  ഈ വാഹനം ഉപയോഗിക്കാം. ആധുനിക രീതിയിലുള്ള  രക്ഷാ ഉപകരണങ്ങളും ഈ വാഹനത്തിൽ ക്രമീകരിച്ചിട്ടുണ്ട്.

വൻ ജനപങ്കാളിത്തം കൊണ്ട് വിജയമായതിനാൽ അഞ്ചരക്കണ്ടിയിൽ എല്ലാ വർഷവും ചാമ്പ്യൻസ് ബോട്ട് ലീഗ് നടത്തുമെന്ന് പൊതുമരാമത്ത്, ടൂറിസം വകുപ്പ് മന്ത്രി പി എ മുഹമ്മദ്‌ റിയാസ് പറഞ്ഞു. കേരളത്തിന്റെ ടൂറിസം ഭൂപടത്തിൽ അഞ്ചരക്കണ്ടി വള്ളംകളിയും ഇടം നേടുകയാണ്-മന്ത്രി പറഞ്ഞു. മുഴപ്പിലങ്ങാട് കടവിൽ ചാമ്പ്യൻസ് ബോട്ട് ലീഗ് മന്ത്രി ഫ്ലാഗ് ഓഫ് ചെയ്തു. 13 ടീമുകൾ ആണ് വാശിയേറിയ മത്സരത്തിൽ പങ്കെടുത്തത്.

ആവേശം നിറച്ച് ചുരുളൻ വള്ളങ്ങൾ; ജനകീയ ഉത്സവമായി
ചാമ്പ്യൻസ് ബോട്ട് ലീഗ്