വണ്ടൂര്‍ ബ്ലോക്ക് പഞ്ചായത്തിലെ  തിരുവാലി ഗ്രാമപഞ്ചായത്തില്‍ മാറ്റിവെച്ച തെരഞ്ഞെടുപ്പ്  നടന്നു. പ്രസിഡന്റായി സുമാ താരിയനെയും(ഐ എന്‍ സി )  വൈസ് പ്രസിഡന്റായി കെ  മുഹമ്മദ് നജീബ് ( ഐ യു എം എല്‍ ) നെയും തെരഞ്ഞെടുത്തു

നിലമ്പൂർ ബ്ലോക്കിൽ ഉൾപ്പെടുന്ന മൂത്തേടം പഞ്ചായത്തിലെ ഏഴാം വാർഡിൽ നാല്  സ്ഥാനാർഥികൾ മത്സര രംഗത്ത്. ആകെ ലഭിച്ച അഞ്ച് നാമനിർദ്ദേശ പത്രികയിൽ ഒന്ന് പിൻവലിച്ചു. യു.ഡി.എഫ് സ്ഥാനാർഥിയുടെ നിര്യാണത്തെ തുടർന്നാണ് വാർഡിൽ തെരഞ്ഞെടുപ്പ് മാറ്റി വെച്ചത്. ജനുവരി 12 നാണ് ഇവിടെ തെരഞ്ഞെടുപ്പ് നടക്കുക

മലപ്പുറം മുനിസിപ്പാലിറ്റി താലൂക്ക് ആസ്ഥാന ആശുപത്രിയില്‍  സായാഹ്ന ഒ.പിയിലേക്ക് എല്‍.എസ്.ജി.ഡി മുഖേന താല്‍കാലികാടിസ്ഥാനത്തില്‍ ഡോക്ടര്‍ തസ്തികയില്‍ നിയമനം നടത്തുന്നു. യോഗ്യരായ ഉദ്യോഗാര്‍ത്ഥികള്‍ യോഗ്യത തെളിയിക്കുന്ന  സര്‍ട്ടിഫിക്കറ്റുകളും ആധാര്‍ കാര്‍ഡിൻ്റെ പകര്‍പ്പും സഹിതം 2026 ജനുവരി ഒന്നിന് ഉച്ചക്ക് 12ന് മുമ്പായി മലപ്പുറം ജില്ലാ മെഡിക്കല്‍ ഓഫീസില്‍ അപേക്ഷ നല്‍കണം. ജനുവരി 3 ന് രാവിലെ 10.30 ന് മലപ്പുറം ജില്ലാ മെഡിക്കല്‍ ഓഫീസില്‍(ആരോഗ്യം) അസ്സല്‍ രേഖകള്‍ സഹിതം ഇന്റര്‍വ്യൂവിന് ഹാജരാകണമെന്ന്  ആശുപത്രി സൂപ്രണ്ട് അറിയിച്ചു. ഫോണ്‍: 0483 2734866

2025-26 സാമ്പത്തിക വര്‍ഷത്തില്‍ ഫിഷറീസ് വകുപ്പിന് കീഴിലുള്ള സൊസൈറ്റി ഫോര്‍ അസ്സിസ്റ്റന്‍സ് ടൂ ഫിഷര്‍വിമെന്‍ (സാഫ്) മുഖേന നടപ്പാക്കുന്ന മത്സ്യത്തൊഴിലാളി കുടുംബങ്ങളിലെ സ്ത്രീകള്‍ക്ക് തങ്ങളുടെ കുടുംബാംഗങ്ങളുടെ കൂടി സഹായത്തോടെ ഒറ്റക്ക് ആരംഭിക്കാന്‍ കഴിയുന്ന ഒരു കുടുംബത്തിന് ഒരു സംരംഭം എന്ന പദ്ധതിയിലേക്ക് അപേക്ഷ ക്ഷണിച്ചു.   മത്സ്യത്തൊഴിലാളി കുടുംബ രജിസ്റ്ററില്‍(എഫ് ഐ എം എസ്) അംഗത്വമുള്ള 20 നും 45 നും ഇടയില്‍ പ്രായമുള്ള വനിതകള്‍ക്ക് അപേക്ഷിക്കാം. ട്രാന്‍സ്ജന്‍ഡേഴ്സ്, വിധവകള്‍, ഭിന്നശേഷിയുള്ള മക്കളുടെ മാതാവ് എന്നിവര്‍ക്ക് മുന്‍ഗണന.

ഉന്നത വിദ്യാഭ്യാസ വകുപ്പിന് കീഴില്‍ പ്രവര്‍ത്തിക്കുന്ന അസാപ് കേരളയുടെ പാണ്ടിക്കാട് കമ്മ്യൂണിറ്റി സ്‌കില്‍ പാര്‍ക്കില്‍ കരാറടിസ്ഥാനത്തില്‍ ജൂനിയര്‍ എക്‌സിക്യൂട്ടീവ് തസ്തികയിലേക്ക് നിയമനം നടത്തുന്നു. ബിരുദവും ഒരു വര്‍ഷ പ്രവൃത്തി പരിചയവുമുള്ള 35 വയസ് കവിയാത്തവര്‍ക്ക് അപേക്ഷിക്കാം. അവസാന തീയതി ഡിസംബര്‍ 31. താല്പര്യമുള്ള ഉദ്യോഗാര്‍ഥികള്‍ https://forms.gle/tqvPwoA98td665UA9 എന്ന ലിങ്കില്‍ രജിസ്റ്റര്‍ ചെയ്യണം.
ഫോണ്‍ 9495999704

കര്‍ഷക തൊഴിലാളി ക്ഷേമനിധി ബോര്‍ഡില്‍ പുതിയ അംഗങ്ങളെ ചേര്‍ക്കുന്നതിനായി ജനുവരി, ഫെബ്രുവരി, മാര്‍ച്ച് മാസങ്ങളില്‍ ക്ഷേമനിധി ബോര്‍ഡിന്റെ മലപ്പുറം ഓഫീസില്‍ വെച്ച് സിറ്റിങ് നടത്തുന്നു.

 താനാളൂര്‍ വില്ലേജില്‍ നിന്നുള്ള അപേക്ഷകള്‍ 2026 ജനുവരി  24നും നടുവട്ടം, കുറ്റിപ്പുറം വില്ലേജുകളില്‍ നിന്നുള്ള അപേക്ഷകള്‍ 27നും തിരുന്നാവായ, അനന്താവൂര്‍ വില്ലേജുകളിലെ അപേക്ഷകള്‍ 28നും, കാട്ടിപരുത്തി, എടയൂര്‍, ഇരിമ്പിളിയം വില്ലേജുകളിലെ അപേക്ഷകള്‍ 29നും സ്വീകരിക്കും.

എടപ്പാള്‍ ഗവ. ഐ.ടി.ഐയില്‍ ജൂനിയര്‍ ഇന്‍സ്ട്രക്ടര്‍ -ആര്‍ട്ടിഫിഷ്യല്‍ ഇന്റലിജന്‍സ് പ്രോഗ്രാമിംഗ് അസിസ്റ്റന്റ് തസ്തികയിലെ ഒരു ഒഴിവിലേക്ക് എസ്.സി വിഭാഗത്തില്‍ നിന്ന് ഗസ്റ്റ് ഇന്‍സ്ട്രക്ടര്‍ നിയമനം നടത്തുന്നു. എസ്.സി വിഭാഗത്തിലെ ഉദ്യോഗാര്‍ത്ഥികളുടെ അഭാവത്തില്‍ ഓപ്പണ്‍ കാറ്റഗറിയിലുള്ളവരെ പരിഗണിക്കും. ഉദ്യോഗാര്‍ത്ഥികള്‍ക്ക് ബന്ധപ്പെട്ട ട്രേഡില്‍ എന്‍.റ്റി.സി/എന്‍.എ.സിയും മൂന്ന്  വര്‍ഷത്തെ പ്രവൃത്തിപരിചയവും അല്ലെങ്കില്‍ മൂന്ന്  വര്‍ഷത്തെ ഡിപ്ലോമയും രണ്ട് വര്‍ഷത്തെ പ്രവൃത്തി പരിചയവും അല്ലെങ്കില്‍ ഡിഗ്രിയും ഒരു  വര്‍ഷത്തെ പ്രവൃത്തി  പരിചയവും വേണം.

വേനല്‍ അരംഭിക്കുന്നതിന് മുന്നോടിയായി ഡിസംബര്‍ 31 (ബുധനാഴ്ച) മുതല്‍ ഓടായിക്കല്‍ റഗുലേറ്ററിന്റെ ഷട്ടറുകള്‍ താഴ്ത്തി ജലസംഭരണം നടത്തുന്നതിനാല്‍ ചാലിയാര്‍ പുഴയിലും കുതിരപ്പുഴയിലും മറ്റും ജലവിതാനം ഉയരാന്‍ സാധ്യതയുണ്ട്. തീരങ്ങളിൽ താമസിക്കുന്നവർ ജാഗ്രത പുലര്‍ത്തണമെന്ന് എക്‌സി. എഞ്ചിനീയര്‍ അറിയിച്ചു.

വനിതാശിശു വികസന വകുപ്പിനു കീഴിലെ കുറ്റിപ്പുറം അഡീഷണല്‍ ശിശു വികസന പദ്ധതി ഓഫീസിലെ ഔദ്യോഗിക ആവശ്യങ്ങള്‍ക്കായി  കരാര്‍ അടിസ്ഥാനത്തില്‍ വാഹനം വാടകയ്ക്ക് നല്‍കുന്നതിന്  വാഹന ഉടമകളില്‍ നിന്ന്  ടെന്‍ഡര്‍ ക്ഷണിച്ചു. ടെന്‍ഡര്‍ സ്വീകരിക്കുന്ന അവസാന തീയതി 2026 ജനുവരി രണ്ട് ഉച്ചക്ക് മൂന്ന്. ടെന്‍ഡര്‍ കവറിന് പുറത്ത് "കുറ്റിപ്പുറം അഡീഷണല്‍ ശിശു വികസന പദ്ധതി ഓഫീസറുടെ ഔദ്യോഗിക ആവശ്യത്തിനായി വാഹനം കരാര്‍ അടിസ്ഥാനത്തില്‍ നല്‍കാനുള്ള ടെന്‍ഡര്‍'' എന്ന് രേഖപ്പെടുത്തണം.

തിരൂര്‍ സബ് കോടതിയിലെ അഡീഷണല്‍ ഗവ. പ്ലീഡര്‍ ആന്‍ഡ് അഡീഷണല്‍ പബ്ലിക് പ്രോസിക്യൂട്ടറുടെ  ഒഴിവിലേക്ക്  യോഗ്യരായ അഭിഭാഷകരില്‍ നിന്ന് അപേക്ഷ ക്ഷണിച്ചു. അഭിഭാഷകവൃത്തിയില്‍ ഏഴ് വര്‍ഷം പൂര്‍ത്തിയാക്കിയവരും 60 വയസ്സിനു താഴെ പ്രായമുള്ളവരുമായ നിശ്ചിത യോഗ്യതയുള്ള അഭിഭാഷകരെയാണ് നിയമിക്കുന്നത്.