പട്ടാമ്പി നേര്‍ച്ചയോടനുബന്ധിച്ച് ക്രമസമാധാന പരിപാലനം ഉറപ്പുവരുത്തുന്നതിനായി പട്ടാമ്പി നഗരസഭാ പരിധിയില്‍ മാര്‍ച്ച് 28, 29 തീയതികളില്‍ മദ്യനിരോധനം (ഡ്രൈ ഡേ) പ്രഖ്യാപിച്ച് ജില്ലാ കളക്ടര്‍ എം എസ് മാധവിക്കുട്ടി ഉത്തരവിറക്കി. അന്നേദിവസങ്ങളില്‍ രാവിലെ ആറ് മുതല്‍ രാത്രി 10 വരെ നഗരസഭാ പരിധിയിലുള്ള എല്ലാ മദ്യഷാപ്പുകളും, ബാറുകളും, കള്ളുഷാപ്പുകളും നിര്‍ബന്ധമായും അടച്ചിടണമെന്നും ജില്ലാ കളക്ടര്‍ നിര്‍ദ്ദേശിച്ചു.

നിയമസഭാ തിരഞ്ഞെടുപ്പുമായി ബന്ധപ്പെട്ട പരാതികള്‍ ഹെല്‍പ്പ് ലൈന്‍ ആന്‍ഡ് പരാതി പരിഹാര സെല്‍ നോഡല്‍ ഓഫീസായ ജില്ലാ പ്ലാനിങ് ഓഫീസിലെ 0491 2500117 എന്ന നമ്പറില്‍ പൊതുജനങ്ങള്‍ക്ക് ബന്ധപ്പെടാമെന്ന് ജില്ലാ നോഡല്‍ ഓഫീസര്‍ അറിയിച്ചു.

നിയമസഭാ തിരഞ്ഞെടുപ്പിനായി ജില്ലയില്‍ 2531 പോളിങ് ബൂത്തുകള്‍. 2021 ലെ നിയമസഭാ തിരഞ്ഞെടുപ്പില്‍ 2112 പോളിങ്ങ് ബൂത്തുകളാണ് ഉണ്ടായിരുന്നത്. 419 ബൂത്തുകള്‍ പുതിയതായി ചേര്‍ത്തു. തൃത്താല -218, പട്ടാമ്പി -222, ഷൊര്‍ണൂര്‍ -224, ഒറ്റപ്പാലം - 238, കോങ്ങാട് - 193, മണ്ണാര്‍ക്കാട് - 220, മലമ്പുഴ - 246, പാലക്കാട് - 219, തരൂര്‍ - 177, ചിറ്റൂര്‍ - 193, നെന്‍മാറ - 207, ആലത്തൂര്‍ - 174 എന്നിങ്ങനെയാണ് മണ്ഡലാടിസ്ഥാനത്തിലുള്ള പോളിങ് ബൂത്തുകളുടെ എണ്ണം. പരമാവധി 1200 വോട്ടര്‍മാര്‍ക്കാണ് ഒരു പോളിങ് സ്റ്റേഷനില്‍ വോട്ട് രേഖപ്പെടുത്താനാകുക.