കേരള സർക്കാർ സ്ഥാപനമായ എറണാകുളം കെൽട്രോൺ നോളജ് സെന്ററിൽ വിവിധ പ്രൊഫഷണൽ കോഴ്സുകളിലേക്ക് സ്പോട്ട് അഡ്മിഷൻ ആരംഭിച്ചു. സർക്കാർ അംഗീകൃത കോഴ്സുകളായ പി.ജി ഡിപ്ലോമ ഇൻ കമ്പ്യൂട്ടർ ആപ്ലിക്കേഷൻ,ഡിപ്ലോമ ഇൻ കമ്പ്യൂട്ടർ ആപ്ലിക്കേഷൻ , എഐ ഡിജിറ്റൽ മാർക്കറ്റിംഗ്, ഡിപ്ലോമ ഇൻ കമ്പ്യൂട്ടർ ഹാർഡ്‌വെയർ ആൻഡ് നെറ്റ്‌വർക്ക് മെയിന്റനൻസ് വിത്ത് ഇ-ഗാഡ്‌ജെറ്റ് ടെക്നോളജി എന്നീ കോഴ്സുകളിലേക്കാണ് പ്രവേശനം ആരംഭിച്ചിരിക്കുന്നത്.ജനുവരി 10 വരെ അപേക്ഷകൾ സമർപ്പിക്കാം. ഫോൺ : 0484 - 2971400, 8590605259

കേന്ദ്ര സർക്കാർ സംരംഭമായ ബിസിൽ ട്രെയിനിംഗ് ഡിവിഷൻ നടത്തുന്ന പ്രീ-പ്രൈമറി, നഴ്‌സറി ടീച്ചർ ട്രെയിനിങ് കോഴ്സുകളിലേക്ക് അപേക്ഷ ക്ഷണിച്ചു. ഒരു വർഷം, ആറ് മാസം എന്നിങ്ങനെയാണ് കോഴ്സുകളുടെ ദൈർഘ്യം.എസ്. എസ്.എൽ.സി ,പ്ലസ്ടു യോഗ്യതയുള്ളവർക്ക് അപേക്ഷിക്കാം. ഫോൺ : 7994449314

പൊതുവിദ്യാഭ്യാസ വകുപ്പിന്റെ നേതൃത്വത്തിൽ 'സ്വാദ്യം 2k25' , സ്കൂൾ പാചക തൊഴിലാളികളുടെ ജില്ലാതല പാചക മത്സരം സംഘടിപ്പിച്ചു. ഉമ തോമസ് എം.എൽ.എ ഉദ്ഘാടനം ചെയ്തു.  

പതിനാല് ടീമുകൾ പങ്കെടുത്ത മത്സരത്തിൽ കോതമംഗലം ഉപജില്ലയെ പ്രതിനിധീകരിച്ച കാരക്കുന്ന് ഫാത്തിമ എൽ.പി. സ്കൂളിലെ എ. ജി രാജി ഒന്നാം സ്ഥാനം കരസ്ഥമാക്കി. പിറവം ഉപജില്ല നാമക്കുഴി ജി.എൽ. പി. സ്കൂളിലെ ഗിരിജ ശ്രീധരൻ രണ്ടാം സ്ഥാനവും മൂവാറ്റുപുഴ ഉപജില്ല പറമ്പഞ്ചേരി എസ്. എസ്. എൽ. പി. സ്കൂളിലെ ബീന ജെയിംസ് മൂന്നാം സ്ഥാനവും നേടി. 

ജില്ലാ ഏകജാലക ക്ലിയറൻസ് ബോർഡും പരാതി പരിഹാര സമിതിയും സംയുക്ത യോഗം ചേർന്നു. ജില്ലാ കളക്ടർ ജി പ്രിയങ്കയുടെ അധ്യക്ഷതയിൽ കളക്ടറേറ്റ് സപാർക് ഹാളിൽ ചേർന്ന യോഗത്തിൽ 24 പരാതികൾ പരിഹരിച്ചു.

വ്യവസായ സംരംഭങ്ങൾക്ക് അനുമതി നൽകുന്നതുമായി ബന്ധപ്പെട്ട് നടന്ന യോഗത്തിൽ ഏകജാലക ക്ലിയറൻസ് ബോർഡ് 37 പരാതികളും പരാതി പരിഹാര സമിതി അഞ്ച് പരാതികളുമാണ് പരിഗണിച്ചത്. 

അഡീഷണൽ ജില്ലാ മജിസ്ട്രേറ്റ് വിനോദ് രാജ്, ജില്ലാ വ്യവസായ കേന്ദ്രം ജനറൽ മാനേജർ പി.എ. നജീബ്, കേരള സംസ്ഥാന ചെറുകിട വ്യവസായ അസോസിയേഷൻ (കെ.എസ്.എസ്.ഐ.എ) പ്രസിഡൻ്റ് ടോം ജോസ്, വിവിധ വകുപ്പ് ഉദ്യോഗസ്ഥർ എന്നിവർ പങ്കെടുത്തു.

സംസ്ഥാനത്തെ വിവിധ തൊഴിൽ മേഖലകളിലെ തൊഴിലാളികളുടെ കഴിവും ഉത്പാദനക്ഷമതയും പ്രോത്സാഹിപ്പിക്കുന്നതിനായി സംസ്ഥാന സർക്കാർ ഏർപ്പെടുത്തിയ തൊഴിലാളി ശ്രേഷ്ഠ പുരസ്‌കാരത്തിന് അപേക്ഷ ക്ഷണിച്ചു. https://lc.kerala.gov.in/ എന്ന വെബ്‌സൈറ്റിലെ 'തൊഴിലാളി ശ്രേഷ്ഠ പുരസ്കാരം 2024' എന്ന ലിങ്കിലൂടെ ഓൺലൈനായാണ് അപേക്ഷ സമർപ്പിക്കേണ്ടത്. അപേക്ഷ സമർപ്പിക്കേണ്ട അവസാന തീയ്യതി 2026 ജനുവരി 8.

പുതിയൊരു ചരിത്രം സൃഷ്ടിക്കുന്നതിനുള്ള ബോധപൂർവമായ ശ്രമം നടത്തുന്ന കാലഘട്ടത്തിലൂടെയാണ് നാം കടന്നു പോകുന്നതെന്ന് നിയമസഭാ സ്പീക്കർ അഡ്വ. എ എൻ ഷംസീർ പറഞ്ഞു. തലശ്ശേരി ഗവ. ബ്രണ്ണൻ കോളേജിൽ ഇന്ത്യൻ ചരിത്ര കോൺഗ്രസിന്റെ സമാപന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു സ്പീക്കർ. 

പട്ടികവർഗ വികസന വകുപ്പിന്റെ കീഴിൽ പ്രവർത്തിക്കുന്ന മോഡൽ റെസിഡൻഷ്യൽ സ്‌കൂൾ, ഹോസ്റ്റൽ വിദ്യാർഥികളുടെ സംസ്ഥാനതല കലാമേള 'സർഗോത്സവം 2025 ന് വർണാഭമായ സമാപനം. കണ്ണൂർ കലക്ടറേറ്റ് മൈതാനിയിൽ പട്ടികജാതി പട്ടികവർഗ പിന്നാക്ക വിഭാഗ ക്ഷേമ വകുപ്പുമന്ത്രി ഒ.ആർ കേളു സമാപന സമ്മേളനം ഉദ്ഘാടനം ചെയ്തു. തൊഴിലധിഷ്ഠിത വിദ്യാഭ്യാസത്തിൽ  മികച്ച മുന്നേറ്റം നേടാൻ പട്ടികവർഗ വിഭാഗക്കാർക്ക് സാധിച്ചിട്ടുണ്ടെന്നും എന്നാൽ ഉന്നത വിദ്യാഭ്യാസം ഉറപ്പാക്കാൻ വിദ്യാർഥികൾ പ്രയത്‌നിക്കണമെന്നും മന്ത്രി പറഞ്ഞു.

പുരാവസ്തു പുരാരേഖ മ്യൂസിയം വകുപ്പുകളുടെ ആഭിമുഖ്യത്തില്‍ നടക്കുന്ന കണ്ണൂര്‍ പൈതൃകോത്സവത്തിന് ജനുവരി ഒന്നിന് മുണ്ടേരിയില്‍ തുടക്കമാവും. വൈകീട്ട് അഞ്ച് മണിക്ക് മുണ്ടേരി മുദ്ര ഓഡിറ്റോറിയത്തില്‍ രജിസ്ട്രേഷന്‍ പുരാവസ്തു പുരാരേഖ മ്യൂസിയം വകുപ്പു മന്ത്രി രാമചന്ദ്രന്‍ കടന്നപ്പള്ളി ഉദ്ഘാടനം ചെയ്യും. ജില്ലാപഞ്ചായത്ത് പ്രസിഡന്റ് അഡ്വ. ബിനോയ് കുര്യന്‍ അധ്യക്ഷനാകും. എടക്കാട് ബ്ലോക്ക് പഞ്ചായത്ത് പ്രസിഡന്റ് കെ.വി ബിജു, മുണ്ടേരി ഗ്രാമപഞ്ചായത്ത് പ്രസിഡന്റ് സി.കെ റസീന, പഞ്ചായത്തംഗം സമീറ ടീച്ചര്‍, മ്യൂസിയം ആന്‍ഡ് മൃഗശാല വകുപ്പ് സൂപ്രണ്ട് പി.എസ് പ്രിയരാജന്‍ എന്നിവര്‍ പങ്കെടുക്കും. 

മനുഷ്യ മനസ്സിലെ മൃഗീയ സ്വഭാവങ്ങള്‍, കാലങ്ങളായി സമൂഹത്തില്‍ സ്ത്രീകള്‍ നേരിടുന്ന പ്രശ്നങ്ങള്‍, ചൂരല്‍മല ദുരന്തം, തെരുവ് നായ ശല്യം തുടങ്ങി കാലിക പ്രസക്തിയുള്ള വിഷയങ്ങള്‍ അവതരിപ്പിച്ച് സര്‍ഗോത്സവം വേദിയിലെ മോണോ ആക്ടുകള്‍ ശ്രദ്ധേയമായി. സീനിയര്‍ വിഭാഗം മോണോ ആക്ടിലാണ് വ്യത്യസ്ത വിഷയങ്ങളെ അവരിപ്പിച്ചത്. 

പട്ടികവര്‍ഗ വികസന വകുപ്പിന് കീഴില്‍ പ്രവൃത്തിക്കുന്ന മോഡല്‍ പ്രസിഡന്‍ഷ്യല്‍ സ്‌കൂളിലെയും ഹോസ്റ്റലുകളിലെയും വിദ്യാര്‍ഥികളുടെ സംസ്ഥാനതല കലാമേള സര്‍ഗോത്സവം 2025 ല്‍ പരവനടുക്കം മോഡല്‍ റെസിഡന്‍ഷ്യല്‍ സ്‌കൂള്‍ 128 പോയിന്റുകളോടെ കലാകിരീടം കരസ്ഥമാക്കി. 126 പോയിന്റുകളോടെ ഡോ. അംബേദ്ക്കര്‍ മോഡല്‍ റെസിഡന്‍ഷ്യല്‍ സ്‌കൂള്‍ കട്ടേല രണ്ടാം സ്ഥാനവും 116 പോയിന്റുകളോടെ ആര്‍ ജി എം ആര്‍ എച്ച് എസ് എസ് നൂല്‍പുഴ മൂന്നാം സ്ഥാനവും നേടി.