കേരളത്തിലെ പൊതുവിദ്യാലയങ്ങളില്‍ കേരള ഇൻഫ്രാസ്ട്രക്ചർ ആന്‍ഡ് ടെക്നോളജി ഫോര്‍ എഡ്യൂക്കേഷൻ (കൈറ്റ്) നടപ്പാക്കുന്ന ലിറ്റില്‍ കൈറ്റ്സ്  ഐ.ടി. ക്ലബ്ബുകളിലെ കുട്ടികള്‍ക്കായുള്ള ഉപജില്ലാതല ദ്വിദിന ക്യാമ്പുകള്‍ക്ക് തുടക്കമായി. ജനുവരി മൂന്ന്  വരെ വിവിധ കേന്ദ്രങ്ങളിലായിട്ടാണ്  ക്യാമ്പുകള്‍ നടക്കുന്നത്.

ആധുനിക കാലത്ത് ശാസ്ത്രീയമായി കാലാവസ്ഥാ നിര്‍ണയം സാധ്യമാകുന്നതെങ്ങനെയെന്നും കാലാവസ്ഥാ പ്രവചന കേന്ദ്രങ്ങളുടെ പ്രവര്‍ത്തനങ്ങളെങ്ങനെയെന്നും ഇതിന് സഹായിക്കുന്ന പ്രോട്ടോടൈപ്പുകള്‍, പ്രോഗ്രാമിംഗ് വിഭാഗത്തില്‍ ഓരോ കുട്ടിയും തയ്യാറാക്കുന്നു എന്നതാണ് ഈ വര്‍ഷത്തെ ക്യാമ്പുകളുടെ പ്രത്യേകത.

ക്ഷീരവികസന വകുപ്പിന്റെ കീഴിലുള്ള ഓച്ചിറ ക്ഷീരോല്‍പന്ന നിര്‍മ്മാണ പരിശീലന വികസന കേന്ദ്രത്തില്‍ ജനുവരി അഞ്ച്  മുതല്‍ ഒമ്പത് വരെ 5 ദിവസങ്ങളിലായി 'ശാസ്ത്രീയ പശു പരിപാലനം' എന്ന വിഷയത്തില്‍ പരിശീലന പരിപാടി സംഘടിപ്പിച്ചിരിക്കുന്നു. താല്‍പ്പര്യമുള്ള ക്ഷീരകര്‍ഷകര്‍ ഓച്ചിറ ക്ഷീരപരിശീലന കേന്ദ്രം മുഖേന നേരിട്ടോ ആലപ്പുഴ, കൊല്ലം ഡെപ്യൂട്ടി ഡയറക്ടര്‍മാര്‍ മുഖാന്തിരമോ, അതത് ബ്ലോക്ക് ക്ഷീരവികസന ഓഫീസര്‍മാര്‍ മുഖാന്തിരമോ രജിസ്റ്റര്‍ ചെയ്യാവുന്നതാണ്. കഴിഞ്ഞ മൂന്ന് വര്‍ഷങ്ങളിലെപ്പോഴെങ്കിലും ഇതേ പരിശീലനത്തില്‍ ഓഫ് ലൈന്‍ ആയി പങ്കെടുത്തിട്ടുള്ളവര്‍ക്ക് ഈ പരിശീലനത്തില്‍ പങ്കെടുക്കാന്‍ അര്‍ഹത ഉണ്ടായിരിക്കുന്നതല്ല.

ആലത്തൂര്‍ താലൂക്ക് വികസനസമിതി ജനുവരി മൂന്ന് രാവിലെ 10.30ന് ആലത്തൂര്‍ മിനി സിവില്‍ സ്‌റ്റേഷനിലെ കോണ്‍ഫറന്‍സ് ഹാളില്‍ ചേരുമെന്ന് തഹസില്‍ദാര്‍ അറിയിച്ചു.

നാട്ടില്‍തിരിച്ചെത്തിയ പ്രവാസികൾക്കായി (വാര്‍ഷിക വരുമാനം ഒന്നരലക്ഷം രൂപയില്‍ താഴെ) സംസ്ഥാന സര്‍ക്കാര്‍ നോര്‍ക്ക റൂട്ട്‌സ് വഴി നടപ്പിലാക്കിവരുന്ന  സാന്ത്വന ധനസഹായപദ്ധതിയുടെ  അദാലത്ത് 2026 ജനുവരി എട്ടിന് ആലപ്പുഴയില്‍. കലക്ടറേറ്റ് കോണ്‍ഫറന്‍സ് ഹാളില്‍ രാവിലെ 10 മുതല്‍ വൈകിട്ട് മൂന്നു വരെ നടക്കുന്ന അദാലത്തില്‍ കുട്ടനാട്, അമ്പലപ്പുഴ, ചേര്‍ത്തല താലൂക്കിലെ അര്‍ഹരായവര്‍ക്ക് പങ്കെടുക്കാം.  മുന്‍കൂട്ടി രജിസ്റ്റര്‍ ചെയ്യുന്നവര്‍ക്ക് മാത്രമായിരിക്കും പ്രവേശനം.  താൽപര്യമുള്ളവർ   www.norkaroots.kerala.gov.in  വെബ്ബ്സൈറ്റ് സന്ദര്‍ശിച്ച് 2026 ജനുവരി ആറിന് മുൻപായി അപേക്ഷ നല്‍കേണ്ടതാണ്.

സംസ്ഥാന ആരോഗ്യ കുടുംബക്ഷേമ വകുപ്പ് ആരംഭം കുറിക്കുന്ന 'ആരോഗ്യം ആനന്ദം വൈബ് 4 വെൽനെസ്സ്' കാമ്പയിന്റെ മുന്നോടിയായി  പ്രചരണ ജാഥയ്ക്ക് ചെങ്ങന്നൂരിൽ ഇന്ന് (ഡിസംബർ  30ന്)  സ്വീകരണം നൽകും.  ചെങ്ങന്നൂർ  ക്രിസ്ത്യൻ കോളേജിൽ നടക്കുന്ന സ്വീകരണ സമ്മേളനം രാവിലെ ഒമ്പതിന് സാംസ്കാരിക- ഫിഷറീസ് വകുപ്പ് മന്ത്രി സജി ചെറിയാൻ ഉദ്ഘാടനം ചെയ്യും. 

കേരള കള്ള് വ്യവസായ തൊഴിലാളി ക്ഷേമനിധി ബോര്‍ഡില്‍ നിന്നും കുടുംബ/സാന്ത്വന പെന്‍ഷന്‍ കൈപ്പറ്റുന്ന ഗുണഭോക്താക്കളില്‍ 60 വയസ് പൂര്‍ത്തിയാകാത്തവര്‍ 2026 വര്‍ഷത്തെ പെന്‍ഷന്‍ ലഭ്യമാക്കുന്നതിനായി ജനുവരി 15ന് മുമ്പായി നോണ്‍ റീമാര്യേജ് സര്‍ട്ടിഫിക്കറ്റ് സമര്‍പ്പിക്കണമെന്ന് വെല്‍ഫയര്‍ ഫണ്ട് ഇന്‍സ്‌പെക്ടര്‍ അറിയിച്ചു. ഫോണ്‍: 0491 2515765