പട്ടികവർഗ വികസന വകുപ്പിന്റെ കീഴിൽ പ്രവർത്തിക്കുന്ന മോഡൽ റെസിഡൻഷ്യൽ സ്‌കൂൾ, ഹോസ്റ്റൽ വിദ്യാർഥികളുടെ സംസ്ഥാനതല കലാമേള 'സർഗോത്സവം 2025 ന് വർണാഭമായ സമാപനം. കണ്ണൂർ കലക്ടറേറ്റ് മൈതാനിയിൽ പട്ടികജാതി പട്ടികവർഗ പിന്നാക്ക വിഭാഗ ക്ഷേമ വകുപ്പുമന്ത്രി ഒ.ആർ കേളു സമാപന സമ്മേളനം ഉദ്ഘാടനം ചെയ്തു. തൊഴിലധിഷ്ഠിത വിദ്യാഭ്യാസത്തിൽ  മികച്ച മുന്നേറ്റം നേടാൻ പട്ടികവർഗ വിഭാഗക്കാർക്ക് സാധിച്ചിട്ടുണ്ടെന്നും എന്നാൽ ഉന്നത വിദ്യാഭ്യാസം ഉറപ്പാക്കാൻ വിദ്യാർഥികൾ പ്രയത്‌നിക്കണമെന്നും മന്ത്രി പറഞ്ഞു.

പുരാവസ്തു പുരാരേഖ മ്യൂസിയം വകുപ്പുകളുടെ ആഭിമുഖ്യത്തില്‍ നടക്കുന്ന കണ്ണൂര്‍ പൈതൃകോത്സവത്തിന് ജനുവരി ഒന്നിന് മുണ്ടേരിയില്‍ തുടക്കമാവും. വൈകീട്ട് അഞ്ച് മണിക്ക് മുണ്ടേരി മുദ്ര ഓഡിറ്റോറിയത്തില്‍ രജിസ്ട്രേഷന്‍ പുരാവസ്തു പുരാരേഖ മ്യൂസിയം വകുപ്പു മന്ത്രി രാമചന്ദ്രന്‍ കടന്നപ്പള്ളി ഉദ്ഘാടനം ചെയ്യും. ജില്ലാപഞ്ചായത്ത് പ്രസിഡന്റ് അഡ്വ. ബിനോയ് കുര്യന്‍ അധ്യക്ഷനാകും. എടക്കാട് ബ്ലോക്ക് പഞ്ചായത്ത് പ്രസിഡന്റ് കെ.വി ബിജു, മുണ്ടേരി ഗ്രാമപഞ്ചായത്ത് പ്രസിഡന്റ് സി.കെ റസീന, പഞ്ചായത്തംഗം സമീറ ടീച്ചര്‍, മ്യൂസിയം ആന്‍ഡ് മൃഗശാല വകുപ്പ് സൂപ്രണ്ട് പി.എസ് പ്രിയരാജന്‍ എന്നിവര്‍ പങ്കെടുക്കും. 

മനുഷ്യ മനസ്സിലെ മൃഗീയ സ്വഭാവങ്ങള്‍, കാലങ്ങളായി സമൂഹത്തില്‍ സ്ത്രീകള്‍ നേരിടുന്ന പ്രശ്നങ്ങള്‍, ചൂരല്‍മല ദുരന്തം, തെരുവ് നായ ശല്യം തുടങ്ങി കാലിക പ്രസക്തിയുള്ള വിഷയങ്ങള്‍ അവതരിപ്പിച്ച് സര്‍ഗോത്സവം വേദിയിലെ മോണോ ആക്ടുകള്‍ ശ്രദ്ധേയമായി. സീനിയര്‍ വിഭാഗം മോണോ ആക്ടിലാണ് വ്യത്യസ്ത വിഷയങ്ങളെ അവരിപ്പിച്ചത്. 

പട്ടികവര്‍ഗ വികസന വകുപ്പിന് കീഴില്‍ പ്രവൃത്തിക്കുന്ന മോഡല്‍ പ്രസിഡന്‍ഷ്യല്‍ സ്‌കൂളിലെയും ഹോസ്റ്റലുകളിലെയും വിദ്യാര്‍ഥികളുടെ സംസ്ഥാനതല കലാമേള സര്‍ഗോത്സവം 2025 ല്‍ പരവനടുക്കം മോഡല്‍ റെസിഡന്‍ഷ്യല്‍ സ്‌കൂള്‍ 128 പോയിന്റുകളോടെ കലാകിരീടം കരസ്ഥമാക്കി. 126 പോയിന്റുകളോടെ ഡോ. അംബേദ്ക്കര്‍ മോഡല്‍ റെസിഡന്‍ഷ്യല്‍ സ്‌കൂള്‍ കട്ടേല രണ്ടാം സ്ഥാനവും 116 പോയിന്റുകളോടെ ആര്‍ ജി എം ആര്‍ എച്ച് എസ് എസ് നൂല്‍പുഴ മൂന്നാം സ്ഥാനവും നേടി.

ഇന്ത്യന്‍ ഹിസ്റ്ററി കോണ്‍ഗ്രസ് പുതിയ ഭാരവാഹികളെ തെരഞ്ഞെടുത്തു 

തലശ്ശേരി ഗവ. ബ്രണ്ണന്‍ കോളേജില്‍ നടന്ന  ഇന്ത്യന്‍ ഹിസ്റ്ററി കോണ്‍ഗ്രസിന്റെ 
ജനറല്‍ ബോഡി യോഗം പുതിയ ഭാരവാഹികളെ തിരഞ്ഞെടുത്തു.ജനറൽ സെക്രട്ടറി ഡോ. പ്രൊഫ. സയിദ് അലി നദീം റസവിയുടെ അധ്യക്ഷതയിൽ ചേർന്ന യോഗം 85 മത് ഇന്ത്യന്‍ ഹിസ്റ്ററി കോണ്‍ഗ്രസ് സമ്മേളനത്തിനായി പ്രൊഫ. മൃദുല മുഖര്‍ജിയെ പ്രസിഡന്റായും പ്രൊഫ. രാജ് ശേഖര്‍ ബസുവിനെ സെക്രട്ടറിയായും തെരഞ്ഞെടുത്തു. ഇര്‍ഫാന്‍ ഹബീബ്, ഡോ. രാജന്‍ ഗുരുക്കള്‍ എന്നിവര്‍ വൈസ് പ്രസിഡന്റുമാരായി പ്രവര്‍ത്തിക്കും.

കേന്ദ്ര  സര്‍ക്കാര്‍ സംരംഭമായ ബിസില്‍ ട്രെയിനിംഗ്  ഡിവിഷന്‍ നടത്തുന്ന ഒരു വര്‍ഷം, ആറു മാസം ദൈര്‍ഘ്യമുള്ള പ്രീ - പ്രൈമറി, നഴ്‌സറി ടീച്ചര്‍ ട്രെയിനിംഗ് കോഴ്‌സുകള്‍ക്ക് പ്ലസ് ടു/ എസ് എസ് എല്‍ സി  യോഗ്യതയുള്ളവരില്‍ നിന്നും അപേക്ഷ ക്ഷണിച്ചു. വിശദ വിവരങ്ങള്‍ക്ക് ബിസില്‍ ട്രെയിനിംഗ് ഡിവിഷന്‍ ഫോണ്‍: 7994449314