കേരള കള്ള് വ്യവസായ തൊഴിലാളി ക്ഷേമനിധി ബോർഡിലെ തൊഴിലാളികൾക്കായി ഇന്ത്യ പോസ്റ്റ് പേയ്മെന്റ് ബാങ്കുമായി സഹകരിച്ച് ബോർഡ് നടപ്പിലാക്കുന്ന 2026 വർഷത്തേക്കുള്ള അന്ത്യോദയ ശ്രമിക് സുരക്ഷ യോജന ഇൻഷുറൻസ് പദ്ധതിയിൽ രണ്ടാം ഘട്ടത്തിൽ തൊഴിലാളികളെ ഉൾപ്പെടുത്തുന്നതിന് ഇതുവരെ ഈ പദ്ധതിയിൽ ഉൾപ്പെടാത്തവരും, ലീവിന് ശേഷം ജോലി ചെയ്ത് തുടങ്ങിയവരും പുതുതായി ജോലിയിൽ പ്രവേശിച്ച് രജിസ്ട്രേഷൻ ലഭിച്ചിട്ടുള്ളതുമായ തൊഴിലാളികളും 2026 മാർച്ച് മാസം 23-ാം തീയതിക്ക് മുൻപായി പോസ്റ്റ് ഓഫീസിൽ ഐപിപിബി അക്കൌണ്ട്, അപകട ഇൻഷുറൻസ് പ്രൊപ്പോസൽ ഫോറം തുടങ്ങിയവ പൂരിപ്പിച്ച് ഈ ഓഫീസിൽ ഹാജരാക്കണമെന്ന് വെൽഫയർ ഫണ്ട്‌ ഇൻസ്‌പെക്ടർ അറിയിച്ചു.

തളിക്കുളം നമ്പികടവ് റോഡിൽ തളിക്കുളം സെന്റർ മുതൽ സ്നേഹതീരം ബീച്ച് വരെയുള്ള ഭാഗത്ത് ടാറിങ് നടക്കുന്നതിനാൽ മാർച്ച്‌ 16ന് രാത്രി ഏഴ് മണി മുതൽ പ്രവൃത്തി പൂർത്തീകരിക്കുന്നത് വരെ ഈ ഭാഗത്തെ ഗതാഗതം തടസ്സപ്പെടുമെന്ന് അസിസ്റ്റന്റ് എഞ്ചിനീയർ അറിയിച്ചു.
 

നെടുമ്പാൾ കോന്തിപുലം കോൾകർഷകസമിതിയിൽ 50 എച്ച് പി സബ്മെഴ്‌സബിൾ മോട്ടോർ പമ്പ് സെറ്റിന്റെ പ്രവർത്തനോദ്ഘാടനം ജില്ലാ പഞ്ചായത്ത് അംഗം ജോസ് ജെ ചിറ്റിലപ്പിള്ളി നിർവഹിച്ചു. കൃഷിയിറക്കുന്നതിനാവശ്യമായ ജലം ക്രമീകരിക്കുന്നതിന് മോട്ടോർ പമ്പ് സെറ്റ് ഇല്ലാത്തതിനാൽ ഒരുപാട് ബുദ്ധിമുട്ടുകൾ വർഷങ്ങളായി കർഷകർ നേരിട്ടുവരികയായിരുന്നു. ഈ പ്രശ്നത്തിനു പരിഹാരമായാണ് തൃശ്ശൂർ ജില്ലാപഞ്ചായത്തിന്റെ 2025-26 വാർഷികപദ്ധതിയിൽ ഉൾപ്പെടുത്തി മോട്ടോർ പമ്പ് സെറ്റ് സ്ഥാപിച്ചിരിക്കുന്നത്.

വേനൽക്കാല കുടിവെള്ള വിതരണത്തിനും ഡാമിന്റെ പ്രൊഫൈൽ കവർ ലെവൽ പാലിക്കുന്നതിനുമായി വാഴാനി ഡാമിൽ നിന്ന്    അധികജലം മാർച്ച് 16 മുതൽ 25 വരെ ഇടതുകര മെയിൻ കനാൽ വഴി 10 ദിവസത്തേക്കും മാർച്ച് 26 മുതൽ 29 വരെ നാല് ദിവസത്തേക്കും സ്ലൂയിസ് ഷട്ടർ ഉയർത്തി വടക്കാഞ്ചേരി പുഴയിലേക്ക് വെള്ളം തുറന്ന് വിടുമെന്ന് ജില്ലാ ഇറിഗേഷൻ എക്സിക്യൂട്ടീവ് എൻജിനീയർ അറിയിച്ചു.

എളവള്ളി വില്ലേജിൽ കാക്കശ്ശേരി ദേശം, കാങ്ക വീട്ടിൽ കണ്ടപ്പൻ മകൻ ജയൻ (52) എന്ന വ്യക്തിയെ 2025 ജനുവരി 22 മുതൽ പാവറട്ടി പോലീസ് സ്റ്റേഷൻ പരിധിയിൽ നിന്നും കാണാതായി. ഇതുമായി ബന്ധപ്പെട്ട് പാവറട്ടി പോലീസ് സ്റ്റേഷൻ കേസ് രജിസ്റ്റർ ചെയ്ത് അന്വേഷണം നടത്തിവരുകയാണ്. വ്യക്തിയെക്കുറിച്ച് എന്തെങ്കിലും വിവരം ലഭിക്കുകയാണെങ്കിൽ അടുത്തുള്ള പോലീസ് സ്റ്റേഷനിലോ, കൺട്രോൾ റൂമിലോ 9497980591, 9497980554, 0487 2263000, എന്നീ ഫോൺ നമ്പറുകളിലോ അറിയിക്കണമെന്ന് പാവറട്ടി പോലീസ് സ്റ്റേഷൻ സബ് ഇൻസ്പെക്ടർ അറിയിച്ചു.

സംസ്ഥാന പൊലീസ് കംപ്ലയിന്റ്സ് അതോറിറ്റി അംഗം പി.കെ. അരവിന്ദ് ബാബു മാർച്ച് 16 ന് രാവിലെ 11 മുതൽ തൃശ്ശൂർ കളക്ടറേറ്റിലെ എക്സിക്യൂട്ടീവ്  കോൺഫറൻസ് ഹാളിൽ  പരാതിയിമേൽ തെളിവെടുപ്പ് നടത്തും. അന്നേദിവസം രാവിലെ പത്തു മുതൽ പതിനൊന്നുവരെ പൊതുജനങ്ങൾക്ക് പോലീസ് സൂപ്രണ്ടിന്റെയും അതിനുമുകളിലുള്ള പോലീസ് ഉദ്യോഗസ്ഥരുടെയും എല്ലാതരത്തിലുള്ള നടപടി ദോഷത്തെ പറ്റിയുള്ള പരാതികളും, കസ്റ്റഡിയിലുള്ള സ്ത്രീകളെ ലൈംഗികമായി പീഡിപ്പിക്കൽ, ഏതെങ്കിലും ആളുകളുടെ മരണത്തിന് കാരണമാകൽ, ഗുരുതരമായി പരിക്കേൽപ്പിക്കൽ തുടങ്ങിയ  ഗുരുതര സ്വഭാവമുള്ള പരാതികളും  അതോറിറ്റി മുമ്പാകെ നേരിട്ട് സമർപ്പിക്കാം. ഫോൺ: 0471 2336939.

മണ്ണുത്തിയിലെ കോളേജ് ഓഫ് വെറ്ററിനറി ആൻഡ് അനിമൽ സയൻസസിന്റെ നേതൃത്വത്തിൽ വേലൂർ ഗ്രാമപഞ്ചായത്തിൻ്റെയും സംസ്ഥാന മൃഗസംരക്ഷണ വകുപ്പിന്റെയും സഹകരണത്തോടെ  പട്ടികജാതി വിഭാഗത്തിൽപ്പെട്ട കർഷകർക്ക് ഏകാരോഗ്യം ബോധവത്ക്കരണ ക്ലാസ് നടത്തി. ക്ലാസ് വേലൂർ ഗ്രാമപഞ്ചായത്ത് പ്രസിഡന്റ് സ്വപ്ന രാമചന്ദ്രൻ ഉദ്ഘാടനം ചെയ്തു. വൈസ് പ്രസിഡൻ്റ് നിധീഷ് ചന്ദ്രൻ അധ്യക്ഷത വഹിച്ചു. ജന്തുജന്യ രോഗങ്ങളും നിവാരണ മാർഗ്ഗങ്ങളും' എന്ന വിഷയം സംബന്ധിച്ച് അസിസ്റ്റന്റ്റ് പ്രൊഫസർ ഡോ. ദിവ്യ റാണി തോമസ് ക്ലാസ് നയിച്ചു.

ഇരിങ്ങാലക്കുട നിയോജക മണ്‌ഡലത്തിലെ ഇരിങ്ങാലക്കുട നഗരസഭ, കാറളം-കാട്ടൂർ ഗ്രാമപഞ്ചായത്തുകൾ എന്നിവയെ ബന്ധിപ്പിച്ച് കടന്നു പോകുന്ന, പൊതുമരാമത്ത് വകുപ്പിൻ്റെ കീഴിലുള്ള പ്രധാന പാതയായ കരുവന്നൂർ-കാട്ടൂർ റോഡ് നവീകരിക്കുന്നതിന്റെ നിർമ്മാണ ഉദ്ഘാടനം പൊതുമരാമത്ത്, ടൂറിസം വകുപ്പ് മന്ത്രി പി. എ. മുഹമ്മദ് റിയാസ് ഓൺലൈനായി നിർവഹിച്ചു. കാട്ടൂർ ഗ്രാമ പഞ്ചായത്തിലെ കാട്ടൂർ ബസാറിൽ നടന്ന ചടങ്ങിൽ ഉന്നതവിദ്യാഭ്യാസ സാമൂഹിക നീതി വകുപ്പ് മന്ത്രി ഡോ. ആർ. ബിന്ദു അദ്ധ്യക്ഷത വഹിച്ചു.

കിഫ്ബി പദ്ധതിയിൽ ഉൾപ്പെടുത്തി 12.60 കോടി രൂപ ചിലവിൽ ഡി.ബി.എം ആൻഡ് ബി.സി നിലവാരത്തിലാണ് റോഡ് നവീകരിക്കുന്നത്.