സുഭിക്ഷ കേരളം പദ്ധതിയുടെ ഭാഗമായി നടത്തുന്ന ഓണത്തിന് ഒരു മുറം പച്ചക്കറിയുടെ കണ്ണൂര്‍ ബ്ലോക്ക്തല ഉദ്ഘാടനം നടന്നു. പാപ്പിനിശ്ശേരി ഖാദി ബോര്‍ഡിന്റെ ഉടമസ്ഥതയിലുള്ള ഒരു ഏക്കറിലധികം ഭൂമിയിലാണ് കൃഷി നടത്തുന്നത്. പരിപാടിയുടെ ഉദ്ഘാടനം കണ്ണൂര്‍ ബ്ലോക്ക് പഞ്ചായത്ത് പ്രസിഡണ്ട് കുടുവന്‍ പത്മനാഭന്‍ നിര്‍വ്വഹിച്ചു. ഖാദി ബോര്‍ഡ് അസിസ്റ്റന്റ് ഡയറക്ടര്‍ നാരായണണ്‍ തൈകള്‍ ഏറ്റുവാങ്ങി. കണ്ണൂര്‍ ബ്ലോക്കിന്റെ ആഭിമുഖ്യത്തില്‍ കൃഷി പ്രോത്സാഹിപ്പിക്കുന്നിന് കുടുംബങ്ങള്‍ക്കുള്ള പച്ചക്കറി വിത്ത് വിതരണത്തിന്റെ ഉദ്ഘാടനവും പ്രസിഡണ്ട് നിര്‍വ്വഹിച്ചു.

ഇതര സംസ്ഥാനങ്ങളില്‍ നിന്നും ഇറക്കുമതി ചെയ്യുന്ന വിഷമയമായ പച്ചക്കറികള്‍ വിപണികള്‍ കീഴടക്കുമ്പോള്‍ വിഷരഹിതമായ പച്ചക്കറികള്‍ നമുക്ക് വീട്ടില്‍ തന്നെ ഉല്‍പാദിപ്പിക്കാം. പച്ചക്കറി ഉല്‍പാദനം സംസ്ഥാനത്ത് സ്വയംപര്യാപ്തതയില്‍ എത്തിക്കുന്നതിന്റെ ഭാഗമായി വിഷരഹിത പച്ചക്കറികള്‍ വീട്ടുവളപ്പില്‍ ഉല്‍പാദിപ്പിക്കുന്നതിനായി സര്‍ക്കാര്‍ നടപ്പിലാക്കി വരുന്ന 'ഓണത്തിനൊരു മുറം പച്ചക്കറി' പദ്ധതിക്ക് ജില്ലയില്‍ തുടക്കമായി. കാര്‍ഷികരംഗത്തേക്ക് ജനങ്ങളെ ആകര്‍ഷിക്കുന്ന തരത്തില്‍ കൃഷിരീതികള്‍ മാറ്റുകയെന്ന ലക്ഷ്യത്തോടെയാണ് സര്‍ക്കാര്‍ പദ്ധതി നടപ്പിലാക്കുന്നത്.

ധര്‍മ്മടത്ത് ഓണ്‍ലൈന്‍ പഠന സൗകര്യമില്ലാത്ത വിദ്യാര്‍ഥികള്‍ക്ക് ടി വി നല്‍കുന്ന പദ്ധതിയുടെ വിതരണോദ്ഘാടനം മുഖ്യമന്ത്രി നിര്‍വഹിച്ചു

സംസ്ഥാനത്തെ സര്‍ക്കാര്‍/എയ്ഡഡ്/അംഗീകൃത അണ്‍എയ്ഡഡ്/സി.ബി.എസ്.ഇ/ ഐ.സി.എസ്.ഇ അഫിലിയേറ്റഡ് സ്‌കൂളില്‍ 1 മുതല്‍  10  വരെ  ക്ലാസുകളില്‍  പഠിക്കുന്ന ഒ.ഇ.സി. വിദ്യാര്‍ത്ഥികള്‍ക്കുള്ള  2020-21 വര്‍ഷത്തേക്കുള്ള പ്രീ-മെട്രിക് വിദ്യാഭ്യാസ ആനുകൂല്യത്തിനുള്ള അപേക്ഷ ക്ഷണിച്ചു. അര്‍ഹരായ കുട്ടികള്‍ ജൂലൈ 31 നകം www.egrant.kerala.gov.in എന്ന  സ്‌ക്കോളര്‍ഷിപ്പ്   പോര്‍ട്ടല്‍  വഴി  അപേക്ഷ  സമര്‍പ്പിക്കണം. കൂടുതല്‍ വിവരങ്ങള്‍ www.bcdd.kerala.gov.in  എന്ന  വെബ്‌സൈറ്റില്‍ ലഭിക്കും.

വൈത്തിരി താലൂക്ക് പരിധിയിലെ എല്ലാ വില്ലേജുകളിലെയും പൊതുജനങ്ങളുടെ പരാതികള്‍ പരിഹരിക്കുന്നതിനായി ജൂലൈ 18 ന് ജില്ലാ കളക്ടര്‍ ഓണ്‍ലൈന്‍ വഴി പരാതി പരിഹാര അദാലത്ത് നടത്തും.  അദാലത്തില്‍ ചികിത്സാ ധനസഹായം, ഭൂമി സംബന്ധമായ വിഷയങ്ങള്‍, റേഷന്‍കാര്‍ഡ് സംബന്ധിച്ച പരാതി എന്നിവ ഒഴിച്ചുള്ള അപേക്ഷകളാണ് പരിഗണിക്കുക. അപേക്ഷകള്‍ ജൂലൈ 10 വരെ  അക്ഷയ കേന്ദ്രങ്ങളില്‍ സ്വീകരിക്കും.

വന മഹോത്സവത്തോടനുബന്ധിച്ച് സാമൂഹ്യ വനവത്കരണ വിഭാഗം വയനാട് ഡിവിഷന്റെ സഹകരണത്തോടെ പുല്‍പ്പള്ളി ജയശ്രീ എച്ച്.എസ്.എസില്‍ വിദ്യാവനം പദ്ധതി നടപ്പിലാക്കി.  സ്‌കൂള്‍ കോംപൗണ്ടില്‍ അഡീഷണല്‍ പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ പ്രദീപ്കുമാര്‍ വൃക്ഷതൈ നട്ട് പരിപാടി ഉദ്ഘാടനം ചെയ്തു.  പനമരം ബ്ലോക്ക് പഞ്ചായത്ത് പ്രസിഡന്റ് ടി.എസ്.ദിലീപ് കുമാര്‍ അധ്യക്ഷത വഹിച്ചു.

വിദ്യാര്‍ത്ഥികള്‍ക്ക് ഓണ്‍ലൈന്‍ പഠനത്തിനായി കാക്കാത്തി, മുളുമല, ആവണിപ്പാറ ആദിവാസി കോളനിയിലെ വിദ്യാര്‍ത്ഥികള്‍ക്ക് കോന്നി വന വികാസ് ഏജന്‍സി നല്‍കിയ മൂന്നു ടെലിവിഷനുകള്‍ വനം മന്ത്രി അഡ്വ.കെ.രാജു വിദ്യാര്‍ത്ഥികള്‍ക്ക് കൈമാറി. 

പത്തനംതിട്ട അടൂര്‍ ഗവണ്‍മെന്റ് ബോയ്‌സ് ഹയര്‍ സെക്കന്ററി സ്‌കൂളില്‍ വനമഹോത്സവത്തിന്റെ ഭാഗമായി നടപ്പാക്കുന്ന വിദ്യാവനം പദ്ധതിയുടെ സംസ്ഥാനതല ഉദ്ഘാടനവേദിയിലാണ് ടെലിവിഷനുകള്‍ കൈമാറിയത്. ചടങ്ങില്‍ കോന്നി ഡിവിഷണല്‍ ഫോറസ്റ്റ് ഓഫീസര്‍ ശ്യാം മോഹന്‍ലാല്‍, വന സംരക്ഷണ സമിതി സെക്രട്ടറിമാരായ സംഗീത് ആര്‍.നായര്‍, ബൈജു, വി.എസ് വിമല്‍കുമാര്‍ തുടങ്ങിയവര്‍ പങ്കെടുത്തു.