നാവിക സേനയുടെ യുദ്ധകപ്പലായ ഐ എന്‍ എസ് ദ്രോണാചാര്യയില്‍ നിന്നും ജൂലൈ 10, 14, 17, 21, 24, 28, 31, ഓഗസ്റ്റ് 4, 7, 11, 14, 18, 21, 25, 28, സെപ്തംബര്‍ 1, 4, 8, 11, 15, 18, 22, 25, 29 തീയതികളില്‍ വെടിവെപ്പ് പരിശീലനം നടത്തുന്നതായി അറിയിപ്പ് ലഭിച്ചിട്ടുണ്ട്. ഈ ദിവസങ്ങളില്‍ കടലില്‍ പോകുന്നവര്‍ ബന്ധപ്പെട്ട ഫിഷറീസ് സ്റ്റേഷനുമായി ബന്ധപ്പെട്ട് പരിശീലനം നടക്കുന്ന പ്രദേശത്തെ സംബന്ധിച്ച് വിവരം തേടിയതിന് ശേഷം മാത്രമേ പോകാവൂ എന്ന് ജില്ലാ കലക്ടര്‍ അറിയിച്ചു.
(പി.ആര്‍.കെ നമ്പര്‍ 1818/2020) 

റേഷന്‍ കാര്‍ഡില്‍ ആധാര്‍ നമ്പര്‍ ലിങ്ക് ചെയ്തിട്ടില്ലാത്തവര്‍ ഉടന്‍തന്നെ റേഷന്‍ കടയോ അക്ഷയ കേന്ദ്രം വഴിയോ ലിങ്ക് ചെയ്യണമെന്ന് ജില്ലാ സപ്ലൈ ഓഫീസര്‍ അറിയിച്ചു. റേഷന്‍ കാര്‍ഡ് മുഖേന ലഭിക്കുന്ന ആനുകൂല്യങ്ങള്‍ ലിങ്ക് ചെയ്യാതിരുന്നാല്‍ നഷ്ടപ്പെടാന്‍ സാധ്യതയുണ്ട്.
(പി.ആര്‍.കെ നമ്പര്‍ 1817/2020)
 

ജില്ലാ ആസൂത്രണ സമിതി യോഗം ജൂലൈ 10 ന് ഉച്ചകഴിഞ്ഞ് മൂന്നിന് ജില്ലാ പഞ്ചായത്ത് കോണ്‍ഫറന്‍സ് ഹാളില്‍ ചേരും.
(പി.ആര്‍.കെ നമ്പര്‍ 1816/2020)

വനങ്ങള്‍ സംരക്ഷിക്കേണ്ടതിന്റെ പ്രധാന ആവശ്യകത പാരിസ്ഥിതിക മൂല്യങ്ങള്‍ നിലനിര്‍ത്തുന്നതിനായെന്ന് വനം-വന്യജീവി മൃഗസംരക്ഷണ വകുപ്പ് മന്ത്രി കെ രാജു. സംസ്ഥാന വനം വകുപ്പ് സംഘടിപ്പിച്ച എഴുപതാമത് വന മഹോത്സവത്തിന്റെ സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
വനത്തെ ആശ്രയിച്ചാണ് പ്രകൃതി, മനുഷ്യര്‍,  ജന്തുജാലങ്ങള്‍ എന്നിവയുടെ നിലനില്‍പ്പ്. അതുകൊണ്ടുതന്നെ വനസംരക്ഷണവുമായി ബന്ധപ്പെട്ട ആശയങ്ങള്‍ പൊതുജനങ്ങളിലേക്ക് എത്തിച്ചു ബോധവത്കരണം നടത്തണമെന്നും അദ്ദേഹം പറഞ്ഞു.

തീരദേശ ടൂറിസത്തിന് കൂടുതല്‍ സാധ്യതകള്‍ ഒരുക്കുന്ന  തേവലക്കര ഗ്രാമപഞ്ചായത്തിലെ തുപ്പാശ്ശേരി കടവ്-ഇറക്കത്ത് കടവ് റോഡിന്റെ  നിര്‍മാണോദ്ഘാടനം ജില്ലാ പഞ്ചായത്ത് പ്രസിഡന്റ് സി രാധാമണി നിര്‍വ്വഹിച്ചു. തേവലക്കര ഗ്രാമപഞ്ചായത്ത് പ്രസിഡന്റ് ഐ ഷിഹാബ് അധ്യക്ഷനായി.

ജില്ലയില്‍ ഇന്നലെ(ജൂലൈ 07) ആറു പേര്‍ രോഗമുക്തി നേടി. അഞ്ചല്‍ തടിക്കാട് സ്വദേശി(39), ഇളമ്പല്‍ സ്വദേശിനി(28), തഴവ സ്വദേശി(44), ചവറ സ്വദേശി(27), വെട്ടിക്കവല ചക്കുവരയ്ക്കല്‍ സ്വദേശിനി(50), പൂയപ്പള്ളി സ്വദേശി(40), എന്നിവരാണ് രോഗമുക്തരായി ആശുപത്രി വിട്ടത്.
(പി.ആര്‍.കെ നമ്പര്‍ 1813/2020)
 

ജില്ലയില്‍ ഇന്നലെ(ജൂലൈ 07) 11 പേര്‍ക്ക് കോവിഡ് സ്ഥിരീകരിച്ചു. 10 പേര്‍ വിദേശത്തു നിന്നും ഒരാള്‍ ഇതര സംസ്ഥാനത്ത് നിന്നും എത്തിയവരാണ്. അഞ്ചു പേര്‍ സൗദിയില്‍ നിന്നും കുവൈറ്റ്, ഒമാന്‍ എന്നിവിടങ്ങളില്‍ നിന്ന് രണ്ടുപേരും ആഫ്രിക്കയില്‍ നിന്ന് ഒരാളും ഹൈദ്രാബദില്‍ നിന്നും ഒരാളുമാണ് എത്തിയത്.

വടക്കാഞ്ചേരി ജില്ലാ ആശുപത്രിയിലേക്ക് അൾട്രാ സൗണ്ട് സ്‌കാനിംഗ് നടത്തുന്നതിന് റേഡിയോളജിയിൽ ബിരുദമുളള ഡോക്ടർമാരെ നിയമിക്കുന്നു. റേഡിയോ ഡയഗോനസിസിൽ എംഡി അല്ലെങ്കിൽ ഡിപ്ലോമ ആണ് യോഗ്യത. താൽപര്യമുളളവർ സൂപ്രണ്ടിനെ വിളിക്കുക. ഫോൺ: 04884 2325214, 9447068513.
 

വടക്കാഞ്ചേരി ജില്ലാ ആശുപത്രിയിലേക്ക് 2020 ആഗസ്റ്റ് ഒന്നു മുതൽ 2021 ജൂലൈ 31 വരെ കെഎഎസ്പി, ജെഎസ്എകെ, ആരോഗ്യകിരണം, ആർബിഎസ്‌കെ എന്നീ സർക്കാർ പദ്ധതികളിൽ ഉൾപ്പെടുന്ന രോഗികൾക്ക് ഡോക്ടർമാരുടെ കുറുപ്പടി പ്രകാരം ലാബ് ടെസ്റ്റ് ചെയ്യുന്നതിന് ടെണ്ടർ ക്ഷണിച്ചു. ടെണ്ടർ സ്വീകരിക്കുന്ന അവസാന തീയതി ജൂലൈ 22 ഉച്ചയ്ക്ക് 12 മണി. ഫോൺ: 04884 232221.

തൃശൂർ ഗവൺമെന്റ് ലോ കോളേജിൽ പുനഃപ്രവേശനത്തിന് അപേക്ഷ ക്ഷണിച്ചു. പഞ്ചവത്സര ബിബിഎ എൽ എൽ ബി ഓണേഴ്‌സ് കോഴ്‌സിലെ 3, 4, 6, 8, 10 സെമസ്റ്ററുകളിലെയും ത്രിവത്സര എൽഎൽബി യൂണിറ്ററി കോഴ്‌സിലെ 3, 4, 6 സെമസ്റ്ററുകളിലെയും ഒഴിവുള്ള സീറ്റിലേക്ക് ഇടയ്ക്ക് പഠനം നിർത്തിയവർക്ക് പുനഃപ്രവേശനത്തിന് അപേക്ഷിക്കാവുന്നതാണ്. കോഴിക്കോട് ഗവൺമെന്റ് ലോ കോളജിൽ പഠിച്ചുകൊണ്ടിരിക്കുന്നവർക്ക് കോളേജ് മാറ്റത്തിനുവേണ്ടി 13/7/2020ന് ഉച്ചതിരിഞ്ഞ് 3 മണി വരെ അപേക്ഷിക്കാവുന്നതാണ്.