ഇടുക്കി മെഡിക്കല്‍ കോളേജാശുപത്രിയില്‍ തയാറാകുന്ന ഡയാലിസിസ് യൂണിറ്റിന്റെയും ബ്ളഡ് ബാങ്കിന്റെയും ഉദ്ഘാടനത്തിനു മുന്നോടിയായുള്ള ഒരുക്കങ്ങള്‍ സ്വാഗതസംഘം യോഗം വിലയിരുത്തി. ജില്ലാ കളക്ടര്‍ എച്ച് ദിനേശന്റെ അധ്യക്ഷതയിലാണ് യോഗം ചേര്‍ന്നത്. ജൂലായ് 14ന് ഉദ്ഘാടനം നടത്താനാണ് തീരുമാനം. ഇതുമായി ബന്ധപ്പെട്ട മറ്റ് ഘടകങ്ങളുടെയും ഉദ്ഘാടനം ഇതോടൊപ്പം നടത്തും. ഡയാലിസിസ് യൂണിറ്റ്, ബ്ളഡ് ബാങ്ക് എന്നിവ കൂടാതെ ഐസിയു, പിസിആര്‍ ലാബ്, കാന്റീന്‍, റോഡ്, വെയിറ്റിംഗ് ഷെഡ്, മോര്‍ച്ചറി നവീകരണം എന്നിവ ഇതിലുള്‍പ്പെടുന്നു.

തിരുവനന്തപുരം, കൊച്ചി, കരിപ്പൂര്‍, അന്താരാഷ്ട്ര വിമാനത്താവളങ്ങള്‍ വഴി തിങ്കളാഴ്ച (ജൂലൈ 6) 21 വിമാനങ്ങളില്‍ പത്തനംതിട്ട ജില്ലക്കാരായ 186 പ്രവാസികള്‍കൂടി എത്തി. ഇവരില്‍ 31 പേരെ വിവിധ കോവിഡ് കെയര്‍ സെന്ററുകളിലും മൂന്നു ഗര്‍ഭിണികള്‍ ഉള്‍പ്പെടെ  155 പേരെ വീടുകളിലും നിരീക്ഷണത്തിലാക്കി.

ഇതര സംസ്ഥാനങ്ങളില്‍നിന്ന് മേയ് 15 മുതല്‍ തിങ്കളാഴ്ച (ജൂലൈ 6) വരെ 89 സ്‌പെഷ്യല്‍ ട്രെയിനുകളിലായി പത്തനംതിട്ട ജില്ലക്കാരായ 2234 പേരാണ് എത്തിയത്. തിങ്കളാഴ്ച (ജൂലൈ 6) നിസാമുദീന്‍ - എറണാകുളം, മുംബൈ തിരുവനന്തപുരം സ്‌പെഷ്യല്‍  ട്രെയിനുകളിലായി പത്തനംതിട്ട ജില്ലക്കാരായ അഞ്ചു പേര്‍കൂടി എത്തി. ഇവരില്‍ മൂന്നുപേരെ കോവിഡ് കെയര്‍ സെന്ററുകളിലും രണ്ടു പേര്‍ വീടുകളിലും നിരീക്ഷണത്തില്‍ കഴിയുകയാണ്.

തേനിയില്‍ നിന്ന് തിരുവല്ല മാര്‍ക്കറ്റിലെത്തിയ ഡ്രൈവര്‍ക്ക് കോവിഡ് സ്ഥിരീകരിച്ചതിനെ തുടര്‍ന്ന് തിങ്കളാഴ്ചതന്നെ മാത്യു ടി.തോമസ് എംഎല്‍എ, തിരുവല്ല സബ് കളക്ടര്‍ ഡോ.വിനയല്‍ ഗോയലില്‍, മുനിസിപ്പല്‍ ചെയര്‍മാന്‍ ആര്‍.ജയകുമാര്‍ എന്നിവരുടെ നേതൃത്വത്തില്‍ മാര്‍ക്കറ്റിലെയും കാവുംഭാഗത്തെയും കടകള്‍ അടപ്പിച്ചു. ചൊവ്വാഴ്ച്ച ഫയര്‍ ഫോഴ്സും നഗരസഭയും ചേര്‍ന്ന് കടകള്‍ അണുവിമുക്തമാക്കി. 

സംസ്ഥാന സര്‍ക്കാര്‍ മൈലപ്ര പ്രാഥമിക ആരോഗ്യ കേന്ദ്രത്തെ ആര്‍ദ്രം പദ്ധതിയില്‍ ഉള്‍പ്പെടുത്തി കുടുംബാരോഗ്യ കേന്ദ്രമായി ഉയര്‍ത്തുന്നതിന്റെ ഭാഗമായി ആശുപത്രിയില്‍ നടത്തുന്ന നിര്‍മാണ പ്രവര്‍ത്തനങ്ങളുടെ ശിലാസ്ഥാപനം നടത്തി. 25.5 ലക്ഷം രൂപയുടെ നിര്‍മാണ പ്രവര്‍ത്തനങ്ങളുടെ ശിലാസ്ഥാപനം അഡ്വ.കെ.യു ജനീഷ് കുമാര്‍ എംഎല്‍എ നിര്‍വഹിച്ചു.  സംസ്ഥാന സര്‍ക്കാര്‍ ആര്‍ദ്രം മിഷനില്‍ ഉള്‍പ്പെടുത്തി അനുവദിച്ച 15.5 ലക്ഷം രൂപയും, എംഎല്‍എയുടെ ഫണ്ടില്‍ നിന്ന് 10 ലക്ഷം രൂപയുമാണ് ഇതിനായി ചെലവഴിക്കുന്നത്. ഇതോട് അനുബന്ധിച്ചു ചേര്‍ന്ന യോഗം ആന്റോ ആന്റണി എംപി ഉദ്ഘാടനം ചെയ്തു.

 ലോക്ക്ഡൗണ്‍ ലംഘനങ്ങള്‍ക്കു ഇന്നലെ 15 കേസുകള്‍ രജിസ്റ്റര്‍ ചെയ്യുകയും 14 പേരെ അറസ്റ്റ് ചെയ്യുകയും ചെയ്തു. 3 വാഹനങ്ങള്‍ പിടിച്ചെടുക്കുകയും, മാസ്‌ക് ധരിക്കാത്തതിന് 40 പേര്‍ക്ക് നോട്ടീസ് നല്‍കുകയും ചെയ്തു.

ഓണ്‍ലൈന്‍ വിദ്യാഭ്യാസം നിര്‍ധനരായതും, സൗകര്യങ്ങളില്ലാത്തതുമായ കുട്ടികള്‍ക്ക് ലഭ്യമാക്കുന്നതിന് സന്നദ്ധസംഘടനകളും മറ്റുമായിച്ചേര്‍ന്നു എത്തിച്ചുവരുന്നു. എസ്.പി.സി പ്രോജക്ടിന്റെ പ്രവര്‍ത്തനഫലമായി ഇത്തരത്തില്‍ 107 ടെലിവിഷനുകള്‍ എത്തിച്ചതായും ജില്ലാപോലീസ് മേധാവി അറിയിച്ചു. 107-ാമത്തെ ടെലിവിഷനന്‍ കഴിഞ്ഞദിവസം കലഞ്ഞൂരില്‍ വിതരണം ചെയ്തു. 

കോവിഡ് വ്യാപനവുമായി ബന്ധപ്പെട്ട് ജില്ലയിലുണ്ടായിട്ടുള്ള പുതിയ സാഹചര്യത്തിന്റെ ഗൗരവം ഉള്‍ക്കൊണ്ട് പ്രവര്‍ത്തിക്കുമെന്ന് ജില്ലാപോലീസ് മേധാവി കെ.ജി സൈമണ്‍ വ്യക്തമാക്കി.

കുളനട പ്രാഥമികാരോഗ്യ കേന്ദ്രത്തിന് 55 ലക്ഷം രൂപയുടെ ഭരണാനുമതി ലഭിച്ചതായി വീണാ ജോര്‍ജ് എംഎല്‍എ അറിയിച്ചു. എംഎല്‍എയുടെ ആസ്തി വികസന ഫണ്ടില്‍നിന്നാണ് തുക അനുവദിച്ചിട്ടുള്ളത്.

സംസ്ഥാന സര്‍ക്കാരിന്റെ ആര്‍ദ്രം മിഷന്റെ രണ്ടാംഘട്ടത്തില്‍ കുടുംബാരോഗ്യ കേന്ദ്രമായി ഉയര്‍ത്തപ്പെട്ട കുളനട പിഎച്ച്സിയില്‍ ദിവസേന 200 ല്‍ പരം രോഗികള്‍ എത്തുന്നുണ്ട്. ശബരിമല ഇടത്താവളത്തിന് സമീപമുള്ളതായതിനാല്‍ തീര്‍ഥാടകര്‍ക്കും പ്രയോജനപ്പെടുമെന്ന് എംഎല്‍എ പറഞ്ഞു.