ബേപ്പൂര്‍  ഫിഷറീസ്  ഗവണ്‍മെന്റ്   റീജിയണല്‍  ടെക്‌നിക്കല്‍  ഹൈസ്‌ക്കൂള്‍  പരിസരത്തുള്ള  ഒരു ഞെട്ടാവല്‍ മരവും തലപോയി നല്‍ക്കുന്ന  ഒരു തെങ്ങും അവ ഇപ്പോഴുള്ള അവസ്ഥയില്‍ ജൂലൈ 13ന് രാവിലെ 11  മണിയ്ക്ക് ബേപ്പൂര്‍ ഫിഷറീസ് സ്റ്റേഷനില്‍ പൊതുലേലം ചെയ്യും. ഫോണ്‍ : 0495 2414074

പേരാമ്പ്ര പഞ്ചായത്തിലെ പട്ടികജാതി വിഭാഗ വിദ്യാര്‍ഥികള്‍ക്ക് പഠനോപകരണങ്ങള്‍ വിതരണം ചെയ്തു. കോവിഡ് മാനദണ്ഡങ്ങള്‍ പാലിച്ചുകൊണ്ട് പഞ്ചായത്തില്‍ നടന്ന ചടങ്ങില്‍  പ്രസിഡന്റ് കെ.എം.റീന വിദ്യാര്‍ത്ഥികള്‍ക്ക് മേശ, കസേര എന്നിവ കൈമാറി. 19 വിദ്യാര്‍ഥികള്‍ക്കാണ് പദ്ധതി പ്രകാരം ഉപകരണങ്ങള്‍ നല്‍കിയത്. ചടങ്ങില്‍ പഞ്ചായത്ത് വൈസ് പ്രസിഡന്റ് കെ.പി. ഗംഗാധരന്‍ നമ്പ്യാര്‍, സുരേന്ദ്രന്‍ മാഷ് എന്നിവര്‍ പങ്കെടുത്തു.

കോവിഡ് 19 - ന്റെ സാഹചര്യത്തില്‍ നിലവിലെ മാനദണ്ഡങ്ങള്‍ പാലിച്ചുകൊണ്ട് ജില്ലാ കലക്ടറുടെ നേതൃത്വത്തില്‍ താലൂക്ക് തല ഓണ്‍ലൈന്‍ പരാതി പരിഹാര അദാലത്ത് താമരശ്ശേരി, വടകര താലൂക്കുകളില്‍ യഥാക്രമം ജൂലൈ 13, 17 തീയ്യതികളില്‍ ഉച്ചയ്ക്ക് രണ്ട് മണിക്ക് നടത്തുമെന്ന് ജില്ലാ കലക്ടര്‍ അറിയിച്ചു. അദാലത്തില്‍ പങ്കെടുക്കുന്നതിനായി പൊതുജനങ്ങള്‍ തൊട്ടടുത്തുള്ള അക്ഷയസെന്ററില്‍ ഫോണ്‍ മുഖേന രജിസ്റ്റര്‍ ചെയ്യണം. ചികില്‍സാ സഹായം, റേഷന്‍ കാര്‍ഡ് സംബന്ധിച്ചുളള പരാതികള്‍ എന്നിവ അദാലത്തില്‍ പരിഗണിക്കില്ല. 

കോഴിക്കോട് വഖഫ് ട്രിബൂണല്‍ 2020 ജൂലൈ 14,15,16 തീയ്യതികളില്‍ എറണാകുളം കലൂരിലുള്ള കേരളാ സ്റ്റേറ്റ് വഖഫ് ബോര്‍ഡ് ഹെഡ് ഓഫീസില്‍ നടത്താനിരുന്ന ക്യാമ്പ് സിറ്റിങ് 2020 ആഗസ്റ്റ് 18,19,20 തിയ്യതികളിലേക്ക് മാറ്റിയതായി ശിരസ്തദാര്‍ അറിയിച്ചു. 

കോവിഡ് 19 നെ തുടര്‍ന്ന് കണ്‍ന്റൈയ്ന്‍മെന്റ് സോണുകളുടെ എണ്ണം വര്‍ദ്ധിച്ചു വരുന്ന സാഹചര്യത്തില്‍ ഉപഭോക്താക്കള്‍ വെള്ളക്കരം ഓണ്‍ലൈനായി അടക്കണമെന്ന് വാട്ടര്‍ അതോറിറ്റി പി.എച്ച്.ഡിവിഷന്‍ എക്‌സിക്യൂട്ടീവ് എഞ്ചിനീയര്‍ അറിയിച്ചു.  http://epay.kwa.kerala.gov.in / quick pay/Google pay/Phone pay വഴി ഓണ്‍ലൈനായി പണമടക്കാം.  ഫോണ്‍: 8547638282, 8547001220 ഓണ്‍ലൈനായി പണമടക്കാന്‍ കഴിയാത്തവര്‍ കോവിഡ്-19 നിബന്ധനകള്‍ കര്‍ശനമായി പാലിച്ചേ കൗണ്ടറില്‍ പണമടയ്ക്കാന്‍ എത്താവൂ. ഫോണ്‍: 0495 2370584

പെരുവണ്ണാമൂഴി കൃഷി വിജ്ഞാന കേന്ദ്രത്തിന്റെ ആഭിമുഖ്യത്തില്‍ 'മഴക്കാല പച്ചക്കറി കൃഷി എന്ന വിഷയത്തില്‍ ജൂലൈ  18-ന് ഗൂഗിള്‍ മീറ്റ് വഴി ഓണ്‍ലൈന്‍ പരിശീലന പരിപാടി സംഘടിപ്പിക്കും.  കോഴിക്കോട് ജില്ലയിലെ കര്‍ഷകര്‍ക്ക് പങ്കെടുക്കാം.  താല്‍പര്യമുള്ളവര്‍ 9447565549 എന്ന നമ്പറില്‍ വാട്ട്‌സ്ആപ്പ് സന്ദേശമയച്ച് ജൂലൈ 15നകം  പേര് രജിസ്റ്റര്‍ ചെയ്യണമെന്ന് കൃഷി അസിസ്റ്റന്റ് ഡയറക്ടര്‍ അറിയിച്ചു.

വിഷരഹിത പച്ചക്കറികള്‍ വീട്ടുവളപ്പില്‍ തന്നെ കൃഷിചെയ്യുന്ന 'ഓണത്തിന് ഒരുമുറം പച്ചക്കറി' പദ്ധതിക്ക്  പേരാമ്പ്ര പഞ്ചായത്തില്‍ തുടക്കമായി. പ്രസിഡന്റ് കെ.എം.റീന പച്ചക്കറി വിത്തുകളുടെ വിതരണ ഉല്‍ഘാടനം നിര്‍വഹിച്ചു. പഞ്ചായത്തിലെ എല്ലാ വീടുകളെയും പദ്ധതിയില്‍ ഉള്‍പ്പെടുത്തി വിത്തുകള്‍ വിതരണം ചെയ്യുമെന്നും  കൃഷിക്കാവശ്യമായ സഹായങ്ങള്‍ ജനങ്ങളിലെത്തിക്കുമെന്നും പ്രസിഡന്റ് പറഞ്ഞു. 

കുറ്റിച്ചിറ മിശ്കാല്‍ പള്ളി നവീകരണവുമായി ബന്ധപ്പെട്ട് നാട്ടുകാരുടെ സഹകരണം ഉറപ്പുവരുത്തുന്നതിനായി സംയുക്ത യോഗം വിളിച്ചു ചേര്‍ക്കുമെന്ന് ജില്ലാ കലക്ടര്‍ സാംബശിവറാവു അറിയിച്ചു.  കോഴിക്കോടിന്റെ പൈതൃക സംരക്ഷണ കേന്ദ്രവും ചരിത്രപ്രാധാന്യമുള്ളതുമായ കുറ്റിച്ചിറ മിശ്കാല്‍ പളളിയുടെ നവീകരണം സംബന്ധിച്ച് ഡോ.എം.കെ.മുനീര്‍ എംഎല്‍എയുടെ അധ്യക്ഷതയില്‍ കലക്ടറേറ്റില്‍ ചേര്‍ന്ന യോഗത്തിലാണ് ഇക്കാര്യം അറിയിച്ചത്.