വടക്കാഞ്ചേരി ഗവ. മോഡൽ റസിഡൻഷ്യൽ സ്‌കൂളിൽ 2020-21 അദ്ധ്യയന വർഷം ഇംഗ്ലീഷ് മീഡിയം വിഭാഗത്തിൽ അഞ്ചാം ക്ലാസ്സിൽ ഒഴിവുളള സീറ്റുകളിൽ പ്രവേശനത്തിനായി പട്ടികജാതി വിഭാഗത്തിൽപ്പെട്ട ആൺകുട്ടികളുടെ രക്ഷിതാക്കളിൽ നിന്ന് അപേക്ഷ ക്ഷണിച്ചു. വിദ്യാർത്ഥികൾക്ക് താമസം, ഭക്ഷണം, യൂണിഫോം, പാഠപുസ്തകങ്ങൾ എന്നിവ സൗജന്യമാണ്. പ്രവേശനം ആഗ്രഹിക്കുന്ന വിദ്യാർത്ഥികളുടെ രക്ഷിതാക്കൾ വടക്കാഞ്ചേരി റെയിൽവേ സ്റ്റേഷനു സമീപത്തെ സ്‌കൂളിൽ നേരിട്ട് എത്തണം. ഫോൺ: 9846590067.

റീ ബിൽഡ് കേരള ഇനിഷ്യേയേറ്റീവ് പദ്ധതിയുടെ ഭാഗമായി കൃഷിഭവനുകളിൽ പ്രളയബാധിത ഉപജീവനകൃഷി നടപ്പാക്കുന്നു. സംയോജിത കൃഷി രീതികളിലൂടെ 2018, 2019 വർഷങ്ങളിലെ പ്രളയബാധിതരുടെ ഉപജീവന മാർഗ്ഗം വർധിപ്പിക്കുക എന്ന ലക്ഷ്യത്തോടെയാണ് ചൊവ്വന്നൂർ ബ്ലോക്ക് കൃഷി അസിസ്റ്റന്റ് ഡയറക്ടറുടെ കീഴിലുള്ള ആർത്താറ്റ്, ചൂണ്ടൽ, ചൊവ്വന്നൂർ, കടങ്ങോട്, കടവല്ലൂർ, കാട്ടകാമ്പാൽ, കണ്ടാണശ്ശേരി, കുന്നംകുളം, പോർക്കുളം, വേലൂർ എന്നീ കൃഷിഭവനുകളിൽ സംയോജിത കൃഷി രീതിയായ 'ജൈവഗ്രഹം' നടപ്പിലാക്കുന്നത്. ഇതിന് കർഷകരിൽ നിന്ന് അപേക്ഷ ക്ഷണിച്ചു.

കോവിഡ് 19 സുരക്ഷാ മുൻകരുതലോടെ വിവിധ ദേശീയ സാമ്പിൾ സർവേകൾ നാഷനൽ സ്റ്റാറ്റിക്കൽ ഓഫീസ് (എൻ.എസ്.ഒ) ആരംഭിച്ചു. 78 ാമത് സാമൂഹിക സാമ്പത്തിക സർവേ, തൊഴിൽ സേനാ സർവേ, അർബൻ ഫ്രെയിം സർവേ എന്നിവയാണ് കണ്ടെയ്മെൻറ് സോണുകൾ ഒഴികെയുള്ള വിവിധ സാമ്പിൾ യൂനിറ്റുകളിൽ നടത്തുന്നത്.

ഇരിങ്ങാലക്കുട ജനറൽ ആശുപത്രിയിൽ സഖി വൺ സ്റ്റോപ്പ് സെന്ററിലേക്ക് സെന്റർ അഡ്മിനിസ്‌ട്രേറ്റർ, കേസ് വർക്കർ, സൈക്കോ സോഷ്യൽ കൗൺസിലർ, ഐടി സ്റ്റാഫ്, സെക്യൂരിറ്റി ഓഫീസർ (നൈറ്റ് ഡ്യൂട്ടി) എന്നീ തസ്തികൾക്ക് അപേക്ഷ ക്ഷണിച്ചു. സൈക്കോ സോഷ്യൽ കൗൺസിലർ ഒഴികെയുളള തസ്തികളിൽ സ്ത്രീകൾ മാത്രം അപേക്ഷിച്ചാൽ മതി. സൈക്കോളജി അല്ലെങ്കിൽ സോഷ്യൽ വർക്കിൽ ബിരുദാനന്തരബിരുദം അല്ലെങ്കിൽ നിയമത്തിൽ ബിരുദമാണ് അഡ്മിനിസ്‌ട്രേറ്ററുടെ യോഗ്യത. നിയമബിരുദം അല്ലെങ്കിൽ സോഷ്യൽ വർക്കിൽ ബിരുദാനന്തരബിരുദമാണ് കേസ് വർക്കറുടെ യോഗ്യത. സൈക്കോളജി അല്ലെങ്കിൽ സോഷ്യൽ വർക്കിൽ ബിരുദാനന്തരബിരുദമാണ് കൗൺസിലറുടെ യോഗ്യത.

കേരള കലാമണ്ഡലം കല്പിത സർവകലാശാല ആർട്ട് ഹൈസ്‌കൂളിലെ എട്ടാം ക്ലാസ് പ്രവേശനവുമായി ബന്ധപ്പെട്ട പൊതു വിജ്ഞാന പരീക്ഷ ജൂൺ 30 ന് കാലത്ത് 11 മണി മുതൽ ഒരു മണി വരെ കലാമണ്ഡലം ആർട്ട് ഹയർ സെക്കന്ററി സ്‌കൂളിൽ നടത്തും. പരീക്ഷയെഴുതുന്ന വിദ്യാർത്ഥികൾക്ക് മാത്രമേ കലാമണ്ഡലത്തിലേക്ക് പ്രവേശനം അനുവദിക്കൂ. കോവിഡ് 19 സുരക്ഷയുടെ ഭാഗമായി മാസ്‌ക് നിർബന്ധമായും ധരിക്കണം. ആരോഗ്യ വകുപ്പ് നിർദ്ദേശിക്കുന്ന മാർഗ്ഗനിർദ്ദേശങ്ങൾ പാലിക്കണം.

എളനാട് പ്രാഥമികാരോഗ്യ കേന്ദ്രത്തിൽ 2020-21 സാമ്പത്തിക വർഷം ലാബ് പ്രവർത്തനത്തിന് വേണ്ട സമാഗ്രികൾ വാങ്ങൽ പദ്ധതിയുടെ ഭാഗമായി സാധന സാമഗ്രികൾ വിതരണം ചെയ്യുന്നതിന് ടെണ്ടർ ക്ഷണിച്ചു. ടെണ്ടർ സ്വീകരിക്കുന്ന അവസാന തീയതി ജൂൺ 18 വൈകീട്ട് നാല് മണി. ഫോൺ: 04884 288574.

സപ്ലൈകോ വിൽപനശാലകൾ വഴി വിതരണം ചെയ്തു വരുന്നകോവിഡ് അതിജീവന കിറ്റ് വാങ്ങാൻ വരുന്നവർ റേഷൻ കാർഡുമായെത്തണമെന്ന് സിഎംഡി പി.എം. അലി അസ്ഗർ പാഷ അറിയിച്ചു. റേഷൻ കടകളിൽ നിന്ന് അതിജീവന കിറ്റുവാങ്ങാത്തവരാണ് ഈ അവസരം വിനിയോഗിക്കേണ്ടത്. ജൂൺ 15 വരെ കിറ്റ് കൈപ്പറ്റാം.
 

ഒല്ലൂക്കര ബ്ലോക്ക് പഞ്ചായത്തിൽ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുമായി ബന്ധപ്പെട്ട് പ്രവർത്തിക്കുന്നതിന് അക്രഡിറ്റഡ് എഞ്ചിനീയർ തസ്തികയിലേക്ക് പ്രസവാവധി ഒഴിവിലേക്ക് ദിവസവേതന അടിസ്ഥാനത്തിൽ അപേക്ഷകൾ ക്ഷണിക്കുന്നു. ആറുമാസമാണ് കാലാവധി. അപേക്ഷകൾ ജൂൺ 16 വൈകീട്ട് 5 മണി വരെ അയയ്ക്കാം. അപേക്ഷകൾ പഞ്ചായത്ത് ഓഫീസിലും സ്വീകരിക്കുന്നതാണ്. ബി ടെക് സിവിൽ എഞ്ചിനീയറിംഗാണ് യോഗ്യതയായി പരിഗണിച്ചിട്ടുള്ളത്. ഈ പദ്ധതിയിൽ മുൻപ് പ്രവർത്തിച്ചിട്ടുള്ള വർക്ക് മുൻഗണന ലഭിക്കുമെന്നും ഒല്ലൂക്കര ബ്ലോക്ക് പഞ്ചായത്ത് സെക്രട്ടറി അറിയിച്ചു.

എളനാട് പ്രാഥമികാരോഗ്യ കേന്ദ്രത്തിൽ 2020-21 സാമ്പത്തിക വർഷം മരുന്ന് വാങ്ങൽ പദ്ധതിയുടെ ഭാഗമായി മരുന്നുകൾ വിതരണം ചെയ്യുന്നതിന് ക്വട്ടേഷൻ ക്ഷണിച്ചു. ക്വട്ടേഷൻ സ്വീകരിക്കുന്ന അവസാന തീയതി ജൂൺ 18 വൈകീട്ട് നാല് മണി. ഫോൺ: 04884 288574.