ഒ.ആര്‍ കേളു എം.എല്‍.എയുടെ പ്രത്യേക വികസന നിധിയില്‍ ഉള്‍പ്പെടുത്തി തൊണ്ടര്‍നാട് ഗ്രാമപഞ്ചായത്തിലെ തേറ്റമല ഗവ.ഹൈസ്‌കൂളിന് പാചകപ്പുര നിര്‍മ്മിക്കുന്നതിന് 20 ലക്ഷം രൂപ അനുവദിച്ചു.

    കര്‍ഷക പെന്‍ഷന്‍ ലഭിച്ചു കൊണ്ടിരിക്കുന്ന കര്‍ഷകരില്‍ അക്ഷയ സെന്ററുകള്‍ വഴി മസ്റ്ററിങ്ങ് നടത്താന്‍ സാധിക്കാത്തവര്‍ക്ക്  ജൂണ്‍ 16 വരെയുള്ള തിയതികളില്‍ അതാത് അക്ഷയ സെന്ററുകള്‍ വഴി മസ്റ്ററിങ്ങ് നടത്താം.  മസ്റ്ററിംഗ് നടത്തിയ  കര്‍ഷകര്‍ക്ക് മാത്രമേ സേവനാ പോര്‍ട്ടല്‍ വഴി പെന്‍ഷന്‍ ലഭിക്കുകയുള്ളൂവെന്ന് കല്‍പറ്റ കൃഷി അസിസ്റ്റന്റ് ഡയറക്ടര്‍ അറിയിച്ചു

  കോവിഡ് 19 വ്യാപന പശ്ചാത്തലത്തില്‍ ആര്‍.പി.ജി ഗ്രൂപ്പും ഹാരിസണ്‍സ് മലയാളം  ലിമിറ്റഡും സംയുക്തമായി മൂന്ന്  സ്വാബ് കളക്ഷന്‍ ബൂത്ത് യൂണിറ്റുകള്‍  ജില്ലാ ഭരണകൂടത്തിന് കൈമാറി. എ.ഡി.എം ചുമതല വഹിക്കുന്ന  ഇ.മുഹമ്മദ് യൂസഫ് , ജില്ലാ മെഡിക്കല്‍ ഓഫീസര്‍ ആര്‍.രേണുക എന്നിവര്‍ എച്ച്.എം.എല്‍ ജനറല്‍ മാനേജര്‍ ബെനില്‍ ജോണ്‍സനില്‍ നിന്നും കളക്ഷന്‍ ബൂത്തുകള്‍ ഏറ്റുവാങ്ങി. രോഗിയും പരിശോധകരും തമ്മിലുള്ള പരസ്പര സമ്പര്‍ക്കം ഒഴിവാക്കി രോഗവ്യാപനം തടയുന്ന വിധത്തിലാണ് ബൂത്തുകള്‍ നിര്‍മ്മിച്ചിരിക്കുന്നത്. ആരോഗ്യ പ്രവര്‍ത്തകര്‍ക്ക് ബൂത്തിനകത്തിരുന്നു കൊണ്ടു തന്നെ സ്രവം എടുക്കാം.

കോവിഡ് 19 രോഗ പ്രതിരോധത്തിന്റെ ഭാഗമായി ക്വാറന്റെയിനില്‍ കഴിയുന്ന വ്യക്തികള്‍ക്കും  ആരോഗ്യപ്രവര്‍ത്തകര്‍ക്കും പോലീസ് സേനാംഗങ്ങള്‍ക്കും  ആയൂര്‍വേദ വകുപ്പ് രോഗ പ്രതിരോധ മരുന്നുകള്‍ വിതരണം ചെയ്യും. ആരോഗ്യ സംബന്ധമായ പ്രശ്‌നങ്ങള്‍ കൈകാര്യം ചെയ്യുന്നതിനു  ടാസ്‌ക് ഫോഴ്‌സ് രൂപികരിച്ചിട്ടുണ്ട്. പ്രതിരോധ മരുന്നുകള്‍ ആവശ്യമുള്ളവര്‍ക്ക് ഒ.വി സുഷ (ജനറല്‍ കണ്‍വീനര്‍)- 9447426990, മേഖല കണ്‍വീനര്‍മാരായ ഡോ. പി.ടി.മഞ്ജു- 9447720937 (കല്‍പ്പറ്റ), എബി ഫിലിപ്പ് - 9961327164 (മാനന്തവാടി), സാജു കെ.രാജ് – 9809408674 (ബത്തേരി) എന്നിവരെ ബന്ധപ്പെടാവുന്നതാണ്.

     2018-2019 കാലവര്‍ഷത്തില്‍ കൃഷിനാശം സംഭവിച്ച കര്‍ഷകര്‍ക്ക് 3.3 കോടി രൂപയുടെ നഷ്ടപരിഹാരം വിതരണം ചെയ്യുന്നതിനുളള നടപടികള്‍ പൂര്‍ത്തിയായതായി കല്‍പ്പറ്റ കൃഷി അസിസ്റ്റന്റ് ഡയറക്ടര്‍ അറിയിച്ചു. കൃഷി നാശം സംഭവിച്ച 918 കര്‍ഷകര്‍ക്ക് ലഭിക്കാന്‍ ബാക്കിയുണ്ടായിരുന്ന സംസ്ഥാന സര്‍ക്കാരിന്റെ പ്രകൃതി ക്ഷോഭ ദുരിതാശ്വാസ പദ്ധതിപ്രകാരമുള്ള 1,59,12,567 രൂപയും സംസ്ഥാന സര്‍ക്കാരിന്റെ വിള ഇന്‍ഷൂറന്‍സ് പദ്ധതി പ്രകാരം  335 കര്‍ഷകര്‍ക്കായി 1,71,46,600 രൂപയുമാണ് വിതരണം ചെയ്യുന്നത്. കര്‍ഷരുടെ അക്കൗണ്ടുകളിലേക്ക് നേരിട്ടാണ് തുക നിക്ഷേപിക്കുക.

           കോവിഡ് പ്രതിരോധത്തിന്റെ  ഭാഗമായി ജില്ലയില്‍  ബുധനാഴ്ച 205 പേര്‍ കൂടി നിരീക്ഷണത്തില്‍. നിലവില്‍ ആകെ 3571 പേരാണ് ജില്ലയില്‍ നിരീക്ഷണത്തിലുളളത്.  237 പേര്‍ നിരീക്ഷണകാലം പൂര്‍ത്തിയാക്കി. രോഗം സ്ഥിരീകരിച്ച് 25 പേര്‍ മാനന്തവാടി ജില്ലാ ആശുപത്രിയിലും  ഒരാള്‍  കോഴിക്കോട് ബീച്ച് ആശുപത്രിയിലും ചികിത്സയിലുണ്ട്. ജില്ലയില്‍ നിന്നും ബുധനാഴ്ച പുതുതായി 43 സാമ്പിളുകള്‍ പരിശോധനക്ക് അയച്ചിട്ടുണ്ട്.  2344 സാമ്പിളുകളാണ്  ഇതുവരെ പരിശോധനയ്ക്ക് അയച്ചത്.  1937 ആളുകളുടെ ഫലം ലഭിച്ചു.  1900 എണ്ണം നെഗറ്റീവാണ്. 402 സാമ്പിളുകളുടെ ഫലം ലഭിക്കാനുണ്ട്.
 

    ജില്ലയില്‍ നാല് പേര്‍ക്ക് കൂടി കോവിഡ് സ്ഥിരീകരിച്ചു. തൊണ്ടര്‍നാട് സ്വദേശിയായ 47 കാരനും ബത്തേരി കല്ലുവയല്‍ സ്വദേശിയായ  46 കാരനും കേണിച്ചിറ സ്വദേശിയായ 27 കാരനും അരിഞ്ചര്‍മല സ്വദേശി 25 കാരനുമാണ് രോഗം സ്ഥിരീകരിച്ചത്. ആദ്യ മൂന്ന് പേര്‍ കുവൈത്തില്‍ നിന്ന് മെയ് 27 നും അരിഞ്ചര്‍മല സ്വദേശി മെയ് 26 ന് ദുബൈയില്‍ നിന്നും ജില്ലയിലെത്തി വിവിധ കോവിഡ് കെയര്‍ സെന്ററുകളില്‍ നിരീക്ഷണത്തില്‍ കഴിയുകയായിരുന്നു.  സാമ്പിള്‍ പരിശോധനയില്‍ പോസിറ്റീവായതിനെ തുടര്‍ന്ന് ഇവരെ മാനന്തവാടി ജില്ലാ ആശുപത്രിയില്‍ അഡ്മിറ്റ് ചെയ്തു .