കടമ്പഴിപ്പുറം ഗ്രാമ പഞ്ചായത്തിലെ പതിനഞ്ചാം വാർഡിലുൾപ്പെടുന്ന പാളമല പട്ടികവർഗ കോളനിയിലെ ഒൻപത് വീടുകളിലെ 10 പട്ടികവർഗ  വിദ്യാർത്ഥികൾക്കായി ശ്രീകൃഷ്ണപുരം ബ്ലോക്ക് പഞ്ചായത്ത് ഇടപെട്ടതിലൂടെ ടി.വി ലഭ്യമാക്കി. ബ്ലോക്ക് പഞ്ചായത്ത് നിർമ്മാണം പൂർത്തീകരിക്കുന്ന അയ്യങ്കാളി സ്മാരക സാംസ്ക്കാരിക നിലയത്തിൽ സജ്ജീകരിച്ച ടി.വിയുടെ സ്വിച്ച് ഓൺ കർമ്മം പി.ഉണ്ണി എം.എൽ.എ നിർവഹിച്ചു. കേരള എൻ.ജി.ഒ യൂണിയൻ ശ്രീകൃഷ്ണപുരം ഏരിയാ കമ്മറ്റിയാണ് ഒരു 32 ഇഞ്ച് കളർ എൽ.ഇ.ഡി ടി.വി സൗജന്യമായി നൽകിയത്.      

കോവിഡ് 19 രോഗ പ്രതിരോധത്തിന്റെ ഭാഗമായി 
ഒറ്റപ്പാലം മണ്ഡലത്തിലെ വിവിധ ആശുപത്രികളിലെ വികസനത്തിനായി  പി ഉണ്ണി എം എൽ എയുടെ ആസ്തി വികസന ഫണ്ടിൽ നിന്നും 98.57 ലക്ഷം രൂപ അനുവദിച്ചു.
കേരളം മെഡിക്കൽ സർവീസ് കോർപറേഷൻ മുഖാന്തിരം  വെന്റിലേറ്ററുകൾ , ടെസ്റ്റിംഗ് കിറ്റുകൾ , ചികിത്സ സാമഗ്രികൾ , ആശുപത്രി ഉപകരണങ്ങൾ എന്നിവ വാങ്ങുന്നതിനാണ്‌ തുക അനുവദിച്ചിട്ടുള്ളത്.

പാലക്കാട് ഡി.എം.ഒ കെ പി റീത്തയുടെ സാമ്പിൾ  പരിശോധനാഫലം നെഗറ്റീവ് ആയതായി ഡി.എം.ഒ അറിയിച്ചിട്ടുണ്ട്. ഫലം നെഗറ്റീവ് ആണെങ്കിലും നിരീക്ഷണ കാലാവധി പൂർത്തിയാകുന്നതുവരെ വീട്ടിലിരുന്ന്  ഔദ്യോഗിക കാര്യങ്ങൾ നിയന്ത്രിക്കുമെന്ന് അറിയിച്ചിട്ടുണ്ട്. കോവിഡ് 19 സ്ഥിരീകരിച്ച ചില ആരോഗ്യ പ്രവർത്തകരുമായി സമ്പർക്കമുണ്ടായതിനാലാണ്  ഡി.എം.ഒ ഹോം ക്വാറന്റൈനിൽ പ്രവേശിച്ചത്.14 ദിവസം കഴിഞ്ഞ് ജൂൺ 11 നാണ് നിരീക്ഷണ കാലാവധി  പൂർത്തിയാകുക. 12 മുതൽ നേരിട്ട് ജോലിയിൽ സജീവമാകുമെന്നും ഡി.എം.ഒ അറിയിച്ചിട്ടുണ്ട്.
 

 ഇതര സംസ്ഥാനങ്ങളിൽ  നിന്ന് വാളയാർ ചെക്പോസ്റ്റ് വഴി ഇന്നലെ   ( ജൂൺ ആറ് രാവിലെ 6 മുതൽ ജൂൺ ഏഴ് രാവിലെ 6 വരെ) 1578 പേർ  കേരളത്തിൽ എത്തിയതായി സ്പെഷ്യൽ ബ്രാഞ്ച് ഡി.വൈ.എസ്.പി ആർ. മനോജ് കുമാർ അറിയിച്ചു. 910 പുരുഷൻമാരും 445 സ്ത്രീകളും 223
കുട്ടികളുമുൾപ്പെടെയുള്ളവർ 664 വാഹനങ്ങളിലായാണ് കേരളത്തിലേക്ക് എത്തിയത്. 521 കാറുകൾ, 80 ഇരുചക്രവാഹനങ്ങൾ, 9 ട്രാവലറുകൾ, 49 മിനി ബസുകൾ, 4 ഓട്ടോറിക്ഷകൾ, ഒരു ആംബുലൻസ് എന്നിവയാണ് അതിർത്തി കടന്ന് കേരളത്തിലെത്തിയത്.

പരിസ്ഥിതി ദിനത്തോടനുബന്ധിച്ച് ജില്ലാ ലോട്ടറി ഓഫീസില്‍ സൗജന്യ വാഴക്കന്ന് വിതരണം നടന്നു. ജില്ലാ ഭാഗ്യക്കുറി ഓഫീസര്‍ അശോകന്‍ പാറക്കണ്ടി ജില്ലാ കൃഷി ഓഫീസ് ടെക്‌നിക്കല്‍ അസിസ്റ്റന്റ് പി കെ ബേബി റീനയ്ക്ക് വാഴക്കന്ന് നല്‍കി പരിപാടിയുടെ ഉദ്ഘാടനം നിര്‍വഹിച്ചു.

ജില്ലയിൽ നിന്നുള്ള 1438 അതിഥി തൊഴിലാളികൾ, വയനാട് ജില്ലയിൽ നിന്നുള്ള 198 പേർ ഉൾപ്പടെ 1636 തൊഴിലാളികൾ ഇന്ന് ( ജൂൺ ആറ്) വൈകീട്ട് 5.30 ന് പാലക്കാട് ജംഗ്ഷൻ റെയിൽവേ സ്റ്റേഷനിൽ നിന്നും വെസ്റ്റ് ബംഗാളിലേക്ക് മടങ്ങി. പാലക്കാട് താലൂക്കിൽ നിന്നും 307, മണ്ണാർക്കാട് താലൂക്ക് 252,  ഒറ്റപ്പാലം താലൂക്ക് 305, ആലത്തൂർ 375, ചിറ്റൂർ 199, തുടങ്ങിയ തൊഴിലാളികളാണ് ഇന്ന് നാട്ടിലേക്ക് തിരിച്ചത്. 

 ഇതര സംസ്ഥാനങ്ങളിൽ  നിന്ന് വാളയാർ ചെക്പോസ്റ്റ് വഴി ഇന്ന്   ( ജൂൺ ആറിന് വൈകിട്ട് 6  വരെ) 1344 പേർ  കേരളത്തിൽ എത്തിയതായി സ്പെഷ്യൽ ബ്രാഞ്ച് ഡി.വൈ.എസ്.പി ആർ. മനോജ് കുമാർ അറിയിച്ചു.750 പുരുഷൻമാരും 394 സ്ത്രീകളും 200
കുട്ടികളുമുൾപ്പെടെയുള്ളവർ 561 വാഹനങ്ങളിലായാണ് കേരളത്തിലേക്ക് എത്തിയത്. 448 കാറുകൾ, 72 ഇരുചക്രവാഹനങ്ങൾ, 8 ട്രാവലറുകൾ, 28 മിനി ബസുകൾ, 4 ഓട്ടോറിക്ഷകൾ , ഒരു ആംബുലൻസ്   എന്നിവയാണ് അതിർത്തി കടന്ന് കേരളത്തിലെത്തിയത്.
 

ലോക്ക് ഡൗണിനെ തുടർന്ന് ഇന്ന് (ജൂൺ 6)  വൈകിട്ട് 6.30 വരെ ജില്ലയിൽ പോലീസ് നടത്തിയ പരിശോധനയിൽ 4  കേസുകൾ രജിസ്റ്റർ ചെയ്തതായി സ്പെഷൽ ബ്രാഞ്ച് ഡി.വൈ.എസ്.പി  ആർ. മനോജ് കുമാർ അറിയിച്ചു. ഇത്രയും കേസുകളിലായി 6 പേരെ അറസ്റ്റ് ചെയ്തു. 4 വാഹനങ്ങൾ പിടിച്ചെടുത്തു.   
ലോക്ക് ഡൗൺ നിർദ്ദേശങ്ങൾ  പാലിക്കാത്തതിനെ തുടർന്നാണ് കേസ് രജിസ്റ്റർ ചെയ്തത്.

 മാസ്ക് ധരിക്കാത്ത 24 പേർക്കെതിരെ കേസ് 

മാസ്ക് ധരിക്കാതെ പൊതുസ്ഥലങ്ങളിൽ ഇറങ്ങിയ 24 പേർക്കെതിരെ പോലീസ് കേസെടുത്തു.  മാസ്ക് ധരിക്കേണ്ടതിന്റെ   ആവശ്യകത പറഞ്ഞതിനു ശേഷം കോടതിയിൽ പിഴ അടയ്ക്കാൻ നോട്ടീസ് നൽകി വിട്ടയച്ചു.

കോവിഡ് 19 മായി ബന്ധപ്പെട്ട് ജില്ലയില്‍ നിലവില്‍ 172 പേരാണ് ചികിത്സയിലുള്ളത്.  കൂടാതെ, ജില്ലയിലെ വിവിധ ആശുപത്രികളിലായി 16 പേർ നിരീക്ഷണത്തിലുണ്ട്. 

ഇന്ന് (ജൂൺ 6) ജില്ലയിൽ 11 പേർക്കാണ് (9 പുരുഷന്മാർ, 2 സ്ത്രീകൾ) കോവിഡ് 19 സ്ഥിരീകരിച്ചത്. 

പരിശോധനയ്ക്കായി ഇതുവരെ 10274 സാമ്പിളുകളാണ് അയച്ചത്. ആകെ 44 പേര്‍ രോഗം ഭേദമായി ആശുപത്രി വിട്ടു. 

സെന്റിനെന്റൽ സർവൈലൻസ് പ്രകാരം ഇതുവരെ 1357 സാമ്പിളുകളും ഓഗ്മെന്റഡ് സർവൈലൻസ് പ്രകാരം ഇതുവരെ 195 സാമ്പിളുകളാണ്  പരിശോധിച്ചത്.

24*7 കോള്‍ സെന്റര്‍ നമ്പര്‍ 0491 2505264, 2505189, 2505847