സംസ്ഥാനത്തെ തദ്ദേശ സ്വയംഭരണ സ്ഥാപനങ്ങളിലേയ്ക്കുള്ള പൊതു തിരഞ്ഞെടുപ്പിനുള്ള വോട്ടർപട്ടിക ജൂൺ 17 ന് പ്രസിദ്ധീകരിക്കുമെന്ന് സംസ്ഥാന തിരഞ്ഞെടുപ്പ് കമ്മീഷണർ വി. ഭാസ്‌കരൻ അറിയിച്ചു.  
കണ്ണൂരിലെ മട്ടന്നൂർ നഗരസഭ ഒഴികെയുള്ള തദ്ദേശ സ്വയംഭരണ സ്ഥാപനങ്ങളിലേക്ക് ഈ വർഷം പൊതു തിരഞ്ഞെടുപ്പ് നടത്തുന്നതുമായി ബന്ധപ്പെട്ടാണ് വോട്ടർപട്ടിക പ്രസിദ്ധീകരിക്കുന്നത്. 941 ഗ്രാമപഞ്ചായത്തുകൾ 152 ബ്ലോക്ക് പഞ്ചായത്തുകൾ, 14 ജില്ലാ പഞ്ചായത്തുകൾ, 86 മുനിസിപ്പാലിറ്റികൾ, ആറ് മുനിസിപ്പൽ കോർപ്പറേഷനുകൾ എന്നിവിടങ്ങളിലേക്കാണ് ഈ വർഷം പൊതു തിരഞ്ഞെടുപ്പ് നടത്തുന്നത്.  

എല്ലാ തയ്യാറെടുപ്പുകളോടും കൂടി ദുരന്തങ്ങള്‍ കരുതലോടെ നേരിടാന്‍ സജ്ജമായി ദുരന്ത നിവാരണ സേന.  മെയ് 28 മുതല്‍ ജൂണ്‍ 03 വരെ  ജില്ലയിലെ വിവിധ പഞ്ചായത്തുകളില്‍ എമര്‍ജന്‍സി റെസ്പോണ്‍സ് ടീം അംഗങ്ങള്‍ക്കുള്ള പരിശീലന പരിപാടി സംഘടിപ്പിച്ചു.  രണ്ട് പഞ്ചായത്തുകളില്‍ നിന്നായി 40 പേരെ വീതം പങ്കെടുപ്പിച്ച് 27 ലധികം പരിശീലനങ്ങളാണ് ജില്ലയില്‍ നടത്തിയത്.

അധ്യാപക വിദ്യാര്‍ഥികള്‍ക്കായുള്ള (ഡിഎല്‍എഡ്) ഓണ്‍ലൈന്‍ പരിശീലനത്തിന് ജില്ലയില്‍ തുടക്കമായി. കണ്ണൂര്‍ ഡയറ്റിന്റെ നേതൃത്വത്തില്‍ ആരംഭിച്ച പരിശീലനം ജില്ലാ പഞ്ചായത്ത് പ്രസിഡണ്ട് കെ വി സുമേഷ് ഉദ്ഘാടനം ചെയ്തു.
സംസ്ഥാന തലത്തില്‍ തന്നെ ആദ്യമായാണ് ഇത്തരമൊരു ഓണ്‍ലൈന്‍ പരിശീലനം ആരംഭിക്കുന്നത്. ദിവസവും ഏതെങ്കിലും ഒരു വിഷയത്തില്‍ ഒരു മണിക്കൂര്‍ ക്ലാസാണ് നടക്കുക. ഡയറ്റ് ഫാക്കല്‍റ്റി അംഗങ്ങള്‍, ഐടിഐകളിലെ ടീച്ചര്‍ എഡ്യൂക്കേറ്റര്‍മാര്‍ എന്നിവര്‍ ക്ലാസുകള്‍ക്ക് നേതൃത്വം നല്‍കും. വിദ്യാലയം തുറക്കുന്നതുവരെ ഈ രീതി തുടരും.

അഞ്ചാംക്ലാസുകാരന്‍ തങ്കപാണ്ടിക്കും സഹോദരി നാഗമ്മയ്ക്കും ഇനി സ്വന്തം വീട്ടില്‍ ഇരുന്ന് തന്നെ ഓണ്‍ലൈന്‍ പഠനമാകാം. വീട്ടില്‍ ടിവിയോ സ്മാര്‍ട്ട് ഫോണോ ഇല്ലാത്തതിനാല്‍ പഠനം മുടങ്ങുമെന്ന ഇവരുടെ ആശങ്ക അവസാനിച്ചു. ജില്ലയില്‍ ആരംഭിച്ച ഇ-ക്ലാസ് ചലഞ്ചിന്റെ ഭാഗമായി ഇവര്‍ക്ക് പുത്തന്‍ ടിവി ലഭിച്ചു.

 ലോക പരിസ്ഥിതി ദിനത്തിന്റെ ഭാഗമായി എലപ്പുള്ളി  ഗ്രാമപഞ്ചായത്തിലെ എൽ.ജി പാളയം താന്നിപള്ളം പ്രദേശത്തെ ആറ് ഏക്കറോളം ഭൂമിയിലെ മാതൃക പച്ചത്തുരുത്ത്  ജില്ലാ പഞ്ചായത്ത് പ്രസിഡന്റ് അഡ്വ. കെ. ശാന്തകുമാരി ഉദ്ഘാടനം ചെയ്തു. ഹരിതകേരളം മിഷന്റെ  ആഭിമുഖ്യത്തിൽ നടത്തുന്ന പച്ചത്തുരുത്ത് പദ്ധതി ജില്ലയിലെ മുഴുവൻ ഗ്രാമപഞ്ചായത്തുകളിലും നഗരസഭകളിലും രൂപീകരിക്കുമെന്ന് ജില്ലാ പഞ്ചായത്ത് പ്രസിഡന്റ് അഡ്വ. കെ. ശാന്തകുമാരി പറഞ്ഞു.

കോവിഡ് 19 ന്റെ  പശ്ചാത്തലത്തിൽ ജില്ലാ ആശുപത്രിയിലെ ഒ.പി വിഭാഗം പാലക്കാട് ഗവ. മെഡിക്കൽ കോളേജിലേക്ക് മാറ്റുന്നതിന്റെ ഭാഗമായി മന്ത്രി എ.കെ ബാലൻ,  ജില്ലാ കളക്ടർ ഡി. ബാലമുരളി എന്നിവർ മെഡിക്കൽ കോളേജ് സന്ദർശിച്ച് സൗകര്യങ്ങൾ വിലയിരുത്തി. ജില്ലാ ആശുപത്രി കോവിഡ് ആശുപത്രിയാക്കുന്നതിനാലാണ് ജില്ലാ ആശുപത്രിയിലെ ഒ.പി വിഭാഗം മെഡിക്കൽ കോളേജിലേക്ക് മാറ്റുന്നത്. 
മെഡിക്കൽ കോളേജിൽ ഒ.പി സൗകര്യത്തിനായി ഓരോ വിഭാഗത്തിനും പ്രത്യേകം വാർഡുകളാക്കി തിരിച്ചിട്ടുണ്ട്. 100 പേർക്കുള്ള കിടക്കകളാണ് ഇവിടെ സജ്ജീകരിച്ചിരിക്കുന്നത്. 

 അബുദാബി,  കുവൈറ്റ്,  ദുബായ്,  മസ്കറ്റ്, ദോഹ എന്നിവിടങ്ങളിൽ നിന്നും  നെടുമ്പാശ്ശേരി, കരിപ്പൂർ, കണ്ണൂർ  അന്താരാഷ്ട്ര വിമാനത്താവളങ്ങളിൽ  ഇന്നലെ (ജൂൺ 4) ജില്ലയിലെത്തിയത് 53 പാലക്കാട് സ്വദേശികൾ.  ഇവരിൽ 19 പേർ  ഇൻസ്റ്റിറ്റ്യൂഷനൽ ക്വാറന്റൈനിൽ പ്രവേശിച്ചു.  ബാക്കിയുള്ള 34 പേർ വീടുകളിൽ നിരീക്ഷണത്തിലാണ്. 

 ദുബായിൽ നിന്നും നെടുമ്പാശ്ശേരി അന്താരാഷ്ട്ര വിമാനത്താവളത്തിൽ 17 പാലക്കാട് സ്വദേശികളാണ് തിരിച്ചെത്തിയത്. ഇവരിൽ 8 പേർ  ഇൻസ്റ്റിറ്റ്യൂഷനൽ ക്വാറന്റൈനിൽ  പ്രവേശിച്ചു. 9 പേർ വീട്ടിൽ നിരീക്ഷണത്തിലാണ്.

 ഇതര സംസ്ഥാനങ്ങളിൽ  നിന്ന് വാളയാർ ചെക്പോസ്റ്റ് വഴി ഇന്നലെ   ( ജൂൺ നാലിന് രാവിലെ 6 മുതൽ ജൂൺ അഞ്ചിന് രാവിലെ 6 വരെ) 1814 പേർ  കേരളത്തിൽ എത്തിയതായി സ്പെഷ്യൽ ബ്രാഞ്ച് ഡി.വൈ.എസ്.പി ആർ. മനോജ് കുമാർ അറിയിച്ചു. 1091 പുരുഷൻമാരും 479 സ്ത്രീകളും 244
കുട്ടികളുമുൾപ്പെടെയുള്ളവർ 562 വാഹനങ്ങളിലായാണ് കേരളത്തിലേക്ക് എത്തിയത്. 403 കാറുകൾ, 62 ഇരുചക്രവാഹനങ്ങൾ,11 ട്രാവലറുകൾ,72 മിനി ബസുകൾ, ഒൻപത് ആംബുലൻസുകൾ, അഞ്ച് ഓട്ടോറിക്ഷകൾ എന്നിവയാണ് അതിർത്തി കടന്ന് കേരളത്തിലെത്തിയത്.